LUK 18
18
Amitsür Aser Obendanger Agi O-entepba
1Parnoki teti tezü metangi sarasademtsü tim ta o-entepba ka pai parnok dang ashi. 2Pai ashi, “Yimti ka nung Obendanger ka liasü, shibai Tsüngremji metsübu aser nisunga mezüngmeshi. 3Aser iba yimti nungji amitsür ka liasü shibai aiben pa dangi arua ashi. ‘Kü tsükchir anema obendangba lateta kü nem agüjang.’ 4Kenpiga pai nungtem saka tesülen pai pei sasa ashi, ‘Ni Tsüngremji metsübur aser nisung danga mezüngmeshiaka, 5oda iba amitsüri ni timtemdaktsü nung ni la o bendangdi, kechiaser lai maneni dang aruba agi ni lakteter.’ ” 6Aser Kibubai ashi, “Ochi mashiba obendangeri ashibaji angangma. 7Aser Tsüngremi shimtetbatem shirnoki anüngdang aser aonung maneni pa dang ayimtener; Tsüngremi parnok atema o mebendangtsütsü ama? 8Ni nenok dang shidi, pai parnok asoshi yakta metentsütsü. Aji sakasa kodang Nisung Chir arudir alima nung pai tamang ngudi ma?”
Farisi Aser Alimelen Sarur Agi O-entepba
9Aser nisung kar shirnoki pei sasa temeshi ta züngshia pei sasa dak tamang ayur aser tangar sensatsür parnok dang o-entepba pai ashi. 10“Nisung ana sarasademtsü tenla kidangi atu. Ka Farisi aser tangar kaji alimelen sarur. 11Farisi nungbaji noktaka pai yamai sarasadem, ‘Oh Tsüngrem, tangar nisungtem oda rongsen rakzükraktemertem, ochi mashirtem, nüktapangtartem mesüra ibala alimelen sarur ka ama ni masü, anungji ni ne tenüng asanger. 12Ni hapta nung anaben tashi lumir, ni anguba ajak nungi tershilem shitak agütsür.’ 13Saka alimelen sarubaji tera pila oa noktaka pai pei tenük kotaklen rangketa mereprangi, pei sasa teku nung tsünga ashi, ‘Oh Tsüngrem, ni temenen nisung ka, kü dang aochiang!’ 14#Mat. 23.12; Luk. 14.11. Ni nenok dang shidi, tangarba dang nungibo iba nisung jagi Tsüngrem tsüngdang temeten ngur pei kidangi ao, kechiaser shibaisa pei sasa uludir, pa tila akümtsü, saka shibaisa pei sasa ajemaludir pa ulutsütsü.”
Tila-Tanurtem Moatsüba
(Mat. 19.13-15; Mar. 10.13-16)
15Aser pa nem kongshidaktsütsü asoshi parnoki pa dangi tila-tanurtem anir aru; saka kodang nütsüngtemi aji angu, parnoki parnokji arütsü. 16Saka Yisui parnok pa dangi aja aser ashi, “Tila-tanurtem kü dangi arudakjang. Parnok tesongtem, kechiaser Tsüngrem Yimliji ibala pur meyong. 17Atangji ni nenok dang shidi, shibaisa tila-tanur ka ama Tsüngrem Yimliji magizüker, pai kodakaanga aji agi maitsü.”
Takar Yimsüsür Ka
(Mat. 19.16-30; Mar. 10.17-31)
18Aser yimsüsür kati pa dang asüngdang, “Tesayur tajung, teti taküm senmang amangtsü asoshi ni kechi inyaktsüla?” 19Aser Yisui pa dang ashi, “Nai kechiba kü dang tajung ta ajar? Tsüngrem dak alema shinga tajung mali. 20Nai ozüngtem meteter, ‘Nüktapangta tebenshi, tetepset, tauya, tiyazü kuli teyi, nebu aser netsü akhüm tsübuang.’ ” 21Idangji nisungba jagi langzü, “Item ajak ni lanuwa nungi benshia arudagi.” 22Aser kodang Yisui ya angashi, pai pa dang ashi, “Na ano langka agi madoksa. Na akaba ajak yokang aser aji sensaker nem lema agüjang, aser kotak nung na rongsen akatsü, aser arung kü sülen anitakang.” 23Saka kodang pai item o angashi, pa jashia aküm kechiaser pa kanga takar liasü. 24Yisui pa dak repranga ashi, “Takari Tsüngrem Yimli-i aitsü koda tasak! 25Kechiaser takari Tsüngrem Yimli-i aitsü dang nungibo ajem ki ateta ut süia aotsü temelaba.” 26Aser ya angashirtemi ashi, “Ajangla shiba-ang kümzüktsü?” 27Saka pai ashi, “Kechi meimchir asoshi tamakoktsü, aji Tsüngrem asoshibo takoktsü.” 28Aser Peteri ashi, “Onoki onok kibongtem toktsüogo aser ne sülen anitak.” 29Aser pai parnok dang ashi, “Atangji ni nenok dang shidi, shibaisa kibong süshia, kibutsü süshia, techirtem süshia Tsüngrem Yimli atema toktsüogo, 30pai iba mapang nung kanga tali angutsü aser tarutsü mapang nung teti taküm angutsü.”
Yisui Pa Asütsü Aser Shia Arutsü Indang Tasemben Shinba
(Mat. 20.17-19; Mar. 10.32-34)
31Aser teranaji pa den anir oa parnok dang ashi, “Atangji asenoki tang Yirusalemi atur, aser Nisung Chir indang ainkartemi kechisa zülua toktsü item shiaji abensa-a ataloka arutsü. 32Kechiaser paji Bendangertem ket nung bendanga agütsütsü, aser sensatsütsü aser mak süa benshitsü aser metzü metsüloktsütsü. 33Aser parnoki pa dak azüktsü aser pa tepsettsü, saka asemnübuba nung pa shia arutsü.” 34Saka nütsüngtemi item o tetezü kecha mangatet. Aser iba ashibaji parnok nungi miimbanga liasü aser aji parnoki mangatet.
Nükpoker Meshimetsür Ka Yeriko Anasa Anebtsüba
(Mat. 20.29-34; Mar. 10.46-52)
35Pai Yeriko anasai arudang nükpoker ka lenmang tezülen mener meshimetsüa liasü. 36Aser telokti ka süia aoba angashia ya kechi sür ta pai asüngdang. 37Nazaret nunger Yisu süidagi ta parnoki ashi.
38Aser pai ayimtena ashi, “Dawid Chir Yisu, kü dang aochiangma!” 39Aser Shirnok tejaklen liasü parnoki paji arütsü aser ajemajema liang ta pa dang ashi, saka pai ano taliang ayimtena ashi, “Dawid Chir, kü dang aochiangma!” 40Anungji Yisui noktak aser pa dangi nükpok sangji anir arung ta ashi. Aser kodang pai anasai aru, Yisui pa dang asüngdang, 41“Na asoshi ni kechi inyakdaktsünür?” Idangji pai langzü, “Kibuba, ni ngunür.” 42Aser Yisui pa dang ashi, “Nai nguang! Ne tamang agi na junga anebtsüogo.” 43Aser idangyongjisa pai angu, aser Tsüngrem tenüng sanga pa sülen anitak. Aser nisung ajaki pa ngua Tsüngrem tenüng asang.
S'ha seleccionat:
LUK 18: ANSEBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The Bible Society of India
© 2023, Used by permission. All rights reserved. More