MARK 16
16
Yisu Shia Aruba Indang
(Mat. 28.1-8; Luk. 24.1-12; Yoh. 20.1-10)
1Amungnüji süir külen, Mari Magdalin, Yakob tetsü Mari, aser Salome parnoki pa dak teronem menemba totzü mezütsütsü asoshi itemji ali. 2Deobar anepdang yakta, anü adokli, parnoki leper jagi aru. 3Parnoki jembitepa ashi, “Shibai asenok asoshi lungpakji leprungki kikümbang nungi lungdoktsütsü?” 4Aser reprangketa yok nung, lungpakji lungdoker parnoki angu; kechiaser lungpakji kanga tulu liasü. 5Aser leper jagi aidang asangur ka sü temesüng ka abener ajichilen parnoki mena angu; aser parnoki süngmang. 6Pai parnok dang ashi, “Tesüngmang, kangki nung angenlokba Nazaret nunger Yisu nenoki bushir. Pa shia aruogo, pa yangi mali, parnoki pa ayudakji ajiang. 7Saka oang, pa nütsüngtem aser Peter dang shiang; aser pa nenok dang tama Galili odagi; aser pai nenok dang shia aliba ama idakji nenoki pa angutsü.” 8Aser parnoki ilunga tugua leper nungi ajen; kechiaser tatententsü aser taoksatsü parnok dak atong; aser parnoki shinga danga kecha mashi, kechiaser parnoki tsübu.
MARKI ZÜLUBA MELEPZÜNG O TALANGBA
Mari Magdalin dangi Yisu Adokba
(Mat. 28.9-10; Yoh. 20.11-18)
9Tang Yisu kodang mezüng deobar anepdang yakta shia aru, pai tamasa Mari Magdalin, shiba dak nungi temenen tanela tenet aridoktsü, la dangi adoka sayu. 10Lai or pa den alirtem dang, parnok mangyima jeba alidang ashi. 11Saka kodang pa taküm lir aser lai pa nguogo ta angazük, parnoki aji mamangtet.
Pa Nütsüng Ana Dangi Adokba
(Luk. 24.13-35)
12Iba sülen ano parnok rongnung nütsüng ana yimtakleni oya alidang, tereprangtsü balaka agi pai parnok dangi adoka sayu. 13Aser parnoki or aji tangar tanüngba danga ashi, saka parnoki tena danga mamang.
Nütsüngtem Tenyaba Indang
(Mat. 28.16-20; Luk. 24.36-49; Yoh. 20.19-23; TMa. 1.6-8)
14Ajisür külen terkaji chiyungdak mena alidang, pai parnok dang adoka sayu, parnoki mamangba aser temulung merangba asoshi pai parnok arütsü, kechiaser pa shia arur külen angurtem danga parnoki mamang. 15#TMa. 1.8. Aser pai parnok dang ashi, “Nenoki alima ajakleni oang, aser teyanglubatem#16.15: Tetezü, Tsüngremi poktetdaktsüba kechisarena ajak. ajak dang osangtajung sayutsüngiang. 16Shibai amanga baptidir, pa kümzüktsü; saka shibai mamanglir, pa aitsütsü. 17Aser shirnoki amangdir, parnok asoshi temaitsü itemi alitsü: kü tenüng nung parnoki temenen tanelatem aridoktsü; aser oshi tasen agi jembitsü; 18Parnoki pertem bena arutsü, aser parnoki tasütsü langka jemaka, iba jagi parnok teraka mekangshitsü; parnoki shirangertem dak teka agi nemettsü, aser parnok anebtsü.”
Yisu Kotaki Atuba
(Luk. 24.50-53; TMa. 1.9-11)
19Yamaji parnok den jembir külen, Kibuba Yisu kotaki anir atu, aser Tsüngrem tajichilen amen. 20Aser Kibubai parnok den külemi inyakba, aser ochi temaitsütem agi kuli agüja, parnoki ajaklen oa sayutsüngi.
(Laishiba kar nungbo iba kaket sülen iba oren tatsüba agi yamai temdakja angutsü)
Saka parnok dang ashiba ama parnoki Peter aser pa den alirtem dang o tatsü agi metetdaktsü. Aser iba sülen, parnok ajanga anüdoklen nungi anüolen tashi, temeshi aser mesamatsüba teti tatem maka tekümtet proktsü Yisui parnok yok.
S'ha seleccionat:
MARK 16: ANSEBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The Bible Society of India
© 2023, Used by permission. All rights reserved. More