मात्ति 9
9
ठिबाङ् याप्मि नुयाना
(मारकुस २:१-१२; लुका ५:१७-२६)
1हिट्नुङ्ना येसु नाउङि ठाङाउङ् तालङाना नाहाँपारा आबे, हिट्नुङ् उन् आप्पे उयुक्ताम्ङि खाडे॥#९:१ उन्ङाना युक्ताम्बाक् काफारनाहुम ए॥ 2हिट्नुङ् याप्मिचिङा याङ्छाडाना लोङ्लेन् याप्मि ओडोलेन्चालोक् उखुयुङ् उन् सोरि ओआप्टुए॥ हिट्नागा याप्मिचिगा बिस्वास निसुङ् येसुङा हिट्ना टुगाना याप्मि लोडुए, “हाउ साइबा, आँटि लिसा॥ कापापचि छेमा उलिसे॥”
3येसुङा हिड्डे माट्टुना रिङ् ओखेम्सुङ् आम्टेप्मा धारमाबिधि काहिसिक्बाचि उन्चि उन्चि उपिगे, “ना याप्मिङाम्टे माङ्हाङ् गोलो लोडुजोएट्टु॥”
4हिट्नागा याप्मिचिगा निङ्ग्वाइना रिङ् ठाहा टोगुङ् येसुङा लोडुचे, “पोङ् खानि निङ्ग्वाङि नाड्डेना ओचाफेन्ना रिङ् आमिट्टुम्टुम्ना? 5हाट्ले लु माट्टानुम् टे, ना याप्मि ‘कापाप छेमा लिसे’ लोमा आथाबा ‘कोबाउङ् लाम्टिया’ लोमा खोनाम्बाक् साजिलो लियुक्ना? 6टरो ना नाराङि याप्मि छा लोङ्सा याप्मिचिगा पाप छेमा चोग्माना आधिकार युङ्ग्वा नुङ् पारमान् खानि पिनाँनि॥” हिट्नुङ् येसुङा हिट्ना लोङ्लेन् याप्मि लोडुए, “कोबा, हिट्नुङ् काडोलेन्चा खुयुङ् कापाङ्ङि खाडा॥” 7हिट्नुङ् हिट्ना याप्मि मुठिलिक् वाठिलिक् कोबाउङ् ओपाङ्लेङ् खाडे॥ 8ना डोङ् ठोङ्डिना टोॽवा याप्मिचिगा खिमेयाङ्मेङा उनिसुङ् हिट्नागा उकिट्टे, हिट्नुङ् याप्मिचिलोङ्सा नाड्डेना आधिकार कापिबा माङ्हाङ्ङाना उनिङ् ओचोन्डुए॥
मात्ति ओलोडुना याप्मि येसुङा छेम्डुना
(मारकुस २:१३-१७; लुका ५:२७-३२)
9येसु हिट्नालाम्मा खाडागेट्टाना बेला ठिबाङ् मात्ति#९:९ उन् लेबि चा ओलोडुए॥#मारकुस २:१४; लुका ५:२७ ओलोडुना तिरो हुङ्माना आड्डाङि युङासाना निसुए, हिट्नुङ् हिट्ना लोडुए, “आङा रोक् याङ्रिक्टा हिट्नुङ् आचेला लिसा,” हिट्नुङ् हिट्ना कोबे हिट्नुङ् ओएङ्-ओएङ् खाडे॥
10येसु मात्ति ओपाङ्ङि चामा चासिङा युङाना बेला, जोम् तिरो काफोक्बाचि हिट्नुङ् कायाङ्छाबाचि ओआबाउङ् उन् हिट्नुङ् ओचेलाचिलोक् चामा चासिङा उयुङे॥#लुका १५:१-२ 11हिड्नाड्डेना उनिसुङ् फारिसि याप्मिचिङा ओचेलाचि उसिलाप्टुचे, “पोङ् खानि काहिसिक्बाङा तिरो काफोक्बाचि हिट्नुङ् कायाङ्छाबा याप्मिचिलोक् एक्केउ युङ्युङ् चोटुगा?”#९:११ याहुदि ओठेडोङ्चिङा येसुलोक् उयुङाउङ् चामा ओचोगा पापिचि आसुद्दो याप्मिचि नुङ् उमिट्टुचिगा डागा॥ हिट्नुङ् हिट्नागालोक् एक्केउ ओचोटु हिट्नागा चा आसुद्दो याप्मिचि नुङ् उमाट्टुगा डागा॥
12हिट्नागा ओचेक्टागा रिङ् खेम्सुङ् येसुङा नाड्डे लोडुचे, “सिडापाङ्डा काचोक्बा टे नुमानिङ् याप्मिचि लोङ्सा माखाक्, टरो उटुग्गा याप्मिचि लोङ्सा गोलो चाहाब् लियुक्॥ 13टरो खाडानिउङ् धारमाछाप्लाङि छेप्टाना ना रिङ्ङाना उटुप् पाइना नुङ् सिकाँ लिसानि, ‘आङा जिवाट्ङाना भोक् माखाक्, आरु लुक्मा टुक्टानुम्चिम् नुङ् आनिङ्ग्वा युङ्ग्वा॥’#मात्ति १२:७; होसे ६:६ पोङ्भोने आङा निङ्ग्वा नुगा याप्मिचि लोङ्सा माखाक्, टरो पापि याप्मिचि गोलो छेम्सिङा टायाङ्ना॥”
उपासा बारे
(मारकुस २:१८-२२; लुका ५:३३-३९)
14हिट्नुङ् बाप्टिस्मा कापिबा युहान्नाङाना ओचेलाचि येसुङि ओआबाउङ् उसिलाप्टुए, “पोङ् काचेलाचि आन्याँ हिट्नुङ् फारिसि याप्मिचि गाड्डे कोइ-कोइ बेला उपासा उयुङ्निगा?”
15येसुङा हिट्नागा लोडुचे, “पाक् भ्याङाना भातेरङि बेउला खानिलोक् वाना बेला जान्तिचि सानिङ्ग्वा लोसा उपासा उयुङ्युग्गि टे? टरो हिड्डेना बेला चा टायुक्, हिट्ना बेला बेउला हिट्नागालाम्मा ओलाबुङ् ओखाट्टुटु, हिट्नुङ् हिट्नागा उपासा उयुङ्युक्॥
16“साङा चा यामाना लोट्लिङ्ङि ओछोङ्ग्वाट् लोट्लिङ्ङाना झुम्रोङा ओलेम्डुन्ना, पोङ्भोने ओछोङ्ग्वाट् लोट्लिङ् छुट्युङ् यामाना लोट्लिङ् झेन् ठेलोक् पोलेहोङ् लिलोक् सेङ्सुडिसुटु॥
17“हिट्नुङ् खोनाङा चा आङ्गुरङाना ओफोगे इङा यामाना ओहोॽवाङाना जाप्रामाङि उयुङ्सुन्गा॥ हिट्नाडे ओचोगुए भोने जाप्रामा चा हेट्युक् हिट्नुङ् इङा चा वेयुक्, हिट्नुङ् जाप्रामा जाखाम् लियुक्॥ टरो आङ्गुरङाना ओफोगे इङा ओछोङ्ग्वाट् ओहोॽवाङाना जाप्रामाङि डोक् युङ्मा कोन्युक्, हिट्नुङ् इप्पोक् डोक् पाक्चा लिनिना॥”
याहुदि सासाक्ङाना मेन्झेमा छा लोक् ठिबाङ् मेन्झेमा
(मारकुस ५:२१-४३; लुका ८:४०-५६)
18येसुङा हिट्नागा ना रिङ् लोडुएट्टुचिना बेला ठिबाङ् याहुदि ओठेडोङ् हिट्नि होन्डा आबे, हिट्नुङ् येसु स्या मेट्टुङ् नाड्डे पिक्सा बिन्टि ठाङ्सुए, “आडाङ्बा, आइछा मेच्छेमा लोप्मो सिए, टरो खान् आबाउङ् कामुक् हिट्ना उठुङ्ङि याङ्युङ्साबिडा, हिट्नुङ् हिट्ना हिङ्युक्॥” 19येसु कोबे हिट्नुङ् ओचेलाचिलोक् हिट्ना याप्मि ओएङ् ओखाडे॥
20हिट्ना बेला डोक् ठिबाङ् बारो बारखा सोम्मा हेलिक् होन्ना बेथा लाहाब् लिसाना ठिबाङ् मेन्झेमा येसु ओएङ्स्वालाम्मा आबाउङ् उन्ङाना ओलोट्लिङ् ओफेरो खोट्टुए॥ 21पोङ्भोने आङा “ओलोट्लिङ् एरोक् खोट्टुङे भोने चा आङा नुङा” नुङ् हिट्ना मेन्झेमाङा उनिङ्ग्वाङि मिट्टुएसुना॥ 22हिट्नुङ् येसु ओएङ्स्वालेङ् रिसाउङ् पुयुनाँ हिट्ना मेन्झेमा निसुए, हिट्नुङ् लोडुए, “आनो, आँटि लिसा, काबिस्वासङा खान् आनुयाइसे॥” हिट्ना बेला डोक् हिट्ना मेन्झेमा नुयाडे॥
23हिट्नुङ् जब येसु याहुदि सासाक्ङाना ओपाङ्ङि टासुए, उन्ङा हिट्नि दुखाँना मुरालि काटेन्बाचि हिट्नुङ् याप्मिचि सानिङ्ग्वा लोसा ओहाबेट्टागा निसुचे॥ 24येसुङा हिट्नागा लोडुचे, “खानि भारा होन्डानेयाक्, पोङ्भोने ना मेच्छा सिनिगेट्निना, टरो इम्सेसे॥” ना रिङ् ओखेम्सुङ् हिट्नागाङा उन् ओरेट्टुजोए॥ 25टरो येसुङा हिट्नागा सोब्बे भारा होट्टुचे हिट्नुङ् भिट्रा लिगे, हिट्नुङ् हिट्ना मेच्छाङाना उमुक्ङि लाबुए, हिट्नुङ् हिट्ना मेच्छा मुठिलिक् वाठिलिक् कोबे॥ 26हिट्डेउङ् ना लिसाना घाट्ना हिट्ना मुलुक् टेप् सोब्बेलेङ् छिन्डे॥
येसुङा याङ्कानिनिबाचि लोक् ओकेलुबा नुमानिङ् चोगुचिगा
27येसु हिट्नालाम्मा खाडागेट्टाना बेला लाम्भोङि इप्पाङ् याङ्निचिन्गाँ “हाउ दाउद पुङ्लाङिना येसु, आन्च्याँ लुक्मा याप्मिटुक्टा” पिक्सा राट्सा ओएङ्-ओएङ् खाडाचे॥ 28उन् पाङ्ङि टासुनाँ हिट्नागाचि इप्पाङ् याङ्कानिनिबाचि चा हिट्नि होन्डा टायाचे॥ हिट्नुङ् येसुङा हिट्नागाचि सिलाप्टुचे, “पाक् आङा खान्चि नुमानिङ् चोक्मा हिडुङ्टुङ्नि नुङ् खान्चिङा बिस्वास आचोक्चुचुनि?”
हिट्नागाचिङा उन् लोडाचुए, “आए, डाङ्बा॥” 29हिट्नुङ् येसुङा हिट्नागाचिगा उन्चि मिक् खोट्टुङ् लोडुचे, “लु हिड्डे भोने खान्चिङा आचोगाचुगा बिस्वास गाड्डे डोक् खान्चि लोङ्सा उलियाक्॥” 30हिट्नुङ् हिट्नागाचिङा याङ्निसाचुए॥ येसुङा हिट्नागाचि “ना रिङ् साक्चा लोनेन्चुन्चिन्” पिक्सा आग्याँ पिडुचे॥ 31टरो हिट्नागाचि हिट्निलाम्मा खाडा चे, हिट्नुङ् हिट्ना छेट्रा टेप् उन्ङाना बारेङि माट्टाचुए॥
32उन्चि हिट्निलाम्मा ओहोन्डागेट्टाना बेला याप्मिचिङा ओचाफेन्ना रिमेट् लाहाब् लिसाना ठिबाङ् ओकेलुबा याप्मि उन् सोरि ओटाडुए॥ 33येसुङा ओचाफेन्ना रिमेट् होट्टुचिनामे हिट्ना ओकेलुबा याप्मि चेक्ना लिसे॥ हिट्नुङ् याप्मिचि डोङ् ओठोङ्डाउङ् उपिगे, “नाड्डेनाम् टे आनि इस्राएलङि खोना बेला चा निनिम्गेट्निम्॥” 34टरो फारिसि याप्मिचिङा नाड्डे ओमाट्टुए, “नाङाउम्टे टोन्डेबाचिगा हाङ्बाङाना बोल्ङा टोन्डेबाचि होट्टुचिगा॥”#मात्ति १०:२५; १२:२४; मारकुस ३:२२; लुका ११:१५
खाट्टिप्मा चालिङ् काहेग्बाचि
(मारकुस ६:३४; लुका १०:२)
35येसु सोब्बे खालाङ्गाङि हिट्नुङ् युक्टाम्ङिगा याहुदि छुम्मापाङ्ङि सिकाँ चोक्सा टोनालोग्ङिना मुलुक् बारेङि नुना खाबोर पारचार चोगुए, हिट्नुङ् पारिक् पारिक्ङागा रोगा हिट्नुङ् उटुगागा नुमानिङ् चोक्सा वासे॥#मात्ति ४:२३; मारकुस १:३९; लुका ४:४४ 36याप्मिचिगा खिमेयाङ्मे निसुङ् उनिङ्ग्वा टुगे॥ पोङ्भोने हिट्नागा गोठाले मालेगा ठुँबाचि गाड्डे याङ्ओछाडागा हिट्नुङ् पाक्चा चोक्मा उहिनिगा गाड्डे उलिसाइसागा॥#गान्ति २७:१७; १ हाङ् २२:१७; २ इतिहास १८:१६; इजिकिएल ३४:५; मारकुस ६:३४ 37हिट्नुङ् येसुङा ओचेलाचि लोडुचे, “चासोङ् जोम् सोङ्ग्मैडे टरो चासोङ् काहेग्बाचिम्बाक् खाट्टिप्मा एडोक् ओवाहेट्॥ 38नाड्डेउङ् चासोङ्ङाना डाङ्बाङि उन्ङाना चासोङ् छुम्मा टोॽवालासि काचोक्बा याप्मिचि याप्मि पाङ्साबिडा नुङ् बिन्टि ठाङ्सानुम्॥”#लुका १०:२
S'ha seleccionat:
मात्ति 9: APH
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. and Nepal Bible Society