खास चेलामन केर काम 1
1
परिचय
1हे दुलारा थियुफिलुस, मोंय अपन पहिला किताब में उ सोउब गोइठमन केर बारे में लीख हों, जेके यीशु शुरु से लेई के स्वरग में उठाल जाएक तक करते आउर सिखाते रहे। 2जे दिन उ परमेश्वर बटले स्वरग में उठाय लेवल गेलक, उकर से पहिले उ अपन खास चेलामन के, जेके उ खुद चुइन रहे, पवितर आत्मा केर मदइत से आगया देलक। 3उ दुःख उठाएक आउर मोरेक केर पाछे ढेइर पक्का सबूतमन से खुद के उ मनक माझे जिंदा देखालक। आउर चालीस दिन तक उ चेलामन के देखाई देते रहलक, आउर परमेश्वर केर राइज केर बारे में बताते रहलक।
पवितर आत्मा केर करार करेक
4एक बेर यीशु अपन खास चेलामन केर संगे रहे तब उमन के आगया देलक। “यरुशलेम शहर के ना छोड़बा, मगर उ दान केर आसरा देखते रहबा, जेके मोर आबा तोहरेमन के देवेक केर करार काइर हे, जेकर बारे में तोहरे मोर से सुइन चुइक हा। 5काले कि यूहन्ना तो पानी में बपतिस्मा जल संस्कार देई हे मगर थोरेक दिनमन केर पाछे परमेश्वर तोहरे के पवितर आत्मा से बपतिस्मा संस्कार देवी।” 6जब यीशु केर खास चेलामन दोबारा उकर से मिललैं तो उमन उकर से पूछलैं, “हे प्रभु, का तोंय अब रोमी शासन के हराय के इसराइल देस केर शासन के फिन से खड़ा करेक आउर सोउब केर उपरे राजा नियर राइज करेक केर योजना बनाथिस?” 7यीशु उमन के जबाब देलक, “उ समयमन या घटनामन कहिया होवी, इके ठहराएक केर अधिकार सिरिफ मोर आबा ठिना अहे, इके जानेक केर जरुरत तोहरेमन के नखे। 8मगर जब पवितर आत्मा तोहर उपरे आवी तब तोहरेमन शक्ति पाबा, आउर यरुशलेम शहर आउर गोटा यहूदिया आउर सामरिया परदेस में, आउर धरती केर आखरी छोर तक सोउब आदमीमन के मोर बारे में गवाही देबा।”
यीशु केर स्वरग में उठाय लेवल जाएक
9इ सोउब कहेक केर पाछे परमेश्वर यीशु के उ मनक देखते-देखते स्वरग में उठाय लेलक आउर बदरी केर चलते उमन उके आउर देखेक नी पारलैं। 10उकर जाएक बेरा जब उमन आकाश बटे देखत रहैं, तब अचका दूई झन आदमीमन चरका लुगा पिंधल उमन ठिना आय के ठड़ाय गेलैं। 11आउर उमन से कहलैं, “हे गलील परदेस केर आदमीमन, तोहरे काले ठड़ाय के आकाश बटे देखाथा? एहे यीशु, जेके परमेश्वर तोहर ठिना से स्वरग में उठाय लेलक, ठीक एहे लेखे दोबारा आवी, जे लेखे तोहरे उके स्वरग में जाते देखला।”
एक संगे मिल के प्रार्थना
12जब स्वरग दूतमन चाइल गेलैं तब खास चेलामन जैतून नाँव केर पहार से यरुशलेम शहर घूइर आलैं, जे लगभग एक किलोमीटर दूर रहे। 13शहर में पोंहइच के उमन घर केर उपरे कोठरी में गेलैं, जहाँ उमन रूइक रहैं। हूवाँ पतरस, यूहन्ना, याकूब, अन्द्रियास, फिलिप्पुस, थोमा बरतुल्मै, मत्ती आउर हलफई केर बेटा याकूब, सिमोन जेलोतेस आउर याकूब केर बेटा यहूदा रहे। 14इमन अक्सर इ ठाँव में जमा होवत रहैं। हिंयाँ थोरेक जनानामन आउर यीशु केर आयो मरियम आउर उकर भाईमन केर संगे एक मन होई के प्रार्थना करत रहैं।
एगो नवाँ खास चेला केर चुनाव
15ओहे दिनमन में जब लगभग एक सौ बीस बिसवासी भाई-बहिनमन जमा होई रहैं, तब पतरस उमन केर माझे ठड़ाय के कहेक लगलक, 16“हे भाईमन, पवितर आत्मा ढेइर समय पहिले राजा दाऊद केर मुँह से यहूदा केर बारे में बताय रहे, जे कि यीशु के धारेक वाला आदमीमन केर अगुवा बाइन गेलक। इ होवेक जरुरी रहे ताकि यहूदा केर बारे में पवितर किताब में लिखल गोइठ पूरा होवोक। 17काले कि उ तो हमर में से एगो रहे, आउर सेवकाई केर काम में शामिल रहे। 18जइसन कि तोहरे जानाला, उके यीशु के धरुवाएक लगिन यहूदी अगुवामन पइसा देई रहैं। जब उके समझ आलक कि मोंय गलती काइर हों तो उ पइसा के यहूदी अगुवामन के घुराय देलक, आउर खुद फाँसी लगाय होलक आउर उकर काया भूंई में गिरलक आउर पेट फाइट गेलक आउर सोउब पोटामन निकइल गेलक। से लगिन यहूदी अगुवामन इ पइसा से एगो खेत कीन लेलैं। 19इ गोइठ के यरुशलेम शहर केर रहेक वाला सोउब आदमीमन जाइन गेलैं। से लगिन उमन उ खेत केर नाँव अपन भाषा में ‘हकलदमा’ मतलब ‘लोहू केर खेत’ रखलैं। 20राजा दाऊद भजन संहिता केर किताब में लीख हे, ‘उकर घर उजइर जाओक आउर उकर में केऊ ना बसोक,’ आउर राजा दाऊद दोसर ठिना एहो कइह हे, ‘उकर पद केऊ दूसरा लेई लेवोक।’ 21से लगिन इ जरुरी अहे कि एगो एइसन आदमी के चुनल जाओक जे यीशु मसीह केर सोउब समय केर काम केर गवाह हेके।
22मतलब यीशु मसीह के यूहन्ना से बपतिस्मा जल संस्कार लेवेक से लेई के, उके स्वरग में उठाय लेवल जाएक तक इ आदमी हमरे केर संगे प्रभु यीशु केर जी उठेक केर गवाह बनोक।” 23तब उमन दूई झन आदमीमन के ठड़ुवालैं, एगो यूसुफ के जे बर-सबा कहायला। जेकर दोसर नाँव यूस्तुस हेके, दूसरा मत्तियाह के।
24तब उमन इ कइह के प्रार्थना करलैं, “हे प्रभु, तोंय जे सोउब केर मन के जानिसला, इ दिस्तार कर कि इ दुयो में से तोंय केके चुइन हिस, 25कि उ इ सेवा केर काम आउर चुनल खास चेलामन केर खाली ठाँव के लेई लेवोक। जेके यहूदा छोइड़ के मोइर गेलक आउर अपन ठहराल ठाँव में चाइल गेलक।” 26तब उमन उ दुयो केर नाँव से चिट्ठी साजलैं, आउर चिट्ठी मत्तियाह केर नाँव से निकललक। इ लेखे उ गारह खास चेलामन केर संगे गिनल गेलक।
S'ha seleccionat:
खास चेलामन केर काम 1: SCK
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Sadri Bible by The Love Fellowship is licensed under Creative Commons Attribution-ShareAlike 4.0 License.