लूका 13
13
पाप करेक छोड़ा
1ओहे बेरा हूवाँ बइठल थोरेक आदमीमन यीशु के बताएक लगलैं कि रोमी राजपाल पिलातुस, गलील परदेस केर थोरेक आदमीमन केर लोहू बहाय के मोराय देई रहे, जब उमन मंदिर में बलिदान चढ़ात रहैं। 2यीशु उमन से कहलक, “का तोहरेमन जानाला कि गलील परदेस केर इ आदमीमन, गलील परदेस केर आउर आदमीमन से बगरा पापी रहैं कि उ मनक उपरे एइसन बिपाइत आलक? 3मोंय तोहर से कहाथों, निहीं! मगर, अगर तोहरेमन पाप करेक नी छोड़बा, तो तोहरेमन हों सोउब एहे नियर नाश होबा। 4चाहे तोहरेमन उ अठारह झन आदमी केर बारे में का कहबा, जे मनक उपरे शीलोह केर गुम्मट गिरलक, आउर उमन दइब के मोइर गेलैं, का उमन यरुशलेम शहर में रहेक वाला सोउब आदमीमन से बगरा पापी रहैं? 5मोंय तोहर से कहाथों कि निहीं, अगर तोहरेमन पाप करेक नी छोड़बा, तो तोहरेमन हों सोउब एहे नियर नाश होबा।”
बेगर फार वाला अंजीर गाँछ केर उदाहरन
6फिन यीशु इ उदाहरन के हों सुनालक, “एगो आदमी केर अंगूर केर बारी में एगो अंजीर केर गाँछ रहे। उ आदमी हर साल अंजीर केर गाँछ में फार खोजेक आलक, मगर एको गो नी पालक। 7तब उ बारी केर रखवाला से कहलक, ‘देख, मोंय तीन साल से इ अंजीर केर गाँछ में फार खोजेक आवाथों, मगर मोके एको गो फार नी भेटालक, से लगिन इके काइट दे, इ बेस भूंई के बरबाद कराथे।’ 8मगर रखवाला उके जबाब देलक, ‘हे मालिक, इके इ साल रहेक दे, मोंय इकर चाइरो बटे गढ़हा कोइड़ के माइद देमूँ। 9अगर इ अगला साल से फरी तो ठीक अहे, आउर नी फरी तो इके काइट देबे।’”
आराम केर दिन कुबड़ी जनाना के ठीक करेक
10एक बेर यहूदी मनक आराम केर दिन में, यीशु एगो यहूदी मनक प्रार्थना घर में उपदेस देवत रहे। 11हूवाँ एगो जनाना रहे, जेकर में एगो भूत रहे, जे उके अठारह साल से बिकलांग बनाय देई रहे, आउर उ कुबड़ी होई जाय रहे, आउर सीधा होवेक नी पारत रहे। 12यीशु उके देइख के अपन ठिना बोलालक आउर उकर से कहलक, “हे बहिन, तोंय अपन रोग से ठीक होई गेले।” 13तब यीशु उकर उपरे हाँथ रखलक, आउर उ तुरते सीधा होई गेलक, आउर परमेश्वर केर बड़ाई करेक लगलक। 14यीशु यहूदी मनक आराम केर दिन में उके ठीक काइर रहे, से लगिन यहूदी मनक प्रार्थना घर केर सरदार खिसे झुंझलाय के आदमीमन से कहेक लगलक, “काम करेक लगिन छाव दिन अहे, ओहे दिनमन में तोहरेमन आय के ठीक होवा, मगर यहूदी मनक आराम केर दिन में ना आवा।” 15इ सुइन के प्रभु यीशु जबाब देलक, “हे ढोंगी आदमीमन, का तोहरेमन यहूदी मनक आराम केर दिन में, अपन गारू चाहे गधा के गोहर घर से खोइल के पानी पियेक नी लेगाला? 16शैतान इ जनाना के जे अब्राहम केर संतान हेके, अठारह साल से बाइंध के राइख रहे, तो का इके यहूदी मनक आराम केर दिन में ठीक होवेक नी रहे?” 17जब यीशु इ गोइठमन के कहलक, तो उकर बिरोधी आदमीमन सोउब लजाय गेलैं, मगर भीड़ केर आदमीमन उकर महान काममन के देइख के खुश होलैं।
राई केर बिहीन केर उदाहरन
(मत्ती 13:31,32; मरकुस 4:30-32)
18फिन उ कहलक, “परमेश्वर केर राइज केकर जइसन अहे? आउर मोंय उकर जोड़ी केकर से करमूँ? 19उ राई केर एगो माँजी नियर अहे, जेके केऊ आदमी लेई के अपन बारी में बुनलक, आउर उ बाइढ़ के सोउब बुदामन में से बड़का गाँछ बाइन गेलक, आउर आकाश केर चरईमन उकर डाइरमन में खोंता बनाय के रहलैं।”
खमीर केर उदाहरन
(मत्ती 13:33)
20यीशु फिन कहलक, “मोंय परमेश्वर केर राइज केर जोड़ी केकर से करमूँ? 21उ खमीर केर जइसन अहे, जेके केऊ जनाना लेई के बीस किलो आटा में मिलाय के गुइंध देलक, आउर थोरेक देरी में सोउब गूंधल आटा फूइल के खमीर बाइन गेलक।”
कठिन डहर
(मत्ती 7:13,14,21-23)
22यीशु अपन चेलामन केर संगे नगर-नगर आउर गाँव-गाँव में उपदेस देते यरुशलेम शहर बटे जात रहे। 23आउर एगो आदमी उकर से पूछलक, “हे प्रभु, का परमेश्वर थोरहें आदमीमन के जुग-जुग केर सजा से बचाई?” यीशु उमन से कहलक, 24“तोहरेमन परमेश्वर केर राइज में नान दुरा से ढूकेक केर कोशिश करा, काले कि मोंय तोहर से कहाथों कि ढेइर आदमीमन ढूकेक केर कोशिश करबैं मगर नी पारबैं। 25जब परमेश्वर, जे घर केर मालिक हेके, उइठ के दुरा के बंद काइर रही, आउर तोहरेमन बाहरे ठड़ाय के दुरा ठोकठोकाय के, आउर बिनती काइर के कहेक लगबा, ‘हे प्रभु, हमर लगिन खोइल दे,’ आउर उ जबाब देवी, ‘मोंय तोहरेमन के नी जानोना, तोहरेमन कहाँ केर हेका?’ 26तब तोहरेमन कहेक लगबा, ‘हमरे तोर संगे खाली-पिली आउर तोंय हमर गलीमन में उपदेस देले।’ 27मगर उ तोहर से कही, ‘मोंय तोहर से कहाथों, मोंय तोहरेमन के नी जानोना, तोहरेमन कहाँ से आय हा। हे बुरा काम करेक वाला आदमीमन, तोहरेमन सोउब मोर ठिना से दूर होई जावा।’
28हूवाँ काँदेक आउर दाँत केटरेक होवी, जब तोहरेमन अब्राहम, इसहाक, याकूब, आउर परमेश्वर केर संदेश के बताएक वालामन के परमेश्वर केर राइज में बइठल देखबा, मगर खुद के बाहरे निकलाल पाबा। तब तोहरेमन हूवाँ काँदबा आउर दाँत केटरबा। 29आउर दुनिया केर चाइरो कोना से दोसर जाइत केर आदमीमन आय के परमेश्वर केर राइज केर भोज में बइठबैं। 30आउर देखा, एहे लेखे से जे आदमीमन इ बेरा दुनिया में छोट बुझल जायना, उमन परमेश्वर केर नजइर में बड़का होई जबैं, आउर थोरेक आदमीमन जे खुद के दुनिया में बड़का बुझैना, उमन परमेश्वर केर नजइर में छोट होई जबैं।”
राजा हेरोदेस केर दुश्मनी
31ओहे बेरा थोरेक फरीसी दल केर आदमीमन आय के उकर से कहलैं, “हिंयाँ से निकइल के चाइल जा, काले कि राजा हेरोदेस तोके माइर मोराएक खोजाथे।” 32यीशु उमन से कहलक, “जाय के उ लोमड़ी नियर चतूर आदमी से कइह देवा कि आइज आउर काइल मोंय भूतमन के निकलाथों आउर बेमरिया आदमीमन के ठीक कराथों आउर तीसरा दिन मोंय अपन काम के पूरा काइर लेमूँ। 33सेकरो में आइज, काइल आउर परसू मोके चलेक जरुरी अहे, काले कि एगो परमेश्वर केर संदेश के बताएक वाला सिरिफ यरुशलेम शहर में हें मोराल जाई।
यरुशलेम शहर लगिन दुःखी होवेक
(मत्ती 23:37-39)
34हे यरुशलेम शहर केर आदमीमन! हे यरुशलेम शहर केर आदमीमन! तोहरेमन जे परमेश्वर केर संदेश के बताएक वालामन के माइर मोराला, आउर तोहर ठिना मोर भेजल संदेश बताएक वालामन के पखना से माइर मोराला। कायनों बेर मोंय चाहलों कि तोहर छउवामन के जइसन मुर्गी अपन चेंगनामन के अपन डेना से ढाँपेला, तइसनेहें जमा काइर लेमूँ, मगर तोहरेमन नी चाहला। 35देखा, अब तोहरेमन केर मंदिर तोहर लगिन उजराल छोइड़ देवल जाई, आउर मोंय तोहर से कहाथों, अब से तोहरेमन मोके तब तक नी देखबा जब तक तोहरेमन इ नी कहबा, ‘धाइन हेके उ, जे प्रभु केर नाँव से आवेला।’ ”
S'ha seleccionat:
लूका 13: SCK
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Sadri Bible by The Love Fellowship is licensed under Creative Commons Attribution-ShareAlike 4.0 License.