युहन्ना 1
1
वचन मन्से भके यलसि
1संसार सिरिस्टि हखलिसे यागा वचन रहलसि। वचन परमेस्वरसाङे रहलसि हसे वचन परमेस्वरहिँ रहलसि। 2सिरिस्टि हखलिसे यागा उहे वचनवा परमेस्वरसाङे रहलसि।
3इहे वचनवासे परमेस्वर जम्मे चिजु बनोलसि हसे हुने बिना कुनहुँ चिजु फेनि हइने बनलइ। 4हुनेमा जिवन रहलइ हसे उहे जिवन मन्सावानिक ज्योति रहलिय। 5उअ ज्योतिया यन्हारिमा चमकसिय हसे यन्हारि कबहुँ फेनि ज्योतियाके बुतावे हइने सकलिय।
6परमेस्वरक पठावल एक जन मन्से रहलिय, वकर नाउँ युहन्ना रहलइ।#मति ३:१; मरकुस १:४; लुका ३:१-२ 7उअ ज्योतियामा जम्मे मन्सावाह विस्वास करइ कहके युहन्ना उअ ज्योतियाक बारेमा साछि देवे यलिय। 8युहन्ना यपनहिँ त ज्योति हइने रहलिय, बाकि उअ ज्योतियाक बारेमा साछि देवे यलिय।
9हरेक मन्सेके ग्यान देना सत्य ज्योति संसारमा यवइ रहलसि। 10हुने संसारमा रहलसि हसे संसार हुनेसे बनलिय, ताफेनि संसार हुनेके हइने चिनलइ। 11हुने यपने मन्सावानि लघिना यलसि, बाकि हुनेक यपने मन्सावाह गरहन हइने करलइ। 12बाकि जतेक जन हुनेके गरहन करलइ हसे हुनेमा विस्वास करलइ, हुने हुनुकाके परमेस्वरक सन्तान हखेके अधिकार देलसि। 13हुनुका न रकतसे, नत देहियाक इछासे कि कुनहुँ मरदाना मन्सेक इछासे जरमल रहलइ, बाकि हुनुका परमेस्वरसे जरमल रहसइ।
14उअ वचनवा मन्से भेलसि हसे हमार बिचा बास करलसि। हुने अनुग्रह हसे सत्यतामा भरिपुरन रहलसि। हमरा हुनेक महिमा देखलहुँ, उअ महिमा परमेस्वर पितासे यलहर एगुडे मतरे पुतरक नहिँया रहलइ।
15बप्तिस्मा देलाहर युहन्ना हुनेक बारेमा साछि देते चिल्लाके कहलिय, “जुने मोर पाछा यबसि हुने मोरसे महान बडसि, केहकेकि हुने मोरसे पहिलहिँ रहलसि। मोर कहलि इअ बतवा हुनेहिँक बारेमा हखइ।” 16हुनेक भरिपुरनतासे हमरा जम्मे जन अनुग्रह पर अनुग्रह पउले बडहुँ 17केहकेकि व्यवस्था मोसासे दियलइ, बाकि हमरा परमेस्वरक अनुग्रह हसे सत्यता येसु ख्रिस्टसे पउले बडहुँ। 18परमेस्वरके कुनहुँ फेनि कबहुँ हइने देखले बडइ। बाकि परमेस्वर पितासाङे रहलाहर एगुडे मतरे पुतर हुनेके परकट करले बडसि।
बप्तिस्मा देलाहर युहन्नाक साछि
(मति ३:१-१२; मरकुस १:१-८; लुका ३:१-१८)
19जब यरुसलेमसे यहुदि मन्सावाह पुजेरियानिके हसे लेवियानिके#१:१९ लेविसभ: लेविसभ पुजेरियानिके मन्दिरवाक सेवाक काममा मदत करइ। युहन्ना लघिना “तुइ कुने हखहि?” कहके पुछे पठोलइ, तब वकर साछि इअ रहलइ। 20युहन्ना स्पस्टसे स्विकार करलिय, इन्कार हइने करलिय, बाकि “मुइ मुक्ति देलाहर ख्रिस्ट हइने हखहि” कहके स्विकार करलिय। 21हुनुका युहन्नाके पुछलइ, “कथि तुइ एलिया हखहि?”
तब उअ कहलिय, “मुइ हइने हखहि।”
हुनुका कहलइ, “कथि तुइ संसारमा यावेवाला अगमवक्ता हखहि त?”
उअ जवाफ देलिय, “मुइ हइने हखहि।”#व्यवस्था १८:१५,१८; मलाकि ४:५
22हुनुका वकरेके कहलइ, “तुइ कुने हखहि? हमराके कहहिँ त, ताकि हमरा जाके हमराके पठोलहरानिके जवाफ देवे सकुँ। तुइ यापन बारेमा कथि कहसहि त?”
23युहन्ना कहलिय, “यसइया अगमवक्ताक कहलि नहिँया, ‘प्रभुक पइडा तयार पारह’ कहके उराठ-ठउरियामा चिल्ला-चिल्लाके फदकलहर एक जनक मुइ स्वर हखहि।”#यसइया ४०:३
24उअ पुछे यलहरवा मन्सावानिके फरिसियाह पठोले रहलइ। 25उहेसे हुनुका युहन्नाके पुछलइ, “यगर तुइ मुक्ति देलाहर ख्रिस्ट फेनि हइने, एलिया फेनि हइने हसे उअ अगमवक्ता फेनि हइने हखहि जउँ, तुइ केहके बप्तिस्मा देसहिँ?”
26युहन्ना हुनुकाके जवाफ देते कहलिय, “मुइ त पानिसे बप्तिस्मा देसहिँ, बाकि यखनि तोहार बिचा एक जन ठडियाइल बडसि, जकरेके तोहरा हइने चिनसह।#मरकुस १:८; मति ३:११; लुका ३:१६ 27मोर पाछा यलहर हुनेहिँ हखसि। हुनेक चप्पलवाक फितवा फोवेके फेनि मुइ लाइक हइने बडहिँ।”
28इअ जम्मे बतवा यरदन लदियाक वाहिकरवा बेथानिया गउँवामा भेल रहलइ, जहवाँ युहन्ना मन्सावानिके बप्तिस्मा देइ रहिय।
येसुजि परमेस्वरक पाठा
29दोसरि दिन येसुजिके यापनवरि यवइकि देखके युहन्ना कहलिय, “हेरह, इअ परमेस्वरक पाठा हखिय, जुने संसारक पाप उठाके लिगसिय! 30मुइ हुनेक बारेमा कहले रहलहिँ, ‘मोर पाछा एक जन यवइ बडसि, हुने मोरसे महान बडसि, केहकेकि हुने मोरसे पहिलहिँ रहलसि।’ 31मुइ त यपनहिँ हुनेके हइने चिनले रहलहि, बाकि इस्राएलियानिक बिचा हुनेके चिन्हावे सकुँ कहके मुइ पानिसे बप्तिस्मा देते यलहिँ।”
32तब युहन्ना यसके कहते साछि देलिय, “मुइ पवितर-आत्माके स्वरगसे घुटुरि नहिँया नाभके हुनेक वपरा बेठइ देखलहिँ। 33मुइ त हुनेके चिनले हइने रहलहि, बाकि जुने मोरके पानिसे बप्तिस्मा देवे पठोलसि, हुने मोरके कहलसि, ‘जुन मन्सावा वपरा पवितर-आत्मा नाभके बेठइकि देखबह, पवितर-आत्मासे बप्तिस्मा देलाहर हुनेहिँ हखसि।’ 34मुइ देखले बडहिँ हसे साछि देले बडहिँ कि, हुनेहिँ परमेस्वरक पुतर हखसि।”
येसुजिक पहिलोठि चेलवाह
35दोसरि दिन युहन्ना यापन चेलवानिमधे दु जनसाङे उहे ठउरियामा ठडियाइल रहलिय। 36उअ येसुजिके उहेमाहे बुल्ते जाइकि देखके कहलिय, “हेरह, हुने परमेस्वरक पाठा हखसि!” 37वकर कहलि इअ बतवा सुनके उअ दु जन चेलवाह येसुजिक पाछा लगलइ। 38तखनहिँ येसुजि घुमके हेरलसि हसे हुनुकाके यापन पाछा यवइकि देखके पुछलसि, “तोहरा कथि खोजइ बडह?” हुनुका येसुजिके कहलइ, “रब्बि” (जाकर यरथ “गुरुजि” हखइ), “यपनहुँ कहवाँ रहसहुँ?” 39येसुजि हुनुकाके कहलसि, “यवह हसे तोहरा देखबह।” हुनुका येसुजिसाङे गेलइ हसे हुनेक रहलि ठउरिया देखलइ। हुनुका उअ दिन हुनेसाङे रहलइ, केहकेकि तखनहिँ साँझक चार बजल रहलइ।
40युहन्नाक बतवा सुनके येसुजिक पाछा लगलाहर उअ दु जनमधे एक जन सिमोन पतरुसक भयवा अन्द्रियास रहलिय। 41उअ पहिला यापन ददेरवा सिमोन पतरुसके भेटके कहलिय, “हमरा मुक्ति देलाहर मसिहके पउलहुँ।” (ग्रिक भासामा “मसिह” के “ख्रिस्ट” कहसइ।) 42तब अन्द्रियास सिमोनके येसुजि लघिना लिगलिय। हुने सिमोनके हेरके कहलसि, “तुइ योआनेसक बेटा सिमोन हखहि। याबेसे तोर नाउँ केफास हखइ” (जकरेके पतरुस कहसइ)#१:४२ हिब्रु भासामा “केफास” हसे ग्रिक भासामा “पतरुस”, इअ दुन्हुक यरथ सिल हखइ। ।
येसुजि फिलिप हसे नथानेलके बलोलसि
43दोसरि दिन येसुजि गालिल छेतरमा जायके निरनय करलसि हसे वहवाँ गेलसि। तखनहिँ हुने फिलिपके भेटलसि हसे वकरेके कहलसि, “मोर पाछा लाग।”
44अन्द्रियास हसे पतरुस नहिँया फिलिप फेनि बेथसेदा सहरवाक मन्से रहलिय। 45वकरपाछा फिलिप नथानेलके पउलिय हसे वकरेके कहलिय, “जाकर बारेमा मोसा व्यवस्थामा हसे अगमवक्तावाह फेनि लिखले रहलइ, हमरा हुनेके पउले बडहुँ। हुने त नासरतमा रहलाहर योसेफक बेटा येसुजि हखसि।”#लुका २४:२७
46इअ बतवा सुनके नथानेल वकरेके कहलिय, “कथि नासरतसे किहो यसल बात यावे सकतइ त?” फिलिप कहलिय, “याके हेरहि न!”#युहन्ना ७:४१; मरकुस ६:२
47येसुजि नथानेलके यापन लघिना यवइकि देखके वकर बारेमा कहलसि, “एक जन पाका इस्राएलिके हेरह, जाकरमा किहो छलकपट हइने बडइ।”
48नथानेल हुनेके पुछलिय, “यपनहुँ मोरके कस्के चिनलहुँ?” येसुजि वकरेके जवाफ देलसि, “फिलिप तोरके बलोलिसे यागा मुइ तोरके कोइलरवाक गछवातर देखले रहलहि।”
49नथानेल हुनेके जवाफ देलिय, “गुरुजि, यपनहुँ त परमेस्वरक पुतर हखहुँ, यपनहुँ इस्राएलक राजा हखहुँ!”
50येसुजि वकरेके जवाफ देलसि, “कथि मुइ तोरके कोइलरवाक गछवातर देखलहिँ कहलेसे तुइ विस्वास करलहिँ? तुइ यकरसे फेनि महान चिजुसभ देखबहि।” 51येसुजि वकरेके फेरि कहलसि, “मुइ तोहराके सदियो कहइ बडहिँ, तोहरा स्वरग खोलाइल हसे परमेस्वरक स्वरगदुतवानिके मन्सेक पुतर वपरा चढइकि तके नभइकि देखबह।”#उत्पति २८:१२; लुका ३:२१
S'ha seleccionat:
युहन्ना 1: CTHR
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. and Nepal Bible Society