युहन्ना 5
5
येसुजि एक जन लङड मन्सेके डउल बनोलसि
1किहो दिन पाछा यहुदियानिक एगुडा पाबनि यलइ हसे येसुजि यरुसलेममा गेलसि। 2यरुसलेम सहरवामा भेडा-दुवरियाक लजिके एगुडा पोखरि रहलिय। जकरेके हिब्रु भासामा बेथस्दा कहसइ, यकर चारिवरि पाँच गो ओसरा रहलइ। 3वहवाँ यान्हर, लङड, धार-हइने चलना रोग लागल बहुत मनियाइल मन्सेसभ ढनमनाइल रहइ। [हुनुका कखनि पोखरियाक पनिया छलकतइ कहके इसियाइ रहइ। 4केहकेकि परमप्रभुक एगुडा दुत कखनु-कखनु याके पनिया छल्का दिय। पनिया छल्कलेपर जुने पहिला पनिया भितरा पेसइ, वकर जसनुक रोग लागल भेले फेनि उअ डउल हखबे करइ।]#५:४ पद तिन हसे चारक कोस्ट भितरा लिखइलि बतवा हस्तलिपियामा हइने बडइ। 5वहवाँ एगुडा मन्से रहलिय, उअ मनियाइल अडतिस बरस भेल रहलइ। 6येसुजि वकरेके वहवाँ ढनमनाइल देखलसि। उअ बहुत बरससे मनियाइल बडिय कहके थाह पउलेपर येसुजि वकरेके कहलसि, “कथि तुइ डउल हखे चाहबहिँ?”
7उअ मनियइलि मन्सावा हुनेके कहलिय, “हजि, जखनि पनिया छल्कसइ मोरके पोखरियामा गहदेवेके मोर कुनहुँ फेनि मन्से हइने बडइ। मुइ कोसिस करते-करते मोरसे यागा दोसरे मन्से पनियामा जइबे करसइ।”
8तब येसुजि वकरेके कहलसि, “उठहि, यापन बिछोनवा बोकके बुलहि।”#मति ९:६; मरकुस २:११; लुका ५:२४ 9वइघरहिँ उअ मन्सावा डउल भेलिय हसे यापन बिछोनवा बोकके बुलबे करलिय। उअ दिन विसरामक दिन रहलइ। 10उहेसे यहुदि यगुवाह उअ डउल भेलि मन्सावाके कहलइ, “इअ त विसरामक दिन हखइ, व्यवस्था यनुसार तुइ बिछोनवा बोके नाहिँ बनतइ।”#नेहमिया १३:१९; यरमिया १७:२१
11बाकि उअ हुनुकाके जवाफ देते कहलिय, “जुने मोरके डउल बनोलसि हुनेहिँ मोरके ‘यापन बिछोनवा बोकके बुलहि’ कहके कहलसि।”
12उहेसे हुनुका वकरेके पुछलइ, “तोरके बिछोनवा बोकके बुलहि कहलाहर मन्से कुने हखिय?”
13बाकि उअ मन्सावाके कुने डउल बनोले रहलिय कहके वकर हइने थाह रहलइ, केहकेकि उअ ठउरियामा भिड भेलेसे येसुजि वहवाँसे गेल रहलसि।
14किहो समय पाछा येसुजि वकरेके मन्दिरवामा भेटलसि हसे वकरेके कहलसि, “हेरहि, तुइ डउल भेल बडहिँ। याबेसे पाप झिन करसि, नत तोरमा यकरसे याको खराब दासा यतइ।”#मरकुस २:५
15तब उअ मन्सावा यहुदि यगुवावानि लघिना जाके “मोरके डउल बनोलहर त येसुजि हखसि” कहके कहदेलिय।
परमेस्वरक पुतरसे जिवन
16उहेसे यहुदि यगुवासभ येसुजिके सतावे लगलइ, केहकेकि हुने इअ कमवासभ विसरामक दिनवामा करइ रहलसि। 17बाकि येसुजि हुनुकाके कहलसि, “मोर पिता यखनिलइ काम करइ बडसि हसे मुइ फेनि काम करते बडहिँ।” 18इअ बतवा सुनके यहुदि यगुवासभ येसुजिके मारेके तहिँया झन याको कोसिस करे लगलइ। हुनुका कहलइ, “उअ विसरामक दिनक नियम मतरे भङ हइने करसिय, बाकि परमेस्वरके फेनि यापन पिता कहके यपनहिँके परमेस्वरक बराबर बनोसिय।”
19येसुजि हुनुकाके जवाफ देते कहलसि, “मुइ तोहराके सदियो कहबहिँ, पुतर यपनहिँ किहो करे नाहिँ सकबिय, बाकि पिताके जथि करइ देखबिय उहे मतरे करबिय, केहकेकि पिता जथि करबसि, पुतर फेनि वसने करबिय। 20केहकेकि पिता पुतरके प्रेम करससि हसे हुने जथि करससि उअ जम्मे कमवा पुतरके देखोससि। यकरसे फेनि महान काम हुने पुतरके देखोबसि हसे तोहरा छक परबह। 21केहकेकि जसने पिता मरलि मन्सावानिके जिउताके हुनुकाके जिवन देससि, वसने पुतर फेनि जकरेके इछा करससि, वकरेके जिवन देससि।#रोमि ४:१७; ८:११ 22पिता ककरो न्याय हइने करससि, बाकि जम्मे न्याय करेके काम पुतरके देले बडसि, 23ताकि जम्मे जन पुतरक यादर करइ, जसने हुनुका पिताक यादर करसइ। जुने पुतरक यादर नाहिँ करतइ, उअ मन्सावा पुतरके पठोलहरा पिताके फेनि यादर नाहिँ करबिय।#लुका १०:१६
24 “मुइ तोहराके सदियो कहबहिँ, जुने मोर वचन सुनसइ हसे मोरके पठोलहरामा विस्वास करसइ, वकरेसाङे अनन्त जिवन बडइ। उअ न्यायमा नाहिँ परबिय, बाकि मृत्युसे पार करके उअ जिवनमा पेससकल बडिय। 25मुइ तोहराके सदियो कहबहिँ, उअ समय यवइ बडइ हसे यासकल बडइ, जब मरलि मन्सावाह परमेस्वरक पुतरक स्वर सुनतइ हसे जुने सुनतइ उअ जियतइ। 26केहकेकि जसने पितामा जिवन देवेके सक्ति बडइ, वसने हुने यापन पुतरके फेनि जिवन देवेके सक्ति देले बडसि। 27वकरेके न्याय करेके अधिकार फेनि देले बडसि, केहकेकि उअ मन्सेक पुतर हखिय।
28 “इअ बतवा सुनके तोहरा यचम्म झिन मनिह, केहकेकि समय यवइ बडइ, जब चिन्डियामा हखलहरा जम्मे जन वकर स्वर सुनतइ, 29हसे चिन्डियासे बाहरा निकडके यतइ। जुने यसल काम करले बडइ, हुनुका जिउतके जिवन पउतइ हसे दुस्ट काम करलहरा जिउतके दन्ड पउतइ।#मति २५:४६; प्रेरित २४:१५
30 “मुइ यपनहिँ किहो करे नाहिँ सकबहि। जसने मुइ पितासे सुनसहिँ, वसने मुइ न्याय करसहिँ हसे मोर न्याय ठिक हसइ, केहकेकि मुइ यापन इछा यनुसार हइने करसहिँ, बाकि मोरके पठोलहराक इछा यनुसार करसहिँ।
येसुजिक बारेमा गवाहि
31 “यगर मुइ यापन बारेमा यपनहिँ गवाहि देबहिँ जउँ, मोर गवाहि सत्य नाहिँ हतइ। 32बाकि मोर बारेमा गवाहि देलाहर परमेस्वर पिता हखसि हसे मोर बारेमा हुनेक देलि गवाहि सत्य बडइ कहके मोर थाह बडइ।
33 “तोहरा बतवा बुझेके तहिँया यापन मन्सावानिके बप्तिस्मा देलाहर युहन्नाक लघिना पठोलह हसे उअ सत्य गवाहि देलिय। #
युहन्ना १:१९-२७; ३:२७-३० 34मोर तहिँया मन्सेक गवाहि चाहि लगसइ कहके हइने, बाकि तोहार उद्धार हखइ कहके मुइ इअ बतवा कहले हखहि। 35युहन्ना त बरइकि हसे चमकइकि दिवा रहलिय हसे तोहरा वकर इजोरवामा यघरिक आनन्द मनावे चाहलह।
36 “बाकि युहन्नाक देलि गवाहिसे फेनि याको जबड गवाहि मोरसाङे बडइ। केहकेकि जुन कमवा पुरा करेके पिता मोरके देले बडसि, उअ कमवा मुइ करइ बडहिँ हसे पिता मोरके पठोले हखसि कहके उहे कमवा मोर बारेमा साछि देइ बडइ। #
मति ११:४ 37उतुरा मतरे हइने, मोरके पठोलहर पिता यपनहिँ फेनि मोर बारेमा साछि देले बडसि। तोहरा हुनेक स्वर न कबहुँ सुनले बडह, नत हुनेके देखले बडह। 38हुनेक वचन तोहार मनवामा हइने रहसइ, केहकेकि तोहरा हुनेक पठोलि मन्सावाके विस्वास हइने करसह। 39धरमसास्तरवामा परमेस्वरसाङे सबदिन रहना जिवन पवेसइ कहके तोहरा डउलसे पढसह। उहे धरमसास्तर त मोर बारेमा साछि देसिय।#लुका २४:२७; प्रेरित १३:२७ 40ताफेनि तोहरा जिवन पावेके तहिँया मोर लघिना यावेके इन्कार करसह।
41 “मुइ मन्सेसे बखान हइने चाहसहिँ, 42बाकि मुइ तोहराके चिनसहिँ, परमेस्वरक प्रेम तोहार हृदयमा हइने बडइ कहके मोर थाह बडइ। 43मुइ यापन पिताक नाउँसे याइल बडहिँ, ताफेनि तोहरा मोरके गरहन हइने करसह। बाकि यगर कुनहुँ यपने नाउँमा यतइ जउँ, तोहरा वकरेके गरहन करबह।#मति २४:५ 44तोहरा एक-दोसरि जनसे यादर खोजसह, बाकि एक मतरे परमेस्वरसे यइना यादरक मतलब हइने करसह जउँ, तोहरा कस्के विस्वास करे सकबह त?
45 “मुइ तोहराके पिताक यागा दोस लगोबहिँ कहके झिन सोचिह। तोहराके दोस लगोलहर त मोसा हखिय, जाकरमा तोहरा यापन यसरा धरले बडह। 46यगर तोहरा मोसाके विस्वास करले रहतह त मोरके फेनि विस्वास करतह, केहकेकि उअ मोर बारेमा लिखले रहलिय। 47बाकि यगर तोहरा वकर लिखलि बतवा विस्वास नाहिँ करबह जउँ, मोर कहलि बतवा कस्के विस्वास करबह त?”#लुका १६:२९,३१
S'ha seleccionat:
युहन्ना 5: CTHR
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. and Nepal Bible Society