Lukas 24
24
Yesus natuwu nculi
(Mat. 28:1-10; Mrk. 16:1-8; Yoh. 20:1-10)
1Eo pamulana mingku ee, hampepulo ngkii, rauramo bangkele-bangkele ee i dayo Yesus. Laikenira rampa-rampa to nawongi to laipahadiara amimi. 2Karatara i ria, lairatara watu bohe powunta dayo Yesus nateduliami. 3Nehuara i rara dayo ee, naupawee momami naria wataloka Pue Yesus lairatara. 4Bulara nokangkore hante kaingu rarara habana napa to laihilora ee mai, ngkali nokangkoreramo rodua tauna i humpiira, nowaru bula to neringkila. 5Nangkahilo ee naeka mpuura pade notingkodu narapa tana. Tauna eera nanguli, “Napa pade laipalimi to natuwu i lentongora to namate? 6Moma-'I naria i hei. Natuwu nculi-'Imi. Linga karia-Na i Galileadipi, laikewoka-Na amimo komi 7ane Ana Manuhia kana rapopewai hi tauna to nadoha pade rasalibra. Naupawee eo katoluna, kana matuwu nculi-'I.”
8Napu ee lailingarami napa to laiuli Yesus. 9Lauparia nanculiramo lako dayo ee mai pade nangkewo humawee lauria hi hampulu hadua ana guru Yesus pade humawee tau ntanina to nantuku Yesus. 10Bangkele-bangkele to nangkewo humawee lauria hi rasul-rasul: Maria Magdalena, Yohana, Maria tina Yakobus pade bangkele-bangkele to ntanina to laipodohera. 11Naupawee, napa to laiulira bangkele ee mai, ewa moma'i nehua akala, etu pade moma iparahayara. 12Naupawee, Petrus neongko pade dungku nokumeno rau i dayo. Karatana i ria, notungka'i nampelongi rara dayo. Wuwu kae to nabula aga laihilona. Napu ee nanculi'i pade nepekune rara bongona napa kakonona to nadupa.
Yesus nampoperawa wotona i dala rau Emaus
13Eo ee mui, rodua lako to pantuku Yesus nomako rau hangu ngata to ikahangai Emaus, maria hampulu hangu kilo ka'awana lako Yerusalem. 14Bulara nomako, laipotuturara humawee to nadupa. 15Rancara notutura, Yesus narata nampamohukira pade nomako dohera. 16Laihilora-'I naupawee ewa naria to nampakaingu rarara hampena moma-'I laincanira. 17Yesus nampekunera, “Napa to laipotuturami bulami nomako?”
Nangepe pepekunea-Na lauria, nentuura nomako hante juu rarara. 18To ikahangai Kleopas nanguli, “Lako humawee tauna i Yerusalem, ba wuwu iko aga to rata to moma nangincani humawee to nadupa i ria bahangkua eo ei!”
19Yesus nanguli, “Napa to nadupa?”
Nehonora, “Humawee to nadupa hi Yesus to Nazaret. Hia ee mai hadua nabi. To iuli-Na pade to ibabei-Na nabaraka mpuu i tingoo Alatala pade humawee manuhia. 20Naupawee imam-imam to i matana hante totua-totua ngata kami to ntanina, nampopewai-'I rahuku mate pade laisalibra-'I. 21Bo laiharumaka kami Hiami mei to mampabakaha Israel. Welau ei eo katolunami hinungkai humawee lauria nadupa. 22Naupawee, bangkele-bangkele to nodoo hante kami, nampakakonce kami habana hampepulo ngkiira he rau i dayo, 23moma'i lairatara wataloka Yesus. Naratara nangkewoka kami ane laihilora malaeka-malaeka to nangkewokara ane Yesus ee natuwu nculimi. 24Napu ee bahangkua duara doo kami rau i dayo. Lairatara ria, nakono mpuudi to laiulira bangkele-bangkele ee mai. Naupawee moma naria Yesus laihilora.”
25Napu ee Yesus nangulikara, “Nadoyo mpuuda komi. Nalera mpuu pampekirimi namparahaya humawee to laiuli nabi-nabi. 26Magau to Pepakahalama to laitipa Alatala kana mangkolo olu humawee kahehaa lauria, napu ee pade rapemabohedi.” 27Napu ee laipakandolaka-Nara napa to laitulihi rara humawee Buku to Nagaha nangkambelai woto-Na moto, nopamula lako buku to laitulihi Musa duu humawee buku nabi-nabi.
28Namohuramo i ngata to rakarauira. Yesus nobabei ewa mingki mopadola pomakoa-Na. 29Naupawee laipahurura-'I bona madota-'I mehani dohera, iulira, “Pehanimo-Ko olu dohe kami ngkawengia ei, apa lau malimaumi lauria.” Alaana raumi Yesus no'oha dohera. 30Bula-Na nangkoni dohera, laiala-Na roti pade nosukuru hi Alatala. Napu ee laitubi-Na pade laiwaika-Na hi hira. 31Tempo ee mui ngkali nanotomi rarara pade laincanira-'Imi. Naupawee ngkali naronto-'Imi lako lentongora. 32Lauparia noneulikaramo, “Nahipato naroho wukuta bula-Na nampotuturakata i dala pade nampakandola batua Buku to Nagaha hi kita.”
33Napu ee neongkoramo nanculi rau i Yerusalem. I riara nampotomuka hampulu hadua ana-ana guru Yesus to nahiromu hante bahangkua dua tau ntanina. 34To nahiromu ee nangulikara to rodua ee, “Nakono. Pue natuwu nculimi, pade nampoperawa woto-Na hi Simon!”
35Napu ee, to rodua ee muirahawo notutura hi humaweera napa to nadupa bulara nomako pade bewa laincanira Yesus tempo-Na notubi roti.
Yesus nampoperawa woto-Na hi humawee ana guru-Na
(Yoh. 20:19-23)
36Bulara notutura nangkambelai humawee to nadupa, ngkali nokangkoremi Yesus i tingoora pade nanguli, “Katuwu to nanone mampodohe komi!”
37Humaweera nakonce pade naeka mpuura, apa iulira hira nampahilo hetara.
38Naupawee iulika-Nara Yesus, “Napa pade naeka komi? Napa pade nokarara komi? 39Hilo pale pade paa-Ku, bona mincani ane Akumi ei. Dama-'A pade hilo belo. Heta moma naria ihina pade wukuna. Naupawee Aku naria ihi-Ku pade wuku-Ku.”
40Nahudupi nanguli lauria, laipahiloi-Nara pale pade paa-Na. 41Naupawee poma laiparahayara mpuu ane Hia ee Yesus, habana nagoe gagara pade nahera. Etu pade laipekune-Nara Yesus, “Naria pangkonimi i hei?” 42Laiwaikara-'I hangkoo bau to laitapa. 43Laiala-Na bau ee pade laikoni-Na i tingoora.
44Napu ee iulika-Nara Yesus, “Eimile to laiulika-Ku komi wengi tempo-Ku dohemidipi, iwei: Napa to laitulihi nangkambelai Aku rara buku Taurat to laitulihi Musa, buku nabi-nabi pade buku Mazmur kana rapaganai.”
45Napu ee laibea-Na pekirira bona rapahara Buku to Nagaha. 46Iulika-Nara, “Naria laitulihi rara Buku to Nagaha, ane Magau to Pepakahalama to laitipa Alatala kana mangkolo kahehaa duu-Na mamate. Eo katoluna matuwu nculi-'I lako kamatea-Na. 47Pade rara hanga-Na kana raparata kareba to nanguli ane manuhia kana mancoro lako doha-dohara bona Na'ampunira Alatala. Kareba ee mai kana rapotolele lako i Yerusalem duu marata i humangkulili dunia. 48Komimi to nampahilo mata humawee to nadupa lauria. 49Epe komi, Kupopanauka komi mei Inoha to Nagaha to laitipa Tuama-Ku. Komi kana marodo mopea i ngata ei, duuna baraka lako Alatala manau mampakaroho komi.”
Yesus nateongko rau huruga
(Mrk. 16:19-20; Kis. 1:9-11)
50Napu ee, Yesus nangkenira ana guru-Na nehuwu lako Yerusalem duu namohu i ngata Betania. I ria laiongko-Na pale-Na pade laitiroi-Nara. 51Bula-Na nampatiroira, nategaa-'Imi lako hi hira, pade nateongko rau i huruga. 52Notingkodura nepue hi Hia. Napu ee nanculiramo rau Yerusalem hante nagoe mpuu rarara. 53Eo-eonara rau i karawaa Hou Alatala, nampaune Alatala.
S'ha seleccionat:
Lukas 24: MYL
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió