Luke 14
14
Sa vakabula e dua sa tauvi-mate ko Jisu, a sa vakarota na yate malumalumu; a sa tukuna ni sa vaka e dua na magiti levu na lotu, 1-24. E vinaka me yalomatua ko ira na tisaipeli i Jisu, 25-33: me ra vakatovolea talega me ra yaga, 34, 35.
1A SA yaco, ni sa lako tu ko koya ki na nona vale e dua sa turaga vei ira na Farisi me kana e na dua na siga ni vakacecegu, era sa vakaraici koya. 2Ka raica, sa tu e matana e dua na tamata sa tauva na buketevatu. 3A sa vosa ko Jisu, ka kaya vei ira na vu-ni-vunau kei ira na Farisi, ka vaka, E tara me ia na veivakabulai e na siga ni vakacecegu, se segai? 4A ra sa vagagalu ga. A sa tauri koya ko koya, ka vakabula, ka vakatala yani me lako; 5a sa vosa vei ira, ka kaya, O cei vei kemudou, kevaka e lutu ki na dua na davuke na nona asa se nona karavau, ena sega ni laveta cake vakasauri e na siga ni vakacecegu? 6A ra sa sega ni vosa rawa tale vua e na veika o qo.
7A sa tukuna e dua na vosa vakatautauvata vei ira era sureti, ni sa raici ira ni ra sa digitaka na veitikotiko vakaturaga; a sa kaya vei ira, 8Ni sa sureti iko e dua ki na solevu ni vakawati, kakua ni tiko sobu e nai tikotiko vakaturaga: de uasivi cake vei iko e dua sa sureti mai; 9ena qai lako mai ko koya sa sureti kemudrau, ka kaya vei iko, Solia na tikina vei koya o qo; o na qai madua ni ko laʼki tiko e na tikina era sara. 10Ia ni ko sa sureti, lako ka tiko sobu e na tikina era sara; me kaya vei iko ko koya sa sureti iko, ni sa lako mai, Na wekaqu, lako mada ki cake: o na qai vakarokorokotaki e na matadra era sa tiko vata kei iko me kana. 11Ia ko koya yadua sa vakalevulevui koya, ena vakamalumalumutaki; ia ko koya yadua sa vakamalumalumutaki koya, ena vakalevulevui.
12Sa kaya talega ko koya vua sa sureti koya, Ni ko sa cakava na magiti ni vakasigalevu sei vakayakavi, kakua ni sureti ira na wekamu dina, se na tuakamu se tacimu, se na kai nomu, se na nomu lewe ni koro e vutuniyau; de ra sureti iko tale, o na qai saumi. 13Ia ni ko sa cakava na magiti, sureti ira na dravudravua, na lokiloki, na gera, na mataboko: 14o na qai kalougata kina: ni ra sa sega ni sauma rawa vei iko: ni ko na saumi ni ra na tu cake tale mai ko ira na yalododonu.
15Ia ni sa rogoca na veika o qo e dua vei ira sa tiko kaya me kana, sa kaya vua, Sa kalougata ko koya ena kana e na matanitu ni Kalou.
16Sa qai kaya vua ko koya, Sa dua na tamata sa cakava e dua na magiti levu ni vakayakavi, a ra sa lewe vuqa sa sureta ko koya: 17ia ni sa yaco na tiki-ni-siga me ia kina nai vakayakavi, sa tala na nona tamata me kaya vei ira era sureti, Dou lako mai; ni sa vakarau tu na ka kecega. 18Ia ko ira yadua era lomavata me ra dui vakadre-dreti ira. Sa kaya e dua vei koya, Au sa volia e dua na tiki ni vanua, a sa dodonu meʼu lako ka raica; au masuti iko kina, mo laivi au meʼu kakua ni lako yani. 19A sa kaya e dua tani, Au sa volia e tini na karavau, ia kaʼu sa lako me vakatovolei ira: au masuti iko kina, mo laivi au meʼu kakua ni lako yani. 20A sa kaya e dua tale, Au sa qai vakawati, o koya kaʼu sa sega kina ni lako rawa. 21Sa qai lako mai na tamata ko ya, ka tukuna vua na nona turaga na veika o qo. Sa qai cudru nai taukei ni vale, a sa kaya vua na nona tamata, Lako vakasauri ki tuba ki na veisalatu kei na veisa-qata ni koro, ka kauti ira mai na dravudravua, kei na gera, kei na lokiloki, kei na mataboko. 22A sa mai kaya na tamata, Turaga, sa caka ga me vaka na nomu vosa, ia ka sa lalaga ga. 23A sa kaya na turaga vua na tamata, Lako ki na veisalatu, kei na veisala sa viribaiti, ka vakasaurarataki ira me ra lako mai, me oso na noqu vale: 24niʼu sa kaya vei kemudou, Sa sega e dua vei ira na tamata sa sureti ena tovolea na noqui vakayakavi.
25A sa lewe vuqa sara era sa lako vata kaya: a sa vuki ko koya, ka kaya vei ira, 26Kevaka e dua sa lako mai vei au, ka sega ni cata na tamana, kei tinana, kei na watina, kei ira na luvena, kei ira na tuakana kei tacina, kei ira na ganena, kei na nona bula talega, ena sega ni yaco rawa me noqu tisaipeli. 27Ia ko koya talega ena tawa colata na nona kauveilatai, ka muri au, sa sega ni yaco rawa me noqu tisaipeli.
28Ia ko cei vei kemudou, kevaka sa via tara vale, e sega ni tiko sobu mada eliu, me wilika na kenai voli, se tu vua nai yau me vakaotia se segai? 29de viria ga ko koya na kena yavu, ka sega ni rawata me vakaotia, era na qai vakalialiai koya ko ira kecega era sa raica, 30ka kaya, A tamata o qo sa vakatekivu me tara vale, ia ka sega ni rawata me vakaotia.
31Se ko cei na tui, sa lako me rau veivala kaya e dua tale na tui, ka sega ni tiko sobu mada eliu, ka vakananuma, se rawata me veivala kaya sa ruasagavulu na udolu na nona na meca, a sa tini na udolu na nona, se segai? 32se, ni sa yawa sara ko koya o qori, sa tala ko koya na tamata, me vakamasuta me rau veisorosorovi. 33Sa vakakina, o koya yadua vei kemudou sa sega ni biuta na nona ka kecega, sa sega ni yaco rawa me noqu tisaipeli.
34A ka vinaka na masima: ia kevaka sa seavu mai na masima na kena tuituina, ena vakatuituinataki e na cava? 35Sa qai sega ni yaga e na veiwere, se ki nai binibini de-ni-manumanu; sa biu ga ki tautuba. O koya sa vakadaligana me rogoca, me mani rogoca sara.
S'ha seleccionat:
Luke 14: FIJ1864
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
First full Bible in the Fijian language © British and Foreign Bible Society, 1864.