साल्तेङ दिङगिल्का 2
2
पुनित हाङसा लोका
1पेन्तिकोस दोअ्का यहुदि पारबा जेङलाउ प्रभु इसुता खान्धुर पाका झाराङ द्याङगेलाइ एथामे जोम्का हिघाखे।#लेबि २३:१५-२१; नियम १६:९-११ 2इङको पहर एकासि आदेलसो बाराका भेरमा चलिहि रो इङको भेरमाको गालाहोइ एम्बालाइ हिका साअ् दोङ पोङघाहि। 3कालाउ मेको देतोङगेलाइभाइका एम्बालाइकोता तिङन्हाहि। इङको मेको देतोङगेलाइ आसिआसि जेङतेङ इन्ता हिका झाराङ द्याङगेलाइता दुल्का एम्बालाइ तिङहि। 4कालाउ एम्बालाइ झाराङ पुनित हाङसाहोइ पोङघाहि रो पुनित हाङसाकोङ साघाउनिसो भेनेङ राउगेलाइता धुइलि तेङहि।
5इङको पहर दुनियाता हिका गोताङ पुरसो सेङजासेवक यहुदिगेलाइ इङको पहर यरुसलेमता हिका हिघाखे। 6कोलाउ इदोइ जोग्रेका हिङतेङ चारपाहाङसो द्याङगेलाइ जोम्हि रो एम्बालाइ भारभुसाइहि। हाइपानु एम्बालाइ झाराङ ताताइको राउता धुइतेङहिका हिङहि। 7एम्बालाइ झाराङ भारभुसाइतेङ दोअ्लि तेङहि, “हाइ इदोइ धुइकालाइ झाराङ गालिलिगेलाइ माको कुनु? 8हेसापा एम्बालाइ झाराङ केलाइको ताइको आमाइराउता धुइका केलाइ हिङन्हाखे। 9केलाइ इता पार्थिगेलाइ, मादिगेलाइ, एलामिगेलाइ रो मेसोपोटामियाको, यहुदियाको, कापाडोकियाको, पोन्टस रो एसियाता हिकालाइ हिन्हाहि। 10कालाउ फ्रिगिया, पामफिलिया, मिस्र रो कुरेनिता हिका लिबियाको हेथे माउजागेलाइ, रोमसो लोका यहुदि रो यहुदि मत मानेकालाइ न्हेमिङ हिन्हाहि। 11क्रेटता हिकालाइ रो अरबिगेलाइ बुङ हिन्हाहि, कालाउ केलाइ ताताइको राउता परमेस्वरको बारा कामगेलाइको कथन एम्बालाइसो हिङदोङन्हाखे।”
12एम्बालाइ झाराङ भारभुसाइतेङ एमि भेनेङहेङ एसा दोअ्लि तेङहि, “याको माने हाइ एइ?” 13कुलाउ हेअ्मि चाहिँ लेङपितेङ दोअ्हि, “एबालाइ पुर्हिका निघार आम्तेङ म्हाका हि।”
पत्रुसको बानाल
14कुलाउ पत्रुस तेएमि साल्तेङ दिङगिल्कालाइ दोफाङ जाअ्तेङ बारा गालाता एम्बालाइहेङ दोअ्हि, “यहुदियाता रो यरुसलेमता हिका झाराङ दादाओनेगेलाइ, नेलाइ इदोइ काथा रेम्फा हिङसु। 15हाइदोनु नेलाइ दोअ्काभाइपाङ एबालाइ म्हाका मान्थु, हाइपानु एला र्हिमाको कुह्वा खिनिङ बजेदोङखे। 16कुलाउ योएल आगाधुइकासो दोअ्का काथा इदोइ एइ:
17‘न्हु दिनागेलाइता इसिका ज्याङ दोअ्तेङ परमेस्वर दोअ्खे,
का झाराङ द्याङगेलाइर्हुता काङको हाङसा होप्याङका,
नेलाइको चानगेलाइ रो नेलाइको चामिन्दिगेलाइ आगाधुइका धुयावा,
नेलाइको वाजालाइ नजर तिनावा,
नेलाइको वाराङखाराङगेलाइ सोपोन्दा तिनावा।
18एइ, का ताइ बान्धाइ बान्धाइतिर्हुता इङको दिनाता काङको हाङसा होप्याङका,
एम्बालाइ आगाधुइका धुयावा।
19र्हुता आदेलता का भारभुसाइका काम
रो लेता सुमिङता चिनोगेलाइ तिङपावा,
जिसिकाङ: हिति, मे रो दुहाँको लोक्ता।
20परमप्रभुको बारा प्रतापको दिना लोका लाम्फा
बेला कितिकितिका रो तालि हितिभाइका इका जेनावा।
21कालाउ परमप्रभुको मिङ र्हुकावा,
इङको भालाइ निनावा।’#योएल २:२८-३२
22“इस्राएलिको द्याङगेलाइ, इदोइ काथा हिङसु, नासरतको इसु इसिका द्याङ हिघाहि, जाइहेङ परमेस्वर सरबङहिका कामगेलाइ, भारभुसाइका कामगेलाइ रो चिनोगेलाइसो नेलाइको आगाता साबित पाहि। 23परमेस्वर निधोपाका उपाइमाफिक रिम निङचाका इसुहेङ दुसकर्मि द्याङगेलाइको खुरसो नेलाइ कुरुसता टाङगाइतेङ सेअ्सुन्हा।#मत्ति २७:३५; मर्कुस १५:२४; लुका २३:३३; युहन्ना १९:१८
24“कुलाउ परमेस्वर वासेहेङ सिकासो सिन्हुपाहि। हाइदोनु सिका वासेहेङ गोर्हाइलि मादोहि।#मत्ति २८:५-६; मर्कुस १६:६; लुका २४:५ 25राजा दाउद बुङ इसुको बारेता एसा दोअ्का हिघाखे:
‘का प्रभुहेङ दिनाङ काङकोङ आगाता तिङखा,
वा का दोफाङ हिखे, एन्साङ का माथिखा।
26इदोइखातिर काङको कोन्धाङ लेङचाखे
रो काङको देतोङ बाखिन्काको ले लेखे।
काङको जिउ बुङ आसता सिन्हुतावा।
27हाइपानु ना काङको बायुहेङ पातेलता मालाअ्ध्याना,
ना ताइको पुनित सेवकको जिउ आइलि प्याना।
28ना कासेहेङ ज्यानको दामा तिङपाका हिन्हा।’
का नाङकोदोफा हितेङ ओसाभारापाङ लेङचाङका।#ले १६:८-११
29“काङको दादाओनेगेलाइ, केलाइको खाल दाउदको बारेता का निधोपातेङ दोअ्लि द्वाङका, वा सिहि रो लिअ्न्हाहि, कालाउ नानिको दिनाथिकापा वाको तोम हिदोङहि। 30दाउद एमि आगाधुइका हिनाङसिङ वा गेघाखे, परमेस्वर केरा चाका हिघाहि वाकोङ खालसो वाको गादिता एमिहेङ योम्पावा।#ले १३२:११; २ समुएल ७:१२-१३ 31लाम्फासोङ इदोइ तिङतेङ वा ख्रिस्टको सितेङ ल्होकाको बारेता दोअ्हि:
‘वा ना पातालता लाअ्धिन्हाहि,
ना वाको जिउ दोङ आइहि।’
32“इदोङ इसु ख्रिस्टहेङ परमेस्वर सिकासो सिन्हुपाहि। इदोइ काथाको केलाइ झाराङ दासि हिनाहि। 33इदोङखातिर परमेस्वर आबा इसुहेङ तोल्हेतेङ ताइको दाम्पाहा योम्पाहि रो ताइको कबोलमाफिक वासेहेङ पुनित हाङसा पिहि। इङकोङ पुनित हाङसा प्रभु इसु एला केलाइहेङ पिका हि, जेदोङ काथा नेलाइ एला हिङतेङ रो तिङतेङ हिसुखेना। 34हाइपानु दाउद ते सादेलता माताङहि, कुलाउ वा ताइमिङ दोअ्खे:
‘परमप्रभु काङको प्रभुहेङ दोअ्हि,
ना काङको दाम्पाहा योम।
35जेलाउथिकापा नाङको दुस्मनहेङ
नाङको खोकोइ ताअ्का माबान्हायाङका।’#ले ११०:१
36“इङकोङखातिर इस्राएलको झाराङ द्याङगेलाइ इदोइ काथा ग्याको- इसु, जाइहेङ नेलाइ कुरुसता टाङगाइसुन्हा, परमेस्वर वासेहेङ प्रभु रो छुटकारा पिका ख्रिस्ट बान्हाइहि।”
37यिदोइ काथा हिङतेङ एम्बालाइको कोन्धाङ कानाङकाना जेङहि। कालाउ पत्रुस रो बो साल्तेङ दिङगिल्कालाइहेङ एम्बालाइ हिअ्हि, “ओइ दादाओनेगेलाइ, केलाइ हाइ पालि?” 38पत्रुस एम्बालाइहेङ दोअ्हि, “कुकरम मानेसु रो नेलाइको कुकरम माफको भाअ्सिङ इसु ख्रिस्टको मिङता नेलाइ झाराङ चिभुअ्लि र्हुसु, कालाउ नेलाइ पुनित हाङसाको बर निङस्वाना। 39हाइपानु इदोइ बाचाचाहिँ नेलाइ, नेलाइको चान चामिन्दिकोभाअसिङ रो दुरे दुरेता हिका झाराङको भाअ्सिङ ेएइ, जाइजाइहेहेङ केलाइको प्रभु काइखे।”
40पत्रुस हेन्जाङ बो काथागेलाइसो एम्बालाइहेङ दासि पिहि रो एसा दोतेङ आर्ति पिहि, “इदोइ आसाति खालसो नेलाइ ताइमिङहेङ सिन्हुपासु।” 41कोलाउ जाइजाइ पत्रुसको काथा साअ्हि एम्बालाइ चिभुअ्लि र्हुहि। इङकोङ दिना चिभुअ्लि र्हुकालाइ सुमहाजार झोको थपिन्हाहि। 42एम्बालाइ साल्तेङ दिङगिल्कालाइको बिद्या, सङगति, तोले पेङलि रो पुकारता ए मन जेङतेङ लागितेङहिघाखे।
खान्धुरिगेलाइको सङगति
43साल्तेङ दिङगिल्कालाइ हेन्जाङ सरबङ हिका कामगेलाइ पातेङ हानेहि। एन्सा जेङलाउ द्याङगेलाइ परमेस्वरहेङ थिलि तेङहि। 44खान्धुर पाकालाइ झोको झाराङ एथानेङ हिघाखे। एम्बालाइको गोताङ आनेमानेगेलाइ माझाको जेङघाखे।#साल्तेङ दिङगिल्का ४:३२-३५ 45एम्बालाइ ताइको टाका काउरि मालमाता पिअ्तेङ गोइकालाइहेङ बाख्राइपिघाखे। 46एम्बालाइ ए मनको जेङतेङ थानता जोम्तेङ सङगति पाघाखे रो साअ्साअ्ता तोले पेङघाखे। एम्बालाइ लेङचातेङ पुनित कोन्धाङसो मिलितेङ प्रभु भतेर चाघाखे। 47एम्बालाइ दिनाङ परमेस्वरहेङ बाखिन्घाखे। बो द्याङगेलाइ बुङ एम्बालाइहेङ मोन्दाताघाखे। छुटकारा निङकालाइको गोटा एम्बालाइको हुलता प्रभु दिनादिनाङ बार्हेपापिहि।
S'ha seleccionat:
साल्तेङ दिङगिल्का 2: DHIM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2024 (Active), Wycliffe Bible Translators, Inc. All rights reserved.