Yùxanà 13
13
Yesù yè e re kàràndzin neè sàn nèè fòoŋ min niì
1Àyìwà, Geren n tsɛɛ̀ sɛr'là ni gbey tsuru, Yesù yè bà na à tɔ̀, ci wò yeè bo dziɲaan doùn, w'e bè e Fa Ŋaablà re, tɔ̀ waatsi na wɔɔ nòn. Tà doùn, nìì reè y'à raa dziɲaan doùn, à na twɛy kɛ̀niɔ̀n kudɛyn. À to yè è kɛ̀n kɔn fɔ e daùn.
2Àwà, Yesù ko e re kàràndzin neè ni fene fɔnɔn ɲɔɔn nà, à re kàràndzin neè ɲàn, nìi tsoo Yudasì, à fàà tsoo yè bà Shimɔ̀n Sikariyɔtsì, Sànwɔbaà na Yesù jàànfaà jiɔ̀ tɔ̀ duùn nòn. 3Yesù na à jaa tɔ̀, ci Fà Ŋaabla goò sapɛ dzyeèma wɔɔ wò suun, wo daun w'e bo Ŋaablà rii lè, wò to nà e kpɛyn sèè wò rii lè.
4Àwà, Yesù yè fù bo ɲwɛɛ̀n kùùn tɔ̀un, è vu ra mɛ̀yɛ blaa bo tsùù, è vya sɔn sen, è tɔ̀ ka e ɲanshì. 5Tà shɔ̀ùn, è yu ji koonfaa doùn, è maa, è kàràndzin neè sàn nèè fòo, à na vya rìi ka e ɲanshiɔ̀, è tɔ̀ ka è tsùsaa. 6À bèu wɔ Shimɔn Piyɛrì tsɛ, tɔ̀ yeè dzin à ra ci: «Tsìfaà, wo takia yè mun sàn nèè fòò ɔ̀ ?»
7Yesù yè dzin à ra ci: «Mun nìi faa, wo na à tɔ̀ dòònuùn ŋe waa, ŋà, wo nà nà à tɔ̀ bònè rìì.»
8Piyɛrì yè dzin à ra ci: «Mun naa sàn nèè ɔ̀, wo fa twɛy fòò fyeu !»
Yesù yè dzin à ra ci: «Mun ma wo sàn nèè fòò, wo dzii na ni mun ka goo sɔn pɛn ɲan dɛ waa.»
9Shimɔn Piyɛrì yè dzin tɔ̀ rii ɲàn ci: «Tsìfaà, maà dàn n san nèè bàsɔùn mà waa, n si rèè ko n kungɔɔ̀ sa foò.»
10Yesù yè dzin à ra ci: «Mòò riì yè e fooŋnà nòn, à na wɔɔ̀, tɔ̀ yeè e foò kpɛrɛ dɛ. À kpɛ̀yn dzia e san nèè bàsɔùn nì fòò sa, tà boshɔ̀ùn, à min niì sapɛ bàa fyɛɔ. Ye sa fyɛɔ, ŋà, à na ye sapɛ dɛ.»
11Mòò riì nà à jàànfa, à na tɔ̀ tɔ̀ nìi fa, tɔ̀ rii kamà, è dzin ci: «Ye sapɛ na fyɛɔ waa.»
12 #
Luk 22.27. Yesù nàu e re kàràndzin neè sàn nèè fòò do waatsi riì bwèy, è re mɛ̀yɛ blaa sèè ji, è tsuù ɲwɛɛ̀n nà e shɔùn. È dzin è ra tɔ̀un ci: «Mun nìi fau ye ra nèe, y'a dzuun tɔ ɔ̀ ? 13Ye mun kiri nìi faa "kàrànfaà" ko "Tsìfaà" tɔ ni e shi tsɛ, kàtsu mun tɔ̀ rii. 14Tà doùn, mun nìi Tsìfaà, min bà kàrànfaà, min ba ye sàn nèè fòoŋ, à wù ye sa yeè e si san ì fòò. 15Mun nèe fau nì, mun y'à ka ye jaa kpàdè, sànko, ye sa y'a fa e si ra, a ci mun y'à fau ye ka nìi tsuru. 16#Mat 10.24; Luk 6.40; Yux 15.20.Sààben na, mun nì ci e ra, jòòn na blà e tsifaà mà waa, kɛɛraa to na blà e kabaà mà waa. 17E ye ba twɛy goo rèè jaa tɔ̀, e y'a shi jiì tɔ̀ tsuru, e raà wùbeu.»
Yesù ci min niì ci wò re kàràndzian soo nà wò jàànfa
(Matsiyù 26.20-25; Marikì 14.17-21; Lukì 22.21-23)
18 #
Zab 41.10. «À na ye sapɛ gooma dekɔɔn dɛ, mun nìi reè boo n jaa ra, mun twɛy tɔ̀. Ŋà, fɔ Ŋaablà re Goomaa doùn gooma de dɔ̀unma bɔrɔɔ sɔn yeè bo e shi tsɛ, nìi yɛ ci:
"Mòò riì na mun ne ɲwɛɛ̀n ɲɔɔ̀n mun ka, tɔ̀ yeè e jaa kereu mun kpɛyn."»
19«Mun y'à dè tsùɔ ye ra dòònuùn, sani à goò yè nà wɔ. Tɔ̀ tsuru, è na wɔ, ye nà ɲɛn à ra ci à Mun nì. 20#Mat 10.40; Mar 9.37; Luk 9.48; 10.16.Sààben na, mun nì ci e ra, mun mòò riì kaɔ, mòò riì yè e tsiɛ tɔ̀ ra, tɔ̀ yeè e tsiiŋ mun nì nà. Mòò riì to yè e tsiɛ mun na, tɔ̀ yeè e tsiiŋ mun kabaà rìì là.»
21Àwà, Yesù tɔ̀ dèu min niì, à akiri yè gbiiman fɔ è bè geren. À y'à dè fyɛ tɔ̀un ci: «Sààben na, mun nì ci e ra, mòò sɔn nà mun jàànfa ye ɲan.»
22À tɔ̀ dèu min niì, kàràndzin neè yè e si siin siin bè, è ba mòò riì gooma dekɔɔn. 23Tɔ̀ y'a tàrà, kàràndzin neè mòò sɔn na ni, Yesù na nìi kɛ̀niɔ̀n. È tsùuŋmaà ɲwɛɛ̀n nà yè e nɔnkɔ̀nma, tɔ̀ kàràndzian na sàraɔ̀ Yesù ra ceu. 24Shimɔn Piyɛrì yè e si ŋààn tɔ̀ ra, ci è Yesù tey, è ba mòò riì gooma dekɔɔn. 25Tɔ̀ sa yeè e kanman be Yesù ɲìɛ̀ kpàkèrè, à y'à tey ci: «Tsìfaà, wo dziàn tsì rii là ?»
26Yesù yè dzin ci: «Mun ye bur'la tsun, mun y'à sìn mòò riì rà, à tɔ̀ tsìfa rìì.»
È bur'la tsun tɔ̀un, à y'à sìn Yudasì rà, Shimɔn Sikariyɔtsì dzin kpir'la. 27Tɔ̀ bur'la dziu sìn Yudà rà min niì, Sùtana yè dɔ̀n à ɲan. Yesù yè dzin à ra tɔ̀un ci: «Wo sào ni wo yè nìi fa, tɔ̀ fa tabe !»
28Àwà, gè o ge na ni ɲwɛyn ɲɔnma nɔ̀n, è pɛn na à tɔ̀, à tɔ̀ deò kùn nìi nà waa. 29Yudasì ɲɛyn marabaà nìi fa, swey na à siɛ̀n, ci Yesù dziɔn à ra rii, ci è bè Geren n tsɛɛ̀ sɛr'là gè rèè fì, tàmafa è bè gbakɔɔn reè kɔ̀. 30Tɔ̀ bur'la wɔu Yudasì suun min niì, Yudasì yè bo suu, tɔ̀ y'a tàrà tsitsiɛ̀ ni.
31Àyìwà, Yudasì boumaà shɔ̀ùn, Yesù yè dzin ci: «Dòònuùn, Adamà dziàn blàbee nà tɔ̀, è bà saabu Ŋaablà blabee yè tɔ̀. 32[À saabu rɔ̀n Ŋaablà blabee ye tɔ], Ŋaablà yɛr'la sa nà à to, à blàbee yè tɔ̀ wò saabu rɔ̀n. À nà tɔ̀ fa dòonen. 33#Yux 7.34.N dzyeèsi ì, mun kpɛ̀yn ni ye ka ŋe, ŋà, tɔ̀ na cian goo dɛ. Ye nà mun gaa, ŋà, mun soo riì dèu Dzyèèsìbee mòdzin neè rà, mun nà tɔ̀ dè ye sa ra dòònuùn, ci mun bèe min niì, ye fa dzi be mɔn waa. 34#Yux 15.12,17; Yux1 3.23; Yux2 1.5.Mun nà dzugooma xɔù yeu de ye ra nìi yɛ ci: Ye e si kɛ̀n. Mun ye kɛ̀niun kɛ̀nìùn'n kur'liì rà, e sa yeè e si kɛ̀n tɔ̀ tsuru. 35Ye ye ba e si kɛ̀niɔ̀n, è sapɛ nà à tɔ̀ tɔ̀ rii là, ci ye mun ne kàràndzin ì.»
Yesù dziun min niì ci Piyɛrì nà dzin ci à na wò tɔ̀ waa
(Matsiyù 26.31-35; Marikì 14.27-31; Lukì 22.31-34)
36Shimɔn Piyɛrì y'à tey ci: «Tsìfaà, wo bèe min ni ?»
Yesù yè dzin à ra ci: «Mun bèe gàne rìi ɲàn, wo fa dzi a gban bè mun kpɛyn mɔn dòònuùn waa. Ŋà, bònè rìì wo nà nà bè mun kpɛyn.»
37Piyɛrì yè dzin à ra ci: «Tsìfaà, feera mun fa dzi n gban bè wo ra dòònuùn ? À ni mun mà, mun yè n xɔɔn sìn wo kamà !»
38Yesù yè dzin ci: «À taki ni wo mà wo y'à xɔɔn sìn mun kamà ɔ̀ ? Sààben na, mun nì ci a ra, sani tsɛ̀keen yè ben she, wo nà bà à dè jaa zhììgi faɔ̀ nòn, ci wo na mun tɔ̀ waa.»
S'ha seleccionat:
Yùxanà 13: BDZU
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2024 Église Évangélique Mennonite du Burkina Faso (EEMBF) et SIL International