Yùxanà 4

Yesù ko Samarika taàn rè kaangoo

1-3Àyìwà, Faridziɲɛn rèè yè nà à myɛ̀n, ci Yesù kàràndzin giri tàr'la Yùxanà mà, è bà è jaara foo. Tɔ̀ to y'à tàrà, Yesù yɛ̀r'la naà mòò jaara foo waa, ŋà, à re kàràndzin neè rìì na mòdzian jaara foo. Faridziɲɛn rèè nìi dèe, Yesù tɔ̀ myɛ̀un waatsi riì bwèy, è bo Yude mar'la ɲàn, è sèè dɔ̀n be Galile mar'la ɲan. 4À bèkɔɔn doùn, à na wù è màrà sɔn fi shɛn dɔ̀n, tɔ̀ kir'là Samari mar'la. 5#Gok 33.19; Yok 24.32.Àwà, è bè tsyɛnbe Samari mar'la wɔ̀ sɔn na, tɔ kir'là Sisharì. Yàkubà na dzù rìi siɔ̀n e dzin kpiri Yusufù rà dan dan, tɔ̀ wɔ̀ɔ̀ dàn na gbàn tɔ̀ ra waa. 6Yàkubà rè kɔ̀r'na na ni mɔn nì. Yesù byɛunmaà jìɛ̀ doùn, è nà e tsuù tɔ̀ kɔ̀rɔ̀n dziɛ rà. Tɔ̀ y'a tàrà bwèè na gaa wɔ sènfi nòn.

7Àwà, Samarika taan sɔn yeè nà, ci wo nàa yu tsyɛn. Tɔ̀un, Yesù yè dzin à ra ci: «Yu sìn n na min n min.» 8Tɔ̀ y'a tàrà, à re kàràndzin neè na dɔ̀n beò wɔ̀ɔ̀ doùn, yè bè ɲwɛyn ɲɔnàma fì.

9 # Ɛdk 4.1-5; Nek 3.33,34. Samarika taàn yè dzin Yesù rà ci: «Kɛ̀n tsuru ? Wo rìi Dzyèèsìbee mòdzin, wo yu gaa mun Samarika taankɔɔn rè ò ?» Taàn tɔ̀ dèu, kàtsu Dzyèèsìbee mòdzin neè na e re goo sɔn pɛn dɔ̀ɔn Samarika reè ɲàn waa.

10Yesù yè dzin taàn na ci: «Ŋaabla mòò kɔ̀ɔ gè niì rà, wo ye ba nà tɔ̀ tɔ̀, tà ko mòò riì yɛ yuà fyɛɔ̀n wo re, wo yè bà na tɔ̀ tɔ̀, wo rìì na nà yu fyɛ̀n à re, à to na nà yu sìn wo ra, yu rìi jaamabee sìan mòdziìn nà.»

11Taàn yè dzin Yesù rà ci: «Tsìfaà, à na kɔ̀rɔ̀n fɛɛ wo re, kɔ̀r'na to tsun, tɔ̀ yu rìi jaamabee sìan mòdziìn nà, wo nà tɔ̀ tàrà dzùrù ? 12Ɲe fàbɔɔ Yàkubà nìi kɔ̀r'nee sìun ɲe ra, wo blà tɔ̀ mà gbɛ ? Tɔ kɔ̀r'nee yuà mìun, à dzin nèè, ko à re dzwɛka kur'là sa y'a yuà mìn.»

13Yesù yè dzin à ra ci: «Mòò o moò nèe kɔ̀r'nee yuà mìan, mìnoo nà tɔ̀ tsìfa kun ŋe. 14Ŋà, mun ye n naa yuà sìn mòò o moò rà, à y'à mìn, mìnoo na tɔ̀ tsìfa kun jàa dɛ. Mun nà yu rìi sìn à tsìfa ra, tɔ nà bà don kungɔ à ɲan, nìi biri boò è bè suu fɔ jaamabe dziù dòbɛɛ dzu.»

15Taàn yè dzin à ra ci: «Tsìfaà, tɔ̀ yuà sɔn sin n na, gè riì n'a to mìnoo mà n kun dɛ, n to mà nà mìin, ci n naà yu tsyɛn dɛ.»

16Yesù yè dzin à ra ci: «B'à re kpir'la kiri e sèè na mìin.»

17Taàn yè dzin à ra ci: «Kpiri na ni mun ne waa.» Yesù yè dzin à ra ci: «Wo dzin nìi fau, ci kpiri na ni wo re waa, wo sààben deu tɔ̀ ka.

18Kpiri nun nì wo sen dɔun, wo to ni kpir'liì kùùn dòònuùn, tɔ̀ na wo re kpiri waa. Wo sààben ni dèu.»

19Taàn yè dzin tɔ̀un ci: «Tsìfaà, m'a jàa, ci wo Ŋaablà re kɛɛra rii. 20Ɲe fàbɔɔ rèè Ŋaablà blabeu nèe jèn nèe tsɛ. Ye Dzyèèsìbee mòdzin neè to dziàn, ci Ŋaablà blabèmaà ni min niì, tɔ Yerusalɛmùn nì.»

21Yesù yè dzin à ra ci: «Tàan, ɲɛn à ra, ci waatsi nàa waatsi ra, Fà Ŋaablà yeè blàbe, tɔ̀ fa bà nèe jèn nèe tsɛ goo dɛ, à to fa bà Yerusalɛmùn goo dɛ. 22Ye Samarika reè, ye nìi blàbee, ye na à tɔ̀ waa. Ɲe Dzyèèsìbee mòdzin neè, ɲe nìi blàbee, ɲe y'à tɔ̀. Àwà, Ŋaabla mòò tsià mòò riì ka, tɔ boo ɲe Dzyèèsìbee mòdzin neè rìì ɲàn. 23Ŋà, waatsi nàa waatsi ra, à yɛ̀rɛ̀ to yè bà wɔɔ nòn sa, nìì reè Ŋaablà blabebaa taki reè, twɛy nà Fà Ŋaablà blabe à re Dzia ko sààbeen baraka rɔ̀n. Mun tɔ̀ dèu, kàtsu, Fà Ŋaabla mòdzin ì gaa, nìì reè y'à blàbee tɔ̀ tsuru. 24A y'a myɛ̀n Ŋaablà, à Dzia rìì. Nìì reè to y'à blàbee, à wù twɛy y'à blàbe tɔ̀ Dzia ko sààbeen baraka rɔ̀n.»

25Taàn yè dzin Yesù rà ci: «Mun y'à tɔ̀, ci sii sɔn see, Masiyà nà nà, è nìi kir'là Ŋaablà Jaara Modzìàn. À ye na waatsi riì bwèy, à nà goò sapɛ jaa dè mùn na.»

26Yesù yè dzin à ra ci: «Mun nìi goomakɔɔn yɛ wo ka, à mun nì.»

27Àwà, è ni tɔ̀ ra, Yesù rè kàràndzin neè yè nà wɔ. Yesù goomakɔɔn tàan ka, tɔ̀ goò yè ji è dzii tsɛ. Ŋà, è ɲan, pɛn na dzi à tey ci: «Wo fee gaa taan ree re ?» Tàà «Feera, wo goomaa à ka ?»

28Tɔ̀un, taàn yè e re yu tsyɛɛn dziniɛn bàto mɔn, è sèè be wɔ̀ɔ̀ doùn, è bè dzin mòdzian nà ci: 29«Ye nà kpiri sɔn siin, mun goo o goo fa dɔun, à tɔ̀ sapɛ deu mun na. À fa bà Ŋaablà Jaara Modzìàn fyeu ɔ ?»

30Mòdzian yè bo wɔ̀ɔ̀ doùn tɔ̀un, yè nà Yesù kpà.

31Tɔ̀ waatsia ɲàn, kàràndzin neè na ni Yesù màfyɛ̀ɛ̀n nà, ci è ɲwɛyn ɲɔn. È dziàn à ra ci: «Kàrànfaà, ɲwɛyn ɲɔn.»

32Ŋà, Yesù yè dzin è ra ci: «Ɲwɛyn ni mun ne, mun y'à ɲɔn, ye na nìi tɔ̀ waa.»

33Kàràndzin neè yè e si tey tɔ̀un ci: «Mòò yè bà nàu à kɔ̀ ɲwɛyn gbɛ ?»

34Yesù yè dzin è ra ci: «Mun naa ɲwɛɛ̀n nì yɛ, mòò riì mun kaɔ, min tɔ̀ sàɔ shi jiì, à to faagoo rìi kɛ̀ɛ̀yfaɔ̀ mun mà, min tɔ̀ fa vyɛ e daùn. 35Ye yɛ̀r'leè rìì na dziàn, ci à tou kuu nààlen shìmàn gaa yè wɔ ɔ ? Ŋà, mun nì ci e ra, ye e jaà ɲansen, ye dzù rèè siin, shìmaan ni min niì, à wɔu gaa. 36Mòò riì shìmaan gaa, tɔ̀ yeè e raa sàr'là tàr'la nòn. Àwà, à shìmàndzian nì ladzyeè tsùɔ jaamabe dziù dòbɛɛ kamà. Tɔ̀ tsuru, mòò riì shìmaan sìa, ko mòò riì y'à gaa, twɛy fiɛ̀ sa taama dzibee e si re. 37Tàlen nìi y'à dèe ci: "Sɔn shìmaan sìa, sɔn yeè bà à gaa", tɔ sààben taki rii. 38Mun ye ka bèu dzù sɔn ɲan, ye na faagoo faɔ̀ min niì waa, ci ye yè b'a shìmaan gaa. Swey y'à faagoò fau, ye yè è re byɛnbee tɔ̀n'nà tàrà.»

39Àwà, taàn dziunmaà ci: «Mun goo o goo fa dɔun, à tɔ̀ sapɛ deu mun na, tɔ̀ goomaa kamà, Sisharì wɔ̀ɔ̀ Samarika reè giri yè ɲɛn Yesù rà.»

40Samarika reè nàu dzi Yesù tsɛ waatsi riì bwèy, y'à màfyɛ̀n, ci è to ye ka. Yesù yè to mɔn tɔ̀un, è bwèy fii fa è ka. 41Tɔ̀un, Samarika reè giri yè ɲɛn Yesù rà kɔn, à yɛ̀r'la goomaumaà kamà è jaa ra. 42Yè dziàn taàn nà ci: «Wo raa goomaa shɔ̀ùn ɲe ɲɛun à ra. Ɲe yè ɲɛn à ra kɔn, kàtsu à goomau ɲe yɛ̀r'la jaa ra. Ɲe y'à tɔu, ci mòò riì dziɲaan mòdzian tsibaà e re gooɲaan nà, à wò rii taki.»

Yesù rè kabagoo goo fiiraa faumaà Galile mar'la ɲàn

43Àyìwà, tɔ̀ bwèy fiɛ̀ faumaà shɔ̀ùn tɔ̀ gàne rɔ̀n, Yesù yè bo mɔn, è dɔ̀n be Galile mar'la ɲàn. 44#Mat 13.57; Mar 6.4; Luk 4.24.Tɔ̀ y'a tàrà, Yesù yɛ̀r'la na à dè dɔɔ̀n, ci blàbe na ni Ŋaablà re kɛɛra pɛn tsɛ e yɛr'la fàtsiɛ doùn waa. 45#Yux 2.23.Àwà, Yesù nàu bè wɔ Galile mar'la ɲàn waatsi riì bwèy, Galileka reè y'à kùùntsiu'n kuru wube, kàtsu è bèumaà nà Yerusalɛmùn Geren n tsɛɛ̀ sɛr'là rè, Yesù kabagoo goo ge o ge fau mɔn, è tɔ̀ sapɛ jau.

46 # Yux 2.1-11. Àwà, Yesù yè e kpɛyn sèè na tɔ̀un Kanà wɔ̀ rɔ̀n, Galile mar'la ɲàn, à yuà lakere bau mììnge min niì. Àwà, màsà kpir'là raa fàànma bla sɔn na ni tɔ̀ raa dzin kpir'la yè bà na ɲìniɔ̀n Kapɛrinaxumùn wɔ̀ rɔ̀n. 47Tɔ̀ kpir'la y'à myɛ̀un min niì, ci Yesù boo Yude mar'la ɲàn, è nà Galile mar'la ɲàn, è b'a kpɛyn. À bèu wɔ, è Yesù màfyɛ̀n, ci è bè Kapɛrinaxumùn, è wò re dziɛ̀n cɛrɛmabe, kàtsu, à gaa san. 48Yesù yè dzin à ra ci: «Ye ma tàànmàshɛn kabagooma ì jà fyeu, ye kpɛ̀yn fa ɲɛn ja mun na ni waa !»

49Fàànma blaa yè dzin Yesù rà ci: «Tsìfaà, nà n ne tsii. Wo ma na, mun ne dziɛ̀n nà san.»

50Yesù yè dzin à ra ci: «A kpɛyn sèè a re tsii, wo re dziɛ̀n cɛrɛmabeu.»

Kpir'la yè ɲɛn Yesù dèvuà rà, è dɔ̀n be. 51À bèkɔɔn, à re faagoofadzin neè yè nà à kùùntsi. Yè dzin à ra ci: «Wo dzin kpir'la cɛrɛmabeu.»

52À yè è tey, ci wò dzin kpir'la fyanbeu waatsi kɛn ni ɲàn ? Yè dzin à ra, ci màtaà y'à bàjiu kuru ɲɛ̀rɛɛ̀ rɔ̀n, bwèè jɛ̀ngɛuma dɛ̀ɛniàn shɔ̀ùn. 53Fàmaa y'à jà tɔ̀un, ci waatsi riì Yesù dziun wò ra, ci wò re dziɛ̀n cɛrɛmabeu, à tɔ̀ waatsia rìì. Tɔ̀un, à ko e re mòdzìnbee sapɛ yeè ɲɛn Yesù rà. 54Àwà, tɔ̀ rii bàu Yesù rè kabagoo goo fauma rèè fiiraa Galile mar'la ɲàn. À tɔ̀ fau, à boumaà shɔ̀ùn Yude mar'la ɲàn.

S'ha seleccionat:

Yùxanà 4: BDZU

Subratllat

Comparteix

Copia

Vols que els teus subratllats es desin a tots els teus dispositius? Registra't o inicia sessió

Més informació sobre Bible Dzùùngoo Unicode

Yùxanà 4

Versets bíblics populars de
Yùxanà 4

La Bíblia:

Dzùùngoo

Versió: Bible Dzùùngoo Unicode - BDZU

Yùxanà 4

Yùxanà 4

Versets bíblics populars de Yùxanà 4

La Bíblia:

Dzùùngoo

Versió: Bible Dzùùngoo Unicode - BDZU

Yùxanà 4

Versets bíblics populars de
Yùxanà 4