KEJADIAN 16
16
Hagar ru Ismael
1Ku mase ajeh, Sarai kenah Abram pekseg kibekenon. Tapi Sarai mong numom hambe kerdor ju lengrik Mesir imuh Hagar. 2Jadi, Sarai kiurok nu Abram, “Yahweh pek Kiog eng ngbekenon. Kerana ajeh, besamaloh ru hambe eng ajeh. Belok panei kek doh dapat kiperyos numom kenon ha hek.” Lalu Abram kibesetuju ru engrok ikenah ajeh. 3Sarai kenah Abram kiog Hagar ihambe nu igengsir sebegei ikenah kedue. Ku mase ajeh, Abram kigei ku Kanaan ya 10 tahut. 4Abram kibesama ru Hagar lalu kerdor ajeh pen kimakok. Bile Hagar ya kipanei ilei ajeh ya kimakok, kek kijadi sumbong ru kihina ha Sarai.
5Telas ajeh Sarai kiurok nu Abram, “Eng ya ngog hambe eng nu hek, tapi sejak kek kimakok, kek kihina eng. Hal adeh salah hek. Semoge Yahweh Kipeadel bok antare har de betol, hek atao eng.”
6Abram kiberlag, “Kek hambe hek ru hek bekuasa nu kek. Behloh nu kek sesuka sengik lihek.” Lalu Sarai kibekelaku kejam nu Hagar lei kijar ju kenjeh.
7Ku kateh iceknip nu padag guron Syur, Hagar kibehenti beg kacoh teu ku padag guron. Ku pajehloh malikat Yahweh kibakek ha Hagar. 8Malikat ajeh kiurok, “Hagar hambe Sarai, hek ju belok ru nu belok haet?”
Hagar kiberlag, “Eng ngjar ju tuan lieng Sarai.”
9Lalu malikat Yahweh ajeh kiurok, “Jogloh ru taatloh nu tuan hek.” 10Malikat kiurok nij, “Eng doh ngog kenon-cenok de ihad jeoi nu hek lei pek mong numom pen de dapat bekira ha enai.”
11Malikat Yahweh kiurok nij nu kek,
“Hunen hamakok
ru hek doh haperyos numom kenon keral.
Sebotloh imuh Ismael#16:11 Ismael: Muh adeh imaksod, Jenang Kicerngai.
kerana Yahweh ya Kicerngai jengnam hek.
12Kenon hek ajeh doh kisui begei keldei liar.
Kek doh kilawan jap-jap sengoi
ru enai doh nailawan kek.
Kek doh kisui maseg ju dikdij isesedara.”
13Hagar kibetanya ku kateh isengik, “Betolka eng ya ngneng ha Jenang de Kiperatik eng?” Kerana ajeh, kek kiog nu Yahweh de ya Kibelwal nu kek ajeh muh adeh: ‘El-Roi,’ imaksod ‘Jenang de Nengneng.’ 14Ajehloh isebab perigi ajeh bigelar ‘Beer-Lahai-Roi,’ imaksod ‘Perigi Ilei de Sui de Nengneng Eng.’ Perigi ajeh ku engkap Kades ru Bered.
15Telas ajeh Hagar kiperyos numom kenon keral, lalu Abram apak sanget ajeh kisebot muh ikenon ajeh Ismael. 16Ku mase ajeh, umur Abram 86 tahut.
S'ha seleccionat:
KEJADIAN 16: AEH
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.