Yohan 7
7
Shiyat Bóy sv̀ng Yesu di we
1Wemèpvng Yesu nø Galili móng taq tvríshìá:mì. Yuda vsv̀ng shølshúrìí Àng kaq shvtlv́m wàò rvtnø̀, Àng nø Yuda móng sv̀ng dí màmvyǿ. 2Wedvgvp nø Yuda vsv̀ngrìò Shiyat Bóy tuq yùl ráì. #Lew. 23:34; Drd. 16:13-15 3Àngnvmpèlaí Àng sv̀ng, “Nàí èwàò we bv̀nlìrì nø, Nà coqcv́nrìí gø yv́ng lúnlv́m rvt, yayv́ng kèní èbúng nø̀ Yuda móng sv̀ng èdivm. #Yoh. 2:12; Mat. 12:46; Dzr. 1:14 4Vdè dvgùng lvshv̀ngvm dø wáshì mvyǿ we kagǿ gø mvyø̀:ní wàò vsv̀ng màvl. Nàí yadv́ng pv̀n èwàò rì taqkèní mònggàng sv̀ng Nà vdè dètánshì,” a:lòe. 5Kadø íe wani àngnvmrì gø Àng sv̀ng mvkv́m. #Mat. 12:46 6Wekvt Yesuí àngmaq sv̀ng, “Ngà rvtø̀ shini mvhøqò. Nàmaq nø kadvgvp gø dí dv̀ng íe. #Yoh. 2:4 7Rvgaqí nø nàmaq sv̀ng shvngolv́m màvl. Ngà sv̀ng nø shèngonge. Pàwá wani àngmaqò bv̀nlì mvgv́m rì Ngàí dvta:nò rvt íe. #Yoh. 15:18-19 8Nàmaq nø bóy sv̀ng èngangv́mnø̀ng. Ngà rvtø̀ nø shini mvhøqò rvtnø̀, yabóy sv̀ng Ngà mvdøng,” a:lòe. 9Yesuí àngmaq sv̀ng yadv́ng pv̀n shø̀:nò dá:ngí, Àng nø Galili móng taq v̀l ráì.
10Íwe àngnvmrì bóy sv̀ng dìá:mì mèpvng, Àng gø vsà:ngí mvdǿ:mò dø mvyø̀:ní ngangá:mì. 11Yuda vsv̀ng shølshúrìí nø, bóy yv́ng Àng kaq láò nø̀, “Àng kayv́ng vl má?” wa rø:tnòe. 12Vsv̀ng loksokrì nø Àng dang bønbøn wa vrùnge. Tiqmaqí, “Àng nø vsv̀ng shvlá íe,” wae. Dvgá tiqmaqí nø, “Mø̀í, À:ngí nø bashàrì kaq shvmà:nòe,” wae. 13Íwe àngmaq nø Yuda vsv̀ng shølshúrì kaq svre rvtnø̀, Àng dang dèdè nø mvshø̀n. #Yoh. 9:22; 12:42; 19:38
Bóy taq Yesuí mvshǿl shø̀:nò we
14Yesu nø bóy pv̀nglà ni taq, Noqngø̀m Tø̀ngnø sv̀ng ngangá:mì nø̀ shvngø:tnòe. 15Wekvt Yuda vsv̀ngrì dà nø̀, “Vsv̀ng yapè nø kàru màcvnshìshaq í we, kayv́ng kèní yadv́ngte sháò má?” wae. #Mat. 13:54; Luk. 2:47
16Yesuí àngmaq sv̀ng, “Ngàí shvngøtnò kà nø Ngàò mø̀í. Ngà sv̀ng dèzv́r dakngà pèò kà íe. #Yoh. 12:49 17Gvray nøt sv̀ng cv́n mvyǿ we kagǿí gø Ngàí shvngøtnò kà nø Gvray yv́ng kèní í má, mø̀íni Ngà nø:tní shø̀nò we í má, wa lòng sv̀ng shá daqòe. 18Vdè nø:tní shø̀:nò gǿ nø vdè dvgùng láshì we íe. Àng kaq dvzv́r daqà pè dvgùng sv̀ng láò gǿ mv̀ng nø, døngman gǿ í nø̀ Àng vdòng taq mvdìng lòng màvl. #Yoh. 5:41,44 19Nàmaq sv̀ng Moshií Dvrá èzí yv̀ngshà we mø̀í má? Íwe Dvrá cv̀n we tiqgǿ gø mèv̀lnø̀ng. Nàmaqí Ngà sv̀ng pàwá shvtlv́m èwàshàe?” a:lòe. #Yoh. 5:16,18,47; Dzr. 7:53; Rom. 2:17-29
20Vsv̀ng loksokrìí, “Nà nø cáng dèchøpme. Kagǿí Nà sv̀ng shvtlv́m èdv́ne?” wa vtá:nòe. #Mak. 3:21; Yoh. 8:48,52; 10:20
21Yesuí, “Ngàí vtiqlv́m tiqlòng wv̀ng bǿngònø̀ng nø̀, nàmaq shvngbe èdànø̀nge. 22Moshií nàmaq sv̀ng rvmøl vtóng èzí yv̀ngshà. (Àngjǿng nø rvmøl vtóng nø Moshi taqkèní mø̀í. Vkop vkàngmaq kèní lè íe). Wervt nàmaqí nø lvngàsvrécèrì kaq Narni taq rèmølnø̀nge. #Nnp. 17:10-12; Lew. 12:3 23Moshi dvrá màcatlv́m dvpvt, lvngàsvrécè tiqgǿ kaq Narni taq dv́ng rvmøl daq nìnø, Narni taq Ngàí vsv̀ng tiqgǿ góngkøp dvzǿm bǿngà lòng rvt, pàwá Ngà sv̀ng shv̀mná shèríshìnø̀ng má? #Yoh. 5:8 24Mvdv̀m lap mv̀rshv̀m taqkèní wa kà mèngénø̀ngni. Døngman dø mv̀ng kà èngénø̀ng,” a:lòe. #Yoh. 8:15
Àng nø Meshia í má?
25Yerusalem vsv̀ngrì tiqmaq yadø wae. “Àngmaqí shvtlv́m wàò pè nø, yapè ni mø̀í má? #Yoh. 7:19 26Íwe èyv̀ngnø̀ng, Àng nø dèdè chaqdvp kà shø̀n nìgø, Àng sv̀ng àngmaqí pàgø mva:lò. Yapè nø Meshia ni í we sv̀ng, shølshúrìí jø̀ngjǿng dǿ:mò we dv́ng mø̀í? 27Ínìgø yapè nø kayv́ng kèní í we nøngmaqí sháìe. Meshia di daq kvt nø, Àng kayv́ng kèní í we kagǿí gø mvshá lú:ngò.” #Yoh. 7:41
28Noqngø̀m Tø̀ngnø taq Yesu vkiq sórí shvngø:tnò nø̀, “Ngà kagǿ ǿngà we nv̀ng Ngà kayv́ng kèní ǿngà we sv̀ng nàmaqí jø̀ngjǿng èsháshà má? Ngà nø Ngà nø:tní dø̀ng dakngà we mø̀í. Ngà sv̀ng dèzv́r dakngà pè nø dìng pè í we nàmaqí Àng kaq mèshánø̀ng. 29Íwe Ngàí Àng sv̀ng shángòe. Pàwá wani À:ngí Ngà sv̀ng dèzv́r dakngà nø̀ Ngà nø Àng yv́ngkèní dø̀ng dakngà,” a:lòe. #Mat. 11:27 30Wekvt àngmaqí Àng sv̀ng tvplv́m wàòe. Ínìgø Àng rvtø̀ shini mvhøqò rvtnø̀, kagǿí gø Àng sv̀ng mvta:pmò. #Luk. 22:53; Yoh. 8:20; 13:1 31Vsv̀ng loksokrì taqkèní mvme gǿ Àng sv̀ng kv́m ráì. Àngmaq nø, “Meshia tuq daq kvt gø, yapèí wàò we shálv́m mvshv́lpvrárì mvdv̀m nø damvwà daqòni,” wae.
#
Yoh. 8:30; 10:42; 11:45; 12:42 32Vsv̀ng loksokrì Yesu dang bønbøn wa vrùng we sv̀ng Parisirìí tá bǿà kvt, shvrúngshú vjìrì nv̀ng Parisirìí Noqngø̀m Tø̀ngnø vsóngshúrì kaq Yesu sv̀ng tvplv́m dvzv́r bǿà.
33Yesuí, “Ngà nø nàmaq nv̀ng tiqlvngcè wa vl dá:ngí, Ngà sv̀ng dèzv́r dakngà pè yv́ngsv̀ng vtv́ngvme. #Yoh. 13:33 34Nàmaqí Ngà sv̀ng èláshà nìgø lá mèlún lóngshà. Ngà vl yv́ngsv̀ng gø nàmaqí dí mèlún lóngnø̀ng,” a:lòe.
#
Yoh. 8:21; 13:36; 17:24 35Yuda vsv̀ngrì nø, “Vsv̀ng yapè nø nøngmaqí lá mvlúnì høq kayv́ng sv̀ng dìlv́m wa má? Àng nø Helenirì vdòng taq vshin yà:ngì rì yv́ngsv̀ng di nø̀ Helenirì sv̀ng shvngøtlv́m wa má? 36‘Nàmaqí Ngà sv̀ng èláshà nìgø lá mèlún lóngshà. Ngà vl yv́ngsv̀ng gø nàmaqí dí mèlún lóngnø̀ng,’ wa Àng shø̀n kà nø kadø wa we í má?” wa vrùnge.
Kv́m rìí Shànshér Pvlàcè lúnlv́m dang
37Bóy lv̀ngdø̀m ni, ring vtvng ni taq, Yesu rip nø̀ vkiq sórí, “Bál vsv̀ng vl nìnø, Ngà yv́ng di nø̀ laq aq ra. #Lew. 23:36; Yoh. 4:10,14 38Ngà kaq kv́m gǿ nø, Shànshér Kàru taq vshǿnshaq dø tiqdvchá, àng vdòng rv́m kèní cúnshì we tì àngwàng vyø longe,” a:lòe. #Esa. 44:3; 55:1; 58:11; Ezk. 47:1,12; Zek. 13:1; 14:8 39À:ngí yadø shø̀:nò lòng nø, Àng kaq kv́m rìí lúnlv́m í we Pvlàcè sv̀ng wa kà íe. Íwe, Pvlàcè nø shini mvzí daqò rvtø̀ íe. Pàwá wani Yesu nø ngø̀rdvgùng shini màshvringshaq íe. #Yoh. 16:7; 2Kr. 3:17
40Vsv̀ng loksu:kngí kà yarì tá bǿà kvt, tiqmaqí, “Yapè nø jø̀ngjǿng ni Kàdvtutshú wepè íe,” wae. #Drd. 18:15; Yoh. 6:14 41Dvgámaq nø, “Yapè nø Meshia ni íe,” wae. Íwe tiqmaq nø, “Kayv́ng! Meshia nø Galili kèní bunglv́m mø̀í. #Yoh. 1:46 42Meshia nø Dawi dvgø̀ng kèní bung long nø̀, Dawi vl yà:ngì we Betlehem mvrìng kèní bung longe, wa nø̀ Shànshér Kàru taq shø̀:nò we mø̀í má?” wae. #2Sm. 7:12; Shz. 89:3; Mik. 5:2; Mat. 2:5-6; 22:42 43Wervt vsv̀ng loksok nø Yesu rvt vzø̀ng lú:ngì. #Yoh. 9:16 44Tiqmaq nø Àng sv̀ng tvp mvyǿ nìgø, kagǿí gø Àng sv̀ng mvta:pmò. #Yoh. 7:30
Yuda vsv̀ng shølshúrì Yesu kaq mvkv́m we
45Noqngø̀m Tø̀ngnø vsóngshúrì vtv́ng ráì kvt shvrúngshú vjìrì nv̀ng Parisirìí, “Kadø í rvt Àng sv̀ng mètvpmvtnø̀ng má?” wa rø:tnòe. #Yoh. 7:32 46Vsóngshúrìí, “Vsv̀ng yapè shø̀n dø nø kagǿ gø mvshø̀n dvr,” wa vtá:nòe. #Mat. 7:28-29 47Parisirìí, “Nàmaq sv̀ng gø we pèí shèmàn bǿshà má? 48Shølshúrì, mø̀íni Parisirì taqkèní, Àng sv̀ng kv́m we tiqgǿgǿ vle má? #Yoh. 12:42 49Dvrá sv̀ng mvsháò we vsv̀ng loksok yamvdò nø, mvtv́nshaq íe,” a:lòe.
50Shølshú mvdò taq vbá nø̀ vzv̀ng Yesu yv́ngsv̀ng dìa:pmì pè Nikodimuí àngmaq sv̀ng, #Yoh. 3:1-2 51“Àng kà sv̀ng vzv̀ng màtáshaq, à:ngí wàò lòng gø màgúnshaq, vsv̀ng tiqgǿ sv̀ng kàngélv́m dvrá vle má?” a:lòe. #Drd. 1:16-17; 19:15 52Àngmaqí, “Nà gø Galili kèní èíe má? Kàrurì taq ègù:nò. Galili kèní nø kàdvtutshú tiqpè gø mvbung dvr we èshá lú:ngòe,” a:lòe. #Yoh. 1:46; 7:41 53Wedá:ngí àngmaq shvngbe vdèdè chø̀m loá:mì.#7:53 Yoh. 7:53-8:11 nø darì kàru àngshá tiqmaq taq màbá.
S'ha seleccionat:
Yohan 7: GSM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2024, Rvcv́ngcè Kàru Gomidi Kristu Shvngø̀mré. All Rights Reserved.