Matiyu 8
8
Yeso è matswa ya modwa-ehwyá
(Marku 1:40-45; Luka 5:12-16)
1Atan a Yeso è shwa ara a sen mo hwì hon ángá, be nobǝ embo embo è ba ye. 2Kè akan, nobǝ akan, ya modwa-ehwyá è bwa nggwa ekpanvǝ mbwe chafya mbwe nè jan, “Etsodwe, a no o dgyan anga, o no ngge echakpo a o ti ma a tswa m.”
3Yeso è ywa bu mbwe ti yi ye a ju nè jan, “M dgyan anga, ben ematswam.” Kè akan modwa-ehwyá éè no a ju nobǝ hon ángá, è mbwida gu. 4Kǝnggwa Yeso è jan nobǝ hon jan, “We di jan, o jan mbo nobǝ akan mò e bwe ngge bo na ra, tea ken tú chu o a zǝn ekǝ́n hon, we no mò etinom a Mosa è jan, evǝa ge e tú be nobǝ jan o ben ara ematswam ángá.”
Chaebi mo chu mo yakàn mo Roma akan
(Luka 7:1-10)
5Atan a Yeso è kwashi ara Kapanahum ángá, chu mo yakàn mo ya a Roma akan è bwa a zǝn ye, nè bgó Yeso jan ne bwe e jwa ye. 6Gè jan, “Etsodwe, ya mochi mam dwano a sen a mu, a tswa ju engǝfǝfǝ, ngge ge ngǝ ekan anga àywá.”
7Yeso è jan ye, “M ken a ma a tswa ye.”
8Tea chu mo yakàn hon è janfwe ye, “Etsodwe, m kǝn m we bwa a mbwe m ra, tea jan fwa kpwà ara, ya mochi mam a ben ematswam. 9Adia a me e chu m, m no a bu mo emwentì, m no ngge be yakàn a bu mam. Ano m jan akan, ‘Nya,’ ge nya anga. M jan e nokǝ̀n, ‘Bwa,’ ge bwa anga. M jan ya mochi mam, ‘Bwe mò ena,’ ge bwe nó anga.”
10Atan a Yeso è fo fwa ena ángá, gè tàn ebwikpe, nè jan ngge be ye è ba ye anga jan, “Ebi m jan nye anga, a engga mo be ya a Esǝrela binbin, m chà didi m nobǝ akan e no ngge chaebi echakpokpo yishwa ena ra. 11M jan nye anga, be nobǝ embo a vǝ chá notà ngge nodgó bwa a chu, na de adi esǝ hon a tswa zǝnotì mo Ehwya ngge Ebrayi, Eshaku ngge Yakubu. 12Tea ba nyo ya àa kwa a tswa zǝnotì mo Ehwya ángá, a vǝ́ a je, vǝ́ kwa a shi a tswa etwafǝfǝ, zǝn a ba kpedwa na kǝ́n san ángá.”
13Ekǝnggwa Yeso è jan chu mo yakàn hon jan, “Nya. Ba bwe o nó, a ken a tén abu o tsǝ́ekǝ̀n no ángá.” Ya mochi mo chu mo yakàn hon, è ben tén ematswam hon atan enò.
Yeso è matswa be nobǝ embo
(Marku 1:29-34; Luka 4:38-41)
14“Atan a Yeso è kwashi a mbwe Bitru ángá, gè di gwé Bitru hon ndegwa è dwano a sen adi edgye. 15Gè yi adi bu mo ndegwa hon, edgye hon è twagwa ye. Gè nyi etkyen nè bwe mode no Yeso.
16“Edgó nò eni, bè kpu be nobǝ embo be ya è no ngge engǝ́ esera bwa a zǝn ye. Ge nyonvǝ́ be engǝ́ esera hon gwa a je ngge fwa ejanm a vǝ kpwà ara, nè matswa gu be ya è no ngge modwa ángá. 17Mò hon a Yeso è bwe ángá, è no ebwedefǝm mo fwa mo efojan Eshaya è jan, ekpe ekpe jan:
“Ge kpuvǝ́ ara be atkigwa mo je
n matswa ara be modwa mo je.”
Ekan e bwa anga a chu ebam mo Yeso ángá
(Luka 9:57-62)
18Atan a Yeso è di be nobǝ embo, è ngàhwya ye no ángá, gè jan be etsonchi mbwe jan ne, be e vǝ́ jengǝ̀ mo edan hon. 19A bè chà nya be ra ángá, etumo mo edon akan è bwa a zǝn ye nè jan, “Etumo, ma ba o a ken a egwa egwa mo be zǝn a o ken anga.”
20Yeso è janfwe ye jan, “Be kwàkpan dwa ngge be edu a be dwa anga, be nwendnye dwa ngge be afku mo be, tea a me, Nwen Nobǝ hon, m ben m zǝn a ma tu chu mam ángá ra.”
21Akan efki a engga mo be ye è ba ye anga è jan, “Etsodwe, ma ba o, tea gwa m atan a àtà m fǝ ara, m di ara ye sangǝ́, m chà a bwa.”
22Tea Yeso è janfwe ye, “Ba m, gwa be ya e fǝ ara adi engǝ́ ángá, be e di sojube.”
Yeso kpón fyochu dgyén
(Marku 4:35-41; Luka 8:22-25)
23Kǝnggwa Yeso è kwashi a tswa mo ngga hon, be etsonchi mbwe è kwashi èé be, bè kwa ara enyam. 24Abu bè no nyaken ángá, kè akan, fyochu echakpokpo è no kpo bwa anga a chu edan hon, nè tsǝ mbǝ hon fǝ́ bwa nggwashi a tswa mo ngga abu ge fka a bwi be. Tea Yeso è dwa dan anga atan enò. 25Be etsonchi è ken fǝ́zǝ ye, nè tandwa jan, “Etsodwe, tivǝ́ je. Je tkò anga.”
26Gè janfwe be, “Bwe engǝ nye tsen etsentsen anga àywá? A nye be ya chaebi mo nye cha ye kpo ra.” Kǝnggwa, gè nyi etkyen nè kpón fyochu ngge mbǝ hon éè fǝ́ anga dgyén, zǝn è tswa gushi ju dgye enó.
27Be etsonchi hon è tàn ebwikpe nè jan, “Nobǝ hon ena no engǝ? Èé be fyo ngge mbǝ e fǝ́ anga tse ye?”
Yeso è matswa be ndedon fà ya éè no ngge engǝ́ esera ángá
(Marku 5:1-20; Luka 8:26-39)
28Atan a bè penyi vǝ́ ara jengǝ̀ chá efa sǝnsen mo Garasina ángá, be nobǝ fà ya éè no ngge engǝ́ esera ángá, è vǝ chá afkudì bwa ben ye. Bè no be ya è ngga kàn anga àywá, enona, ende akan è dgyan didi ye ge e kpo efǝ chá zǝn hon ra. 29Bè tandwa jan, “Mò a o nda anga a zǝn je ángá a no, Nwen mo Ehwya? O bwa ana evǝa we tswa je ekan, atan a ekpengga mo ekan mo je hon chà bwe ye ra?”
30Tenten a zǝn hon, etso echa mo be efika è de mò anga. 31Enona, be engǝ́ esera hon è bgó Yeso jan, “Ano wa nyo je a vǝ́ a je, du je kwashi a ju etso mo efika e nokǝ̀n.”
32Gè jan be, “Nye nya.” Bè gwa a je a ju be nobǝ fà hon, nè ken kwashi gu a ju etso mo be efika hon. Kǝnggwa binbin mo be efika hon è tse ken kposhi gu chá tón evuru mo edan hon nè tkò gu a tswa mbǝ. 33Be ya è dgon be efika hon ángá è tsegwa zǝn hon, nè shi jantu gu be nobǝ a tswa eten hon, egwa egwa mo be mò è bwe be efika hon ngge mò è bwe ngge be nobǝ fà hon ya éè no ngge engǝ́ esera a ju ángá. 34Kǝnggwa, binbin be nobǝ a tswa eten hon è tsegwa a je evǝa be e ben Yeso. Atan a bè di ye ángá, bè bgó ye jan ge e nya e gwa efa mo be.
S'ha seleccionat:
Matiyu 8: ICH
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2024 Luke Initiative for Scripture Translation