Jọn 17
17
Jesu Na Erhunmwu Ne Avbe Erhuanegbe Ẹre
1Ugbẹn vbe Jesu ghi ta avbe ẹmwẹ na fo nẹ, ọ keghi tọn aro mu ghe odukhunmwu, ọ wẹẹ, “Evbavba, ẹghẹ na kha nii sẹ nẹ nian. Rhie uyi ne Ovbi uẹ ne Ọmọ vbe rhie uyi nuẹn. 2Rhunmwuda, wẹ ọre ọ rhie asẹ nẹẹn ne ọ gha kha yan emwa hia, ne irẹn miẹn ehe ne rhie arrọọ ne ẹ i fo ne iran hia ne uwẹ viọ ne ẹn. 3Ọna ọrọre nene arrọọ ne ẹ i fo wẹ ne emwa ne agbọn rẹn ruẹn zẹ vbe Osanobua ọkpa ne ọ re ọghe ẹmwata kevbe ne iran rẹn Jesu Kristi, ọmwa ne uwẹ gie. 4Mẹ rhie uyi ruẹ maa nẹ vbe agbọn: Iwinna ne u rhie mẹ, I winnaẹn fo nẹ. 5Evbavba ne Evbavba, rhie uyi mẹ vbobọ vbobọ nian, egbe uyi ne I ka guẹ mwẹ vbe a ma he yi agbọn.
6“Mẹ rhie ruẹ ma iran ne uwẹ hannọ ke uwu agbọn ladian nẹ. Ọghuẹ iran khin, wẹ keghi viọ iran mẹ, iran vbe ru nẹ zẹ vbe ne u gie. 7Wanwanna nian, iran rẹn nẹ wẹ, emwi ne uwẹ viọ mẹ, ọghuẹ iran ke rre. 8Rhunmwuda uhunmwu ne u gie mwẹ re, I tama iran nẹ, iran vbe miẹn rẹn nẹ, iran rẹnrẹn wẹ ọghuẹ mẹ ke gha dee vbe ẹmwata, iran vbe yayi nẹ ighẹ wẹ ọre ọ gele gie mwẹ.
9“Te I mẹ ghi na erhunmwu ne iran nian, I ma na erhunmwu ne agbọn, iran ne u viọ mẹ ọkpa ọre I na erhunmwu na rhunmwuda ọghuẹ iran khin. 10Emwi ne I mwẹ hia, ọ wuẹ nọ, emwi ne uwẹ vbe mwẹ hia, ogho mwẹ nọ. Ena ọre ọ rhie uyi mwẹ maa. 11Wanwanna nian, mẹ bu ruẹ dee, mẹ i ghi rre agbọn na sokpan iran ye rre agbọn na, Evbavba Ne Ọ Huanrẹn ya ẹtin eni ruẹn gbe ebe gue iran, eni ne u mu mẹ nii, ne iran miẹn ehe na gha re ọkpa zẹ vbe ne ima vbe ruẹ vbe re ọkpa. 12Ẹghẹ ne I na gha gu iran rrọ, ẹtin eni ruẹn ọre I ya tan ifuẹn gue iran, eni ne u mu mẹ nii, I gele tan ifuẹn gue iran, a ma miẹn ne ọ fuan vbọ, gberra ọkpa nii ne a wẹ te ọ ra fuan, ne ẹmwẹ ne ebe ne ọ huanrẹn ta ẹe miẹn ehe na sẹ. 13Banbanna nian, I bu ruẹ dee. Te I guan ẹmwẹ na vbe agbọn, ne ọyẹnmwẹ mwẹ miẹn ehe na gha sẹ iran, ọyẹnmwẹ ne ọ sẹ otọ ẹko. 14I ta uhunmwu ne u gie mwẹ re ma iran nẹ, agbọn na gha khọ ẹko iran, rhunmwuda iran i re ọghe agbọn na zẹ vbe ne imẹ i vbe re ọghe agbọn na. 15I ma wẹ ne u viọ iran hin agbọn na rre, sokpan ne u viọ iran lẹre ne Ọmwa dan nii. 16Vbene imẹ i re ọghe agbọn na, erriọ zẹẹ iran i vbe re ọghe agbọn na. 17Ye ẹmwata ya iran khian ọ wuẹ, ẹmwata ọre ẹmwẹ ruẹn khin. 18Zẹ vbene uwẹ gie mwẹ gha die agbọn, erriọ mẹ vbe gie iran gha rrie agbọn. 19Rhunmwuda iran, ọre I na ya egbe mwẹ fi ohan nuẹn, ne iran tobọ iran miẹn ehe na vbe khian ọwuẹ vbe ẹmwata.
20“Ẹ i re iran na ọkpa ọre I na erhunmwu na, sokpan kevbe iran hia ne ọ gha la ekpa ikporhu iran do ya mwẹ yi. 21I rinmwian ne iran hia gha re ọkpa. Evbavba, gie iran gha rre uwu ima ne agbọn miẹn ehe na yayi ighẹ wẹ ọre ọ gele gie mwẹ. 22Uyi ne uwẹ rhie mẹ ọre imẹ vbe rhie ne iran, ne iran miẹn ehe na gha re ọkpa zẹ vbene imẹ vbe ruẹ re ọkpa. 23Mẹ vbe uwu iran, wẹ vbe uwu imẹ, ne iran miẹn ehe na wa gha re ọkpa, ne agbọn miẹn ehe na rẹn ighẹ wẹ ọre ọ gele gie mwẹ, kevbe wẹ zẹ vbene u ho ẹmwẹ mwẹ, erriọ ọre u vbe ho ẹmwẹ iran.
24“Evbavba, u viọ iran mẹ nẹ, I ho ne iran gun mwẹ gha rre ehe ne imẹ ye ne iran miẹn ehe na ya aro iran miẹn uyi mwẹ, uyi ne u rhie mẹ, rhunmwuda, vbe a te do yi agbọn na wẹ ka gha ho ẹmwẹ mwẹ nẹ. 25Erha ne ẹ i bu eku, agbọn na ma rẹn ruẹn, sokpan mẹ rẹn ruẹn, iran na vbe rẹn ighẹ, wẹ ọre ọ gele gie mwẹ. 26I rhie ma iran nẹ, erriọ ọre I khian ye gha ru ẹe khian, ne ahoẹmwọmwa ne u mwẹ ghe mwẹ sẹtin sẹ iran egbe, ne imẹ sẹtin gha rre uwu iran.”
S'ha seleccionat:
Jọn 17: EDO96
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
@ The Bible Society of Nigeria, 1996