Luk 20
20
Jizọs Kụrọ Gbolomanyẹ Gbíla
(Mat 21.23-27; Mak 11.27-33)
1Gbẹ́rẹ́ éné Jizọs Tamunoopuwárị ma bie fịnị nyẹ́diearị sáá, pịghị ibi oku ma dugho wásámaarị, igwagwaalaapụ na ólóghó nyẹ́dieapụ, na sẹ́nịapụ ma ḅo ḅom. 2Si warị ọ ḅẹ ḅẹẹ, <<Dugho wa pịrị i tẹ́ kụrọ nyáná sị pa mị fịrị mamgba nwángịarị? Tụọ anị kụ́rọ ma pa ị pịrị?>>
3Jizọs warị n pagharaa ḅẹẹ, <<Mị́sa kúru a gbẹ́rẹ́nyẹ pa o gbíla. Dugho i pịrị, 4Jọn ọ pa mingi saraarị kụ́rọ ma anị Tamuno ḅara ḅo, anịgha anị túminị́ ḅarabie ḅo?>>
5Nnị warị saghị anị bịpị ḅẹlẹma ḅẹẹ, <<Wa tẹ́ dugho bẹ? Wa ḅọ́rọ́ ḅẹ ḅẹẹ Tamuno ḅara saghịḅom; o dughobẹm ḅẹ́, <Tegó, ọmịnị Jọn mininigha?> 6Kụ́ma wa ḅẹ́ ḅẹẹ, <Túminị́ ḅara saghịḅom,> mịná túminị́ mamgba mgbọ́lụ pa wa gbibẹm, tegó nna ḅụ korom ḅẹẹ, Jọn ori ikiakoroḅọ.>>
7Nnị warị ọ pagharaa ḅẹẹ, <<Wa nimigha anị sághị ḅọ angaá.>>
8Jizọs warị dugho n pịrị ḅẹẹ, <<Irị sọ a dugho ọ pịrịbịgha a pa mịnanyẹ ma mịẹarị kụ́rọ.>>
Grepụ Duakiri Fịrịnwangịapụ Kaḅụ
(Mat 21.33-46; Mak 12.1-12)
9Jizọs warị mị kaḅụ ma kọọ n pịrị: <<Gbẹ́rẹ́sa biri gbẹ́rẹ́ owitụ́wọ imi vainị dụadipi ḅo, warị anị pa ọkọ pịrị, warị soo ḅọlọ angaá muu sị anị sẹ ma ḅụ tọgha kụ́rá fịnị. 10Duasughu sáá, ḅo láa sáá ori ọrẹ ómóniḅọ fịrịma ọ ḅara dua ọkọapụ ma dámámum, ḅẹẹ nnị ori diekiri pa ọ pịrị, kụ́ma nnị ori ómóniḅọ ma fomtẹ́lẹ́mam warị o wáriso gbẹ́rẹ́nyẹ so pa ọ pịrịgha. 11Ọ warị jẹ́ ómóniḅọ fịrịma; kụ́ma mịị dua ọkọapụ ma pịghị mịị jẹ́ ómóniḅọ ma fomtẹ́lẹ́mam ọ ḅụ́gịrịrịma, sị ọ fịrịma so, gbẹ́rẹ́nyẹ sọ pa ọ pịrịgha. 12Ọ warị tẹ́rẹ́ kárámá ómóniḅọ fịrịma; dua ọkọapụ ma nyẹ pa olamam; warị o gbi págháma. 13Vainị duakiri ma nyánáḅọ ma warị ḅẹẹ, <A pịghị tẹ́ mịẹbẹ? A ị́yẹ́ ḅẹlẹma tụwọ fịrịmabẹm, mịnga ḅọ ma nnị ori osibẹm.>
14<<Kụ́ma dua ma ḅụ nnị ọkọapụ ma ori árị sáá, nnị warị jụghọ jụghọ ḅẹẹ, <Mịị duakiri ma nyánáakị bẹḅọ. O ḅoo wamịnị ọ ḅá sị duakiri ma wámịna nyẹ sọọ!> 15Nnị warị ọ gbi págháma vainị duakiri ma bie, sị pịghị ọ ḅá.>>
Jizọs warị n gbíla, <<Vainị duakiri ma nyánáḅọ ma ọ pịghị mị́sa tẹ́ pa duakiri ma ọkọapụ ma mịẹbẹ? 16O ḅo anị owiapụ ma ḅaabẹm sị vainị duakiri ma ḅọ́rọ́ma jẹ́ ọkọapụ pịrị.>>
Túminị́ ma mịma náa sáá, n dughom ḅẹẹ, <<Tamuno minima!>>
17Jizọs tọ́rụ́ ḅọ́rọ́ma n dighim sị gbíla, <<Anịsáa, mị tọ́ndiri ma anị tẹ́ dughoarị?
<<Wárinámáapụ ma sịghị dapịrị ma
ḅẹ́ anị ḅẹnyẹ ḅẹnyẹ ḅụ ofori anịị
ḅo mị́sa warị ma dighi sẹ́ma nyẹ!
18Anị dapịrị ma ḅụ sóghóró kóróḅo gonyẹ́ gonyẹ́ dapịrị ma n ḅo pẹlẹ kọsịmabẹm, dapịrị ma ḅọ́rọ́ kị́nị́ ḅụ koro koro anị n ḅo gbẹ́ẹ̄ fọọ mịẹbẹm.>>
19Ólóghó nyẹ́dieapụ na igwagwaalaapụ asọ dọ́ghụm n Jizọs kuu bẹ ḅara anị gbẹ́rẹ́kiri, tegó nnị akanyaḅom ḅẹẹ, mịị kaḅụ ma ọ kọọ nna sịbị ọ́gọ́nọ gbánām; kụ́ma n túminị́ ma dighi ḅáláfam.
Kọnsịn Ósó Igbii Gbẹ́ẹ̄ Gbólómanyẹ
(Mat 22.15-22; Mak 12.13-17)
20Nnị warị ọ ḅụ tọ́rụ pa kiri lama, sị ámáfúrúapụ fịrịma ḅẹẹ n muu akati ḅẹẹ, jẹ́ epele nyẹ nna tẹ́mẹ́bie ofori nnị gbilaarị nyẹ ma. Nnị mịma mịẹarị n pa oku bẹ ḅara ḅẹẹ mịị o dughonyẹ sị nnị ọ saghị táarị ḅo na pịghị Rom ḅẹ́rẹ́tọ́ḅọ ma ḅarabie sua. 21Mịị ámáfúrúapụ ma Jizọs ḅẹm, <<Nyẹ́dieḅọ, wa nimim ḅẹẹ i dughonyẹ na i die nyẹ karakáram. Wa pịghị nimim ḅẹ́ i sa nyáná tumḅọ la nyẹ pịrịgha. Kụ́ma karakárányẹ ma anịị ị diearịnyẹ Tamuno bii ḅara tumḅọ duma kọọ. 22Dugho wa pịrị, anị karakárá ḅẹẹ wa kọnsịn ósó igbii gbẹ́ẹ̄ Siza pịrị, mụ́nọ sị wa gbẹ́ẹma?>>
23Kụ́ma Jizọs arịm n tiarị epele warị nnị ḅẹẹ, 24<<Ọ gbẹ́rẹ́ Romapụ pị́naḅala igbii pa i die, Tụọ tórúku na tụọ ẹ́rẹ anị ḅụ imii?>>
Nnị warị pagharaa, <<Siza ma.>>
25Jizọs warị ḅẹẹ, <<Siza nyẹ pa Siza pịrị, pịghị Tamuno nyẹ pa Tamuno pịrị.>>
26Anị ngá túminị́ ma toruku n gbẹ́rẹ́nyẹ sọ nyánágha n go pa oku ḅẹnyẹ, ọ pịghị ḅara warị n pa o gbíla nyẹ págháraarị ḅara ma nna tọ́rụ́ nẹngịm, n warị nna bịpị gbẹ́ẹ̄.
Fịị Ḅụ Saghị Gboloma Gbíla Nyẹ
(Mat 22.23-33; Mak 12.18-27)
27Anịsáa, jẹa Sadusiiapụ, ḅẹapụ ḅẹẹ, túminị́ fịị ḅụ saghịbịgha, Jizọs damaḅom sị ḅẹẹ, 28<<Nyẹ́dieḅọ, Mosis mịị ologho gịẹ wa pịrịm ḅẹẹ, ḅọ́rọ́ owitụ́wọ fịịfịị sị taa wáriso, awọ nna bie ofori ofori, fịịḅọ ma mị́naḅọ ọ taa ma yaa ḅẹm sị awọ yii fịịmaá mị́naḅọ ma pịrị. 29Gbẹ́rẹ́ sáá biri, sọ́nọ́ma mịnaapụ imii; nna ḅụ sẹ́nịḅaḅọ ma ọ́rụ́ḅọ yaam sị awọ yiigha pa fịị. 30Mmẹẹ́ kárámáḅọ ma ọ́rụ́ḅọ ma yaam, sị fịị tụwọ yiigha pa, 31tẹ́rẹ́ kárámáḅọ ḅo pịghị, anị gbẹ́rẹ́ ḅara mịẹ. Mị gbẹ́rẹ́nyẹ ma nnị sọ́nọ́maápụ mamgba ḅụ pághám nnị kị́nị́mamgba fịịm awọ yiigha pa. 32Nyẹ mamgba kunema, ọ́rụ́ḅọ ma sọ pịghị fịm. 33Mị́sa, fịịapụ fịị ḅụ saghị bẹ sáá ma ḅụ ọ́rụ́ḅọ ma, a tụ́ọ taa sọọ bẹ? Nnị sọ́nọ́maápụ mamgba a yáamáa sáá.>>
34Jizọs warị n pagharaa, <<Mịị tuminikiriapụ ma yaarị pịghị nna awọ pa yaa pịrịarị 35Kụ́ma fịị ḅụ saghị bẹ owiapụ na ẹ́rẹ́ámáapụ dumafịnị bẹapụ ḅoarị sa ma ḅụ nnị dee anịgha taa yaabịgha. 36Sookumuapụ ma fịnị ḅara anịị n fịnị bẹ ḅara, nnị ine fịịbịgha, nnị anịị Tamuno awọ, tegó, nnị fịị ḅụ saghịmam. 37Mosis tọ́rụ́ bulubulumagha ḅara ḅụ diepághámam ḅẹẹ, fịịapụ saghịbẹm fịị ḅụ. Nnị dọghụmarị piri ma gbólómanyẹ gịẹ angaá ma ọ ḅẹm ḅẹẹ, <Kị́nị́nyánáḅọ ma, ori anịị Ebraham Tamuno, Aizik Tamuno na pịghị, Jekọpụ Tamuno.> 38Ori anịị fịịmaapụ ma Tamungha, kụ́ma dumaapụ ma Tamuno, ḅẹẹ ọ toruku kị́nị́mamgba dumam.>>
39Ólóghó nyẹ́dieapụ ma jẹ́apụ warị pụghọ saghị ẹ́gẹ́rẹ́ ḅẹẹ, <<Nyẹ́dieḅọ, mị ibima pagharaa ẹ́gẹ́rẹ́.>> 40Nnị mịnị ine jẹ́nyẹ pa o gbilagha.
Krais Ma Gboloma Gbilanyẹ
41Jizọs gbilam, ḅẹẹ, <<Nnị tọrọ́ pa anị dugho bẹ ḅẹẹ, Krais ma ori Deviti furobie saghị págháḅo bẹḅọ? 42Deviti ọ ḅụgbọrụ dughom Núme diri ma bie ḅẹẹ,
<< <Dúmagbámásó ḅọ ma,
i nyánáḅọ ḅẹm,
<<Mịnga ị́yẹ́ amaḅaranga kpọrọfịnị
43akị mú a ị́yẹ́ iruonaapụ pa ị́yẹ́
Ḅụọ gbananyẹ mịẹ,
i ḅụọ sughu!>> >
44Deviti <Inyanaḅọ pa ọ sim.> Anịsáa Krais ma ọ tọ́rọ́ pa ḅo Deviti furotụ́wọ sọọ bẹ?>>
Ólóghó Nyẹ́dieapụ Ma Gboloma Birinụ́nụ́
(Mat 23.1-36; Mak 12.38-40)
45Kị́nị́mamgba o pughuarị sáá, Jizọs warị ori ọḅụduaapụ ḅẹẹ. 46<<Ọmịnị ólóghó nyẹ́dieapụ ma ẹbị. Nnị sámámgba koro bịtẹ sua dọ́ghụm sị nwángị ikelekelé ḅẹlẹmaapụ ḅẹẹ túminị́ nna osii ḅara pa sịbịpị pa n sịị fẹ́siri, kobiri yọ ma ḅụ n kị́rị́ma warị ịkasị ḅẹlẹmaapụ n pịghị opuapụ kiri ḅẹ́lẹ́mam fị na ḅụ yọ. 47Nnị deefịị ẹ́rẹ mbásịm sị nna warị daakị n ḅarabie, sị oḅori pa kị́nị́ sị, sị nángwọ tẹ́ghẹ̄ kọọ! Nna gbẹ́ẹfịnyẹ siḅaabẹm.>>
S'ha seleccionat:
Luk 20: IBY
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
©2024 Luke Initiative for Scripture Translation