Yôhan 4
4
Brah Yêsu jêh ri bu ur Samari
1Lah Brah Yêsu hŏ gĭt jêh phung Pharisi tăng lư Păng dơn jêh ri ƀư ƀaptem ma oh mon âk rlau lơn ma Y-Yôhan. 2(Na nê̆ mâu di Brah Yêsu ƀư ƀaptem ôh, ƀiălah jêng phung oh mon Păng ƀư), 3yor ri Brah Yêsu du luh bơh n'gor Yuđa plơ̆ sĭt ta n'gor Galilê. 4Ƀiălah ăn Păng hăn rgăn n'gor Samari. 5Pôri, Păng hăn tât ta du ƀon tâm n'gor Samari, kuăl jêng Sikar, dăch lôk mir Y-Yakôp ăn jêh ma kon păng jêng Y-Yôsep.#Ntơm 33:19; Yôs 24:32. 6Ta aơ geh du mlâm ntu dak Y-Yakôp. Yorlah rgănh hăn trong, rĭ dĭng Brah Yêsu gŭ rlu kêng ntu dak. Nôk nây klăp lah jât ma bar mông nklang bôk nar.#4:6 Nrn: mông rơh prao.
7Du huê bu ur Samari văch bâk dak. Brah Yêsu lah ma păng: “Ăn dak ma Gâp nhêt.” 8Nôk nây, phung oh mon Păng hŏ hăn rvăt ndơ sa tâm ƀon. 9Bu ur Samari nây lah: “Mâm may jêng du huê bunuyh Yuđa dăn dak ta gâp jêng du huê bu ur Samari?” (Yorlah phung Yuđa ơm mâu dơh dăch ôh đah phung Samari).#Êsr 4:1-5; Nêh 4:1-2. 10Brah Yêsu plơ̆ lah: “Tơlah ay gĭt ndơ Brah Ndu ăn, jêh ri Păng dôl ngơi đah ay: ‘Ăn Gâp dăn nhêt dak’ jêng mbu nơm pôri n'hêl nanê̆ ay mra vơl dăn ma Păng, jêh ri Păng mra ăn dak rêh ma ay.” 11Bu ur nây lah: “Hơi Kôranh, may mâu geh ndơ gay bâk, ntu dak aơ jru ngăn, pôri ntŭk tă may geh dak rêh nây? 12Chô yau hên jêng Y-Yakôp ăn ma hên ntu dak aơ; Y-Yakôp nơm, phung kon sau jêh ri ma mpô mpa rong păng nhêt ta ntu dak aơ da dê, mâm may toyh lơn ma Y-Yakôp?” 13Brah Yêsu plơ̆ lah: “Mbu nơm nhêt dak aơ mra hôm ji hir ƀaƀơ, 14ƀiălah mbu nơm nhêt dak Gâp mra ăn, mâu hôm ji hir đŏng ôh. Dak Gâp ăn mra plơ̆ jêng tu dak tâm bunuyh nây, bêng ler tât nau rêh n'ho ro.” 15Bu ur nây lah: “Hơi kôranh, dăn ăn gâp dak nây, gay ma gâp mâu hôm ji hir jêh ri mâu hôm văch ta aơ bâk dak đŏng.”
16Brah Yêsu lah: “Hăn kuăl hom sai ay, jêh ri plơ̆ ta aơ.” 17Bu ur nây ơh: “Gâp mâu geh sai ôh.” Brah Yêsu lah: “Ay lah ay mâu geh sai jêng di ngăn, 18yorlah ay hŏ geh jêh prăm nuyh sai, bi bunuyh ay gŭ aƀaơ aơ mâu di sai ay ôh; nau aơ ay lah hŏ di ngăn jêh.” 19Bu ur nây lah: “Hơi kôranh, gâp gĭt năl may jêng du huê nơm mbơh lor. 20Chô yau hên yơk mbah ta klơ yôk aơ, bi khân may lah pô aơ ƀon Yêrusalem mhe jêng ntŭk khư yơk mbah.” 21Brah Yêsu lah: “Aơ, hơi bu ur ri, chroh hom ma Gâp, mông dăch tât jêh, khân ay mâu hôm yơk mbah ma Mbơ̆ ta klơ yôk aơ mâu lah ta ƀon Yêrusalem đŏng. 22Khân ay yơk mbah ma Nơm khân ay mâu gĭt năl, bi hên yơk mbah ma Nơm hên gĭt năl, yorlah nau tâm rklaih văch tă bơh phung Yuđa. 23Mông dăch tât jêh ri hŏ tât jêh, nôk phung bunuyh yơk mbah nanê̆ ngăn mra yơk mbah Mbơ̆ ma huêng jêh ri ma nau ngăn; nây jêng phung bunuyh yơk mbah Mbơ̆ ŭch joi. 24Brah Ndu jêng brah, mbu nơm ŭch yơk mbah ngăn ma Păng, ăn păng yơk mbah ma huêng jêh ri ma nau ngăn.”#4:24 nau ngăn: Mlr: nau nanê̆ ngăn. 25Bu ur ơh: “Gâp gĭt Nơm Mêsi (ntĭt jêng Brah Krist) mra tât. Tơlah Păng tât, Păng mra mbơh lĕ ntil nau ma hên.” 26Brah Yêsu lah: “Gâp, bunuyh dôl ngơi đah ay aơ, jêng Nơm nây.”
27Nôk nây, phung oh mon tât. Khân păng hih rhâl dôl saơ Păng tâm ngơi đah du huê bu ur; ƀiălah mâu geh du huê ôp: “Moh nau Kôranh ŭch?” mâu lah: “Moh nau Kôranh ngơi đah bu ur nây?” 28Bu ur nây chalơi yăng dak păng ta nây jêh ri hăn lăp tâm ƀon, mbơh ma lĕ rngôch bunuyh pô aơ: 29“Hăn uănh hom du huê bunuyh hŏ lah di lĕ rngôch nau gâp ƀư jêh. Nây mâu di jêng Brah Krist?” 30Khân păng luh bơh ƀon jêh ri văch ta Brah Yêsu.
31Tâm dôl nây, phung oh mon vơh vơl ma Păng: “Ơh Nơm Nti, sông sa hom.” 32Ƀiălah Brah Yêsu plơ̆ lah: “Gâp hŏ geh jêh ndơ sa ƀiălah khân may mâu gĭt ôh.” 33Yor ri, phung oh mon tâm lah ndrăng khân păng: “Gĭt hŏ geh bunuyh djôt ndơ sông sa ma Păng, jêh mâu?” 34Brah Yêsu lah ma khân păng: “Ndơ sông sa Gâp jêng ƀư tĭng nau mĭn ŭch Nơm hŏ njuăl Gâp, jêh ri ƀư lôch jêh nau kan Păng. 35Mâu di hĕ khân may lah: ‘Hôm puăn khay đŏng rĭ mơ tât yan rek?’ Ƀiălah Gâp lah ma khân may: ‘N'gơr hom jêh ri uănh hom lôk mir ba lĕ dŭm,#4:35 Nrn: lĕ nglang. hŏ rơm ndrăp jêh ma yan rek. 36Bunuyh rek dơn prăk nkhôm jêh ri prăp nkrem kao play ma nau rêh n'ho ro, pôri bunuyh tuch n'hanh ma bunuyh rek răm maak ndrel.’ 37Ta ntŭk nây, nau bu lah: ‘Bunuyh aơ tuch, nơm ri rek,’ jêng di ngăn. 38Gâp hŏ njuăl khân may hăn rek ta ntŭk khân may mâu mâp hŏt ƀư, bunuyh êng hŏ ƀư kan hŏt jêh, bi khân may lăp dơn tâm kan hŏt khân păng.”
39Âk phung Samari tâm ƀon nây chroh ma Brah Yêsu, yor bu ur nây mbơh nkoch jêh pô aơ: “Păng hŏ lah lĕ rngôch nau gâp hŏ ƀư.” 40Yor ri, nôk phung Samari hŏ tât ta Brah Yêsu, khân păng kân Brah Yêsu gŭ ndrel ma khân păng, jêh ri Brah Yêsu hŏ gŭ jêh ta nây bar nar. 41Lah tăng nau Brah Yêsu nkoch, rnoh bunuyh chroh lơ hô âk lơn đŏng. 42Khân păng lah ma bu ur nây pô aơ: “Aƀaơ aơ mâu hôm tă bơh nau ay mbơh dĭng hên chroh, ƀiălah hên tăng nau Păng nơm nkoch, jêh ri gĭt nanê̆ Păng jêng Nơm Tâm Rklaih neh ntu.”
Nau Brah Yêsu ƀư bah kon bu klâu du huê kôranh toyh
43Lôch bar nar nây, Brah Yêsu luh bơh ntŭk nây, hăn tât ta n'gor Galilê. 44(Yorlah Brah Yêsu nơm hŏ dơn jêh pô aơ, nơm mbơh lor bu mâu yơk ôh tâm ƀon tơm păng nơm.)#Mat 13:57; Mark 6:4; Luk 4:24. 45Lah hŏ tât jêh ta n'gor Galilê, phung ƀon nây vơt rom Brah Yêsu, yorlah khân păng hŏ saơ jêh lĕ rngôch nau Brah Yêsu ƀư ta ƀon Yêrusalem tâm nar rƀŭn, yorlah khân păng nơm hăn râng tâm rƀŭn đŏng.#Yôh 2:23.
46Pôri, Brah Yêsu plơ̆ tay ta ƀon Kana tâm n'gor Galilê, ntŭk Păng hŏ njêng dak jêng ndrănh. Du huê kôranh toyh tâm phung ta ngih hađăch ta ƀon Kapernum geh kon bu klâu geh nau ji.#Yôh 2:1-11. 47Nôk kôranh nây tăng Brah Yêsu tă bơh n'gor Yuđa hăn tât ta n'gor Galilê, păng joi jêh ri dăn ma Brah Yêsu hăn ƀư bah kon bu klâu păng, yor ji dăch khĭt. 48Brah Yêsu lah ma kôranh toyh pô aơ: “Tơlah mâu saơ ôh nau mbên khlay jêh ri nau khlay, nanê̆ khân may mâu chroh ôh!” 49Kôranh toyh nây ơh: “Hơi Kôranh Brah, dăn May hăn êlor kon gâp khĭt!” 50Brah Yêsu lah: “Hăn hom, kon may mra rêh.” Kôranh toyh nây chroh nau Brah Yêsu lah ma păng jêh ri păng plơ̆ sĭt. 51Dôl păng hăn rŏ trong, phung oh mon păng tât tâm mâp đah păng jêh ri lah: “Kon bu klâu may rêh jêh!” 52Kôranh toyh ôp khân păng ma ndah mông kon bu klâu gâp dơi bah. Khân păng plơ̆ lah: “Nđaơ, ta du mông mhaơ,#4:52 Nrn: mông rơh pơh. păng bah ji kop.” 53Bunuyh mbơ̆ nây gĭt năl di ta mông Brah Yêsu lah ma păng pô aơ: “Kon may mra rêh”; pôri păng, jêh ri nđâp ma lĕ rnăk vâl chroh da dê. 54Aơ jêng nau mbên khlay rơh bar Brah Yêsu hŏ ƀư jêh, jêh Păng luh bơh n'gor Yuđa plơ̆ sĭt ta n'gor Galilê.
S'ha seleccionat:
Yôhan 4: CMO2023
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023 United Bible Societies. All rights reserved.