यूहन्‍ना 13

यीशु द्‍वारा चेलों का खुटा धोण

1अर फसह का त्योवार से पैलि यीशु जाणि गै, कि दुनियां तैं छोड़ि के पिता का पास चलि जाणु को बगत नजदीक ऐ गै। तब वेन जु वेका दगड़ा मा रौन्दा छा, ऊंतैं जन प्यार उ पैलि करदु छौ, उन्‍नि प्यार उ आखिरी का दिन तक कनु रै। 2अर जब ऊ राति खाणु खाणा छा, तब शैतान न शमौन का नौना यहूदा इस्करियोती का मन मा पैलि ही यू विचार डालियेली छौ, कि उ यीशु तैं पकड़वै द्‍यो। 3अर यीशु न यू जाण्यालि छौ, कि पिता न सब कुछ मेरा हाथ मा सौंप्याली, अर मि परमेस्वर की तरफा बटि अयूं छौं, अर अब फिर से परमेस्वर का पास जाण वळु छौं। 4तब उ खाणुक खाण दौं उठी। अर वेन अपणा भैरा कपड़ों तैं उतारि के अलग मा रखी दिनी, अर अंगोछु लेके अपणी कमर तैं बान्धि दिनी। 5येका बाद वेन परात मा पाणि भोरी अर चेलों का खुटा धोण लगि गै, अर अपणी कमर पर बन्धयां अंगोछन फुंजण लगि गै।

6अर जब उ शमौन पतरस का समणि ऐ, तब वेन यीशु कू बोलि, “प्रभु, क्या तुमुन मेरा खुटा धोणिन?” 7तब यीशु न वेतैं जबाब देई, “जु मि कनु छौं, वांका बारा मा तू अभि कुछ नि जणदी, पर बाद मा तू समझि जैली।” 8पर पतरस न वेकू बोलि, “मि तुमतै अपणा खुटा कभि भि धोणु कू नि द्‍यूलु।” यू सुणी के यीशु न वेकू बोलि, “अगर जु मि तेरा खुटा नि धूलु, त तू मेरा दगड़ा मा साझी नि ह्‍वे सकदी।” 9तब शमौन पतरस न वेकू बोलि, “प्रभु, त फिर तुम इन कैरा, की मेरा खुटा ही ना, पर मेरा हाथ अर मुण्ड़ भि ध्वे द्‍या।” 10फिर यीशु न वेकू बोलि, “जु नहे गै वेतैं खुटों का अलावा और कुछ भि धोणे की जरुरत नि च। किलैकि उ त पूरि तरौं से शुद्ध च। अर तुम शुद्ध छाँ, पर सभ्या का सभि ना।” 11अर यीशु अपणा पकड़ौण वळा तैं जणदु छौ, इलै ही वेन बोलि, कि “तुम मा बटि सभ्या का सभि शुद्ध नि छिन।”

12जब वेन ऊंका खुटा ध्वे दिनी, तब उ अपणा कपड़ा पैरि के फिर से बैठि गै। अर वेन ऊंकू बोलि, “क्या तुम समझि ग्यां, कि मिन तुमरा दगड़ा मा क्या कैरी? 13अर तुम मिकू गुरु अर प्रभु बुल्द्‍यां, अर तुम ठिक ही बुल्द्‍यां, किलैकि मि उई छौं। 14अर जब मिन प्रभु अर गुरु ह्‍वेके तुमरा खुटा ध्वेनि, त तुमतै भि एक-दुसरा का खुटों तैं धोण जन सेवा करण चयेणी। 15किलैकि मिन तुमरा समणि एक उदारण कैरिके देखैलि, कि जन मिन तुमरा दगड़ा मा कैरी, उन्‍नि तुम भि कैरा। 16अर मि तुम बटि सच्‍चि बोन्‍नु छौं, कि नौकर अपणा मालिक से बड़ु नि होन्दु, अर जैतैं भेज्यूं च उ अपणा भेजण वळा से बड़ु नि होन्दु। 17अगर तुम यों बातों तैं जाणि के ऊंका मुताबिक चलिल्या त तुम धन्य छाँ।”

बिस्वासघात की भविष्यबाणी

(मत्ती 26:20-25; मर 14:17-21; लूका 22:21-23)

18तब यीशु न फिर से बोलि, “मि तुम सभ्यों का बारा मा नि बोन्‍नु छौं, किलैकि जौं तैं मिन चुण्यालि, ऊ कन्द्रया छिन मि जणदु छौं। फिर भि यू इलै होणु च ताकि पवित्रशास्‍त्र को वु वचन पूरु हो जु कि इन च कि,

# भजन 41:1 “‘जैन मेरी रुट्‍टी खै, वेन ही मि पर लथि उठे।’

19अर यू होण से पैलि ही मि तुमतै येका बारा मा बतै देन्दु, ताकि जब यू पूरु ह्‍वे जौ, त तुम बिस्वास कैरा कि मि उई#13:19 इख मा प्रभु यीशु मसीह अफ तैं परमेस्वर बतौणु च, किलैकि परमेस्वर को एक नौ “मि छौं” यू भि च (निर्ग 3:14)। छौं। 20अर मि तुम बटि सच्‍चि ही बोन्‍नु छौं, कि जु कुई मेरा भेज्यां मनखियों तैं स्वीकार करदु, उ मितैं स्वीकार करदु। अर जु मितैं स्वीकार करदु, उ वेतैं स्वीकार करदु जैन मितैं भेजि च।”

21अर इन बोन्‍ना का बाद यीशु हकबकौण लगि गै। अर वेन बोलि, “मि तुम बटि सच्‍चि ही बोन्‍नु छौं, कि तुम मा बटि एक न मितैं पकड़ौण च।” 22तब चेला सक कैरिके एक-दुसरा तैं दिखण लगि गैनी, कि उ कै का बारा मा या बात बोन्‍नु च। 23अर चेलों मा बटि यीशु जैतैं भौत जादा प्यार#13:23 इख मा लिखणु वळु यूहन्‍ना अपणा बारा मा बोन्‍नु च। करदु छौ, उ यीशु की काखे तरफा झुकि के बैठयूं छौ। 24इलै शमौन पतरस न वे चेला जनै इसारा कैरी कि, “जरा वे बटि पूछ, कि उ कै का बारा मा बोन्‍नु च?” 25अर वे चेला न उन्‍नि यीशु की काखे तरफा झुकि के वेतैं पूछी, “प्रभु, कु च उ?” 26तब यीशु न जबाब देई, “जैतैं मि यू रुट्‍टी को टुकड़ा कटोरा मा डुबै के द्‍यूलु, उई च।” अर वेन रुट्‍टी का टुकड़ा तैं कटोरा मा डुबै के शमौन इस्करियोती का नौना यहूदा इस्करियोती तैं देई। अर वेन उ रुट्‍टी को टुकड़ा लेई।

27अर शैतान यहूदा मा समै गै। तब यीशु न यहूदा कू बोलि, “जु तिन करण च, उ तू जल्दी कैर।” 28पर जु उख खाणुक खाणु कू बैठयां छा, ऊंमा बटि कुई भि इन नि समझ सैकी, कि यीशु न वेकू इन्द्रयो किलै बोलि। 29अर ऊंमा बटि कुछ न सोची, कि त्योवार मा जु-जु चीज जरुरी छिन, ऊंतैं मोल लिणा का बानो, या त गरीबों मा दान बंटणा का खातिर वेन इन बोलि होलु। किलैकि यहूदा मा पैसौं की थैली रौन्दी छै। 30जब यहूदा न रुट्‍टी को टुकड़ा लेई, तब उ तुरन्त भैर चलि गै। अर यू राति को बगत छौ।

यीशु द्‍वारा नई आज्ञा दिये जाण

31जब यहूदा भैर चलि गै तब यीशु न बोलि, “मनखि को पुत्र कथगा महान च, यू लोगु तैं पता चललु। अर वेका द्‍वारा परमेस्वर कथगा महान च, यू भि ऊंतैं पता चललु। 32अर इन होण से परमेस्वर की बडै ह्‍वेलि, तब परमेस्वर भि इन दिखै द्‍यालु, कि पुत्र कथगा महान च। अर इन उ जल्दी ही करलु।

33“मेरा बच्‍चों, अब मि तुमरा दगड़ा मा कुछ ही देर तक छौं। फिर तुम मितैं खुजैल्या, अर जन मिन यहूदियों कू बोलि, उन्‍नि मि अब तुमकु भि बोन्‍नु छौं, कि जख मि जाणु छौं, उख तुम नि ऐ सकद्‍यां। 34इलै अब मि तुमतै एक नई आज्ञा देन्दु छौं, कि तुम एक-दुसरा बटि प्यार कैरा। अर जन मिन तुम बटि प्यार कैरी, उन्‍नि तुम भि एक-दुसरा बटि प्यार कैरा। 35अर अगर जु तुम आपस मा प्यार करिल्या, त यू देखि के सभि लोग जाणि जाला कि तुम मेरा चेला छाँ।”

पतरस को यीशु तैं नकरणे की भविष्यबाणी

(मत्ती 26:31-35; मर 14:27-31; लूका 22:31-34)

36तब शमौन पतरस न यीशु तैं पूछी, “प्रभु तुम कख जाणा छाँ?” यीशु न वेतैं जबाब देई, “जख मि जाणु छौं, उख तू अभि मेरा पिछनै नि ऐ सकदी, पर बाद मा ऐलि।” 37अर पतरस न वेकू बोलि, “प्रभु मि अभि तुमरा पिछनै किलै नि ऐ सकदु? मि त तुमरा खातिर अपणी जान भि दे द्‍यूलु।” 38तब यीशु न वेतैं जबाब देई, “क्या तू मेरा खातिर अपणी जान दे दिली? मि त्वे बटि सच्‍चि ही बोन्‍नु छौं, कि मैर का बसण से पैलि तिन मितैं तीन दौं नकारी देण कि, मि वेतैं नि जणदु।”

S'ha seleccionat:

यूहन्‍ना 13: GBM

Subratllat

Comparteix

Copia