मरकुस 10
10
तलाक का खिलाप मा यीशु की शिक्षा
(मत्ती 19:1-12; लूका 16:18)
1तब यीशु कफरनहूम नगर बटि निकळि के यरदन गाड का दुसरा छाला यहूदिया मुलक मा ऐ। अर सुणा, एक भीड़ फिर से वेका पास इकट्ठा ह्वे गै, अर उ लोगु तैं हमेसा की तरौं फिर से सिखौण लगि गै।
2तब कुछ फरीसी दल का लोग यीशु का पास ऐनी, अर ऊंन वेतैं अपणी बात मा फसौणु खुणि वेसे पूछी, “क्या या बात नियम का मुताबिक ठिक च, कि कुई भि मनखि अपणी जनानि तैं तलाक दे सकदु?” 3वेन ऊंतैं जबाब दिनी, “मूसा न तुमतै क्या इजाजत दिईं च?” 4ऊंन बोलि, #व्यव 24:1“परमेस्वर का रैबर्या मूसा न तलाकनामा लिखी के घरवळी तैं छुड़ण की आज्ञा दिईं च।” 5मगर यीशु न ऊंकू बोलि, #व्यव 24:1-4“तुमरा मन का निठुर होण की वजै से वेन तुमतै या आज्ञा लिखी के दिनी। 6पर #उत्पति 1:27; 5:2शुरु बटि ही परमेस्वर न ऊंतैं नर अर नारी का रुप मा बणै। 7इलै #उत्पति 2:24आदिम अपणा ब्वे-बाब तैं छोड़ि के अपणी घरवळी का दगड़ा मा एक ह्वेके रालु, अर वु दुईया का दुई एक बदन होला। 8अर दुई होण की वजै से वु अलग नि होला, बल्किन मा ऊ एक सरील छिन। 9इलै जैतैं परमेस्वर न जोड़ी, वेतैं कुई भि मनखि अलग नि कैरो।”
10तब वेका चेलों न घौर मा जैके तलाक का बारा मा यीशु से फिर से पूछी। 11वेन ऊंकू बोलि, जु कुई अपणी घरवळी तैं तलाक देके कै दुसरि जनानि का दगड़ा ब्यौ करदु, त वु पैलि जनानि का खिलाप मा पाप करदु। 12अर ठिक उन्नि अगर कुई जनानि अपणा पति तैं छोड़ि के कै दुसरा का दगड़ा मा ब्यौ करदी, त वा जनानि गळत सम्बन्ध बणौणी च।
छुटा बच्चों तैं यीशु की आसीस
(मत्ती 19:13-15; लूका 18:15-17)
13अर फिर लोग अपणा बाल-बच्चों तैं यीशु का पास लेके ऐनी, ताकि उ ऊं पर अपणु हाथ रखो, मगर वेका चेलों न ऊंतैं झिड़की। 14अर यू देखि के यीशु नाराज ह्वे अर वेन अपणा चेलों कू बोलि, “बच्चों तैं मि मू औण द्या, ऊंतैं रोका ना, किलैकि परमेस्वर को राज ऊंको ही च जौं को जीवन यों बच्चों की तरौं च। 15अर मि तुम बटि सच्चि बोन्नु छौं, कि परमेस्वर का राज मा वे ही मनखि न जै सकण, जु परमेस्वर का राज तैं एक छुटा बच्चा की तरौं स्वीकार करलु।” 16अर वेन ऊं बच्चों तैं अपणा गोद मा उठे, अर ऊं पर अपणु हाथ रखी के ऊंतैं आसीस दिनी।
सेठ मनखि अर सदनि को जीवन
(मत्ती 19:16-30; लूका 18:18-30)
17अर जब यीशु वे मुलक बटि निकळि के यरूशलेम नगर कू जाणु छौ, त एक मनखि भागी के वेका पास ऐ, अर वेका अगनै घुंडा टेकी के वेसे पूछी, “गुरुजी, तुम अच्छा गुरु छाँ, सदनि का जीवन को हकदार होण खुणि मि क्या जि कैरुं?” 18वेन वे मनखि कू बोलि, “तू मिकू अच्छु किलै बोन्नि छैई, परमेस्वर का अलावा कुई भि अच्छु नि च। 19तू आज्ञाओं तैं त जणदी ही छैई, #निर्ग 20:12-16‘हत्या नि कैरी, कै का दगड़ा मा गळत सम्बन्ध नि रखी, अर चोरी नि कैरी, झूठ्ठी गवै नि देई, छल-कपट नि कैरी, अपणा ब्वे-बुबों को आदर-सम्मान कैरी।’” 20वे मनखि न बोलि, “गुरुजी, यों सब बातों तैं त मि बाळ्पन बटि ही मणदी औणु छौं।” 21अर यीशु न वे जनै देखि अर वेका मन मा वे मनखि खुणि भौत प्यार ऐ। अर वेन वेकू बोलि, “त्वेमा अभि भि एक बात की कमी च, इन कैर कि जु कुछ भि त्वेमा च, ऊ सब कुछ बेचि दे अर वे बटि जु कुछ भि मिललु वु सब गरीबों मा बांटि दे। अर मेरु चेला बणि जा, तब त्वेतै स्वर्ग मा खजानु मिललु।” 22पर ईं बात तैं सुणी के वु मनखि भौत उदास ह्वे। अर बड़ु दुखी ह्वेके उख बटि चलि गै, किलैकि वेका पास भौत जादा जैजाद छै।
23अर यीशु न चौतरफि देखि के अपणा चेलों कू बोलि, “सेठ लोगु को परमेस्वर का राज मा दाखिल होण भौत कठिन च।” 24वेका चेला या बात सुणी के दंग ह्वे गैनी। पर यीशु न ऊंकू फिर से बोलि, “बच्चों सुणा, जु लोग अपणी जमीन-जैजाद पर भरोसा रखदिन, ऊ खुणि परमेस्वर का राज मा दाखिल होण बड़ु कठिन च। 25एक ऊंट को स्यूण का छेद बटि निकळण सरल च, मगर एक सेठ मनखि को परमेस्वर का राज मा दाखिल होण बड़ु कठिन च।” 26अर ईं बात तैं सुणी के चेला और भि जादा दंग ह्वे गैनी, अर अपणा आपस मा पूछण लगि गैनी, “त फिर इनकै कैतैं बचयै जालु?” 27तब यीशु न ऊंकी तरफा देखि के बोलि, “मनखियों बटि त यू नि ह्वे सकदु, पर परमेस्वर बटि ह्वे सकदु च, किलैकि परमेस्वर सब कुछ कैरी सकदु च।” 28ईं बात तैं सुणी के पतरस यीशु कू बोन्न लगि गै कि, “गुरुजी देखा, हम त सब कुछ छोड़ि के तुमरा पिछनै ह्वे ग्यां।” 29यीशु न ऊंकू बोलि, “मि तुम बटि सच्चि बोन्नु छौं, कि वु सब लोग जु मेरा अर शुभ समाचार का बानो, अपणा घौर-बार तैं, अपणा भै-बैंणो, अर अपणा ब्वे-बबों या अपणा बाल-बच्चों तैं या पुंगड़ा-पटलों तैं छोड़ि देन्दिन, 30ऊं लोगु तैं धरती पर सतयै जालु, मगर फिर भि ईं दुनियां मा ऊंतैं अपणु घौर-बार, भै-बैंणो, अर अपणा ब्वे-बबा, अपणा पुंगड़ा-पटलों बटि सौ गुणा मिललु, अर औण वळा युग मा ऊ सदनि का जीवन तैं भि पाला। 31पर वे औण वळा युग मा भौत सा लोग जु आज पैलि छिन, वु आखिरी ह्वे जाला, अर जु आज आखिरी छिन वु पैलि ह्वे जाला।”
अपणी मौत का बारा मा यीशु की तिसरी भविष्यबाणी
(मत्ती 20:17-19; लूका 18:31-34)
32अर यीशु अर वेका चेला यरूशलेम नगर कू जाणा छा, अर वे बाटा मा वु चेलों का अगनै-अगनै छौ। अर चेला बड़ा ताजुब मा छा, अर भीड़ का जु लोग वेका पिछनै-पिछनै औणा छा वु भि डऽरयां छा। तब यीशु अपणा बारह चेलों तैं अलग लि गै, अर अफ पर होण वळी बातों का बारा मा बतौण लगि गै। 33वेन बोलि, “सुणा, हम लोग यरूशलेम नगर कू जाणा छां, अर उख मनखि का पुत्र तैं मुख्य पुरोहितों अर शास्त्री लोगु का हवाला किये जालु, अर वु वे पर इळजाम लगाला कि वेतैं जान से मार दिये जौ, अर वेतैं ऊं लोगु का हवाला करला जु कि यहूदी जाति का नि छिन। 34अर यू लोग जु यहूदी जाति का नि छिन, यू वेको मजाक उड़ाला, वे पर थुकला वे पर कोड़ा मरला, इख तक की जान से मार द्याला, पर उ तिसरा दिन मुरदो मा बटि ज्यून्दु ह्वे जालु।”
यीशु से याकूब अर यूहन्ना खुणि बिन्ती
(मत्ती 20:20-28)
35तब जबदी का दुई नौना याकूब अर यूहन्ना यीशु का पास ऐनी अर वेकू बोलि, “गुरुजी, हम चन्द्यां कि जु कुछ भि हम तुम बटि मांगा, वु तुम हमतै द्या।” 36तब यीशु न ऊंकू बोलि, “तुम क्या चन्द्यां, कि मि तुम खुणि कैरुं?” 37अर ऊंन बोलि, “गुरुजी, हमतै इन इजाजत दे द्या, कि जब तुम आदर-सम्मान का दगड़ा मा राज करिल्या, तब हम दुईया का दुई एक तुमरि दैंणी तरफा अर दुसरो बैं तरफा बैठि सैका।” 38यीशु न ऊंकू बोलि, “तुम नि जणद्यां कि तुम मंगणा क्या छाँ? क्या तुम वे दुख तैं झेली सकद्यां, जु मि झिलण वळु छौं? अर जै तरीके से मेरी मौत होण वळी च क्या वे तरीके से तुम मोरि सकद्यां?”#10:38 कुछ कागज्दों मा इन लिख्यूं च कि, क्या तुम वे कटोरा तैं पी सकद्यां, जु मि पीण वळु छौं? अर जु बपतिस्मा मि लेण वळु छौं, क्या तुम वेतैं ले सकद्यां? 39ऊंन वेकू बोलि, “हाँ गुरुजी, हम झेली सकद्यां।” वेन ऊंकू बोलि, “जु दुख मि झिलण वळु छौं, वेतैं तुम जरुर झिलिल्या, अर ज्वा मौत मि झिलण वळु छौं वींतैं तुम भि जरुर झिलिल्या। 40पर मेरा दैं अर बैं तरफा बैठाण को काम मेरु नि च, पर या जगा ऊं खुणि च जौं खुणि तयार किये गै।” 41याकूब अर यूहन्ना की यों बातों तैं सुणी के दस का दस चेला ऊं दुईयों पर बड़ा गुस्सा ह्वेनि। 42अर यीशु न चेलों तैं अपणा पास बुलै के बोलि, “तुम जणदा छाँ कि ईं दुनियां का लोगु पर राज करण वळा ऊं पर जुलम करदिन, अर बड़ा अधिकारी लोग अपणा-अपणा राज्य का लोगु पर अपणु हक जमौन्दिन। 43पर तुम लोगु का बीच मा इन नि होण चयेणु, अगर तुम मा बटि कुई बड़ु होण चान्दु, त उ पैलि तुमरो सेवक बणु, 44अर जु कुई तुम मा बटि परधान होण चान्दु, त उ सभ्यों की सेवा करण वळु हो। 45किलैकि मनखि को पुत्र अपणी खातिरदारि करौणु खुणि नि ऐ, बल्किन मा इलै ऐ, कि खुद सेवा कैरो अर भौत सा लोगु तैं ऊंका पापों की सजा से आजादी दिलौणु खुणि अपणी जान दे द्यो।”
अन्धा बरतिमाई तैं खूब करण
(मत्ती 20:29-34; लूका 18:35-43)
46अर येका बाद यीशु अर वेका चेला यरीहो नगर मा ऐनी। अर जब वु यरीहो नगर बटि निकळण लगि गैनी, त एक बड़ी भीड़ वेका पिछनै चलण लगि गै। अर सुणा, बाटा का किनरा एक अन्धु भिकारी बैठयूं छौ, जैको नौ बरतिमाई छौ, अर येका बुबा को नौ तिमाई छौ। 47अर वे अन्धा न सुणी कि नासरत गौं को यीशु इख च, त वु चिल्लै-चिल्लै के बुलण लगि गै, “हे राजा दाऊद का वंशज यीशु, मि पर दया कैर।” 48तब भौत सा लोगु न वेतैं झिड़की की चुप ह्वे जा, पर उ और भि जादा जोर से चिल्लै के बोन्न लगि गै, “हे राजा दाऊद का वंशज, मि पर दया कैर।” 49तब यीशु रुकी गै अर वेन बोलि, “वेतैं इख बुला।” अर लोगु न वेतैं जैके बुलै अर वे अन्धा मनखि कू बोलि, “हिम्मत रख, अर खड़ु हो किलैकि यीशु त्वेतै बुलाणु च।” 50अर जु कपड़ा वेन उड़युं छौ वेन वेतैं एक तरफा ढोळि, अर चड़म उठी के यीशु का पास ऐ। 51यीशु न वेतैं पूछी, “तू क्या चान्दी, कि मि त्वे खुणि कैरुं?” अर वेन बोलि, “गुरुजी, मि इन चान्दु कि मि फिर से दिखण लगि जौं।” 52यीशु न वेकू बोलि, “जा, तू खूब ह्वे गै, किलैकि तिन मि पर बिस्वास कैरी।” अर उ तुरन्त दिखण लगि गै, अर वे ही बाटा मा यीशु का पिछनै चलण लगि गै।
S'ha seleccionat:
मरकुस 10: GBM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.