मरकुस 13
13
मन्दिर नास होण की भविष्यबाणी
(मत्ती 24:1,2; लूका 21:5-6)
1अर जब यीशु मन्दिर बटि भैर जाणु छौ, त वेका चेलों मा बटि एक न वेकू बोलि, “देखा गुरुजी, कथगा बड़ा ढुंगो से कथगा सुन्दर भवन बणयां छिन।” 2तब यीशु न ऊंकू बोलि, “तुम यों बड़ी-बड़ी दिवालों तैं दिखणा छाँ, इख एक ढुंगो दुसरा ढुंगा का मथि नि रालु, किलैकि वु सब ढुळै जाला।”
आखिरी का दिनों का बारा मा यीशु की भविष्यबाणी
(मत्ती 24:3-28; लूका 21:7-24)
3अर यीशु जैतून नौ का पाड़ पर बैठयूं छौ, अर मन्दिर वेका समणि दिखैणु छौ। तब पतरस, याकूब अर यूहन्ना अर अन्द्रियास न अलग मा जैके यीशु बटि पूछी कि, 4“गुरुजी, हमतै इन बता कि जु बात तुमुन बुलिनी वु सब कब पूरि होलि? अर जब वु पूरि होण लगि जालि त वेको चिन्न क्या जि होलु?” 5वेन ऊंकू बोलि, “चेतन रा, कुई भि तुमतै भरमै नि सैको। 6अर भौत सरा लोग मेरा नौ से आला अर बुलला कि, #निर्ग 3:14‘मि उई छौं,’ अर भौत सा लोगु तैं भरमै द्याला। 7अर जब तुम लड़ै अर लड़ै की अफवा का बारा मा सुणिल्या, त घबरै नि जयां, किलैकि यों सब बातों को होण जरुरी च, पर वे बगत भि अन्त नि होलु। 8किलैकि एक देस दुसरा देस पर, अर एक राज्य दुसरा राज्य का खिलाप मा खड़ा होला। अर भौत सि जगों पर भ्वींचळा आला, अर अकाळ पोड़लु। अर यों सब बातों से त बस दुख की शुरुवात होलि।
9“पर तुम अपणा बारा मा चौकस रा, किलैकि लोग तुमतै न्याय समितियों का हवाला करला अर तुमतै प्रार्थना भवनों मा पिटला, अर मेरा खातिर लोग तुमतै अधिकारीयों अर राजाओं का समणि खड़ा करला, अर यू वु अवसर होलु, जब तुम मेरा बारा मा बता। 10पर जरुरी यू च, कि पैलि शुभ समाचार को परचार सब जातियों मा किये जौ। 11जब लोग तुमतै लि जैके ऊं लोगु का हवाला करला, त तुम पैलि बटि इन चिन्ता नि कर्यां कि हमुन क्या जि बोन्न, किलैकि पवित्र आत्मा वे ही बगत तुमतै सिखालु कि बोन्न क्या च। अर तुम उई बुलयां, किलैकि बुलण वळा तुम नि छाँ बल्किन मा पवित्र आत्मा च। 12अर भै अपणा ही भै तैं मरणु खुणि पकड़वै द्याला, अर ठिक उन्नि बुबा भि अपणा नौना तैं मरणु खुणि पकड़वै द्याला, अर बच्चा अपणा ब्वे-बाब का खिलाप मा ह्वेके ऊंतैं मरवै द्याला। 13अर मेरा नौ का खातिर सब लोग तुम बटि नफरत करला, पर जु आखिरी तक सबर रखलु वेतैं ही बचयै जालु।
14“अर यीशु न इन भि बोलि, ‘अर जब तुम खण्डर करण वळी वीं #दानि 9:27; 11:31; 12:11अशुद्ध चीज तैं ज्वा की वीं जगा पर खड़ि किये जाणि हो, इन होन्द दिखल्या, जख कि वींतैं नि होण चयेणु (जु पढणु च उ ईं बात तैं समझि ल्यो) तब जु यहूदिया मुलक मा हो उ पाड़ो जनै भागी जौ। 15अर जु कुई छत मा हो उ मूड़ी नि उतरो, अर ना ही उ घौर बटि कुछ लेणु खुणि भितर जौ। 16अर जु पुंगड़ा मा हो, उ अपणु कपड़ा लेणु कू पिछनै नि जौ। 17अर ऊं दिनों मा जु गरवति होलि, या अपणा बच्चों तैं दूद पिलाणि होलि, ऊं खुणि यू दिन भौत पीड़ा देण वळा होला। 18अर इन प्रार्थना कैरा कि तुमतै ह्यूँद का दिनों मा नि भगण पोड़ो, 19किलैकि तब संकट का इन्द्रया दिन आला, याने कि इन्द्रयो संकट जु की परमेस्वर की बणईं #दानि 12:1ईं दुनियां की शुरुवात बटि नऽ त अभि तक ऐनी, अर ना ही फिर कभि आला। 20अर अगर जु प्रभु ऊं दिनों की गिनती कम नि करदु, त कुई भि मनखि नि बचदु, मगर जौं लोगु तैं परमेस्वर न चुण्यालि, ऊं लोगु का खातिर ही वेन ऊं दिनों की गिनती कम कैरी।’ 21अगर वे बगत मा लोग तुमकु बुलला कि, ‘देखा मसीह इख च’ या ‘देखा मसीह उख च,’ त तुम यकीन नि कर्यां।” 22किलैकि झूठ्ठा मसीह अर झूठ्ठा रैबर्या ऐ जाला, अर इन ह्वे सकदु कि चुण्यां लोगु तैं भरमौण खुणि ऊ बड़ा-बड़ा चिन्न अर चमत्कार का काम कैरिके दिखाला। 23पर तुम लोग चौकस रा, सुणा, यू सब कुछ मिन तुमतै पैलि ही बतैयालि।
यीशु को फिर से वापस औण
(मत्ती 24:29-31; लूका 21:25-28)
24अर यीशु न चेलों कू इन भि बोलि, #यशा 13:10; 24:23; 34:4 “ऊं दिनों मा ये संकट का तुरन्त बाद सूरज अन्धेरु ह्वे जालु, अर चाँद भि अपणु उज्याळु देण बन्द कैरी दयालु, 25अर आसमान का गैंणा मूड़ी पोड़ि जाला, अर जु कुछ भि #योए 2:10आसमान मा च वु सब कुछ इनै-उनै ह्वे जालु। 26तब लोग मनखि का पुत्र तैं बादळों मा बड़ी ताकत अर बड़ा आदर-सम्मान का साथ मा वापस औन्द दिखला। 27अर वे बगत मनखि को पुत्र अपणा स्वर्गदूतों तैं भेजलु, ताकि वु वेका चुण्यां लोगु तैं पूरि दुनियां का हरेक दिसा से इकट्ठा कैरा।”
सदनि खुणि यीशु को वचन
(मत्ती 24:32-35; लूका 21:29-33)
28तब यीशु न ऊंकू बोलि, “तिमला का डाळा बटि इन सबक सीखा। जब वे पर फौंका लगदिन, अर कुंगळा पत्ता निकळण शुरु ह्वे जनदिन, त तुमतै पता लगि जान्दु कि रुड़्यूं का दिन नजदीक ऐ गैनी। 29ठिक उन्नि जब तुम ऊं बातों तैं होन्द दिखल्या, त समझि ज्यां कि मनखि का पुत्र को वापस औण नजदीक ही च, बल्किन मा #याकू 5:9समणि ही च। 30अर मि तुम बटि सच्च बोन्नु छौं कि जब तक यू सब बात पूरि नि ह्वे जालि, तब तक ईं पीढ़ी को अन्त नि होलु। 31आसमान अर धरती को नास ह्वे जालु, मगर मेरी बुलिं बात कभि नि टळळि।”
चौकस रा
(मत्ती 24:36-44)
32अर यीशु न चेलों कू इन भि बोलि, “वे दिन अर वे बगत का बारा मा कुई भि नि जणदु, नऽ त स्वर्गदूत अर ना ही पुत्र, पर केवल पिता परमेस्वर ही जणदु। 33इलै चौकस रा अर बिज्यां रा, किलैकि तुम नि जणद्यां कि उ बगत कब ऐ जालु।
34“अब मि तुमतै वे दिन अर वे बगत का बारा मा एक उदारण बतौन्दु, एक दिन एक मनखि जैन परदेस जाण का बगत अपणा घौर की जबाबदारी अपणा नौकरों का हाथों मा सौंप दिनी, अर हरेक तैं वेको काम बतै, अर पैरेदार तैं आज्ञा दिनी की चौकस रै। 35ठिक उन्नि तुम भि चौकस रा, किलैकि तुम नि जणद्यां कि घौर को मालिक कब ऐ जालु, ह्वे सकदु रुमुक होण पर या अधि रात मा, या फिर रात खुलण का बगत मा, या सुबेर लेके, 36कखि इन ना हो कि वु अचानक ऐ जौ, अर तुमतै सियूं#13:36 इख मा “सियूं” को मतलब इन च कि आत्मिक रुप से सियूं। देखो। 37अर जु कुछ मि तुम बटि बोन्नु छौं उई मि सभ्यों कू बुल्दु कि, चौकस रा।”
S'ha seleccionat:
मरकुस 13: GBM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.