यहून्नो 1
1
बचन देहधारी शुई
1दिह भत्ते संसारो शुरुवात बेहच़ी तुहई दुह तोहई अतिंङ बचन कुट्री, दंङ दुह परमेश्वरारंङ साते तोहई दंङ दुह परमेश्वर तोहई। 2दुह शुरुवात बेहच़ी परमेश्वर रंङ साते तोहई।
3परमेश्वरे दोऊ दोरच़ी भत्ते धिर बणाएठ्री शुह, दंङ छिला धिर दुह मेह बणाएषी माह शुह। 4दुह भत्ते जीवनो आधार शुह दंङ दू, दुह ए शुह अच़ि मीहतिंङ छंङी रंड्री। 5दंङ छंङी हंञारारंङ चमकेक्फी; हंयारे दोबि सच़ी मरति।
6इच्च़ा मीह परमेश्वरो दोरच़ी अति दोऊ मिन यूहन्ना तोहई। 7दुह दिऊ थल्जी अंजा कि छंङीऊ गवाही रमतो, कि भत्ते दोऊ गवाही ओ दोरच़ी दुह छंङीऊ टोहकठे विशवास लोहर। 8यूहन्ना ऐनाह ता दुह छंङी माह तोहई, दुह छंङीऊ पाहठी गवाही रंड्री अंज़े तोहई।
9“मसीह अंऊ सच्चे छंङी तोह” अच़ि हर इच्च़ा मीहबी छंङी लहज़ाते, संसारारंङ अपि लेहकी तोहई। 10दुह संसारारंङ तोहई, दंङ संसार दोऊ दोरच़ी बणाएषी तोहई, दंङ संसारो मीहज़ी दुह सेहच़ी मरतिरे। 11दुह एनोह मीहतु चुंङ अति दंङ दोऊ ऐनोह ए मीहज़ी दुह ठुकराके च़रतिर। 12पर अच़िला दुह अपनाएक्तोर, दोई दोतिंङ परमेश्वरो कटुरे शुहबिमी अधिकार रेंई, या दोरे अच़ि दोऊ टोहकठे विशवास लहज़ातोर।
13दोरे माह, बाह-मेमेतु दोरच़ी, माह मीहू हिटी रंङ, माह मीहतु कटुऊ प्राप्ति थल्जी पर परमेश्वरो दोरच़ी जेह्की शुहर।
14दंङ बचन इच्च़ा मीहू रुपंङ अति; दंङ मोह्ड़े दाह ए सच्चाईरङ परिपूर्ण शुहचे हेंदु बिचंङ डेरा लहरी, दंङ हेंज़ी दोऊ धिंङघा महिमा खंणी छना पिता (परमेश्वरो) इच्च़ा योह। 15“यूहन्ना ज़ि दोऊ पाहठी गवाही रेंई, दंङ हाऊष रें कुंई, दी दुह ए शुह, अतु पाहठी गेह कुहतेग, कि अंऊ गिऊ थल अपा दुह गिह्बी ला मोह्ड़े तोह, छना कुचे दुह गिह्बी ला तुहई मौजूद तोहई।” 16छना कुचे दोऊ मोह्ड़े दाह ओ परिपूर्णतारंङ साते हेंज़ी भत्ते धिर खोकषातंई मतलब आशीषो टोईच़ी आशीष। 17दिऊ थल्जी कि कानून ता मूसा ओ दोरच़ी रांहषी शुह, पर परमेश्वरे मोह्ड़े दाह ए सच्चाई यीशु मसीहू दोरच़ी कंङातो। 18परमेश्वरा बि अच़िला अपेहला तंङशी माह शुह। सिर्फ परमेश्वरो इच्च़ा योह अंऊ सच्चा परमेश्वर शुह दंङ अरी बाहो कछंङ तोह, अच़ि ञेंतिंङ कंङातो कि परमेश्वर छना ठ्रोह तोह।
यूहन्ना बपतिस्मा रंड्राढो गवाही
19यूहन्ना ओ गवाही दीह शुह, कि अपेहल यहुदी सेंहणा ज़ि यरूशलेम शहरंङ च़ि यहुदी पुरोहित ए लेवी रे दीह रुक्च़िमी च़रतिरे, “कांह अरी शुनाह?” 20दंङ दोई दोतिंङ साफ-साफ कुई, “गेह मसीह माह शुगाह।”
21दंङ दोच़ी दुह रूहक्तिर, “दंङ का अरी शुनाह?
छि कांह एलियाह भविष्यवक्ता शुनाह?” दोई कुहतो, “गेह माह शुगाह।”
“छि दुह भविष्यवक्ता शुनाह?” दोई जुबाब रेंई, “माह शुगाह!”
22दंङ दोच़ी दुह रुक्तिरे, “दंङ कांह अरी शुनाह? ताकि हेंज़ी हेंदु च़रच़ा दोतिंङ जुबाब रमोंई। केई केनोह पाहठी छि कुट्रातन?” 23दोई कुहतो, छना यशायाह भविष्यवक्ता ज़ि कुतोह गेह सुनसान ठाहरीरिंङ इच्च़ा मीहू हऊषेपि सग शुगाह, “कि केहच़ी प्रभु ऊ स्वागतो थल्जी केनातु सेहम तेयार लंहि दंङ केनाहतिंङ सुधारेतुंई।”
24दिहरे फरीसी मीहतु दोरच़ी च़रसी तोईरे। 25दोच़ी दोबि दिह सवाल रुकतिरे, अगर कांह मसीह माह शुनाह, माह एलियाह भविष्यवक्ता, दंङ माह दुह भविष्यवक्ता शुनाह, दंङ बपतिस्मा छिले रंड्रातन?
26यूहन्ना ज़ि दोबि जुबाब रेंई गेह ता केतिंङ ती रंङ साते बपतिस्मा रंदेग पर केहतु विचंङ इच्च़ा मीह खड़े तोह अच़ि केहच़ी माह ञेंहनी। 27मतलब दुह गिऊ थल अबिमी तोह, गेह दिऊ जोगे माह शुगाह कि कोंङा शुहचे दोऊ बुह्टो तस्मा युफोग, 28दि गप्पारे यरदन बेंड़ीऊ नुरेच़ि बैतनिय्याह नगरंङ शुई, अंऊर यूहन्ना मीहतिंङ बपतिस्मा रंड्रा तोहई।
परमेश्वर ओ कुर्च़ा
29“दोऊ ओइरग दोई यीशु बि एनोह हखा अपि तंङाते कुहतो, खंणु, दी परमेश्वरो कुर्च़ा शुह, अच़ि संसारो पापो उठा के शिली! 30दीह दुहए शुह अतु पाहठी गेह कुहतेग, इच्च़ा गंङमी गिऊ थलेसी अपत दुह गिहबे ला मोह्ड़े शुह, छना कुचे दुह गिहबे तुई तोहई। 31दंङ गेह ता दुह माह सेहचातग कि दुह मसीह तोहई, पर दिऊ थल्जी गेह तिऊ दोरच़ी बपतिस्मा रंड्रा अन्जी शुगाह कि इस्राएल देशो मीहतु टोईच़ी प्रगट शुहबी जूंस! 32दंङ यूहन्ना ज़ि दी गवाही रेंई; गेह पवित्र आत्माबि कबूतरो ठ्रोह सर्गंङ ज़ि योंखा तक्सी तंङरिगा, दंङ दुह दोऊ टोईच़ी नहच़ीरी! 33गेह ता दुह माह सेहचातग, पर अच़ि गिह्बी ती रंङ बपतिस्मा रंड्रीमी थल्जी च़रसी तोहई, दोई ए गेरंङ साते कुई, अतु टोईच़ी केई आत्माबि तक्सी दंङ नह्च़ी खमोंई, दुह ए पवित्र आत्मो बपतिस्मा रंड्रा शुह। 34दंङ गेह खांणीगा, दंङ गेह करंङ साते हेले कुट्रातग कि दी ए परमेश्वरो योह शुह।”
यीशु ऊ मुण्डो चेलारे
35दोऊ ओइरग यूहन्ना ए दोऊ चेला तु बिचंङ झुह्ट मीहरे खड़े तोईरे,
36दंङ दोई यीशु बि अरी दोर्तिंङ इबि लेहकी तोहई, दोखा खंड्रा कुंई, “खंणुई, दी परमेश्वरो कुर्च़ा शुह।” 37दंङ दुह झुह्ट चेलारे दोऊ दी गप्पा रेड्रा यीशु थले शुहचे इलिरे 38यीशु ज़ि थलका यह्च़ा दोतिंङ थालेसी अपि खंणी दंङ दोतिंङ कुहतो, केरे अतु खोजा रिंङ तोईन? दोच़ी दोबि कुहतो, हे गुरु, कांह अंऊर बंङज़ातन? 39दोई दोतंङ साते कुंई, “जोनी दंङ खमोंई।” नीरो लगभग चार बजेके इलजी तोहई अपेहल दोरे दोरंङ साते इलिरे दंङ खंयातोर कि दुह अंऊर बंङज़ा। दिऊ थल्जी दोरे बचेके ध्याड़ाओ थल्जी दोर्तिंङ ए रुमज़ा इलिर।
40दोकु बिचंङ च़ि, अरी यूहन्नो गप्पा रेड्रा यीशु थले शुहचे इलिरे, इच्च़ा शमौन पतरसो न्वा अन्द्रियास तोहई। 41दोई मुण्डा एनोह सका न्वा शमौन रंङ साते दोइए कुहतो, ञेंतिंङ मसीह मतलब परमेश्वरो दोरच़ी अभिषेक लहसी खोकसा इलज़ा।
42अन्द्रियासे शमौना बि यीशु कछंङ हति यीशु ज़ि दुह खांई कुहतो, “कांह यूहन्ना ओ योह शमौन शुनाह, कांह कैफा मतलब पतरस कहलाएपोन।”
फिलिप्पुस ए नतनएल बि बुलाएच़ी
43दोऊ ओइरग यीशु ज़ि गलील प्रदेशो हखा इबिमी सेहम लहरी, दंङ फिलिप्पुस रंङ साते दोई कुहतो, गिऊ चेला बणेक्पिमी थल्जी, “गिऊ थले शुहचे इला।” 44फिलिप्पुस ता अन्द्रियास ए पतरसो नगर बैतसैदा ओ नगरप्पा तोहई। 45फिलिप्पुसे नतनएल रंङ साते दोई दंङ दोरंङ कुहतो, “अतु पाहठी मूसा ज़ि कानूना दंङ भविष्यवक्ता लहरिरे, दुह ञेंतिंङ खोकसा इलिरे; दुह नासरत नगरो यूसुफो योह, यीशु शुह।”
46नतनएल ए दोरंङ साते कुंई, “छि रुठे चीज़ नासरत नगरंङ ज़ि हुंज़तोआ?” फिलिप्पुसे दोरंङ साते कुंई, “जो दंङ खांई च़रतु।” 47यीशु ज़ि नतनएल बि एनोह हखा अपि खंणी रंङ साते दोऊ पाहठी कुहतो, “खंणुई, दी इस्राएलो भरोसेमंद खानदानो शुह: अरी पुरे ठ्रोह ईमानदार तोह।”
48नतनएले दोरंङ साते कुंई, केई गेह छना ञेंहना? यीशु ज़ि दोबि जुबाब रेंई, “दिबे तुई फिलिप्पुसे कांह बुलाएती, अपेहल कांह अंजीरो बुटो पोयंङ तोइना, दोहपल गेह कनिंङ खंयातेग।”
49नतनएले दोबि जुबाब रेंई, “हे गुरु, कांह परमेश्वरो योह शुनाह: कांह इस्राएलो महाराजा शुनाह।” 50यीशु ज़ि दोबि जुबाब रेंई, “गेह करंङ साते छिला कुहतेग केना अंजीरो बुटो पोयंङ तंङरिगा, छि केई दिऊ थल्जी विशवास लहज़ातन? केई दिबे ला मोह्ड़े-मोह्ड़े कम खमोंन।” 51दंङ दोरंङ साते कुंई, गेह केतंङ साते हेले कुट्रातग कि केहच़ी स्वर्ग बि अल्सा ए परमेश्वरो स्वर्ग दूतातिंङ खेका इबि ए गेह मीहू योहू टोईच़ी तक्सी खमोंई।
S'ha seleccionat:
यहून्नो 1: LBFNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.