लूको 19
19
चुंगी लेहप्च़ाड़ जक्कई
1यीशु यरीहो शहरंङज़ि शुहचे इपि लेहकी तोहई 2दोर तिंङ जक्कई मिन्दु इच्च़ा मीह तोहई अरी चुंगी लेहप्च़ातु मुख्या ए साहुकार तोहई। 3दुह यीशु बि खंड्रिमी तहरे कि दुह छना ठ्रोह तोह? पर भीड़ो बजाहज़ि खंड्री माहरच़ाते, छना कुचे दुह छोह्टे तोहई। 4दंङ दोबि खंड्रिमी थल्जी दुह तुंखा ज़रका रेंऐ इच्च़ा अंजीरो बुटो टोईच़ी हुंच़ा इलि, छना कुचे यीशु दुहए अमज़ि इबिमी तहरे। 5अपेहल यीशु दुह बुटो कछंङ पिचाते अंऊर जक्कई तोहई, दंङ यीशु ज़ि खेका खांई दोरंङ साते कुहतो, “हे जक्कई, युरनाह तहक्सा अता; छना कुचे गीहबी तोग कांह चुंङ अपि ज़रूरी तोह।” 6दुह दोथरे बुटो दोरच़ी तहक्सा अति दंङ यीशु बि एनोह चुंङ रेंज़ा शिली दंङ खुशी रंङ साते दोऊ स्वागत लहरी। 7दिह खंड्रीरंङ भत्ते मीहरेर कुड़कुड़ाएच़ी कुट्री लेहतिरे, “दुह ताह इच्च़ा पापी मीहू दोहर य्वा।”
8जक्कई ज़ेइमी टेमारिंङ खड़े शुहचे प्रभु यीशु हखा कुट्री लेहती, “हे प्रभु, खंणु गेह घेंङौ अध्धा टंगा ढबाह गरीबातिंङ रंड्रातग, अगर गेह अतुआ दोरच़ी चुंगी लेहप्च़िमी टेमा छिला गलत लेह छिला लेहपसी तातग ताह, दोबि गेह पी गुणा लेह रें च़रपोग।” 9दंङ यीशु ज़ि दोबि कुहतो “तोहग दिह घरबारो मीहतु बिचंङ उद्धार शुहचा, छना कुचे कि दिह लाह अब्राहमो खानदानो शुह, 10छना कुचे गेह मीहू योह योंहंषा मीहतिंङ अनंत सज़ाओ दोरच़ी बचाएक्च़िमी थल्जी ए दोतु उद्धार लहच़िमी थल्जी अंज़े शुगाह”
सा मुहरो कथा
11अपेहल मीहरेर दिह गप्पारे रेड्री लेहकी तोईरे दंङ दोई इच्च़ा कथा कुंई, दिऊ थल्जी कि दुह यरूशलेम शहरो कछंङ तोहई, दंङ मीहरेर चेहच़ातेर कि परमेश्वरो राज हेंतेग प्रगट शुहचे योतो। 12दंङ यीशु ज़ि दोतंङ कुहतो, “इच्च़ा साहुकार मीह ऊहई देशो हखा यवाते कि राजपद लेहपच़ा यह्च़ा अपतो। 13दोई एनोह परगरो बिचंङज़ि सा परगरा रे बुलाके दंङ दोतिंङ राह तोड़ा (मतलब इच्च़ा मीहू षुमु सालो कमाई) रें दंङ दोतिंङ कुंई, गिऊ यह्च़ा तचेक लेन देन लांई।” 14“पर दुह साहुकारो इलाका ओ मीहरेर दोरंङ साते दुश्मनी तहच़ातेर, दंङ दोच़ी एनातु थोड़े अरे उजाब लहज़ातिंङ दुह साहुकारो थले चरच़ातेर कि ञेंहच़ी माहजुंज़ातंई कि दोई ञेंहतु टोईच़ी राज लोहतो।”
15“अपेहल दुह साहुकार राजपद खोकसा यह्च़ा अति, दोपहल दोई एनोह परगरातिंङ बुलाक्ति अतिंङ दोई ज़ङों सिक्कारे रांहषी तहरे, ताकि दोई दोतु दोरच़ी लेन देनो पता लोहतो, कि दोच़ी छि-छि कमाएकातोर। 16दंङ तुहई मुखो दोई अंज़े कुहतो हे मालिका कांह मुहर ओ दोरच़ी राह तोड़ा दोरच़ी ऊई राह तोड़ा कमाएक्तग। 17साहुकारे दोबि कुहतो, हे रूठे परगरा, कांह धन्य शुनाह, दिऊ थल्जी कि कांह कवचि अरे ज़िम्मेवारी रिंङ ला बिशवासो जोगे हुंच़िरी, दा केई सा इलाकाओ ज़िम्मेवारी सोटेक्तु। 18अईदि अंज़े कुहतो, हे मालिका। कांह मुहर ओ दोरच़ी ङा ऊहई मुहरे कमाएक्तग। 19साहुकारे दोऊ हखा कुंहई, ‘केई ला ङा इलाकाओ ज़िम्मेवारी सोटेक्तु।’ 20तीसरा दोई अंज़े कुंई, हे मालिका खंणु कांह मुहर देर्तिंङ तोह, अतिंङ गेह खम्ज़ेरंङ छ़ुह्च़ी ताहरेग। 21छना कुचे गेह करंङ साते बेवातग झांह लेह कि कांह निर्दयी मीह शुनाह; केई छि केहषी माह दुह ला उठाके चरच़ातन केई छि एहसी माहतन केई दुह ला ट्रिके चरच़ातन। 22साहुकारे दोबि कुहतो, हे मांजी परगरा, गेह कांह ए गप्पा ज़ि काह दोषी लोहग! केई गेह ञेंहच़ातेन कि गेह निर्दयी मीह शुगाह, छि गेह केहषी माह दुह उठाएच़ी, दंङ छि गेह एहसी माह दुह गेह ट्रिकट्री; 23दंङ कनिंङ झांह लेह जूंशी तोहई कि गिऊ मुहर ब्याजारिंङ रेह च़रतिआ; कि गेह अंज़े दोऊ दोरच़ी ब्याजारंङ साते लेहपतिगा।
24दंङ अरी मीहरे कछंङ तोईरे साहुकारे दोतंङ कुहतो, दुह मुहर दिऊ दोरच़ी लेहपच़े च़रतुंई, दंङ अच़ि राह तोड़ा दोबि रेंऐ च़रतुंई। 25दोच़ी साहुकारो हखा कुंई; ‘हे मालिका दोई ता तुहई ए राह तोड़ा ततो।’ 26गेह केतंङ साते कुट्रातग कि छना कुचे अतु कछंङ तोह, दोबि ऊई ला महस खोकसोतो, दंङ अतु दोहर छले माह, दोऊ दुह ला योह्सा योतो, अंऊ दोऊ कछंङ तोहई, 27पर गिऊ दुह बेरीतिंङ अच़ि माह जुंज़ातेर कि गेह दोतु रज्ज़ा बणेक्पोग, दोतिंङ गिऊ तुईज़ी हंजे सचे च़रतुंई।”
यरूशलेम शहरंङ विजय प्रवेश
(मत्ती 21:1-11; मरकु 11:1-11; यहून्न 12:12-19)
28दिह गप्पारे कुचे यीशु यरूशलेम शहरो हखा एनोह चेला तु तुईज़ी ज़ोई लेहती। 29दंङ अपेहल दोरे जैतून मिंदंङ गोह मुखारिंङ बेतफगे ए बैतनिय्याह नगरो कछंङ अच़ा अतिरे। दंङ यीशुज़ि एनोह चेला तु बिचंङ झुह्ट चेलारे दि कुह्चे च़रति कि, 30“तुईज़ी नगरंङ ईलांई, दंङ दोहर पिचे ए केतिंङ इच्च़ा करेटी कटु, अतु टोईच़ी अपेहल ला अरीला माह बंङज़ी शुह, केतिंङ छुहसा खोकसोतो, दुह युहप्चे रेंज़ा हतांई। 31अगर अच़िया कनिङ रुहक्ती साते ता, छिले युहप्चातंई दंङ कुचे च़रतुंई कि प्रभु यीशु बि दिऊ ज़रूरत तोह।”
32अंऊ दिऊ थल्जी च़रसी ताहरेर, दोच़ी इलजे छना यीशु ज़ि दोतंङ कुहते, ध्वांए खोक्शातोर। 33अपेहल दोरे दुह करेटु युहप्च़ी लेहकी तोईरे ता, दोऊ मालिकाज़ि दोरे रूहक्तोर, “दिह करेटु कटु बि छिले युहप्चातंई?” 34दोच़ी कुहतोर, “प्रभु यीशु बि दिऊ ज़रूरत तोह।” 35दोच़ी दुह करेटु यीशु कछंङ हतिरे, दंङ एनातु खमज़े दुह करेटु टोईच़ी केह यीशु दोऊ टोईच़ी बेठाके च़रतिर। 36अपेहल दुह इपि लेहकी तोहई, एनोह-एनोह शाल चादर अमरिंङ थिङी लेहतिर।
37अपेहल यीशु दुह डेशके ठाहरीरिंङ पिचाते अंऊरच़ि सड़का जैतून ओ गोह योंहखा यरूशलेम शहरो हखा य्वाते, दंङ चेला तु भत्ते मंडली दुह भत्ते सामर्थो कमातु बजाहज़ि अंऊ दोच़ी तंङातेर खुश शुहचे हाऊष रें परमेश्वरो स्तुति लहज़ी लेहतिर; 38“धन्य शुह दुह रज्ज़ा अरी अंऊ प्रभुऊ अधिकारंङ अपा स्वर्गंङ शांति ए सर्गंङ महिमा शोतो।” 39दंङ भीड़ो ज़ि रेह फरीसी मीहरेर यीशुबि कुट्री लेहतिर, “हे गुरु, केनोह चेला तिंङ रैहचु कि दोरे चुपे तोहर।” 40यीशु ज़ि दोतिंङ जुबाब रेंई, “गेह केतंङ साते हेले कुट्रातग अगर दिहरे चुह्पे बंङज़िरे, ता रघटे हाऊषेके योर।”
यरूशलेमो शहरो थल्जी क्रपि
41अपेहल यीशु यरूशलेम शहरो कछंङ पिचा, दोपहल दुह यरूशलेम शहर खांई क्रपि लेहती। 42दंङ कुंई, “अंयों ए रूठे शुचंङ कि कांह, हाँ कांह ए, तोग कि ध्याड़ो शांति ला गप्पा ञेंह। पर हेंतेग दिह गप्पा कांह टीरा ज़ि ब्याके इलजी तोत। 43छना कुचे दुह ध्याड़ारे अपि लेहकी तोह अपेहल दुश्मन सेना केहतु पिला हासी घेराबंदी लेह केहतु हुंच़िमी अम बंद लेह केयोर। 44कांह बैरीर कांह नाश ले केयोर दंङ कांह भत्ते मीहतिंङ सचे च़रपोर, दोरे कांह चुंङो रघो टोईच़ी इच्च़ा ला रघ माह केयोर; छना कुचे केई दुह मुका अपेहल परमेश्वर कनिंङ बचाएच़िमी थल्जी अंदे सेहच़ी मरतिग।”
मंदिरंङ ज़ि व्यापारी रे हुंपी
(मत्ती 21:12-17; मरकु 11:15-19)
45दंङ यीशु परमेश्वरो यहुदी मंदिरंङ इलजे लेन-देन लहज़ातिंङ धह्तेका हुंपी लेहती, 46दंङ दोतंङ कुहतो, “पवित्र शास्त्रा रिंङ च़ेहसी तोह, गिऊ घरबार भत्ते जातिऊ थल्जी प्रार्थनाओ घरबार शोतो।; पर केहच़ी दोबि डाकुतु अड्डा बणाके चरच़ातंई।” 47दुह रोज ए यहुदी मंदिरंङ शिक्षा रंड्राते; दंङ यहुदी मोह्ड़े पुरोहितरे ए यहुदी शास्त्री ए मीहतु यहुदी सेंहणा दुह सच़िमी मोका खंड्रातेर। 48पर छिला साकिम हुंज़ी मरतिरे कि छना लोहंई, छना कुचे भत्ते रूठेरंङ दोबि रेड्रातेर।
S'ha seleccionat:
लूको 19: LBFNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.