यूहन्ना 1
1
सबले आगू मे बचन रहिस
1सबले आगू मे बचन रहिस अउ बचन परमेश्वर कर संग रहिस अउ बचन हर परमेश्वर रहिस। 2एहिच हर सबले आगू परमेश्वर कर संग रहिस। 3सबेच कुछ हर ओकर द्वारा ले बनीस है, अउ सबेच जाएत हर बनीस ओमे ले कोनो चीज हर ओकर बिना नी बनीस है। 4ओमे जीवन रहिस अउ ओ जीवन हर आदमी मन कर इंजोर रहिस 5इंजोर हर अंधार मे चमकथे अउ अंधार हर ओके ला नी अपनईस।
6एक झन परमेश्वर कती ले भेजल रहिस, जेकर नाव यूहन्ना रहिस। 7ओहर गवाही देहे बर अईस कि इंजोर कर गवाही देही ताकि सबेच झन ओकर द्वारा बिश्वास लानही। 8ओहर अपन खुद त इंजोर नी रहिस पर ओहर इंजोर कर गवाही देहे बर आए रहिस।
9सच्चा इंजोर जेहर सबेच आदमी मन ला उजियारा करथे जगत मे आए बर रहिस। 10ओहर जगत मे रहिस अउ जगत ओकरे ले जनमिस, अउ संसार हर ओला नी चिनहिस। 11ओहर अपन घर अईस अउ ओकर अपन मन ओला नी अपनईन। 12पर जेतेक झन ओला अपनईन ओहर ओमन मन ला परमेश्वर कर बेटा बने कर अधिकार देहिस, मतलब कि ओमन ला जेमन ओकर नाव पर बिश्वास रखथे। 13ओमन मन न त लहू ले न देह कर इक्छा ले न लोग कर इक्छा ले पर परमेश्वर ले जनमिस है।
14अउ बचन हर देह ला धारन करिस अउ अनुग्रह अउ सच्चाई ले भरपूर होए के हमर मांझा मे डेरा करिस अउ हमन ओकर एकस महिमा देखे जेकस कि दाऊ कर एकलौता बेटा कर महिमा। 15यूहन्ना हर ओकर बिषय मे गवाही देहिस अउ किरलाए के कहिस कि एहर ओहिच हर है, जेकर बिषय मे कहत रहे कि जेहर मोर पाछू आवथे ओहर मोर ले बड़खा है, काबर कि ओहर मोर से आगू ले ही रहिस। 16काबर कि ओकर भरपूरी ले हमन सबेच झन पाए हन मतलब अनुग्रह ले अनुग्रह। 17एकर बर कि ब्यवस्था हर मूसा कर द्वारा देहल गईस पर अनुग्रह अउ सच्चाई हर यीशु मसीह कर द्वारा पहुचिस। 18परमेश्वर ला कोनो हर कभो नी देखिन है, एकलौता बेटा जेहर दाऊ कर कोरा मे आहे ओहिच हर ओके ला परगट करिस।
यूहन्ना बपतिस्मा देहे बाला कर गवाही
(मत्ती 3:1-12; मरकुस 1:1-8; लूका 3:1-9,15-17)
19यूहन्ना कर गवाही ये है कि जब यहूदी मन यरूशलेम कर याजक अउ लेवी मन ला ओकर ले ये पूछे भेजिन कि तय कोन हस। 20त ओहर ये माएन लेहिस अउ मना नी करिस पर माएन लेहिस कि मैहर मसीह न लागो। 21जब ओमन ओकर ले पूछिन त फिर तय कोन हस का तय एलिय्याह हस ओहर कहिस मैहर न लागो त तय का वो अगमजानी हस ओहर कहिस मैहर न लागो। 22तब ओमन ओकर ले पुछिन त तय कोन हस कि हमन अपन भेजोईया ला बताबो कि तय अपन बिषय मे का कहथस 23ओहर कहिस जेकस यशायाह अगमजानी हर कहिस मैहर जंगल मे एक झन पुकारे बाला कर शब्द हो कि प्रभु कर डगर ला सीधा करा।
24एमन मन फरीसी मन कती ले भेजल रहिन। 25ओमन मन ओकर ले एकस पूछिन अगर तय न मसीह हस अउ न एलिय्याह अउ न वो अगमजानी हस त फिर बपतिस्मा काबर देथस? 26यूहन्ना हर ओमन मन ला उत्तर देहिस, कि मैहर त पानी ले बपतिस्मा देहथो, पर तुमन कर मांझा मे एक झन मैनसे ठड़होईस है, जेला तुमन मन नी जानथा। 27मतलब कि मोर पाछू आए बाला है, जेकर जूता कर डोरा ला मैहर खोले लाएक नी हो। 28ये गोएठ मन यरदन नदी कर ओ पार बैतनिय्याह मे होईस, जे जग यूहन्ना बपतिस्मा देहत रहिस।
परमेश्वर कर मेमना
29दूसर दिन ओहर यीशु ला अपन कती आत देख के कहिस, देखा एहर परमेश्वर कर “मेमना” है जेहर जगत कर पाप ला उठाए ले जाथे। 30ये ओहिच हर है, जेकर बिषय मे मैहर कहे रहे, कि एक मैनसे हर मोर पाछू आवथे, जेहर श्रेष्ट है, काबर कि ओहर मोर ले आगू ले रहिस। 31“अउ मैहर ओके ला नी पहिचानत रहे, लेकिन एकरे बर मैहर पानी ले बपतिस्मा देहत आए हो, कि ओहर इस्राएल मे परगट होए जाए।” 32अउ यूहन्ना हर ये गवाही देहिस, “मैहर आत्मा ला परेवा नियर अकाश ले उतरत आत देखे हो अउ परेवा हर ओकर मे ठहरिस। 33अउ मैहर ओला नी पहिचानत रहे, पर जेहर मोला पानी ले बपतिस्मा देहे भेजिस, ओहिच हर मोला कहिस, कि जेकर उपर तय आत्मा ला उतरत अउ ठहरत देखबे; ओहिच हर पवित्र आत्मा ले बपत्तिस्मा देहे बाला है। 34अउ मैहर देखे, अउ गवाही देहे हो, कि एहिच हर परमेश्वर कर बेटा है।”
यीशु के शुरू कर चेला
35दूसर दिन फिरिच यूहन्ना अउ ओकर चेला मन ले दुई झन ठड़होए रहिन। 36अउ ओहर यीशु पर जेहर जात रहिस देख के कहिस, देखा, एहिच हर परमेश्वर कर मेमना है। 37तब ओमन दुई चेला मन ओकर ये गोएठ ला सुईन के यीशु कर पीछू होए लेहिन। 38यीशु हर मुईड़ के अउ ओमन मन ला पीछू आवत देख के ओमन मन ले कहिस, तुमन काके खोजत हा? ओमन मन ओकर ले कहिन, हे रब्बी, मने कि (हे गुरू) तय कहा रहथस? यीशु हर ओमन मन ले कहिस, चला, त देख लेईहा। 39तब ओमन मन आए के ओकर रहे कर जगहा ला देखिन, अउ ओहिच दिन ओकर संग रहिन अउ एहर दसवां घंटा कर लगभग रहिस।
40ओ दुई झन मन जेमन यूहन्ना कर गोएठ ला सुईन के यीशु कर पीछू होए लेहे रहिन, एक झन त शमौन पतरस कर भाई अन्द्रियास रहिस। 41ओहर आगू ले अपन सग्गा भाई शमौन ले भेटाए के ओकर ले कहिस, कि हमन ला ख्रीस्त मने कि मसीह भेटाए गईस है। 42ओहर ओके ला यीशु कर लिघे लानिन; यीशु हर ओकर पर नजर कईर के कहिस, कि तय यूहन्ना कर बेटा शमौन हस, तय कैफा मने कि पतरस कहलाबे।
फिलिप्पुस अउ नतनएल कर बुलई
43दूसर दिन यीशु गलील मे जाए बर चाहिस, अउ फिलिप्पुस ले भेटाए के कहिस, मोर पाछू होए ले। 44फिलिप्पुस त अन्द्रियास अउ पतरस कर शहर बैतसैदा कर रहे बाला रहिस। 45फिलिप्पुस हर नतनएल से भेटाए के ओकर ले कहिस, कि जेकर बारे मे मूसा हर ब्यवस्था मे अउ अगमजानी मन करिन है, ओहर हमन मन ला भेटाए गईस है; ओहर यूसुफ कर बेटा, यीशु नासरी है। 46नतनएल हर ओकर ले कहिस, कि का कोनो बड़िया चीज भी नासरत ले हिकेल सकथे? फिलिप्पुस हर ओकर ले कहिस चईल के तय देख ले। 47यीशु हर नतनएल ला अपन कती आत देख के ओकर बिषय मे कहिस देखा, एहर सहिच मे इस्राएली है; एकर मे कपट नी है। 48नतनएल हर ओकर ले कहिस, तय मोला कहा जग ले जानथस? यीशु हर ओके ला उत्तर देहिस; एकर ले आगू कि तय फिलिप्पुस हर तोला बुलईस, जब तय अंजीर के रूख कर खाल्हे रहे, तब मैहर तोला देखे रहे। 49नतनएल हर ओके ला उत्तर देहिस, कि हे रब्बी, तय परमेश्वर कर बेटा हस; तय इस्राएल कर महाराजा हस। 50यीशु हर ओके ला उत्तर देहिस, मैहर त तोला कहे, कि अंजीर कर रूख के खाल्हे देखे रहे, का तेकर बर तय बिश्वास करथस? तय एकर ले बड़खा-बड़खा बुता ला देखबे। 51फिर ओकर ले कहिस, मैहर तोर ले सहिच-सहिच कहथो कि तय स्वर्ग ला खुलल, अउ परमेश्वर कर स्वर्गदूत मन ला उपर जात अउ मैनसे कर बेटा कर उपर उतरत देखिहा।
S'ha seleccionat:
यूहन्ना 1: SGJNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.