लूका 23
23
पिलातुस कर द्वारा यीशु ले प्रश्न
(मत्ती 27:1-2,11-14; मरकुस 15:1-5; यूहन्ना 18:28-38)
1तब सबेच सभा उईठ के यीशु ला पिलातुस कर लिघे ले गईन। 2“ओमन मन ये कहे के ओकर पर दोष लगाए लागिन: हमन मन एके ला लोग मन ला बहकात, अउ कैसर ला कर देहे ले मना करथे, अउ अपन आप ला मसीह, राजा कहत सुने हन।” 3पिलातुस हर ओकर ले पूछिस, “का तय हर यहूदी मन कर राजा हस?” यीशु हर उत्तर देहिस, “तय अपन ही कहथस।” 4तब पिलातुस हर प्रधान याजक अउ लोग मन ले कहिस, “मैहर ये मैनसे मे कोनो दोष नी पाथो।” 5पर ओमन मन अउ जबरजस्ती कहे लागिन, “एहर गलील परदेस ले ले के हिया तक ले, सबेच यहूदिया परदेस मे उपदेश दे देकर लोग मन ला भड़काथे।” 6एला सुईन के पिलातुस हर पुछिस, “का ये लोग हर गलीली है?” 7अउ एला जाएन के कि ओहर राजा हेरोदेस कर रियासत कर है, ओला हेरोदेस जग भेज देहिस, काबर कि ओ दिन मन मे ओहर भी यरूशलेम शहर मे रहिस।
यीशु कर हेरोदेस जग भेजई
8राजा हेरोदेस हर यीशु ला देख कर ढेरेच खुश होईस, काबर कि ओहर ढेरेच दिन ले ओला देखे बर चाहत रहिस; एकरे बर कि ओकर बिषय मे सुने रहिस, अउ ओकर ले कुछ चिन्हा देखे कर आशा रखत रहिस। 9ओहर ओकर ले ढेरेच अकुन गोएठ पुछत रहिस, पर ओहर ओमन मन ला कुछ भी उत्तर नी देहिस। 10प्रधान याजक अउ शास्त्री मन ठड़होए तन मन ले ओकर पर दोष लगात रहिन। 11तब राजा हेरोदेस हर अपन सिपाही मन कर संग ओकर अपमान कईर के ठठ्ठा मे उड़ईन, अउ भड़किला कपरा पहिनाए के ओला पिलातुस कर लिघे फिराए देहिन। 12ओहिच दिन पिलातुस अउ हेरोदेस संगता होए गिन; एकर आगू ओमन मन एक दूसर कर बैरी रहिन।
पिलातुस द्वारा यीशु मसीह ला मरे कर सजा देहई
(मत्ती 27:15-26; मरकुस 15:6-15; यूहन्ना 18:39-19:16)
13पिलातुस हर प्रधान याजक अउ सरदार अउ लोग मन ला बुलाए के ओमन मन ले कहिस, 14“तुमन मन ये मैनसे ला लोग मन ला बहकाए बाला ठहराए के मोर जग लाने हा, अउ देखा, मैहर तुमन मन कर आगू मे एकर जांच करे, पर जे गोएठ मन कर तुमन मन यीशु पर दोष लगाथा ओ गोएठ मन कर बिषय मे मैहर ओमे कुछ भी दोष नी पाए हो; 15न राजा हेरोदेस हर, काबर कि ओहर हमर लिघे फिराए देहिस है: अउ देखा, ओकर ले एसन कुछ नी होईस कि ओहर मृत्यु कर सजा कर लाएक ठहराल जाही। 16एकरे बर मैहर ओला पिटवाए के छोएड़ देहत हो।” 17(पिलातुस तिवहार कर समय ओमन मन बर एक बंदी ला छोएड़ देहे बर मजबूर रहिस)। 18तब सबेच झन मन मिल के किरलाए उठिन, “एकर काम तमाम कर, अउ हमर बर बरअब्बा ला छोएड़ दे!” 19ओहर कोनो बलवा मन के कारन जेहर नगर मे होए रहिस, अउ हत्या कर कारन जेलखाना मे डालल गए रहिस 20पर पिलातुस हर यीशु ला छोएड़ देहे कर इक्छा ले लोग मन ला फिर ले समझईस, 21लेकिन ओमन मन किरलाए के कहिन, “ओला क्रूस पर चड़हावा, क्रूस पर!” 22ओहर तीसर बार ओमन मन ले कहिस, “काबर, ओहर कोन नियर कर बुराई करिस है? मैहर ओमे मृत्यु कर सजा लाएक कोनो गोएठ नी पाए। एकरे बर मैहर ओला पिटवाए के छोएड़ देहत हो।” 23लेकिन ओमन मन किरलाए-किरलाए के पाछू पईड़ गईन कि ओला क्रूस पर चड़हाल जाए, अउ ओमन मन कर किरलई हर प्रबल होईस। 24तले पिलातुस हर हुकूम देहिस कि ओमन कर बिनती के अनुसार करल जाए। 25ओहर ओ लोग ला जेहर बलवा अउ हत्या कर कारन जेलखाना मे डालल गए रहिस, अउ जेला ओमन मन हर मांगत रहिन, छोएड़ देहिस; अउ यीशु ला ओमन मन कर इक्छा कर अनुसार सौप देहिस।
यीशु कर क्रूस पर चड़हई
(मत्ती 27:32-44; मरकुस 15:21-32; यूहन्ना 19:17-19)
26जब ओमन मन यीशु ला ले जात रहिन, त ओमन मन शमौन नाव कर एक कुरेनी ला जेहर गाव ले आत रहिस, धईर के ओकर उपर क्रूस ला लाएद देहिन कि ओला यीशु कर पाछू-पाछू ले चले।
27लोग मन कर बड़खा भीड़ ओकर पाछू होए लेहिन अउ ओमे ढेरेच झन महिला मन भी रहिन जेमन मन ओकर बर छाती-पिटत अउ बिलाप करत रहिन। 28यीशु हर ओमन मन कती मुईड़ के कहिस, “हे यरूशलेम शहर कर बेटी मन, मोर बर झिन रोवा; लेकिन अपन अउ अपन छउवा मन बर रोवा। 29काबर कि देखा, ओ दिन मन आत है, जेमे लोग मन कही, ‘धन्य है ओमन जेमन मन बांझ है अउ ओमन जेमन मन कर गर्भ हर नी जने अउ ओ स्तन जेमन मन दूध नी पिलईन।’
30ओ समय
‘ओमन मन पहार मन ले कहे लागही कि हमन पर गिर,
अउ टीला मन ले कि हमन ला ढाएप लेवा।’
31काबर कि जब ओमन मन हरियर रूख कर संग मे एसन कईर सकथे, त झुराल मन कर संग का कुछ नी करल जाही?”
32ओमन अउ दूई झन मन ला भी जेमन कुकरमी मन रहिन ओकर संग घात करे बर लेते गईन।
33जब ओमन मन ओ जगहा जेला खोपड़ी कहथे पहुचिन, त ओमन मन हुवा ओला अउ ओ कुकरमी मन ला भी, एक ला जेवनी अउ दूसर ला डेरी कती क्रूस मन पर चड़हईन। 34तब यीशु हर कहिस, “हे दाऊ, एमन मन ला छमा कर, काबर कि एमन मन नी जानथे कि का करथे।” अउ ओमन मन चिठ्ठी डाएल के यीशु के कपरा मन ला बाएट लेहिन।
35लोग मन ठड़होए-ठड़होए देखत रहिन, अउ सरदार हर भी ठठ्ठा कईर के कहत रहिन, “एहर दूसर झन मन ला बचईस, अगर एहर परमेश्वर कर मसीह है, अउ ओकर चुनल है, त अपन आप ला बचाए लेहे।” 36सिपाही मन भी लिघे आए के अउ सिरका ला दे के यीशु मसीह कर ठठ्ठा कईर के कहत रहिन, 37“अगर तय हर यहूदी मन कर राजा हस, त अपन आप ला बचाए ले!” 38अउ यीशु कर उपर एक दोष पत्र ला भी लगे रहिस, “एहर यहूदी मन कर राजा है।”
क्रूस पर मन फिराए बाला कुकरमी
39जे कुकरमी मन हुवा लटकाल गए रहिन, ओमन मन ले एक झन हर यीशु मसीह कर निन्दा कईर के कहिस, “का तय मसीह नी हस? त अपन ला अउ हमन मन ला भी बचा!” 40एकर बर दूसर झन हर ओला जन्गाए के कहिस, “का तय हर परमेश्वर ले भी नी डरथस? तय हर भी ओहिच सजा ला पाथस, 41अउ हमन मन त न्याय अनुसार दण्ड ला पात हन, काबर कि हमन अपन बुता कर सहिच फर ला पात हन; पर एहर कोनोच अनुचित बुता नी करिस।” 42तब ओहर कहिस, “हे यीशु, जब तय अपन राएज मे आबे, त मोर सुधि लेबे।” 43यीशु हर कहिस, “मैहर तोर ले सहिच कहथो कि आएज ही तय मोर संग मे स्वर्ग लोक मे होबे।”
यीशु मसीह कर प्रान छोड़ई
(मत्ती 27:45-56; मरकुस 15:33-41; यूहन्ना 19:28-30)
44अउ लगभग दुईपहर ले तीसर पहर तक ले सबेच देश मे अन्धार छाए रहिस, 45अउ बेर कर इंजोर हर जात रहिस, अउ मन्दिर कर परदा हर मांझा ले फईट गईस, 46अउ यीशु हर जोर से किरलाए के कहिस, “हे दाऊ, मैहर अपन आत्मा ला तोर हाथ मे सौपत हो।” अउ ये कह के प्रान ला छोएड़ देहिस। 47सूबेदार हर, जे कुछ होए रहिस देख के परमेश्वर कर बड़ाई करिस, अउ कहिस, “जरूरेच ये मैनसे हर धर्मी रहिस।” 48अउ भीड़ जेहर एला देखे बर जुटे रहिन, ये घटना ला देख कर छाती पिटत फिर गईन। 49अउ ओकर सबेच जान पहिचान, अउ जे महिला मन गलील परदेस ले ओकर संग मे आए रहिन, दुरिहा ठड़होए ये सबेच देखत रहिन।
अरिमतियाह कर यूसुफ के द्वारा यीशु ला दफनई
(मत्ती 27:57-61; मरकुस 15:42-47; यूहन्ना 19:38-42)
50अउ हुवा यूसुफ नाव कर महासभा कर एक सदस्य रहिस, जेहर सज्जन अउ धर्मी आदमी रहिस। 51अउ ओमन मन कर योजना अउ ओमन मन कर ये बुता ले खुश नी रहिन। ओ यहूदी मन कर नगर अरिमतियाह कर रहे बाला अउ परमेश्वर कर राएज कर बाट जोहत रहिस। 52ओहर पिलातुस जग जाए के यीशु कर लाश ला मांगिस; 53अउ ओला उताएर के मलमल कर चादर मे लपेट कर, अउ एक कबर मे रखिन, जेहर चट्टान मे खोदल रहिस; अउ ओमे कोनोच ला कभो नी रखे गए रहिन। 54ओहर तियारी कर दिन रहिस, अउ सब्त कर दिन शुरू होए बर रहिस। 55अउ ओ महिला मन जेमन मन यीशु के संग गलील परदेस ले आए रहिन, पाछू-पाछू जाए के कबर ला देखिन, अउ ये भी कि यीशु कर लाश ला कोन रीति ले रखल गईस है। 56तब ओमन मन फिर के सुगन्ध चीज मन ला अउ इत्र तियार करिन; अउ सब्त कर दिन ओमन मन कर हुकूम कर अनुसार अराम करिन।
S'ha seleccionat:
लूका 23: SGJNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.