ᓘᑲᓯᐅᑉ ᐊᒡᓚᖏᑦ 15
15
ᓰᐱ ᐊᓯᐅᓯᒪᔪᖅ
ᒫᑎᐅᓯ 18:12-14
1 #
ᓘᑲᓯ 5:29,30. ᑍᑦᓱᒪᓂ ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖏᑦ ᐱᐅᖏᑦᑐᓕᓂᖏᓐᓄᓪᓗ ᓇᕐᕈᒋᔭᐅᔪᑦ ᔩᓱᓯᒧᐊᕐᐳᑦ ᑐᓵᔪᒪᓪᓗᑎᒃ. 2ᐹᕆᓯᑦ ᐱᖁᔭᓂᒡᓗ ᐃᓕᓮᔩᑦ ᐅᖃᕐᓂᕐᓘᑎᓕᕐᐳᑦ ᐅᖃᕐᓗᑎᒃ, “ᐆᒪ ᐱᐅᖏᑦᑐᓕᔪᑦ ᐃᓚᓕᐅᕐᐰᑦ ᓂᕆᖃᑎᒋᓪᓗᒋᓪᓗ.” 3ᐊᑦᔨᐅᔪᒥᒃ ᐆᒥᖓ ᐅᖃᐅᑎᕔᑦ:
4“ᓇᓕᕐᓯ ᓰᐱᖁᑎᖃᕈᓂ 100ᓂᒃ, ᐃᓚᖓᑦ ᐊᑕᐅᓯᖅ ᐊᓯᐅᒃᐸᑦ, ᑖᒃᑯᐊ 99 ᐃᓄᖃᖏᑦᑐᒧᑦ ᕿᒪᒃᑲᔭᓐᖏᓔᑦ, ᑍᓐᓇ ᐊᑕᐅᓯᖅ ᕿᓂᕆᐊᕐᓗᒍ ᕿᓃᓐᓇᕋᔭᓐᖏᓚᐅᒃ ᓇᓂᖅᑳᕐᓇᒍ? 5ᓇᓂᒍᓂᐅᒃ, ᖁᕕᐊᓱᒡᓗᓂ ᐃᕐᓱᓕᕋᔭᕐᐹ. 6ᐊᖏᕐᕋᕈᓂ, ᐃᓚᓐᓈᕆᔭᓂ ᐃᓅᖃᑎᓂᓗ ᕾᖁᒐᔭᕐᐰᑦ, ᐅᖃᐅᑎᓗᒋᑦ, ‘ᖁᕕᐊᓱᖃᑎᒋᓯᓐᖓ ᓰᐱᖁᑎᒐ ᐊᓯᐅᓯᒪᓚᐅᕐᑐᖅ ᓇᓂᒐᒃᑯ.’ 7ᑍᒫᒃᑕᐅᖅ ᐅᖃᐅᑎᕙᑦᓯ, ᐊᖏᓂᕐᓴᒥᒃ ᕿᓚᖕᒥ ᖁᕕᐊᓲᑎᒋᔭᐅᓂᐊᕐᐳᖅ ᐊᔪᕐᑐᓕᔪᖅ ᐊᑕᐅᓯᖅ ᓵᒋᐊᕐᐸᑦ ᐊᒡᓛᑦ ᑍᒃᑯᓇᓐᖓᑦ 99ᓂᑦ ᐃᓗᐊᕐᑐᓂᑦ ᓵᒋᐊᕆᐊᖃᖏᑦᑐᓂᑦ ᖁᕕᐊᓲᑕᐅᓂᕐᓴᐅᕗᖅ.”
ᑮᓇᐅᔭᖅ ᐊᓯᐅᓯᒪᔪᖅ
8“ᐅᕝᕙᓗ ᐊᕐᓇᖅ, 10ᓂᒃ ᑮᓇᐅᔭᖁᑎᖃᕐᑐᖅ, ᐊᑕᐅᓯᕐᒥᒃ ᐊᓯᐅᔨᒍᓂ, ᓇᓂᕈᐊᒥᒃ ᐃᑭᑦᓯᒐᔭᓐᖏᓛᖅ, ᐃᒡᓗ ᓴᓂᕐᓗᒍ ᕿᓂᑦᓯᐊᕋᔭᓐᖏᓚᐅᒃ ᓇᓂᖅᑳᕐᓇᒍ? 9ᓇᓂᒍᓂᐅᒃ, ᐃᓚᓐᓈᕆᔭᓂ ᐃᓅᖃᑎᓂᓗ ᕾᖁᒐᔭᕐᐰᑦ ᐅᖃᐅᑎᓗᒋᑦ, ‘ᖁᕕᐊᓱᖃᑎᒋᓯᓐᖓ, ᑮᓇᐅᔭᕋ ᐊᓯᐅᔨᓯᒪᓚᐅᕐᑕᕋ ᓇᓂᒐᒃᑯ.’ 10ᑍᒫᒃᑕᐅᖅ ᐅᖃᐅᑎᕙᑦᓯ, ᒎᑎᐅᑉ ᐂᖏᓖᖁᑎᖏᑦ ᐊᖏᔪᒥᒃ ᖁᕕᐊᓱᒃᑎᑕᐅᕗᑦ ᐊᔪᕐᑐᓕᔪᖅ ᐊᑕᐅᓯᖅ ᓵᒋᐊᕐᐸᑦ.”
ᐃᕐᓂᖅ ᐊᓯᐅᓯᒪᔪᖅ
11ᔩᓱᓯ ᐅᖃᕐᐳᖅ, “ᐊᖑᑎᑕᖃᓚᐅᕐᐳᖅ ᒪᕐᕉᖕᓂᒃ ᐃᕐᓂᖃᕐᑐᒥᒃ. 12ᓄᑲᕐᖠᐅᑉ ᐊᑖᑕᓂ ᐅᖃᐅᑎᕚ, ‘ᐊᑖᑖᒃ, ᐱᖁᑎᑎᑦ ᐃᓅᔪᓐᓃᕈᕕᑦ ᐱᑖᒃᓴᒃᑲ ᒫᓐᓇ ᕾᓕᒃᑭᑦ.’ ᐊᑖᑕᖓᑕ ᐱᖁᑎᓂ ᐊᕕᒃᐰᑦ ᑐᓂᓪᓗᒋᑦ ᐊᑐᓂᑦ ᐃᕐᓃᖕᒥᓄᑦ. 13ᐅᓪᓗᐃᑦ ᐅᓄᖏᑦᑐᑦ ᑭᖑᕐᖓᒍᑦ, ᐃᕐᓂᖓᑕ ᓄᑲᕐᖠᐅᑉ ᐱᖁᑎᓕᒫᓂ ᑲᑎᓪᓗᒋᑦ ᓄᓇᒧᑦ ᐅᖓᓯᒃᑐᒧᑦ ᐊᐅᓪᓚᕐᐳᖅ, ᑕᐅᕙᓂ ᐱᖁᑎᓕᒫᓂ ᓄᖑᑉᐰᑦ ᐃᓱᒪᕐᓲᓗᐊᕐᓂᕐᒧᑦ. 14ᐱᖁᑎᓕᒫᒥᓂᒃ ᓄᖑᑎᓯᒪᓕᕐᑎᓪᓗᒍ, ᓄᓇᓕᖕᓂ ᓇᔪᕐᑕᖓᓂ ᑳᖕᓇᕐᑐᕐᔪᐊᖃᓕᕐᐳᖅ, ᑕᑉᕙ ᐊᔪᕐᓴᓇᕐᑐᕐᔪᐊᒦᓕᕐᐳᖅ. 15ᓇᔪᕐᑕᒥ ᓄᓇᓖᑦ ᐃᓄᖏᑕ ᐃᓚᖓᓐᓄᑦ ᐃᖅᑲᓁᔭᕆᐊᕐᑐᕐᐳᖅ, ᑖᑦᓱᒪ ᐅᐸᒃᑕᖓᑕ ᑎᓕᕚ ᐱᕈᕐᓰᕕᖁᑎᒥᓄᑦ ᑰᒃᑰᓯᖁᑎᒥᓂᒃ ᑲᒪᔨᐅᖁᓪᓗᒍ. 16ᑰᒃᑰᓯᑦ ᓂᕆᔭᒃᓴᖏᓐᓂᒃ ᓂᕆᔪᒪᒐᓗᐊᕐᐳᖅ; ᓂᕆᓂᐊᕐᑕᒥᓂᒃ ᑐᓂᓯᕕᐅᕙᖏᓐᓇᒥ. 17ᑍᒪᓕ ᐃᖅᑬᓕᕋᒥ ᐃᓱᒪᓕᕐᐳᖅ, ᐊᑖᑕᒪ ᐃᖅᑲᓁᔭᕐᑎᖁᑎᖏᑦ ᓂᕿᒃᓴᒥᒃ ᐊᒥᒐᕐᓯᖏᑦᓯᐊᕐᐳᑦ, ᐅᕙᖓᓕ ᒫᓂ ᐱᕐᓕᓕᕐᐳᖓ! 18ᐅᑎᕐᓂᐊᓕᕐᐳᖓ ᐊᑖᑕᓐᓄᑦ, ᐅᖃᐅᑎᓗᒍ, ‘ᐊᑖᑖᒃ ᐊᔪᕐᑐᓕᓚᐅᕐᐳᖓ ᒎᑎᒧᑦ ᕿᓚᖕᒦᑦᑐᒧᑦ ᐃᓕᖕᓄᓪᓗ; 19ᐃᕐᓂᕐᓂᒃ ᑍᔭᐅᔪᒃᓴᐅᔪᓐᓃᕋᒪ; ᐃᖅᑲᓁᔭᕐᑎᖁᑎᒃᑐᑦ ᑍᒫᒃ ᐱᓚᐅᓐᖓ.’ 20ᐊᐅᓪᓚᕋᒥ ᐊᑖᑕᒥᓄᑦ ᐅᑎᓕᕐᐳᖅ.
“ᓱᓕ ᐅᖓᓯᒃᑐᒦᑎᓪᓗᒍ ᐊᑖᑕᖓᑕ ᑕᑯᕚ, ᐃᓚᑦᓱᒋᓕᕐᓗᒍ, ᐊᑖᑕᖓ ᐅᓪᓚᒃᓯᓪᓗᓂ ᐸᕐᕆᐊᕐᐹ, ᑎᑭᓐᓇᒥᐅᒡᓗ ᐃᕿᑉᐹ ᑯᓂᒡᓗᒍᓗ, 21ᐃᕐᓂᖓᑕ ᐅᖃᐅᑎᕚ, ‘ᐊᑖᑖᒃ ᐊᔪᕐᑐᓕᓚᐅᕐᐳᖓ ᒎᑎᒧᑦ ᕿᓚᖕᒦᑦᑐᒧᑦ ᐃᓕᖕᓄᓪᓗ; ᐃᕐᓂᕐᓂᒃ ᑍᔭᐅᔪᒃᓴᐅᔪᓐᓃᕐᐳᖓ.’ 22ᐊᑖᑕᖓᑕ ᐱᔨᓂ ᐅᖃᐅᑎᕔᑦ, ‘ᑐᐊᕕᕐᓗᓯ ᐊᓐᓄᕌᓂᒃ ᐱᐅᓂᕐᐹᓂᒃ ᕾᑦᓯᓕᕆᑦᓯ, ᐊᓐᓄᕌᕐᓗᒍ; ᓇᒡᒍᐊᕐᒥᒃᑕᐅᓗᓂ,#15:22 ᓇᒡᒍᐊᕐᒥᒃ ᐅᕝᕙᓗ ᕿᑎᕐᓯᕐᒥᒃ ᐅᕝᕙᓗ ᒥᑭᓕᕋᕐᒥᒃᐃᑎᒐᒍᓯ ᐃᑎᒐᒍᓯᕐᑕᐅᓗᓂᓗ; 23ᐃᒻᒧᒃᓯᐅᒐᐅᑉ ᓄᕐᕋᖓ ᖁᐃᒃᓯᑦᓯᐊᖑᔪᖅ ᑐᖁᓯᐅᒃ, ᓂᕆᕕᒡᔪᐊᕐᓗᑕ ᖁᕕᐊᓱᖃᑎᒌᓕᕐᑕ; 24ᐅᓇ ᐃᕐᓂᕋ ᑐᖁᖓᓚᐅᕐᑐᖅ ᐆᒻᒪᕐᒥᖕᒪᑦ; ᐊᓯᐅᓯᒪᓚᐅᕐᑐᖅ ᓇᓂᔭᐅᖕᒪᑦ.’ ᑕᕝᕙ ᖁᕕᐊᓱᖃᑎᒌᓕᕐᐳᑦ.
25“ᐃᕐᓂᖓᓕ ᐊᖓᔪᒃᖠᖅ ᐱᕈᕐᓰᕕᖕᒦᓚᐅᕐᐳᖅ; ᐊᖏᕐᕋᓕᕋᒥ ᐃᒡᓗᒧᑦ ᖃᒡᓕᓪᓗᓂ, ᑐᓵᓕᕐᐳᖅ ᓂᑦᔭᐅᓯᔭᕐᑐᓂᒃ ᑖᓂᓯᕐᑐᓂᒡᓗ. 26ᐱᔨᑦ ᐃᓚᖓᓐᓂᒃ ᕾᖁᔨᕗᖅ ᐊᐱᕆᓪᓗᓂ ᓱᔪᖃᕐᒪᖔᑦ. 27ᐱᔨᐅᑉ ᑭᐅᕚ, ‘ᓄᑬᑦ ᑎᑭᒻᒪᑦ, ᐊᑖᑕᕕᑦ ᐃᒻᒧᒃᓯᐅᒐᐅᑉ ᓄᕐᕋᖓ ᖁᐃᒃᓯᑦᓯᐊᖑᔪᖅ ᑐᖁᑦᑕᐅᖁᖅᑲᐅᕚ, ᓄᑬᑦ ᖃᓄᐃᒐᓂ ᐅᑎᕐᓯᒪᓕᕐᓂᖓ ᐱᑦᔪᑎᒋᓪᓗᒍ.’ 28ᐊᖓᔪᒃᖠᕐᓕ ᓂᓐᖓᒃᐳᖅ ᐃᒡᓗᒧᑦ ᐃᑎᕈᒪᔪᓐᓃᕐᓗᓂ. ᐊᑖᑕᖓ ᐊᓂᒐᒥ ᐃᑎᖁᓕᕐᐹ, 29ᑖᑦᓱᒪ ᐊᑖᑕᓂ ᑭᐅᕚ, ‘ᑕᑯᒋᑦ, ᐊᕐᕌᒍᓂᒃ ᐊᒥᓱᓂᒃ ᐱᔨᑦᓯᓕᕐᐸᒋᑦ, ᖃᓄᑐᐃᓐᓇᖅ ᑐᓵᓐᖏᓴᓚᐅᕐᓯᒪᓇᖓ#15:29 ᐊᓐᖔᖏᑦᑑᓚᐅᕐᓯᒪᖏᓐᓇᒪ ᐱᖁᔨᑎᓪᓗᑎᑦ; ᑭᓯᐊᓂ ᑐᓂᓯᓚᐅᕐᓯᒪᖏᑦᑐᑎᑦ ᒎᑦᓯᐅᑉ ᓄᕐᕋᖓᓂᒃ#15:29 ᒎᑦᓰᑦ ᓰᐱᐅᑉ ᐂᑉᐸᕈᑕᖏᑦ ᐊᑦᔨᐸᓗᒋᓪᓗᓂᒋᑦ ᐃᓚᓐᓈᕆᔭᒃᑲ ᖁᕕᐊᓱᖃᑎᒋᓗᒋᑦ ᓂᕆᖃᑎᒋᓂᐊᕋᒃᑭᑦ. 30ᐃᕐᓃᑦ ᐅᑎᕐᒪᑦ, ᐱᖁᑎᖕᓂᒃ ᓄᖒᑦᓯᔪᖅ ᐊᕐᓇᓄᑦ ᐊᖑᓐᓂᐊᕐᑎᓄᑦ, ᐃᒻᒧᒃᓯᐅᒐᐅᑉ ᓄᕐᕋᖓᓂᒃ ᖁᐃᒃᓯᑦᓯᐊᖑᓯᒪᔪᒥᒃ ᑐᖁᑕᐅᑎᑦᓯᕗᑎᑦ!’ 31ᐊᑖᑕᖓᑕ ᑭᐅᕚ, ‘ᐃᕐᓃᒃ, ᐅᕙᓐᓂᒃ ᓇᔫᑏᓐᓇᕋᕕᑦ, ᐱᒋᔭᓕᒫᒃᑲᓗ ᐱᒋᕙᑎᑦ, 32ᒫᓐᓇ ᐊᑲᐅᓈᑦᓯᐊᕐᒪᑦ ᖁᕕᐊᓱᖃᑎᒌᒡᓗᑕ ᓯᕆᓗᑕᓗ, ᓄᑬᑦ ᑐᖁᖓᓚᐅᕐᑐᖅ, ᐆᒻᒪᕐᒥᖕᒪᑦ; ᐊᓯᐅᓯᒪᓚᐅᕐᑐᖅ ᒫᓐᓇ ᓇᓂᔭᐅᖕᒥᖕᒪᑦ.’”
S'ha seleccionat:
ᓘᑲᓯᐅᑉ ᐊᒡᓚᖏᑦ 15: EAIB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Eastern Arctic Inuktitut Bible © Canadian Bible Society, 2012, 2021-2023.