Oknayene Ibo 4
4
Kein ya Abel ye Yawe God tawa tebrika
1Ana Adam ya Ewa ere mogl, bogl swara pabriko, Ewa dane paugo, ye yagl gak ta kugl yogwa. Kugl yedre, ye yegl dugwa, Yawe na ake ple di naruko, yagl gak ta kule di, yegl dugwa. Didre, yagl gak i kagie Kein we dugwa. 2Ana okuo, ye yagl gak ta ama kuglsre, kagie Abel we dugwa. Ana yagl gak suo i kade miurka igne i we, Abel sipsip ere kuglkwa yagle moglko, Kein kaya mokna ere yaglkwa yagle moglko, eribrika.
3Ana okuo Kein kaya mokna ere yaglkwa bogl paugo, Kein tau si i pi Yawe tawa togwa. 4Togo, Abel sipsip nagigle ta si goglsre, togidre, wam bogl idre, i pi tawa togwa. Sipsip nagigle i, mam nagigle komono paugwa. Tawa togo, Yawe ye Abel erukwa wakai kandre, Abel tawa togwa kan yugwa. 5Kan yugwa ba ye Kein erukwa kide kandre, Kein tawa togwa kan ikrukwa. Kan ikruko, Kein dem podo kubruko, guma dra u kide ogwa. 6Ana Yawe ere mogl, Kein yegl di prukwa, Ene we, siragl eruko den kubutne? Ene guman dran siragl pre u kide ome? di, yegl di prukwa. 7Didre, ye ama yegl di togwa, Ene kuno ta etn, na ene wakai kanaglka. Ba ene kuno ta erekitn we, tadaglme ene sinabuka. Tadaglme i, agl bugla are mere yugun dramugl moglsre, ene sinagledi ere moglkwa. Tadaglme ene sidre, ene sugl moragledi erukwa, ba ene mane dinatnga pamiwe di, God yegl dugwa.
8Ana Kein ere mogl, ye agigle Abel yegl di togwa, Nono ede kugl wai wai yomara obuglo! dugwa. Dugo, ye ede pi kugl wai wai yomara wan miurko, Kein ere mogl, ye agigle si goglkwa.
9Ana Yawe ere mogl, Kein di prukwa, Ene agitn Abel aglo moglme? dugwa. Kein di ikne ede, yegl dugwa, Na ta kankrika. Ene na agra sugl moglkwa yagle moglmedi pitno? dugwa. 10Dugo, God ere mogl, Ene siragl etne? dugwa. Ene agitn si goglnga, ye bormaimo ede makan mina ogwa. Bormaimo i we, i yoba mere mogl, siragl etnga i, na te ikne edenaglka mere, yegl di narukwa. 11-12Erme we, ene mabuno kide ta etnga pre yubun podo ta inatnga. Ene agitn si goglnga boromaimo ede makan mina ogwa. Ogwa pre ene makan mina kogon ta erekratnga. Eratnga, ba ene kogon ta etn, kaya mokna wakai ta boglkrabuka. Yegl eran, ene dumonen ta yekran, ene wanwan kua moratniwe di, yegl di kide yei togwa.
13Ana Kein ere mogl, Yawe yegl di togwa, Ene yubun podo kaima natnga. Na inaglka kuno erekrukwa. 14Na kaya mokna ere yaraglba mane dinga. Na ama si pi eglke edinga pre ene motnara ta moglkraglka. Na makana ta yekran, wanwan kua moglbo, yoba ta na tegigl yebi, na na si goraiglmiwe di, yegl dugwa. 15Dugo, Yawe di ikne ede, yegl dugwa, Ta manabuka. Ene yubun podo teiga ba yoba ta ene si geglbi, yubun podo kide kaima inaiglmiwe di, yegl dugwa. Didre, ye ere mogl, yoba Kein kandre, si gogl dinaiglmedi ogo gagie mina muno ere paduglkwa.
16Ana Kein Yawe moglmara kide kodidre, ede pi dumo makan ta Not we dimara moglkwa. Dumo makan Not#4.16 Ka Hibru mina, dumo kagie Not mabuno ta paugwa, yoko wan moglkwa mere paugwa. we digwa i, dumo Iden ade umara koglo ibo kra yogwa.
Kein gawama kagno paugwa
17Ana Kein ere mogl, ye ebie bogl, bogl swara pabriko, ye ebie yagl gak ta kugl yogwa, kagie Enok we dugwa. Kugl yogo, Kein dumo ta bru yedre, dumo i ye wam kagie yei te, dumo Enok we dugwa. 18Okuo, Enok ere mogl, yagl gak ta kuglkwa, kagie Irat we dugwa. Ana okuo Irat ere mogl, yagl gak ta kuglkwa, kagie Mehujael we dugwa. Okuo Mehujael ere mogl, yagl gak ta kuglkwa, kagie Metusael we dugwa. Okuo Metusael ere mogl, yagl gak ta kuglkwa, kagie Lamek we dugwa.
19Ana yagl Lamek i we, ye abu suo yugwa. Abu ta i we, kagie Ada we digwa. Ana ta i we, kagie Sila we digwa. 20Ana Ada yagl gak ta kuglkwa, kagie Jabal we digwa. Ana Jabal i we, ye komono kana sel yugu ki padre, kau ya ki ere kuglko, okuo yoba mere erumere yegl erikwa. 21Jabal agigle ta moglkwa, kagie Jubal we digwa. Ana Jubal i we, ye komono kana pumige ya taragl gita mere ki yegl sugo, okuo yoba mere sumere yegl sigwa. 22Abu Sila ama yagl gak ta kuglkwa, kagie Tubalkein we digwa. Ana Tubalkein i we, ye ain ya taragl ain mere yegl ta yogwa kagie bras we digwa idre, kogon taragl ya ki bekugwa. Tubalkein abauglo ta moglkwa, kagie Nama we digwa.
23Ana yagl Lamek i we, ye ere mogl, ebie suo yegl di togwa, Ada ya Sila, na ebina suo, na ka ta dinaglka ene priro. Kumugl gak ta na sugwa boglka pre na ere mogl, ye si goglkra. 24Na ye si goglka ba yoba ere mogl, na ta sikraiglkwa. Yoba ta Kein si goran, yubun podo kaima inabuka. Ana na we, yoba ta na si goran, yubun podo kide kaima inabiwe di, yegl dugwa.
Ewa yagl gak kor ta kuglkwa
25Ana Adam ya Ewa aglke kor dagl bogl swara pabriko, Ewa ere mogl, yagl gak ta kuglkwa, kagie Set yei togwa. I siragl pre Ewa yegl dugwa, Na wana Kein ye agigle Abel si goglkwa. Si goglkwa pre erme God gak kor ta narukwa#4.25 Ka Hibru mina, kagie Set mabuno paugwa, narukwa.. Gak kor ta narukwa i, Abel agaimo inabiwe di, yegl dugwa. 26Ana okuo, Set yagl gak ta kuglsre, kagie Enos we dugwa. Enos moglkwa igne, yoba ere mogl, mabuno bogl Yawe agle di prisre, kamage ere tedre, erikwa.
S'ha seleccionat:
Oknayene Ibo 4: KB
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Copyright 2015 New Tribes Mission