Oknayene Ibo 6
6
Yoba mudu mabuno kide beglkwa
1Ana okuo yoba mere kide makan mina bage bage moglsre, ye abroma mere kiglkwa. 2Kiglko, God wama tau#6.2 Ka Hibru mina, God wama we di beglkwa. Yoba tau angelo tau u kide eigwa pre dumedi prikwa, ba yoba tau prikwa i, Set gawama, yoba God kamo prikwa i pre dumedi prikwa. yoba abai gak kiglkwa i wakai kandre, yene wakai kanimere igwa. 3Igo, Yawe yegl dugwa, Yoba we, ye aimadi moglkraiglkwa. Te, na Murubuglona aimadi ka giglede ta di te moglkrabuka. Yoba bugla yugu 120 moglsre, goraiglmiwe dugwa. 4Ana God wana tau ye abai gak igwa ikra, akie bogl swara paigo, abai wagle ikra yagl gak kiglkwa. Yagl gak kiglkwa i podo mogl, olto kaima meglkwa. Ege i meglko, okuo tau ama meglkwa. Ana yoba podo meglkwa i, ye okna ibo yobuglo podo eriko, ye kagno paugwa.
5Ana Yawe kanugwa yoba ege ege mabuno kide keme kinano gudu pre, mabuno erikwa ama kide kaima erikwa. 6Eriko, Yawe kandre, ye okna yoba beke yogwa kide prisre, dem muduo yubun dogwa. 7Dem muduo yubun dogo, ye yegl dugwa, Na yoba beke yeiga ba etne kide prika pre mudu si goraglka. Yoba si goglsre, agl bugla ya dua kabu ya kua ki ama mudu si goragle di, yegl dugwa. 8Yegl dugwa ba yagl swara ta moglkwa, kagie Noa we digwa. Ana Noa i we, Yawe ye swara wakai kanugwa.
9Ana ka magigl paugwa i, Noa ya ye gawama kano paugwa. Ana Noa mabuno kide erekre, yoba du moglkwa pre gagie ka ta sikrikwa. Ye God bogl deno muduno swara yedre, boma daguma miurka. 10Te, Noa yagl gak suota kuglkwa. Ta kagie Siem we didre, ta Ham we didre, ta Jafet we dugwa.
11Ana yoba mudu uglo koglo koglo meglkwa we, ye God gumuglo wagle u kide pi kodidre, ye ama kuda magigl magigl beglkwa. 12God kanugwa, yoba mudu ka kaima mabuno kide keme beglkwa pre u kide pi kodigwa.
Noa sip ta bekugwa
13 Ana God ere mogl, Noa yegl di togwa, Yoba uglo koglo koglo meglkwa i kuda keme beglkwa pre na yoba mudu si goragledi prika. Na kuri ta mogl, yoba mudu si goglsre, makan ama ere kide eraglka. 14Ana ene we, ede gopa we digwa i, tau si yudre, sip ta bekenatniwa. Sip ta bekenatnga yugugl i we, agai pere pere yenabuka. Ana sip beke kodin, nigl ede yugugl pi dinabedi ene ede nuglo idre, sip meda ya yugugl akie egratniwa. 15Ana sip siragl mere sie yei bekenatnga i we, yegl eratnga, sip olto 130 mita mere bekidre, prak 22 mita mere bekidre, ana ede mitna enabuka i, 13 mita mere bekenatniwa. 16Ene sip idaule bekidre, sip dagigle wagle kugl kar ere ede mitna enatnga ba sip bre yomara magigl 1 mita ikne kugl kar erekratnga. Agai i yoko yenabuka. Ana sip dagigle wagle dua ta ersre, sip yugugl bogl suota tebe atne kuratnga. Bogl ta atne kuglsre, ta suna kuglsre, ta mitna ibo kuratniwe di, yegl di togwa.
17God yegl didre, ye ama ka yegl di togwa, Ene pro! Na kamun podo ta dedenaglka. Dedibo, nigl makandile mudu ake wai dinan, yoba ya taragl kane kane makan mina moglsre, ir mina pipode igwa i, mudu goraiglkwa. 18Ba na ene ka kaima di te padraglka. Ene ebin bogl, ya wanma ebinoma bogl akie ede sip mina yugugl enaiglkwa. 19Ana agl bugla ya dua kabu ki we, ene taragl mudu makan mina meglkwa suo suode idre, i pi sip yugugl edinatniwa. Taragl swara swarade kumugl ta idre, abai ta idre, ye ene bogl kor moraiglmedi i pi sip yugugl edinatniwa. 20Kua kane kane ya te, agl bugla kane kane ya te, taragl kane kane makan mina wanigwa i, ye kor moramnedi suo suode ede u ene moratnara unaiglkwa. 21Ana kaya mokna mudu kane kane yogwa i, tau si i pi sip yugugl edin, yenan, ene yoba nebi, agl bugla ya ki ama nenaiglmiwe di, yegl dugwa.
22God ka yegl di te kodugo, yagl Noa i we, God dumere mudu duglo boglkwa.
S'ha seleccionat:
Oknayene Ibo 6: KB
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Copyright 2015 New Tribes Mission