Luk 22
22
Judas Jisas i pi kuda ikne ogono mina yenagle dugwa
(Matyu 26.1-5, 26.14-16, Mak 14.1-2, 14.10-11, Jon 11.45-53)
1Ana bret yis edekre, neigwa ege ikra, ede magigl ugwa. Te, ege kade i, ama God nono kowano awano oglo sugwa ege we digwa. 2Ana ege i, tawa teigwa yoba bitno meglkwa i ya God lomo beke teigwa yoba i, ye Jisas si goramnedi prikwa ba ye yoba kuduglno goglsre, atne kra si goramendi konbauna dokigwa.
3Ana Judas, kagie ta Iskariot we digwa i, moglmara Satan ede suna ogwa. Yagl Judas i, ye Jisas duglo beglkwa yoba 12-pela swarano ta moglkwa. 4Ana Judas moglmara Satan ede suna ogo, Judas ede pi Juda yoba kade wagle meglmara ogwa. Yoba kade i, tawa teigwa yoba bitno meglkwa i yeigo, soldia tau tawa teigwa yugu sugl meglkwa i bitno tau yeigo, ye Judas bogl akie ka tau digo, Judas konbo ta yenan, Jisas yu ene ogono mina yenagliwe dugwa. 5Yegl dugo, yoba kade wagle i gun yedre, mige silva tau Judas tenamnedi ka di keglkwa. 6Yegl digo, Judas pra we didre, ege wakai ta, yoba tau mere Jisas bogl akie moglkraiglkwa igne, Jisas ye ogono mina yenagledi sugl kan moglkwa.
Pita ya Jon kaya mokna ere wakai eribrika
(Matyu 26.17-25, Mak 14.12-21, Jon 13.21-30)
7Ana Juda yoba bret yis edekre, gagl neigwa ege i, u kodugwa. Ege i, ye sipsip si goglsre, God nono kowano awano oglo sumedi praiglkwa pre kaya mokna nenaiglkwa paugwa. 8Ege i, Jisas ye Pita ya Jon dede, God nono kowano awano oglo sugwa i pre moramnedi kaya mokna nenamga i, ene pi ere wakai eriro dugwa. 9Yegl dugo, ye, No aglo mere ere wakai erabredi pitne? dibrika. 10Ye yegl dibriko, Jisas di ikne ede, yegl dugwa, Ene ede taun kade suna ebr, yagl ta nigl migi kake yunan, ene ye tegigl yedre, ye enabara ene sika si pi yugu ta ede yugugl enabara i, ene ama ede yugugl piro. 11Ene ama pidre, yugu nem kandre, yegl di tero, No tisano ene yegl di prukwa, God nono oglo sugwa i, na duglo beglkwa yoba bogl pre moramnedi kaya mokna nenamga i, agai aglo mere mogl nenamne? di, tisano yegl dumiwe diro. 12Ene yegl dibr, yugu nem ene agre ede kuglo ibo pidre, agai kade ta tenabuka. Ana kiule i tebol ya ki yei, ere wakai ere kodigwa. Ye dumo i ene obuno di tenan, ene dumo i ere wakai eribr, nono kaya mokna akie nenamniwe di, Jisas yegl dugwa. 13Jisas yegl dugo, yagl suo i ede taun suna pidre, taragl kane kane Jisas plau dinabedi dumere mudu plau dugo, kanibrika. Kandre, God ye Israel yoba oglo sugwa i pre moramnedi kaya moka ere wakai eribrika.
Jisas ye duglo beglkwa yoba bret ya nigl wain togwa
(Matyu 26.26-30, Mak 14.22-26, 1 Korin 11.23-25)
14 Ana ye kaya mokna nenaiglkwa ege i, ugo, Jisas ye duglo beglkwa yoba ame di meglkwa. 15Ame di meglko, Jisas ye yegl di togwa, God nono kowano awano oglo sugwa i pre moramnedi kaya mokna erme nenaunga i, na ka kaima akie nenamnedi pre mogl wigo, erme ege ugwa. Te, nono ne kodumun, na giugl praglka paugwa. 16Nono erme kaya mokna i ne kodumun, na kaya mokna yegl nekre ebo, God yoba kingno morabuka ege i, unabuka. Ege i, kaya mokna i mabunomo nogugl plau dinan, na aglke kor nenaluwe dugwa.
17Ana Jisas ka yegl di kodidre, kap ta wain nuglo atne moglkwa i idre, God di wakai yei te, ye duglo beglkwa yoba yegl di togwa, Ene kap idre, wain nuglo yubu si neo. 18I siragl pre na ene di teiga, na wain nuglo okuo nekre moglbo, God yoba kingno morabuka ege i, unabiwe dugwa. 19Ana Jisas yegl didre, bret ta ake i mitna ede, God di wakai yei tedre, bret i ake buko dugwa. Ake buko di, ye duglo beglkwa yagl swara swarade nenaiglmedi tedre, yegl dugwa, Bret i, na nagna mere yegl yogwa. Na nagna ene kumapno pre tebo, ene okuo na goraglka i pre moramnedi ama bret yegl buko di neo di, Jisas yegl dugwa. 20Ana kuno yegl mere Jisas ye duglo beglkwa yoba bogl kaya mokna ne kodigo, Jisas kap ta wain nuglo atne moglkwa idre, ye duglo beglkwa yoba di te, yegl dugwa, Wain nuglo i, na bormaina mere yegl moglmiwa. Na ene kumapno tenagledi bormaina suru ede meda edibo, God ka kaima ta ene di te paduglkwa i, ka kaima plau dinabiwe di, yegl dugwa.
21Ana Jisas yegl didre, ama yegl dugwa, Ene kanio, yoba ta na i pi kudana ikne ogono mina yenabuka i, nono bogl akie tebol swara mina ame di munga. 22Na Yoba Wam moglka i, God okna na goratnedi di paduglmere yegl goraglka ba yagl ta na i pi kudana ikne ogono mina yenabuka i, ye kaima yubun podo ta inabiwe dugwa. 23Jisas yegl dugo, ye duglo beglkwa yoba i ere mogl, ye yene yegl di pre meglkwa, Nono munara suna i, yoba ira mabuno yegl erabe? digwa.
Jisas duglo beglkwa yoba ye ira mogl mitna edenabuka pre nonga digwa
24Ana Jisas duglo beglkwa yoba i ka di mogl, nonga ta digwa. Ye nonga digwa i, ye meglmara suna i, yoba ira ta mogl mitna edidre, tau tenabuka i pre digwa. 25Yegl digo, Jisas ye yegl di togwa, Yoba yugobuno pere pere meglkwa i, ye kingno mogl mitna edidre, ye bitno meglkwa. Yegl eriko, yoba ye meglmara atne meglkwa i, ye no ake ple di norikwa yoba meglmiwe di, ka kibi mere yegl digwa. 26Ye yegl erikwa ba ene meglkwa i, yegl ta erekraiglkwa paugwa. Ene meglmara suna i, yoba ta yoba kade moragledi pran, ye gak kebra mere yegl morabuka paugwa. Te, yoba ta ede okna enagledi prabuka i, ye yoba pere niglno kogono ere tenabuka paugwa. 27Yoba ta tebol mina ame di moglsre, kaya mokna nogwa i, mogl mitna edugo, yoba ta kaya mokna suru togwa i, mogl atne edugwa. Yoba ta tebol mina ame dugwa i, mogl mitna edugwa paugwa. Ba ene prio. Na ene meglmara suna i, mogl mitna edekre, ene niglno kogono ere teiga. Yegl pre ene ama mabuno yegl mere erio di, Jisas yegl dugwa.
28Jisas yegl didre, ama yegl dugwa, Yubun tau na moglmara plau dugwa igne, ene na moglmara mogl pai meglkwa. 29Ana na Nina na pre ka gigledi di paduglkwa i, Ene yoba kingno mogl, ye suglno moratne dugwa. Kuno yegl mere, na ene pre di padiglka i, ene ama yoba pere bitno moraiglmedi di padiliwa. 30Te, na king moraglka igne, ene na bogl akie tebol swara mina ame di mogl, kaya mokna nedre, nigl nedre, eramga. Yegl erumun, ene ama sia king 12-pela mina ame didre, Israel yoba yugobuno 12-pela meglkwa i, suglno moraiglmiwe dugwa.
Pita ye Jisas pre kan erekriwe dinabuka i pre Jisas di poglkwa
(Matyu 26.31-35, Mak 14.27-31, Jon 13.36-38)
31Jisas yegl didre, ama yegl dugwa, Saimon yo, ene pro. Ene na duglo beglkwa yoba meglkwa i, Satan ene kinano sinagledi God di pruko, God kanige eragle dumiwa. Ye ene kinano sidre, ene adigl moraiglmo mo i, eribi, kanagledi erabuka. 32Ba ene na ene pre kamage erika i, ene na pre mediglnga i, dudukrabedi kamage erika. Ene yage sinatnga ba ene kor adratnga igne, ene agiglnma deno muduno si gigle di to! dugwa.
33Jisas yegl dugo, Pita ye yegl di togwa, Yagl Kade yo, na ene bogl kane yugu panabuglka mere panan, mo akie gorabuglka mere panan, na pra we di priwe dugwa. 34Yegl dugwa ba Jisas di ikne ede, yegl dugwa, Pita, na ene di teiga, Erme eduer, koduagle kumugl wi sikran, ene ege suota na moglka i, pre kan erekriwe dinatniwe di, Jisas yegl dugwa.
Duglo beglkwa yoba i, bek ya ki idre, ede bage bage enaiglkwa
35Ana Jisas ye duglo beglkwa yagl yegl di togwa, Okna na ene taragl tau ikre, na kogona eraiglmedi ede bage bage pio diga i, ene prio. Ene paus ya bek ikre, su tau ama ikre, ede pio diga igne, ene taragl tau dokimo? dugwa. Yegl dugo, ye di ikne ede, Ta manume digwa. 36Yegl digo, Jisas aglke kor ye yegl di togwa, Okna ene taragl tau ikre, ede bage bage pio diga ba erme ene paus mo bek ta yen, ene idre, ede enatnga paugwa. Te, ene bainet ta kan nekitn, ene ir gaglnen topo boglsre, bainet ta topo si kan nenatnga paugwa. 37I siragl pre God kamo na pre dugwa i, plau dinabuka paugwa. God kamo dugwa i, yegl dugwa, Yoba ye kanaiglkwa i, lo si buko dugwa yoba ta moglmedi kanaiglmiwe#22.37 Aisaia 53.12 di, yegl dume dugwa. 38Jisas yegl dugo, ye duglo beglkwa yagl di ikne ede, yegl digwa, Kano, no bainet suo yomne digwa. Yegl digo, Jisas dugwa i, I pra yomiwe dugwa.
Jisas ede muglo Oliv pamara pidre, kamage erukwa
(Matyu 26.36-46, Mak 14.32-42)
39 Ana Jisas ye Jerusalem kide kodidre, ye muglo Oliv, ege mere omara ogo, ye duglo beglkwa yagl ye mokomugl sika si ede eigwa. 40Ana ye pi dumo ta enamnedi eimara plau digo, Jisas ye duglo beglkwa yagl yegl di togwa, Yagl kide ene kinano si dinabedi kamage ere molo dugwa. 41Ye yegl didre, kuri ta eglke iro pi, goglko bodugl, kamage ere moglkwa. 42Ye kamage ere, yegl dugwa, Nina yo, ene wakai pitn, na nigl kide ta kogl nenaglka i, i eglke ede naratnedi priwa. Ba nana primere ta erekraglka. Ene siragl mere ta pratnga i, plau dinabedi priwe di, Jisas yegl dugwa.
43Ana Jisas kamage yegl eruko, angelo ta heven ibo kide kodidre, u ye moglmara plau dugwa. Plau didre, Jisas dem muduo si gigle di togwa. 44Ana igne i Jisas pre yubun kaima dedre, kamage gigledi kaima ere mogl, pitn boglkwa. Ye pitn boglkwa i, bormai mere yegl yage makandigle sugwa. 45Ana Jisas kamage ere kodidre, adigl ede pi ye duglo beglkwa yagl meglmara pi kanugwa i, ye ugl pai meglko, kanugwa. Ye ugl pai meglkwa i, siragl pre ye deno muduno yubun dogwa. 46Ana Jisas ye ugl pai meglkwa i kandre, ye yegl di togwa, Ene siragl pre ugl pai meglme? Ene adiglsre, yagl kide ene kinano si dinabedi kamage ere molo dugwa.
Judas ye Jisas kudamo ikne auro yugwa
(Matyu 26.47-56, Mak 14.43-50, Jon 18.3-11)
47Ana Jisas ka yegl di moglko, yoba tau mere ye moglmara wigwa. Te, ye wimara i, yagl Judas, ye Jisas duglo beglkwa yagl 12-pela meglmara suna moglkwa i, ede okna ugwa. Ye ede okna udre, Jisas moglmara magigl u Jisas pauna si nogwa. 48Pauna si nogo, Jisas ye yegl di prukwa, Judas yo, na Yoba Wam moglka i, ene na paunana si nedre, na i pi kudana ikne ogono mina yeno? dugwa.
49Ana Jisas duglo beglkwa yagl magigl moglsre, siragl taragl plau dinagledi erukwa i, kanigwa pre ye Jisas di pre, No yoba wigwa i, bainet mina sinamno? digwa. 50Yegl digo, swarano ta bainetmo idre, tawa teigwa yoba bitno moglkwa i, niglmo kogonmo yagl sidre, ye kina ogo wo kra paugwa i, si bugl di edugwa. 51Si bugl di edugo, Jisas ye duglo beglkwa yagl i, yegl di togwa, Kodio! Ene yegl ta erekraiglkwa pamiwe dugwa. Yegl didre, ye yagl i kina mina akidre, ere i kor edugwa.
52Ana Jisas yegl ersre, yoba kade tau ye moglmara wigwa i, ka ta di togwa. Yoba kade ye moglmara wigwa i, tawa teigwa yoba bitno meglkwa i yeigo, soldia tau ye tawa teigwa yugu sugl meglkwa i bitno tau yeigo, Juda yoba yobano kade bogl wigwa. Ana Jisas ye di te, yegl dugwa, Ene na kunogl gogl yoba ta moglmedi prisre, bainet ya kuba idre, wimo? dugwa. 53Na ege ege tawa teigwa yugu yomara ene bogl akie munga ba ene na si kane sikrikwa. Ba erme ene egeno yogwa. Te, erme mim erukwa sugl moglkwa yagl i, yobuglo erukwa pamiwe di, Jisas yegl dugwa.
Pita Jisas pre kan erekriwe dugwa
(Matyu 26.57-58, 26.69-75, Mak 14.53-54, 14.66-72, Jon 18.12-18, 18.25-27)
54Ana Jisas yegl di kodugo, yoba ye moglmara wigwa i ye si akidre, ye auro i pi tawa teigwa yoba bitno ta moglkwa i, kipamara eigwa. Te, ye ede eigwa igne, Pita eglke iro mogl, ye eimara sika si ede ogwa. 55Ana tawa teigwa yoba bitno yagl kipamara togl suna i, yoba tau ede ere gaglsre, ede pramnedi ame di meglko, Pita ede togl suna udre, ye meglmara suna i ame dugwa. 56Ye ame didre, ede pre moglko, nigl kogon abai ta ye toro kan moglsre, yegl dugwa, Yagl moglkwa magigl i, ye yagl Jisas i bogl akie miuriwe dugwa. 57Yegl dugo, Pita mane didre, yegl dugwa, Abai yo, na yagl i ta pre kan erekriwe dugwa. 58Pita yegl didre, kuri ta moglko, yoba pere ta ye kandre, yegl dugwa, Ene yagl i duglo boglnga yagl ta motniwe dugwa. Yegl dugo, Pita ye di te, Na ta maniwe dugwa. 59Pita yegl dugo, aua swara mere yegl ede ogo, yagl pere ta ka gigledi di moglsre, Ene ka kaima yagl i bogl akie miurka pamiwe dugwa. I siragl pre ama Galili yoba ta motniwe dugwa. 60Yegl dugo, Pita di ikne ede, yegl dugwa, Ene ka dinga i, na ta pre kan erekriwe dugwa. Ana ye ka yegl di moglko, koduagle kumugl ta wi sugwa. 61Koduagle kumugl ta wi sugo, Jisas ama kan ake te, Pita kanugwa. Jisas ye Pita kanugo, Pita ye Yagl Kade ka ta dugwa i, pre moglkwa. Yagl Kade dugwa i, Erme eduer koduagle kumugl ta wi sikran, ene ege suota na ta pre kan erekriwe dinatniwe dugwa. 62Jisas ka yegl dugwa i, Pita pre moglsre, ede meda pi, kai podo erukwa.
Juda yoba kade Jisas kot ere teigwa
(Matyu 26.59-68, Mak 14.55-65, Jon 18.19-24)
63Ana yoba tau Jisas ake meglkwa i, ye kenaglmo sidre, ere sigwa. 64Te, ye gumuglo were si kegl di tedre, ye ere si, yegl digwa, Yoba ira ta ene sugwa i, ka kep ere, di pogl noro! digwa. 65Yegl didre, ye kenaglmo sinamnedi ka kide tau mere ama digwa.
66Ana kamun tagugo, Juda yoba kaunsilno wagle u makai sigwa. Kaunsil wagle i, ye tau tawa teigwa yoba bitno meglko, tau God lomo beke teigwa yoba meglko, erukwa. Ana ye u makai sidre, Jisas auro i pi ye makai si si erimara yugugl edidre, 67ye di te, yegl digwa, Ene God Kere Yugwa Yagl motn, di noro digwa. Yegl digo, Jisas di ikne ede, yegl dugwa, Na ene di tebo, ene na ta pre mediglkraiglkwa. 68Te, na ene kira pogl pribo, ene di ikne edekraiglkwa. 69Ba erme we, na Yoba Wam moglka i, God, ye yobuglomo podo paugwa moglkwa i, ogo wo kra ame di moraluwe dugwa.
70Ana Jisas yegl dugo, yoba kade wagle makai si meglkwa i, ye yegl di prikwa, Ana ene God Wam motno? digwa. Yegl digo, Jisas di ikne ede, yegl dugwa, Ene digwa i, na yegl moluwe dugwa. 71Jisas yegl dugo, ye ere mogl, yegl digwa, Yoba ta ye aglaumo di porabuka i, ta paikrumiwa. Yene dra mina ka aglau ere dugwa i, nono mudu prumniwe digwa.
S'ha seleccionat:
Luk 22: KB
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Copyright 2015 New Tribes Mission