Lûkə 10
10
Yésuwə a lúmí bawútú mûm shyámbɛ na bábɛ̂
1Misam mínán mí mə́ wə̌ ɛ́ túm, Sáŋgúwə́ a pwɛsí bawútú bápə́pə̂, mûm shyámbɛ na bábɛ̂. A lúmí bɔ́ álí kə á wusú á mɔ́ bábɛ̂ bábɛ̂ á nkí tɛ́, na á líbú tɛ́ álə́ mɔ́mə̌n a n wɔ́ŋní álí kə. 2Yésuwə á byábí á bawútú bá mɔ nána, “Ndfukú ɛ mə́ ɛ yɛ́ jǐta, byə̌m bí bwí álí páʼ, ndé bapálaʼ bá bwíyǎ átin. Áfánikə̌, nyí káni nána nwɔ́ŋa-a-ndfukú a lúm bapálaʼ.” 3Kəkáni, ndé nyí lɔ́lí ɛ bî nána nǎn lúm nyə́ ngə bǎn-bá-mílɔŋgi á wútitîn wú ngvɛʼ. 4Nyí si lə́ ɛ́kpa ɛ́ ngáʼ, ká ɛkpa ɛ́pə́pə̌, tɔ̌ bitámbí. Nyí si tyə́ álí sambán mɔ ká nfɔ́ á mbuka. 5Njí nyí pílí á ndáʼ tɛ́ nyí kɔ́sɛ ɛ sambán bɔ́ nána, “Musaŋgu m bá á ndáʼ ɛnín.” 6Njí mɔ a musaŋgu a dí á wə́, musaŋgu n nyə n dikɛ na mɔ́. Njí a shyǎ, musaŋgu n nyə, nǎn tǐm mbí a nyə́mə̌n. 7“Nyí dyɛ̂ á ndáʼ ɛni, nyí dyá, nyí mwá ká yə̌ bá bə́kíní nyə́, á ɛ́tútú nána mɔʼ a ndutu a wɔ́ŋí álí kwisí nsáwu m mɔ. Nyí si kə̌ á ndáʼ na ndáʼ tɛ́. 8Wə̌ti nyí kí á nkí tɛ́ ti bá kásí nyə́, nyí dyá ká njá yǔmə́ ɛ́yə́ bá bə́kíní nyə́. 9Nyí pwísi baʼ ábə́ bá wɔ́ŋí banyambɛ̂ á wə́, nyí pɔ̂ŋ baʼ bâ nána, ‘Janiya lí Dyǔ lí mə́ ɛ wútán nyə́.’ 10Ndé njí nyí kí á nkí ká fə́ ti bá kásiyǎ nyə́, nyí kə̂ á matán má nji ti nyí byábí nána, 11‘Ká mpupu n ndɔʼ mú nkí n nyə ámə́ n látání sə́ á mbɛ́njí ɛ́ makwi áshí, sí fyákú makwi má sə á nyə́. Ndé nyí lɔ́lí ɛ́ bî nána Janíya lí Dyǔ lí mə́ ɛ wútán nyə́!’ 12Nǎn pɔ̌ŋ nyə́ nána á Bǔn bú líkáyisi bâ, Dyǔ lí lúfú likini lí nlə́m jǐta á Sódom litúm nkí mû.”
Mikí ámə́ mí dúbɛ̌ Dyǔ
13Á baʼ bá Kórásînə, ɛbúmán ɛ́ bá na nyə́! Á baʼ bá Bɛ́tsáyída ɛbúmán ɛ́ bá na nyə́! Njí misam mí mányáká ámə́ Dyǔ lí bwə́lání á nyə́, lî m bwə mɔ́ á Táya na Sídɔnə, ní bá fílí malɛbu ɛtfûm ɛ́ púndá, bá pɛ́njíyá pə́ mbumbû á nyǔ ɛ́ bɔ álí lúfú nána bá pə́lání bilɛm bí bɔ bíbî. 14Dyǔ lí lúfú likini lí nlə́m línə̂n á Táya na Sídɔnə á bǔn bú líkáyisi lí baʼ litúm nyə́. 15Na nyə́ pə́ baʼ bá Kapɛ́nahûmə, nyí kani nána,
nyí mə́ ɛ paʼ á wudya wú Dyǔ,
ndé bá shulí nyə́ áshí á mwǐ ámə́ n sə̌ ɛ́ dím ti á luŋgɛ́.
16Yésuwə a byábí á bawútú bá mɔ nána, “Ká njá awə̌ a wúkání nyə́ a wúkání mi, ká njá awə̌ a báŋí nyə́ á nyǔ, a báŋí pə́ mi á nyǔ. Ká njá awə̌ a báŋí mi á nyǔ, a báŋí pə́ mɔ awə̌ a lúmí mi á nyǔ.”
Bawútú mûm shyámbɛ na bábɛ̂ bá tímbí á mbí
17Á púndá ɛyə̌ bawútú mûm shyámbɛ na bábɛ̂ ábə́ Yésuwə a lúmíní bá tímbíní á mbǐ, bá pɔ́ŋí mɔ́ á munyɛŋgɛ nsə́sə̌n nána, “Sáŋgúwə́! Ká midî míbî mí shúlí nyǔ ɛ́ bɔ áshí á wusú wú sə ngə sí pánjíní dǐn lí wə.” 18Yésuwə a timbí bɔ́ nána, “M míní ngə sátan a fíní ámǐn a kfúnd áshí ngə ɛməmə. 19Nyí wúkan mi, m mə̌ nyə́ ɛ bə́ wunja, nána nyí tíŋgání ɛ dyaŋ nyɔ̌ na mabu, na álí wɔ́ŋ ngínya litúm ngínya ɛ́ sátan na baʼ bá ɛkfwɛyí bá nyə, ká yǔm ɛ́ si shiyán nyə́. 20Ndé nyí si wú munyɛŋgɛ nána midî mí bî mí wúkán nyə́, ndé nyí wú munyɛŋgɛ nána mǐn má nyə má tílání á wúdya wú Dyǔ.”
Yésuwə a wúkí munyɛŋgɛ
21Á púndá ɛni Mudî ámə́ ŋ Sáŋí m bwəlí Yésuwə a wúkí munyɛŋgɛ jǐta, ti a byábí nána, “Sísə́, Sáŋgúwə́ a wudya wú Dyǔ na nkínshíyə, n sákán wə á ɛ́tútú nána wə ɛ shwɛlí misam mínán á baʼ bá libyɛ́ na á baʼ ábə́ bá bî kâti, ɛ lúfú mɔ́ á bǎnbándəm. Iŋ, Sísə́, nâ ɛ sakíní nána ɛ́ bá. 22Wə̌ n pɔŋ nyə́ nána Sáŋ m myə a bəkí misam mísə́sə̌n á mákɛ́ má myə. Mɔʼ ká nfɔ́ a bíyǎ ngə Mwǎn a díní ɛ́sitúm Sáŋ m mɔ, nâ pə́ mɔ ká nfɔ́ a bíyaní ngə Sáŋ a díní ɛ́sitúm Mwǎn na baʼ ábə́ Mwǎn á pwɛsíní álí lúfú mɔ́ á bɔ́.”
23Ti Yésuwə a wɛ́sí nyǔ á bawútú bá mɔ ti a byábí á kfun átin nána, “Wunam na nyə́ ábə́ nyí mín byə̌m ábə́ nyí mínní! 24Nǎn pɔ́ŋ nyə́ nána balakuwa-bá-mudî bá Dyǔ jǐta na bakə̂ŋ bá sákí álí mín yə̌ ɛ́yə́ nyí mín ní, ndé bá púliyǎ, na álí wú yə̌ ɛ́yə́ nyí wúní, ndé bá wúkiyǎ.”
Ŋganú ɛ mɔ a Samáriya awə̌ a n lɔ̌ nlə́m
25Mulɛ̂ a mbéndá á pilí álí lə́mbí Yésuwə, ti a kɔ́ndɛ́ nána, “Mulɛ̂ yə̌ n lɔlíní ɛ bwə álí wɔ́ŋ luŋgɛ́ álə́ lísə̌ ɛ́ mɛ?” 26Yésuwə a pushú mɔ́ nána, “Yán bá tílíní á kâti ɛ mbéndá? Yán wə ɛ láŋíní yɔ́? 27Mɔ ani a pushú nána, ‘Nə̌ŋ Sáŋgúwə́ Dyǔ lí wə na nlə́m n wə nsə́sə̌n, na mudî n wə nsə́sə̌n, na ngínya ɛ́ wə ɛsə́sə̌n na likani lí wə lísə́sə̌n. Ɛ nə̂ŋ bǎn-bá-nyǎ bá wə ngə ɛ nəŋíní nyǔ ɛ́ wə.’” 28Yésuwə a pushú mɔ́ nána, “Ɛ pushú bwâm. Njí ɛ bwəlí nâ ɛ́ wɔ́ŋ luŋgɛ́ álə́ lísə̌ ɛ́ mɛ.” 29Ndé ngə mulɛ̂ a mbéndá a bílíní ɛ sa álí lúfú nána a tɛ́ŋgɛ́ní, a kɔ́ndɛ́ Yésuwə nána, “Njá a dí awə̌ a wútání mi?” 30Yésuwə a pushú mɔ́ á ŋganú átin nána, “Mɔ a Ísrɛl nfɔ́ a bílí ɛ kə á ɛ́kə. A fí á Jerúsálɛmə álí kə á Jeríko. Ngə a pílíní á njwɔ́ átin, bajíb bá wálí mɔ́, bá fúl mɔ́ maba á nyǔ, bá tí mɔ́ mbɛ́ti kə́ŋkə́ŋ a pɛ́pɛ́ ɛ́ wá. Ti bá mákú mɔ́ á nsaŋ n nji. 31Ɛ́ bwə́lání nâ prísə nfɔ́ a bílí ɛ kə á mbuka mû, ngə a míníní mɔ ani, a bámbú á nsaŋ a túm. 32Mulimlim nâ pə́ mɔ awə̌ a fí á litúmbá lí Lɛ́viyə awə̌ a bílí ɛ bwə ndutu á Tɛ́mpɛl, á pilíní, a kǐ a mindí mɔ ani, mɔ́ pə́ a bámbú á nsaŋ a túm. 33Ndé mɔ a Samáriya awə̌ á bílí ɛ kə á pɛsi ɛni, a pílí áwə́. Ngə a míníní mɔ ani, likini lí lwínjí mɔ́ á nlə́m. 34A kǐ a tání mɔ́, a fílí bwə á shiʼ ɛ́ mɔ́, a tfúlí yɔ́, ti a pə́mbí mɔ́ á nyam ɛ́ mɔ́. Ngə a pánání mɔ́ á nkí átin a kanání mɔ́ á ndáʼ ɛ bakən áfə́ a bílíní mɔ́ ɛ búngu. 35Bǔn bú yílíní a bəkí bikúlí bítân á ngɔ́ŋ a ndáʼ, ti a pɔŋí mɔ́ nána, ‘Butí mɔ́ ɛ kúmbɛ, álí tim lí myə, n sáwú wə ngáʼ ɛyə̌ ɛ bátí ámín.’” 36Ti Yésuwə a kɔ́ndɛ́ mulɛ̂ á mbéndá ani nána, “Á likani líwə, a baʼ bâ bálán ábə́ bá tání mɔ awə̌ bajíb bá lábíní, njá a bílí mwǎn n nyǎ n mɔ́?” 37Mulɛ̂ a mbéndá a pushú nána, “Awə̌ a lúfú mɔ́ likini lí nlə́m.” Ti Yésuwə a pɔŋí mɔ́ nána, “Wə pə́ kə̌ ɛ bwə mulimlim.”
Yésuwə a kǐ ɛ kpəmi Matá na Meríyə́
38Yésuwə na bawútú bá mɔ bá pilí á mǎ nkí ntə́kə̂n nfɔ́. Mwalân nfɔ́ awə̌ dǐn lí mɔ́ lí bílí Matá, a kasí bɔ́ á ndáʼ ɛ́ mɔ. 39A n wɔ́ŋ mwǎn-n-nyǎ m mɔ a mwalân, dǐn dí mɔ lí bílí Meríyə́. Meríyə́ a shumaní álí wútan Yésuwə álí wúkán mɔ́ ngə a bílíní ɛ́ lɛ́fú. 40Matá a bílí ɛ kfwî á ɛ́tútú nána a n wɔ́ŋ ɛbulú jǐta. Áfánikə̌ a kǐ ɛ pɔ̌ŋ Yésuwə nána, “Sáŋgúwə́, wə ɛ sɛ̌ mín nána mǎ-nyǎ m myə a mwɛsání mi ɛbulú ɛsə́sə̌n álí bwə? Pɔ̌ŋ mɔ́ nána a paʼ a wúnjan mi” 41Yésuwə a pushú mɔ́ nána, “Matá, Matá! Ɛ̌ látí nyǔ, ɛ̌ taʼ á nlə́m á misam jǐta. 42Ndé nsam nfɔ́ n dí ámə́ n dí n mbímbí. Meríyə́ a pwɛsí yǔm ɛ́yə́ ɛ́ tɛ́ŋgɛ́ní. N tíŋganiyǎ ɛ́ bwə bá kúwán mɔ́ yɔ́.”
S'ha seleccionat:
Lûkə 10: bwt
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió