Lûkə 11
11
Yésuwə a lɛ́fú makáni
1Bǔn bufɔ́ Yésuwə a bílí ɛ káni á fǔm bufɔ́. Ngə á malíní muwútú m mɔ nfɔ́ a byábí á mɔ́ nána, “Sáŋgúwə́ lɛ́fú sə́ álí káni, ngə Jɔnə́ a lɛ́fúní bawútú bá mɔ” 2Yésuwə a byábí á bɔ́ nána, “Wə̌ti nyí sa ɛ́ káni, nyí byá nána,
‘Sísə́, ɛdúbɛ́ ɛ́ bə́kání dǐn lí wə.
Janiya lí wə lí pâʼ lí nûŋ wudya.
3Bə sə́ bǔntɛ́ lidyá lí sə lí bwín.
4Laksɛ́ sə́ wubî wú sə,
ngə sə́ pə́ sí laksɛ́ní baʼ ábə́ bá bwəlí sə́ wubî,
ɛ si púshú nána sí kwíli á makiksan.’”
5Ti Yésuwə a byábí a bawútú bá mɔ nána, njí nyə́ mɔ nfɔ́ a kǐ á ndáʼ ɛ nsún m mɔ á nlə́m wudû, ti a byábí nána “Áshí, bɔlɛ́ mî mibúŋgá mí blɛ̂t mílán, 6nsún m myə nfɔ́ awə̌ ǎ kə á ɛ́kə a pílí á ndáʼ sɔnsɔ́nǎn, ŋ wɔ́ŋiyǎ ká yǔm álí kasí mɔ́.” 7Ndé njí nsún n wə ani a pushú wə á ndáʼ átin nána, “Ɛ si takí mi, ɛkuʼ ɛ́ myə ɛ́ kɔ́lɔ́ní, bǎn bá myə na mimə̌n sí mə́ ɛ́ nali. N sî púlá ɛ́ falu áshí álí bə wə̂ ká yǔm. 8N pɔ̂ŋ nyə́ mbálɛ nána ká a sî falúwá áshí á ɛ́tútú nána ɛ dí nsún m mɔ, ká yə̌ ɛ́ bwəlan, a fálú áshí álí bə wə yǔm na yǔm tɛ́ ɛ́yə́ ɛ̌ saní á ɛ́tútú nána ɛ mákuwa álí kɔndɛ́ mɔ́ yǔm ɛ́yə́ ɛ̌ saní. 9Áfánikə̌ nǎn pɔŋ nyə́ nána, kɔndɛ́ á Dyǔ, lí bə wə̂. Sǎ, Dyǔ lí bwə wə̂ ɛ mín. Kfǔm ɛkuʼ Dyǔ lí dfǔl wə̂ yɔ́. 10Á ɛ́tútú nána, mɔtɛ́ awə̌ a kɔndɛ́ á Dyǔ, á kwisi, awə̌ pə́ a sakí á mín. Ká njá a kfumbí ɛ́kuʼ Dyǔ lí dvul mɔ́ yɔ́. 11Nyə́ basáŋ bá bǎn, njá á ndíŋgí n nyə á bə̌ mwǎn m mɔ nyɔ̌ ɛ́yə́ mwǎn a kɔndɛ́ní mɔ́ shwî? 12Tɔ̌ njí a kɔndɛ́ likə lí kfú a bə mɔ́ libu? 13Njí nyə́ ábə́ nyí dí baʼ bábî nyí bí ɛ́ bə̌ mabeya má mbâ á bǎn bá nyə, bitî bítín na Sáŋ n nyə awə̌ a dí á mǐn? Yán lí sî bəní Mudî ámə́ ŋ Sáŋí á baʼ ábə́ bá kɔ́ndɛ́ mɔ́?”
Yésuwə a shiyǎ mulatáku na kə̂ŋ ɛ midî mí bî
14Bǔn bufɔ́ Yésuwə a bílí ɛ fúl mudî m bî á mɔ nfɔ́ ámə́ m bwəlí mɔ́ a si púlá ɛ́ byá. Ngə mudî m bî mû nyítíní, mɔ ani a butí ɛ byá. Limuti lí bâʼ ábə́ bá bílí áwə́ bá bílí manyáká. 15Ndé baʼ bafɔ́ bá byábí nána, “Bɛ́lsɛ́bulə kə̂ŋ ɛ midî míbî mɔ́ a bə́kí mɔ́ ngínya álí nan bɔ́.”
16Duŋgu lí baʼ bá búnsání Yésuwə wulám. Ti bá pɔ́ŋí mɔ́ nána a lúfú bɔ́ ɛyəmblan ɛ́yə́ ɛ́ fí á wudya wú Dyǔ. 17Ndé a m bí yə̌ ɛ́yə́ bá bílíní ɛ kani, ti a byábí á bɔ́ nána, “Ɛkumbu ɛ́yə́ ɛ́ kábání átin ɛ́ si wɔ́ŋ múlatáku ɛ́ páŋili. Pú ɛ ndáʼ tɛ́ ɛyə̌ ɛ kábání átin, bá si bá nsu nfɔ́, yɔ́ pə́ ɛ́ páŋili.” 18Áfánikə̌, njí janiya lí Sátan lí wɔ́ŋí bipipá ábə́ bí wanán bɔ́mə̌n, yán lí bwəní ka lí tyə́? Nǎn byá na ngə nyí byábíní nána mi nǎn midî míbî á ɛ́tútú nána Bɛ́lsɛbulə a bəkí mi ngínya álí bwə nâni. 19Njí ngínya ɛ́ Bɛ́lsɛbulə yɔ́ nǎn bwəlaní álí nǎn mídî míbî a baʼ, ngínya ɛ́ njá kə́ baʼ bá nyə bá bwəlaní álí nǎn mídî míbî? Baʼ bâ bɔ́ bá lúfú nána nyí kfúndí muká. 20Ǎ yě! Ngínya ɛ Dyǔ yɔ́ nǎn bwəlaní álí nǎn mídî míbî. Ɛ́yí ɛ́ lúfú nána janiya lí Dyǔ límə́ ɛ paʼ áwútitîn wú nyə. 21Wə̌ti mɔ a ngínya a búnsání nyǔ ɛ́ mɔ bwâm, ti ǎ tátí ndáʼ ɛ́ mɔ, yǔm ɛ́ mɔ ká ɛ́fɔ́ ɛ́ sə̌ gbɛ̂. 22Ndé wə̌ti mɔ a ngínya ampə́pə̂ awə̌ a túmbí mɔ́ ngínya, a kúwí mɔ́ á njum ti a túmbí mɔ átin, á la byə̌m ábə́ á wanání njum bí mɔ a kánan bɔ́, ti a kabí byə̌m bísə́sə̌n ábə́ a nɔŋání mɔ́. 23“Ká njá awə̌ a shiyǎ na mi, ní ǎ tɛ́ŋgɛ́n mî. Ká njá awə̌ a sə mî ɛ wúnjan álí laʼ, ní ǎ páŋ wɔ̂.”
Njí mudî m bî n tímbí pə́ á nyǔ ɛ mɔ
24“Wə̌ti mudî m bî n fálú mɔ á nyǔ, n tán tam á ɛ́sínj, n saká fǔm bú lí kɔ́mbɛ. Njí n púliyǎ ɛ́ mín ká fǔm, n byá na mɔ́mə̌n nána, ‘Wə̌ n tîm á ndáʼ ɛ́ myə áfə́ n nyítíní.’ 25Ti n tímbí, n tání ndáʼ ɛyə̌ ɛ sáŋí, ɛyə̌ bá támbúní átin. 26Ti n tímbí n kí ɛ panán midî míbî shyǎmbɛ mípə́pə̂ ámə́ mí bə́bí litúm mɔ́mə̌n álí paʼ ɛ́ kwilí á nyǔ ɛ́ mɔ ani, ti bá tambú wudya wú bɔ á wə́. Á púndá ɛni, libá lí mɔ ani lí bə́ litúm ngə lí bílíní á bibutílí.”
Munyɛŋgɛ m mbálɛ
27Ngə Yésuwə a malíní álí byá nâni, mwalân nfɔ́ a byábí, a kándí ámǐn, átitîn a limuti lí baʼ nána, “Wunam wú bá na libum álə́ lí jyɛ́ wə̂, na libî álə́ lí búngú wə̂.” 28Ndé Yésuwə a pushú nána, “Wunam wú dí wɔ̂ na baʼ ábə́ bá wúkí ɛyala ɛ́ Dyǔ, ka bá bwə ngə ɛ́ byábíní.”
Bá kɔ́ndɛ́ Yésuwə ɛyəmblan
29Ngə limuti lí baʼ lî lí butíní ɛ kɔ, Yésuwə a byábí nána, Nyɔnyi ɛ baʼ bá ɛ́tɛ̂n ɛ́ dí ɛ baʼ bábî. Bá kɔ́ndɛ́ nána n lúfú bɔ́ ɛyəmblan ɛ́ manyáká, ndé bá sî míná yɔ́ ɛ́sitúm ɛyəmblan ɛ́ Jóna. 30Ngə nlakuwa-a-mudî a Dyǔ Jóna a bílíní ɛyəmblan á baʼ bá Níníve, ná pə́ Mwǎn a Mɔnyuŋ á bání ɛyəmblan á nyɔnyi ɛ́tɛ̂n. 31Á bǔn bú líkáysi lí baʼ, mwalân awə̌ a bílí ɛ janiya ɛkumbu ɛ́ Shɛ́ba, á wumu á ndim átin na nyɔnyi ɛ baʼ bá ɛ́tɛ̂n. Á tyə́ mbúŋ ɛyə̌ ɛ́ bwə bɔ́ bá kfún múká. Bá kfún muká á ɛ́tútú nána a n fí kfwáŋ áfə́ nkínshíyə n shúkíní, álí paʼ ɛ́ wúkán mísam mí libyɛ́ ámə́ Sólómonə a bílíní ɛ lɛ́fu. Ndé ɛ́tɛ̂n mɔ a dí fán awə̌ a túmbí Sólómonə. 32Á bǔn bú líkáyisi, baʼ bá Níníve bá wumu á midim ɛyɔyɔ na nyɔnyi ɛ́ baʼ bánán. Bá tyə́ mbúŋ ɛyə̌ ɛ́ bwə̌ baʼ bá nyɔnyi ɛ baʼ bánán álí kfún muká, á ɛ́tútú nána á púndá ɛyə̌ Jóna a bílíní ɛ pɔ̂ŋ ɛ́yala ɛ́ Dyǔ á baʼ bá Níníve, bâ n makú wubî. Ndé mɔ a dí fán sɔnsɔ́nǎn awə̌ a túmbí Jóna, ndé nyí sɛ mɔ́ ɛ wúkan.
Mwɛ́nɛ n nyǔ ɛ mɔ
33“Mɔʼ ká nfɔ́ a sə̌ yǔl ɛtrúkán a shwɛ́lí yɔ́, tɔ̌ a dí yɔ́ á ɛkfuʼ áshí. Á kəlí yɔ́ a mǐn álí bwə nána mɔʼ na mɔtɛ́ awə̌ ǎ kwilí á ndáʼ ǎ mín wǔm. 34Mǐ má dí ngə ɛtrúkán á nyǔ ɛ mɔʼ. Áfánikə̌, wə̌ti mǐ má kálú wə á nlú, ní nyǔ ɛ́ wə pə́ ɛsə́sə̌n ɛ́ kálú átin. Ndé wə̌ti dǐ lí wə lí sáŋiyǎ nyǔ ɛ́ wə ɛsə́sə̌n pə́ ɛ̌ lwín na ɛfínjan. 35Áfánikə̌, nyí lɔ́lí ɛ bwə misam ámə́ mí bá ngə ɛtrúkán álí lúfú nyə́ wǔm, ɛ́ lɔ́liyǎ ɛ́ bá misam ámə́ mí fá nyə́ á ɛfínjan átin. 36Njí nyǔ ɛ́ wə ɛsə́sə̌n ɛ́ lwínjí na mwɛ́nɛ, ɛ́yə́ pɛ ká pɔ́ ɛ shiyaní á ɛfínjan átin, nyǔ ɛ́ wə ɛ́ mindí ngə ɛtrúkán ɛ́ míndíní.”
Yésuwə na Bafárisî na balɛ̂ bá mbéndá
37Á púndá ɛyə̌ Yésuwə a malíní álí byá, mɔ a Fárisî a bəŋí mɔ́ á ndáʼ ɛ́ mɔ álí dyá na mɔ́. Ti Yésuwə a kǐ á fǔm bú mɔ, a shumání á tíbili na mɔ́. 38Mɔ a Fárisî a bílí manyáká álí mín nána Yésuwə a wúliyǎ makɛ́ má mɔ ngə ɛ́ bílíní ɛləm ɛ́ bɔ alâ ɛ butí ɛ́ dyá. 39Ti Sáŋgúwə́ a pɔŋí mɔ́ nána, Nyə́ Bafárisî nyí wǔ mbís ɛ mbwindí na kúmbu ndé átinə́ n nyə byə̌m bíbî bɔ́ bí lwínjí nyə́ á nlə́m. 40Nyə́ baʼ bá ɛlemâ! Ngáʼ Dyǔ álə́ lí bwə́lí misam mí ɛ́buʼ, lɔ́ pə́ lí bwə́lí misam mí tinə́? 41Ndé nuŋání byə̌m ábə́ bí dí átinə́ nyí bəká á baʼ bá líban, ti misam mísə́sə̌n tɛ́ŋgɛnɛ nyə́ mí sáŋ
42Ɛ́ dí wubî na nyə́ Bafárisî jǐta! Nyí bə Dyǔ likaʼ lifɔ́ á mákaʼ dyǔm lí nyə lí mashyə, ndwi, na byɛ̌ bípə́pə̂. Ndé nyí niŋiyǎ ɛ́ lúfú nlə́m n mbâ na ɛniŋgán á Dyǔ. Nyí bwə misam mî ndé nyí káni pə́ míní.
43“Ɛ́ dí wubî jǐta na nyə́ Bafárisî! Nyí nə́ŋí ɛ shuman á bíbuŋ bínə̂n á mandáʼ má mákáni má baʼ bá Ísrɛl, na nána bá sambán nyə́ na ɛdúbɛ́ á mákíti átin. 44Ɛ́ dí wubî jǐta na nyə́! Nyí dí ngə midim ámə́ mí sɔ́mɔ́ní ámə́ baʼ bá túmní ámín bá si bî.”
45Mulɛ̂ a mbéndá nfɔ́ a byábí á Yésuwə nána, “Mulɛ̂ wə̌ti ɛ̌ byá nâni, ɛ̌ lwí pə́ sə́!” 46Ti Yésuwə a pushú nána, Ɛ́ dí wubî na nyə́ pə́ balɛ̂ bá mbéndá! Nyí bwə́lí baʼ bá pə́mbí múná ámə́ n kámbí álí pə́m, ndé nyí sə̌ ɛ́ bán makɛ́ má nyə á wə́ álí wúnján bɔ́. 47Ɛ́ dí wubî na nyə́! Á ɛ́tútú nána balakuwa bá mudî bá Dyǔ ábə́ bá sáŋ bá nyə bá nyakə́ bá búlúní, nyí lúŋí bɔ́ midim. 48Áfánikə̌ nyí lɔ́lí ɛ tyə́ mbúŋ, nyí lɔ́lí ɛ lúfú nána basáŋ bá nyə bá nyákə́ bá bwə́lí nsam m mbâ ngə bá búlúní balakuwa bá mudî bá Dyǔ. Na nána nyə́ nyí lúŋí midim mí bɔ. 49Á ɛ́tútú ɛ́yî, Dyǔ lí byábí na libyɛ́ nána, N lúm bɔ́ balakuwa bá mudî bá myə, na bawútú-bálí-lúm bá myə, bá búlú bɔ́ baʼ bafɔ́, bá tákí bání. 50Áfánikə̌ nyɔnyi ɛ baʼ bá ɛ́tɛ̂n bá wɔ́ŋ kɔ́ksɛ á balakuwa bá mudî bá Dyǔ básə́sə̌n ábə́ bá búlúní butya á púndá ɛyə̌ bá wíkíní nkínshíyə. 51Butya á púndá ɛyə̌ bá búlúní Ábɛlə ti á púndá ɛyə̌ bá búlúní Zakaríya, awə̌ bá búlúní áwútitîn á fǔm ábə́ bá bəní Dyǔ jabeya na ábə́ bú Sáŋí. Nǎn pɔ́ŋ nyə́, nyɔnyi ɛ baʼ bá ɛ́tɛ̂n bá kwisí kɔ́ksɛ á milú mí bɔ́ básə́sə̌n á ɛ́tútú ɛ́ mísam mínán mísə́sə̌n.
52“Ɛ́ dí wubî na nyə́ balɛ̂ bá mbéndá! Nyí kɔ́ŋgɔ́ní ɛdiban ɛ́yə́ ɛ́ dvul ɛ́kuʼ ɛ́ libyɛ́. Nyə́mə̌n nyí sî kwiliyá áwə́ átin, ndé nyí káŋ bâʼ ábə́ bá wanán álí kwíli áwə́ átin.”
53Ngə Yésuwə a falúní á fǔm bû, balɛ̂ bá mbéndá na Bafárisî bá bútí mɔ́ ɛ tɛ́ŋgɛn, bá kɔ́ndɛ́ mɔ́ mibyá tɛ́ŋgɛnɛ misam jǐta, 54Bá bílí ɛ bwə mísam minán mísə́sə̌n ngə bá kúní mɔ́ na liwusɛ́.
S'ha seleccionat:
Lûkə 11: bwt
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió