Lûkə 21
21
Jabeya lí nkfwís a mwalân
1Ngə Yésuwə a wɛnjíní mî ámǐn, a míní ngə badi bá baʼ bá fání mabeya á ɛ́buŋ ɛ́ jabeya ɛ́ Tɛ́mpɛl. 2A míní pə́ mban a nkfwís ngə ǎ fání dɔ́la ɛbɛ̂ á ɛ́buŋ ɛ́ jabeya ɛ́ Tɛ́mpɛl. 3Ti a byábí nána, “Á mbálɛ, nǎn pɔ̌ŋ nyə́ nána mban a nkfwís ani a bəkí jabeya litúm mɔ a nsə́sə̌n. 4Á ɛ́tútú nána baʼ bání bá bə́kí ngáʼ ɛyə̌ ɛ yɔbí áshí, ndé nkfwís á mwalân ani, na liban álə́ lí dí mɔ́, a bəkí ngáʼ ɛ́ mɔ ɛsə́sə̌n ɛ́yə̌ a n lɔní ɛ bwəlan álí búngú nyǔ.”
Biyəmblan bí púndá ɛ lishúkí lí nkínshíyə
5Bawútú bá Yésuwə bafɔ́ bá bílí ɛ kɛsí wulɔ wú Tɛ́mpɛl ngə bá lúŋíní yɔ́ na malɛ́ má mbâ, na ngə bá támbúní yɔ́ átin na mabeya ámə́ baʼ bá bílíní ɛ bə. Ti Yésuwə a byábí nána, 6“Byə̌m bí nán bísə́sə̌n ábə́ nyí mínní, púndá ɛ̌ paʼ ɛ́yə́ bá páŋní malɛ́ mǎ másə́sə̌n. Bá si makúwá lilɛ́ ká lifɔ́ lí bá a líní ámǐn.”
7Ti bawútú bá Yésuwə bá kɔndɛ́ mɔ́ nána, “Mulɛ̂, á njá púndá ɛ́yî ɛ́ bwəlání? Ɛyəmblan ɛ́fə́ ɛ́ lúfú nána púndá ɛ mə̌ ɛ paʼ ɛyə̌ ɛ́ bwəlání?” 8Yésuwə a pushú bɔ́ nána, “Nyí si yasán nyǔ, mɔ ká nfɔ́ a si səŋ nyə́. Baʼ jǐta bá paʼ, á dǐn lí myə, álí səŋ nyə́, mɔ na mɔtɛ́ á byábá nána, mɔ́ mú dí Ani Awə̌ bá Wɔ́kílíní. Bá byá pə́ nána madû ámə́ má shúkání má mə́ ɛ paʼ. Ndé nyí si pɔŋ bɔ́ á mbí. 9Njí nyí wúkí nána njum ɛ́ dí jǐta, tɔ nána wǔm má páŋtí jǐta nyí si báŋ. Misam mî mí lɔ́lí ɛ bwəlan kəkə, ndé mí sə̌ ɛ́ lúfú nána líshúkán límə́ ɛ paʼ.” 10Yésuwə a kǐ á wusú álí byá nána, “Bikumbu bí wǎn njum na bikumbu bípə́pə̂, madya má wanán madya 11Ndɔʼ ɛ́ sáʼ na ngínya. Njɛ ɛnə̂n na banyambɛ̂ bá kfútí wǔm másə́sə̌n. Misam mí mányáká na ámə́ mí bə baʼ bɔŋ mí fí á libubɛ. 12Ndé byáná misam mínán mísə́sə̌n mí bwəlan, bá kúʼ nyə́, bá tákí nyə́. Bá kanán nyə́ á mandáʼ má mákáni, bá káyísí nyə́, ti bá fílí nyə́ á bíbuwa. Bá tyə́sí nyə́ á masú má bakə̂ŋ na bajaniya á ɛ́tútú ɛ dǐn lí myə. 13Ɛ́yî ɛ́ bə nyə́ ɛpúlu á púndá ɛní, álí pɔ̌ŋ bɔ́ misam mísə́sə̌n ámə́ nyí sɔ́ntání tɛ́ŋgɛnɛ mi. 14Áfánikə̌, nyí fá á nlə́m n nyə ɛtî ɛfɔ́ nána nyí lɔ́liyǎ ɛ́ taʼ á nlə́m ngə nyí kásíní. 15Á ɛ́tútú nána m bə nyə́ biyala ábə́ nyí byání na libyɛ́ álə́ nyí bwəlání, á nyai ɛyə̌ baʼ bá ɛkfwɛyí bá nyə́ bá sî púlání ɛ́ tyə́ na nyə́. Bá sî púlá pə́ ɛ byá nána yə̌ ɛ́yə́ nyí byání ɛ́ tɛ́ŋgɛnyǎ 16Basáŋ na banyǎ bá nyə, bǎn-bá-nyǎ bá nyə, baʼ bá mátúmbá má nyə, na basún bá nyə, bá nyítí nyə́ á ɛbúkatîn, ti bá búlú duŋgu lí nyə lifɔ́. 17Mɔtɛ́ á kfwɛ nyə́ á ɛ́tútú ɛ́ dǐn lí myə. 18Ndé kánâwə̌, yǔm ká ɛfɔ́ ɛ́ sî bwəláníyá nyə́, nyuŋ ká pɔ́ á nlú nyə ɛ́ sî gbɛ̂. 19Tfúláni milə́m kpáŋ, ngə nyí kwísíní lisungɛ.”
Yésuwə a byábí tɛ́ŋgɛnɛ lí gbítí lí Jerúsálɛmə
20Yésuwə a pɔŋí bawútú bá mɔ nána, “Á púndá ɛyə̌ nyí mínní ngə sója ɛ́ kámbúní nkí n Jerúsálɛmə, yɔ̂ nyí yəmbní nána wǔm má kə̌ ɛ́ páŋti. 21Á púndá ɛni baʼ ábə́ bá dí á Judéya bá kə mifílí álí kə ɛ́ sɔmɔn á mákul ámǐn, baʼ ábə́ bá dí á nkí m mû bá falu áwə́, baʼ ábə́ bá shiyǎ á nkí átin, bá si takíyǎ nyǔ ɛ́ bɔ á lí kwili áwə́ átin. 22Á ɛ́tútú nána púndá ɛni ɛ́ bá madû má kɔ́ksɛ ngə yə̌ ɛ́yə́ bá tílíní áshí ɛ́ bwəlání. 23Ɛ́ bá wubî á madû má na balân ábə́ bá dí wutû, ná ábə́ bá mwáŋí mikə́ŋgə́. Mutakaʼ n nə̂n n paʼ fán á nkínshíyə, nyɔnyi ɛ níná ɛ́ kwisí mutaka jǐta. 24Bá búlú duŋgu lí baʼ, duŋgu líní ka bá kánan bɔ́ ngə baʼ bá bibuwa á bikumbu bípə́pə̂. Baʼ ábə́ bá shiyǎ baʼ bá Ísrɛl bá kɔ nkí n Jerúsálɛmə kə́ŋ kə́ŋ likaʼ álə́ Dyǔ lí fílíní bɔ́ lí bûm.”
Púndá ɛyə̌ Mwǎn a Mɔnyuŋ á paʼní
25“Dúlu, ngɔn na títí ɛ́ lúfú biyəmblan. Mbô ɛnə̂n ɛ́ lim átin, ɛ́ bwəlá ntɔkɔku ngə madí ámə́ má púlú. Ɛ́yî ɛ́ bwə baʼ bá bikumbu bí nkínshíyə álí báŋ, kə́ŋkə́ŋ bá si púlá ɛ bî yə̌ ɛ yə́ bá bwəní. 26Baʼ bá pumban á ɛ́tútú ɛ bɔŋ ngə bá sínjákíní yə̌ ɛ́yə́ ɛ́ bwəlan á nkínshíyə, mangínya ámə́ má dí á mǐn má sáʼ á mabú má bɔ. 27Á púndá ɛni bá mín ngə Mwǎn a Mɔnyuŋ ǎ paʼní á libáŋ átin na ngínya ɛnə̂n na wulɔʼ wúnə̂n. 28Wə̌ti misam mínán mí bútí ɛ bwəlan, tyə́báni ámǐn, nyí wɛ́n mǐ ámǐn, á ɛ́tútú nána púndá ɛ lishuŋgɛ lí nyə ɛ mə́ ɛ wútan.”
Mə̌ má lúfú sə́ libyɛ́
29Ti Yésuwə a pɔŋí bɔ́ ŋganú ɛni nána, “Tátyáni ɛju ɛ́ bwə̌ ɛ́ fík na biju bí mə̌ bíní. 30Njí nyí míní ngə byɛ̌ bí kɔ́nə́ bí bútíní ɛ jyɛ̂, nyí bî nána ɛyɔ́ yɔ́mə̌n ɛ́ mə́ ɛ wútan. 31Mulimlim njí nyí míní misam mínán mí bwəlan, nyí bî nána Wudya wú Dyǔ wú mə́ ɛ wútan. 32Á mbálɛ, n pɔŋ nyə́ nána nyɔnyi ɛ baʼ bánán bá sî mɛ̌ bɔ́ básə́sə̌n ɛ́yə́ misam mínán mísə́sə̌n mí bwə́lániyání. 33Minyə́ á mɛ, nkínshíyə pə́ n mɛ, ndé biyala bí myə bí bá kə́ŋ ta á bwindeya.
Nyí nûŋ púndá
34Nyí si yasán nyǔ! Nyí si fɛn púndá ɛ́ nyə ɛsə́sə̌n álí dyá lídyá na álí mwá mǐm jǐta. Nyí si takí nyǔ ɛ́ nyə jǐta á ɛ́tútú ɛ́ mísam mí lúŋgɛ́. Njí nyí bwə́lí nâ, ní bǔn bû bú tán nyə́ təlí ngə wulám. 35Bǔn bû bú paʼ a mɔ ansə́sə̌n wǔm másə́sə̌n á nkínshíyə. 36Nyí si yasán nyǔ ɛtîtɛ́. Nyí káni ɛtîtɛ́ nána nyí wɔ́ŋ ngínya álí túm misam mínán mísə́sə̌n átin ámə́ mí bwəlan, ngə nyí púlní ɛ tyə́ á wusú wú Mwǎn a Mɔnyuŋ.”
37Á madû mǎ másə́sə̌n Yésuwə a bílí baʼ ɛ lɛ́fú á Tɛ́mpɛl bǔntɛ́. Nkwin nkwin tɛ́ a bílí ɛ kə álí nali á Wúkul wú Ólivə. 38Mushú mushú tɛ́ baʼ jǐta bá bílí ɛ kə á Tɛ́mpɛl álí wúlán mɔ́.
S'ha seleccionat:
Lûkə 21: bwt
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió