Yuuhanna 8
8
Al-mara al-zanat
1Wa laakin Isa macha fi jabal al-Zaytuun. 2Wa be fajur, hu macha fi fadaayit beet Allah wa kulla l-naas jo leyah wa hu gaʼad tihit wa bada yiʼallimhum. 3Wa l-ulama wa l-Fariiziyiin jo leyah wa jaabo mara waahide al-karabooha gaaʼide tazna. Wa waggafooha giddaamhum.
4Wa hajjo le Isa wa gaalo : «Ya l-muʼallim, al-mara di karabooha gaaʼide tazna. 5Wa fi l-Tawraat, Muusa amar wa gaal ayyi mara kan zanat waajib yarjumuuha. Wa inta, tuguul chunu ?» 6Humman gaalo al-kalaam da achaan yijarrubuuh. Dawwaro yalgo sabab achaan yathamooh beyah. Laakin Isa dangar wa bada yaktib be usbaʼah fi l-turaab. 7Wa saʼalooh suʼaal katiir wa baʼadeen hu rafaʼ raasah wa radda leehum wa gaal : «Ayyi naadum minku al-abadan ma aznab, khalli yazgul al-hajar al-awwalaani.»
8Wa dangar battaan wa katab be usbaʼah fi l-turaab. 9Wa wakit simʼo kalaamah da, khalaas kulluhum chatto minnah. Awwal al-kubaar wa waraahum al-sukhaar lahaddi faddal Isa wiheedah wa l-mara waagfe giddaamah. 10Wa Isa rafaʼ raasah wa saʼal al-mara wa gaal : «Mara zeene, ween humman ? Ma fi naadum yidoor yiʼaakhibki walla ?» 11Wa hi gaalat : «La, ya l-sayyid. Naadum ma fiih.» Wa Isa gaal leeha : «Ana kula ma niʼaakhibki. Khalaas, amchi. Wa min al-yoom ma taznibi battaan.»
Nuur al-aalam
12Wa battaan Isa hajja le l-naas wa gaal : «Ana nuur al-aalam. Ayyi naadum al-yitaabiʼni abadan ma yagood fi l-dalaam. Hu yiʼiich fi l-nuur al-yantiih al-haya.»
13Wa l-Fariiziyiin hajjo leyah wa gaalo : «Inta gaaʼid tachhad le nafsak wa misil da, chahaadtak di ma indaha faayde.» 14Wa Isa radda leehum wa gaal : «Kan nachhad le nafsi kula, chahaadti indaha faayde achaan ana naʼarif al-bakaan al-ana jiit minnah wa l-namchi leyah. Laakin intu ma taʼarfu al-bakaan al-ana jiit minnah wa la l-bakaan al-namchi leyah. 15Intu tihaasubu al-naas be fikir insaani. Ana ma gaaʼid nihaasib ayyi naadum. 16Wa laakin kan ana nihaasib al-naas kula, nihaasib be adaala achaan ana ma nihaasib wiheedi. Abuuyi Allah al-rassalaani, hu maʼaayi. 17Wa kitaabku al-Tawraat buguul chahaadat naaseen indaha sabaat. 18Ana gaaʼid nachhad le nafsi wa l-chaahid al-taani al-gaaʼid yachhad leyi, hu abuuyi al-rassalaani.»
19Wa gammo saʼalooh wa gaalo : «Abuuk ween ?» Wa Isa radda leehum wa gaal : «Ma taʼarfuuni wa ma taʼarfu abuuyi. Kan awwal iriftuuni, taʼarfu abuuyi kula.»
20Wa Isa gaal al-kalaam da wakit hu gaaʼid yiʼallim al-naas fi fadaayit beet Allah jamb sanduug al-maal. Wa ma karabooh achaan al-wakit al-Allah gataʼah leyah lissaaʼ ma ja.
Al-Masiih hajja be mootah
21Wa Isa hajja leehum battaan wa gaal : «Ana namchi wa intu tifattuchuuni wa laakin tumuutu be zunuubku. Al-bakaan al-namchi leyah, intu ma tagdaro tamchu leyah.» 22Wa l-Yahuud gammo yihajju ambeenaathum wa gaalo : «Hu gaal ma nagdaro namchu fi l-bakaan al-hu yamchi foogah. Hu yidoor yaktul nafsah walla ?»
23Wa Isa gaal leehum : «Intu min naas al-ard wa ana min al-sama. Intu naas al-dunya di wa ana ma minha. 24Wa gult leeku tumuutu be zunuubku. Akiid, tumuutu be zunuubku kan ma tiʼaamunu kadar ana bas hu.»#8:24 Al-kalaam da talgooh fi Khuruuj 3:14-15. 25Wa achaan da, saʼalooh wa gaalo : «Inta yaatu ?» Wa Isa gaal : «Ana misil ooreetku beyah min al-bidaaya. 26Indi kalaam katiir al-nagdar nuguulah foogku wa beyah nahkim foogku. Wa laakin al-rassalaani saadikh wa l-kalaam al-antaani, da bas al-kalaam al-nuguulah le naas al-dunya.»
27Wa ma fihmo kadar hu gaaʼid yihajji leehum be Allah abuuh. 28Wa Isa hajja leehum wa gaal : «Wakit tarfaʼo Ibn al-Insaan foog, taʼarfu kadar ana bas hu. Wa taʼarfu ana ma nisawwi cheyy wiheedi laakin al-kalaam al-abuuyi ooraani, da bas al-kalaam al-nuguulah leeku. 29Wa l-rassalaani gaaʼid maʼaayi. Hu ma khallaani wiheedi achaan nisawwi daayman kulla cheyy al-hu yarda beyah.» 30Wa wakit Isa gaaʼid yuguul al-kalaam da, naas katiiriin aamano beyah.
Al-Masiih wa Ibraahiim
31Wa Isa hajja le l-Yahuud al-aamano beyah wa gaal : «Kan tagoodu saabtiin fi kalaami, intu tabgo talaamiizi be l-sahiih. 32Wa misil da, taʼarfu al-hagg wa l-hagg yiharrirku min al-ubuudiiye.» 33Wa l-Fariiziyiin raddo leyah wa gaalo : «Haay ! Aniina min zurriiyit Ibraahiim wa abadan ma fi naadum abbadaana. Kikkeef tuguul nabgo hurriin ?»
34Wa Isa radda leehum wa gaal : «Asmaʼo nuguul leeku al-hagg, ayyi naadum al-gaaʼid yaznib, hu bigi be sababah abid. 35Wa l-abid ma yagood daayman fi beet siidah. Illa wileed siid al-beet yagood daayman. 36Wa kan Ibn Allah yiharrirku min al-ubuudiiye, intu tabgo hurriin marra waahid. 37Irift kadar intu min zurriiyit Ibraahiim laakin tidooru taktuluuni achaan fi guluubku ma tidooru kalaami. 38Ana nihajji leeku fi l-cheyy al-chiftah wakit ana gaaʼid maʼa abuuyi wa laakin intu gaaʼidiin tisawwu al-cheyy al-abuuku ooraaku beyah.»
39Wa raddo leyah wa gaalo : «Ibraahiim hu abuuna.» Wa Isa gaal : «Kan sahiih intu iyaal Ibraahiim, intu tisawwu al-cheyy al-Ibraahiim sawwaah. 40Wa laakin intu tidooru taktuluuni wa ana jiit leeku achaan niʼooriiku al-hagg al-Allah antaani. Da ma al-cheyy al-Ibraahiim sawwaah. 41Intu gaaʼidiin tisawwu al-cheyy al-abuuku yisawwiih !»
Wa gaalo : «La. Aniina ma furuukh. Indina abu waahid bas wa hu Allah.» 42Wa Isa gaal : «Kan sahiih Allah abuuku, intu tihibbuuni achaan ana jiit minnah leeku. Ana ma jiit be niiyti ana bas, laakin Allah rassalaani. 43Maala ma fihimtu kalaami ? Intu ma fihimtuuh achaan intu ma tagdaro tasmaʼo taʼliimi. 44Abuuku hu Ibliis wa intu iyaalah wa tidooru tisawwu al-cheyy al-hu yidoorah. Hu kattaal dimam min al-bidaaya wa abadan ma dawwar al-hagg achaan fi galbah, al-hagg ma fiih. Kalaam al-kidib bigi leyah lukhkhitah achaan hu kaddaab wa kulla l-kalaam al-kidib, hu abuuh. 45Wa ana gaaʼid niʼooriiku al-hagg wa achaan da bas intu ma tiʼaamunu beyi. 46Tuguulu ana muznib laakin abadan ma tisabbutu tuhmitku. Kan ana nuguul leeku al-hagg, maalku ma tiʼaamunu beyi ? 47Kan naadum min Allah, hu yidoor yasmaʼ kalaam Allah. Laakin intu ma tasmaʼo kalaam Allah achaan intu ma minnah.»
48Wa l-Yahuud raddo leyah wa gaalo : «Kalaamna foogak sahiih ! Inta min daar al-Saamira wa inta muchootin !» 49Wa Isa radda leehum wa gaal : «La, ana ma muchootin. Ana gaaʼid nikarrim abuuyi wa laakin intu gaaʼidiin tiʼayyubuuni. 50Ana ma nidoor al-naas yicharrufuuni. Al-yicharrifni, gaaʼid wa hu al-yihaakim. 51Asmaʼo nuguul leeku al-hagg, ayyi naadum al-yitaabiʼ kalaami adiil, ma yumuut abadan.»
52Wa l-Yahuud raddo leyah wa gaalo : «Khalaas ! Hassaʼ irifna inta muchootin ! Ibraahiim wa l-anbiya maato wa laakin inta tuguul ayyi naadum al-yitaabiʼ kalaamak ma yumuut abadan. 53Tuguul inta akbar min abuuna Ibraahiim walla ? Hu maat. Wa l-anbiya maato. Tuguul inta yaatu ?» 54Wa Isa radda leehum wa gaal : «Kan nicharrif nafsi, da ma yanfaʼ. Abuuyi hu al-yicharrifni wa intu tuguulu hu ilaahku. 55Wa laakin intu abadan ma iriftuuh. Ana naʼarfah. Kan nuguul ana ma naʼarfah, ana nabga kaddaab misilku. Wa laakin ana naʼarfah wa nitaabiʼ kalaamah. 56Abuuku Ibraahiim farhaan achaan irif hu yichiif jayti. Wa chaafaaha wa firih.»
57Wa l-Yahuud gaalo leyah : «Haay ! Lissaaʼ ma indak 50 sana wa tuguul chift Ibraahiim ?» 58Wa Isa gaal leehum : «Asmaʼo nuguul leeku al-hagg, gubbaal ma wildo Ibraahiim, ana hu al-Hayy !» 59Wa battaan chaalo hujaar wa dawwaro yarjumuuh wa laakin hu allabbad minhum wa marag min beet Allah.
S'ha seleccionat:
Yuuhanna 8: ADT19
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Arabe tchadien (alphabet latin) Bible © Alliance Biblique du Tchad, 2019.