Hechos 12
12
Kakamisax ri Jacobo y kaya'i' ri Pedro pa cárcel
1Chupa taq k'u ri' la' la q'ij ri rey Herodes xeb'utaq jujun soldados cha' kekichap jujun chike ri kikojom rub'i' ri Cristo re keya' pa k'axk'ob'ik. 2Yey xeb'utaq che kakikamisaj ruk' espada ri Jacobo ri ratzixel ri Juan. Y ri soldados jela' xki'ano.
3Ek'uchiri' xrilo lik xuk'ul kik'u'x raj judi'ab' ri x'an che ri Jacobo, xutaq uchapik ri Pedro. Wa' xu'an chupa ri nimaq'ij Pascua echiri' katij ri pam na jinta levadura che.#Éx. 12:1-27 4Ek'uchiri' chapom chi ri Pedro, ri Herodes xutz'apij pa cárcel y xuya pakiq'ab' kajib' mutza'j soldados re kakichajij, yey wa soldados e kajkaj chujujunal mutza'j. Ri xuch'ob' ri Herodes e k'ate karesaj lo ri Pedro chikiwach ri winaq re ri tinamit echiri' ik'owinaq chi ri nimaq'ij Pascua.
5K'o k'u ri' ri Pedro pa cárcel lik chajital chi utz. Yey ri kikojom rub'i' ri Cristo na keb'uxlan ta che u'anik orar chwach ri Dios puwi' rire.
Ri Pedro kesax b'i pa cárcel ruma jun ángel
6Chupa k'u raq'ab' chwach pan ri q'ij echiri' ri rey Herodes uch'ob'om karesaj lo ri Pedro chikiwach ri tinamit, ri Pedro e ri' kawar chikixo'l ka'ib' soldados, ximital ruk' ka'ib' karena yuqul lo chike ri soldados. Yey pa rewi raj chajal e k'o chwach ri okib'al re ri cárcel.
7Xaqik'ate't k'ut xwinaqir jun ángel re ri Qanimajawal ruk', yey jun aq' lik xutzij upa ri cárcel. Ri ángel xuyuch'uya' ri Pedro puk'alk'a'x, xuk'osoj y jek'uwa' xub'i'ij che: «Chatwa'lijoq, chawilij» xcha che. E taq k'u ri karena k'o che ruq'ab' ri Pedro xtzaqik.
8Xub'i'ij k'u ri ángel che: «Chaximila' b'i rakoton y raxajab'» xcha che. Y rire jela' xu'ano.
Xub'i'ij tanchi ri ángel che: «Chakojo b'i raq'u' re pisb'al awij y chat-tereja lo chwij» xcha che.
9Ri Pedro xel b'i teran chirij ri ángel, tob' na reta'am taj we qatzij ri ku'an ri ángel ruk'; ma chwach rire, laj xa wachik' la katajin che rilik. 10Xeb'ik'ow k'u chikiwach ri nab'e mutza'j e chajinel. Tek'uchiri', xeb'ik'ow che ruka'm mutza'j e chajinel y xeb'opon k'u chwach ri okib'al 'anom ruk' ch'ich', wa' e ri kel b'i pa b'e chupa ri tinamit. Wa' wa okib'al utukel xjaqataj chikiwach y jela' xeb'el b'i. Xeb'in k'u jub'iq' che ri b'e y xaqik'ate't ri ángel xuya kan ri Pedro utukel.
11K'a ek'uchiri' ri Pedro xumaj usuk' na wachik' ta ri ku'ano. Xub'i'ij k'u chirib'il rib': «Wo'ora paqatzij wi, kanmaj usuk' e ri Qanimajawal utaqom lo ru ángel wuk'. Jela' xinresaj puq'ab' ri rey Herodes y che ronoje ri kakaj kaki'an ruk'iyal e aj judi'ab' chwe» xcha'.
12Ek'u la' katajin wa' pujolom ri Pedro, xe'ek chirocho ri María ruchu ri Juan, ri kab'i'x Marcos che. Chiri' kimolom wi kib' uk'iyal hermanos ketajin pa oración chwach ri Dios. 13Echiri' ri Pedro xuch'awisaj pan ri puerta re ruwa ja, jun ali aj chak Rode rub'i', xel lo che. 14Ek'uchiri' xuto e uqul ri Pedro, ruma ruki'kotemal na xujaq ta ri puerta. Ri xu'ano e kanik xok tanchi ub'i pa ja y xu'tzijoj chike k'o ri Pedro chwach ri puerta.
15Ek'u ri e k'o pa ja xkib'i'ij che:
—Ri'at xatch'u'jerik —xecha che.
Pero rali xujikib'a' uwach chike lik qatzij la kub'i'ij.
Yey xkib'i'ij rike:
—Laj e u ángel ri k'o chiri' —xecha'.
16Ek'u ri Pedro lik chak k'o che uch'awisaxik pan ri puerta. Ek'uchiri' xkijaqo yey xkil ri Pedro, lik xkam kanima' che; ma lik k'ayew chike kakikojo we qatzij ri ketajin che rilik.
17Pero ri Pedro xu'an jun k'utub'al ruk' ruq'ab' cha' ketz'inka'nik. Xutzijoj k'u chike su'anik xesax lo ruma ri Qanimajawal chupa ri cárcel. Yey xub'i'ij k'u chike:
—Tzijoj alaq wa' che ri Jacobo#12:17 Wa Jacobo na e ta ri xkamisaxik (v. 2); wa' e ri jun xu'an aj wach re ri iglesia y e uchaq' ri Jesús. Mt. 13:55; Jn. 7:3-5; Hch. 1:14 y chike taq ri hermanos —xcha'.
Tek'uchiri', xel b'i y xe'ek pa jun chik luwar.
18Echiri' xsaqirik, xok jun sachib'al na'oj chikixo'l ri soldados. Xkijeq ketukukik ruma na keta'am taj sa' ri xu'an ri Pedro, ma na jinta chik.
19Ek'u ri Herodes xutaq utzukuxik ri Pedro. Yey ruma na xriqitaj taj, e xuta kichi' ri soldados; tek'uchiri', xutaq kikamisaxik. Echiri' xu'an wa', ri Herodes xel b'i Judea y xe'ek pa ri tinamit Cesarea y chiri' xkanaj wi.
Rukamik ri rey Herodes
20Ri rey Herodes lik k'o royowal chikij ri winaq e aj Tiro y e aj Sidón.#12:20 Ruma royowal, xeb'uq'atej taq raj k'ay e k'o chupa rutaqanik cha' na kek'ayin ta chi chike ri e aj Tiro y aj Sidón. Ek'u ri' wa keb' tinamit xkich'a'b'ej kib' chikiwach re keb'e'ch'a'ta ruk' ri rey Herodes cha' kaki'an utzil chomal chikiwach ruk'. K'o k'u jun achi Blasto rub'i', wa' raj chak ri rey yey lik k'o uwach pa ri rocho ri rey. Xkikoj k'u kib' chwach ri Blasto y xkipuaqij che cha' rire kach'aw pakiwi' chwach ri rey cha' na jinta chi ch'a'oj chikiwach. Y jela' raj k'ay re rutinamit ri Herodes utz kakik'ayij ri kajawax chike ri e aj Tiro y aj Sidón.
21Ri rey Herodes xukoj k'u jun q'ij chike re kakimol kib'. La' la jun q'ij xuwiq rib' ruk' chomilaj k'ul k'i rajil, xtz'uyi' pa ri q'atb'al tzij y xuya k'u jujun uch'a'tem chikiwach ri tinamit.
22Ek'u ri winaq xkijeqo lik ko kesik'inik kakib'i'ij: «¡Wa' wa kaqato, na uqul ta juna achi; e uqul jun tiox!» kecha'.
23Xa pa joq'otaj k'u ri' jun ángel re ri Qajawal xukoj lo jun yab'il che ri Herodes; ma rire xuk'ul wa yakb'al uq'ij x'anik, yey wa' xew taqal che ri Dios. Jek'uri'la' xtiji' kuma amolo y ruma wa' xkamik.
24No'j k'u ri Utzilaj Tzij re ri Qanimajawal lik xe'ek utzijoxik y lik katajin kik'iyarik ri kekojow re.
25Echiri' ri Bernabé y ri Saulo xkik'is ri chak ya'om chike,#Hch. 11:29, 30 xeb'el chiri' Jerusalem y xkik'am b'i ri Juan kuk', ri kab'i'x Marcos che.
S'ha seleccionat:
Hechos 12: acrN
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2009, Wycliffe Bible Translators, Inc. All rights reserved.