Juan 18
18
Kachap b'i ri Jesús
(Mt. 26:47-56; Mr. 14:43-50; Lc. 22:47-53)
1Echiri' ri Jesús xuk'is ub'i'xikil taq wa', xel b'i junam kuk' rutijo'n, xkiq'axuj k'u ri raqana' Cedrón y xeb'ok chupa jun werta k'o chiri'. 2Ri Judas, ri kak'ayin re ri Jesús, reta'am chi ri luwar, ma uk'iyal laj ri Jesús kuk' rutijo'n kimolom kib' chiri'.
3Ek'u ri Judas xoponik, eb'uk'amom b'i uk'iyal soldados y taq ri chajinel re ri Rocho Dios. Rike kuk'a'am taq chapab'al, yey e k'o ri kawolol ri ki aq' y e k'o ri xa kitzuk'em ki aq'. Wa' etaqom b'i kuma ri nimaq e aj chakunel pa Rocho Dios y ri fariseos.
4Ek'u ri Jesús ruma reta'am chi ronoje ri katajin lo puwi', xeb'u'k'ulu apanoq y xutz'onoj chike:
—¿China ri kitzukuj? —xcha'.
5Rike xkik'ul uwach:
—E Jesús ri aj Nazaret —xecha'.
Ri Jesús xub'i'ij k'u chike:
—In ri'in —xcha'.
Yey ri Judas, ri kak'ayin re, k'o chikixo'l ri kakaj kakichap b'i ri Jesús. 6Echiri' xub'i'ij ri Jesús chike: “In ri'in”, xetzelej chikij y xetzaq pulew.
7Ek'u ri Jesús xutz'onoj tanchi chike:
—¿China ri kitzukuj? —xcha'.
Y rike xkib'i'ij:
—E Jesús ri aj Nazaret —xecha'.
8Xub'i'ij k'u ri Jesús chike:
—Ri'in nub'i'im chi che alaq; “In ri'in.” We in k'u ri kintzukuj alaq, ya'a b'i alaq luwar chike wa nutijo'n cheb'e'ojana —xcha chike. 9E xub'i'ij wa' ri Jesús cha' e ku'ana ri ub'i'im chik: «Na jinta junoq xsach chike ri eb'uya'om ri Nuqaw chwe.»#Jn. 17:2
10Ek'u ri Simón Pedro ruk'a'am jun espada. Xresaj k'u uloq y xujochij b'i ruxikin uwikiq'ab' ri raj chak ri kajawal raj chakunel pa Rocho Dios. Wa aj chak Malco rub'i'.
11Ri Jesús xub'i'ij k'u che ri Pedro:
—Chak'olo ra espada chupa ruk'olib'al. ¿Na kinik'ow ta kami ri' pa ri k'axk'ob'ik we e ri Nuqaw intaqayom lo che? —xcha'.
12Ek'uchiri', ri soldados y ri taqanel ke, junam kuk' raj judi'ab' e chajinel re ri Rocho Dios, xkichap ri Jesús y xkiyutu.
Ri Jesús k'o chikiwach raj q'atal tzij
(Mt. 26:57-58; Mr. 14:53-54; Lc. 22:54)
13Xkik'am k'u b'i ri Jesús chwa ri Anás, ruqaw-uji' ri Caifás ri kajawal raj chakunel pa Rocho Dios chupa la' la junab'. 14Yey e Caifás ri ub'i'im chike raj judi'ab': «E más utz we ta e la' xa jun chi achi kakam kuma konoje ri tinamit.»#Jn. 11:49-50
Ri Pedro kub'i'ij na reta'am ta uwach ri Jesús
(Mt. 26:69-70; Mr. 14:66-68; Lc. 22:55-57)
15Ri Simón Pedro y jun chik tijo'n eteran b'i chirij ri Jesús. Wa' wa jun chik tijo'n eta'matal uwach ruma ri kajawal raj chakunel pa Rocho Dios; ek'u rire xok b'i ruk' ri Jesús che ruwa ja re ri rocho ri aj wach. 16No'j ri Pedro xkanaj kan chwa ri puerta pa b'e. Ruma k'u ri', xel lo ri jun tijo'n eta'matal uwach ruma ri kajawal raj chakunel pa Rocho Dios, xch'a't ruk' rali aj chajal re ri puerta cha' kuya luwar che ri Pedro kok b'i.
17Ek'uchiri' rali xutz'onoj che ri Pedro:
—¿Na lal ta nawi jun chike rutijo'n la' la jun achi? —xcha'.
Ri Pedro xuk'ul uwach:
—Na in taj —xcha'.
18Ruma k'u lik k'ax tew, raj chakib' y ri e chajinel e tak'al chuchi' jun aq' kinuk'um re kakimiq'isaj kib'. Yey ri Pedro k'o kuk' chuchi' ri aq'.
Ri Anás kuta uchi' ri Jesús
(Mt. 26:59-66; Mr. 14:55-64; Lc. 22:66-71)
19Ri kajawal raj chakunel pa Rocho Dios#18:19 Ri Anás ik'owinaq kajawal raj chakunel pa Rocho Dios; e uwari'che k'a kab'i'x wa' che, tob' chupa wa' wa junab' e Caifás ri xk'oji'ik. xujeq utz'onoxik che ri Jesús pakiwi taq rutijo'n y puwi ruk'utunik.
20Ri Jesús xub'i'ij che:
—Ri'in in tzijoninaq chiwachil chikiwach konoje ri winaq, xaqi in k'utuninaq pa taq sinagogas y pa ri Rocho Dios pa kakimol wi kib' raj judi'ab'. Na jinta k'o nub'i'im xa xe'laq'ay. 21¿Su'chak k'u ri' katz'onoj alaq chwe puwi ri nuk'utunik? E tz'onoj alaq chike ri e tayom we ri'in, ma rike keta'am sa' ri nuk'utum chikiwach —xcha'.
22Echiri' xub'i'ij wa' ri Jesús, jun chike ri e chajinel xupach' jun q'ab' chupalaj ri Jesús y xub'i'ij che:
—¿Utz neb'a jela' kak'ulub'ej uwach ri kajawal raj chakunel pa Rocho Dios? —xcha'.
23Ri Jesús xuk'ul uwach:
—We ximb'i'ij juna ch'a'tem na utz taj, b'i'ij la ri' sa' ri na utz taj ximb'i'ij. No'j we utz ri ximb'i'ij, ¿su'chak k'u ri' xinch'ay la? —xcha'.
24Yutum chi ri Jesús, ri Anás xutaq b'i chwa ri Caifás, ri kajawal raj chakunel pa Rocho Dios.
Ri Pedro kub'i'ij tanchik na reta'am ta uwach ri Jesús
(Mt. 26:71-75; Mr. 14:69-72; Lc. 22:58-62)
25Ek'u ri Pedro tak'al chuchi' ri aq', kumiq'isaj rib'. Yey e k'o jujun jewa' xkib'i'ij che:
—¿Na lal ta nawi jun chike rutijo'n la' la jun achi? —xecha'.
Ri Pedro xrewaj, jewa' xub'i'ij:
—¡Ja'i! Na in taj —xcha'.
26Chiri' k'o jun raj chak ri kajawal raj chakunel pa Rocho Dios. Rire k'o chux che ri jun xjochix ruxikin ruma ri Pedro. Xutz'onoj k'u che ri Pedro:
—¿Na xinwil ta neb'a wach la chila' pa ri werta ruk' ri Jesús? —xcha'.
27Yey ri Pedro xrewaj tanchik, y ek'uchiri' xb'ixon lo ri teren.
Ri Jesús kaya'i' chwach ri taqanel Pilato
(Mt. 27:1-2; Mr. 15:1; Lc. 23:1)
28E ri' katajin usaqirik echiri' xesax b'i ri Jesús chwa rocho ri Caifás y xk'am b'i pa ri palacio re ri Pilato, ri taqanel aj Roma. Ek'u ri aj judi'ab' na xeb'ok ta chupa ri palacio cha' na kakich'ulaj ta kib' chwach ri Dios y jek'ula' utz kakitij ri cena re Pascua.#18:28 Chikiwach raj judi'ab' we e la' keb'ok pa rocho junoq na kuk'il ta raj judi'ab', ruk' wa' kemakun chwach ri Dios y na taqal ta k'u ri' chike kaki'an ri nimaq'ij Pascua. Ruma wa' na xkaj taj keb'ok chupa ri rocho ri taqanel Pilato.
29E uwari'che, ri taqanel Pilato xel loq cha' kach'a't kuk' y xub'i'ij chike:
—¿Sa' rumak wa'chi kakoj alaq? —xcha'.
30Raj judi'ab' xkik'ul uwach:
—We tamaji aj mak, na kaqaya ta ri' paq'ab' la —xecha'.
31Ek'u ri Pilato xub'i'ij chike:
—K'ama b'i alaq y q'ata alaq tzij puwi' jela' pacha' ri kub'i'ij ri tzijpixab' e alaq —xcha'.
Pero raj judi'ab' xkik'ul uwach:
—Ri'oj oj aj judi'ab' na jinta paqaq'ab' kaqaq'at tzij re kamik puwi junoq#18:31 Ri tzijpixab' ke raj judi'ab' kataqan che ka'an junoq pa'b'aj we q'atom chi tzij re kamik puwi'. Pero chupa la' la q'ij, xew k'o puq'ab' ri gobierno re Roma kuq'at tzij re kamik puwi junoq. —xecha'.
32Jela' e xu'ana pacha' rub'i'im lo ri Jesús puwi rukamik.#18:32 Raj judi'ab' na kakikamisaj ta junoq chwa cruz; xew raj Roma keb'anaw wa'. Yey ri Jesús ub'i'im chik kakamisax chwa cruz. Jn. 3:14; 8:28; 12:32
Ri Pilato kuta uchi' ri Jesús
(Mt. 27:11-14; Mr. 15:1-5)
33Ri Pilato xok tanchi ub'i chupa ri palacio, xusik'ij ri Jesús y xutz'onoj che:
—¿Lal kami ri' ri rey ke raj judi'ab'? —xcha'.
34Ri Jesús xub'i'ij che:
—¿Xa pa e la ka'an la wa tz'onob'al chwe o k'o eb'i'yom re che'la? —xcha'.
35Ri Pilato xuk'ul uwach:
—Na jinta we ri'in che wa', ma ¿in neb'a kuk'il raj judi'ab'? Yey ri xeya'w e la panuq'ab' e ri winaq re ri tinamit la kuk' ri nimaq e aj chakunel pa Rocho Dios. ¿Sa' k'u ri mak 'anom la? —xcha'.
36Ek'u ri Jesús xuk'ul uwach:
—Ri nutaqanik ri'in na re ta wara che ruwachulew. Ma we ta re wara, xech'o'jin ta k'u ri' ri nutijo'n cha' na kinya' ta pakiq'ab' raj judi'ab'. No'j ri nutaqanik na re ta wara che ruwachulew —xcha'.
37Xub'i'ij k'u ri Pilato che:
—¿Qatzij kami ri' lal rey? —xcha'.
Ri Jesús xuk'ul uwach:
—Lal kab'i'n la re, ri'in in rey. Ri'in xinalax che ruwachulew yey xink'unik re kanq'alajisaj ri Q'ijsaq. Janipa k'u ri kitaqem ri Q'ijsaq, e kakita ri kamb'i'ij ri'in —xcha'.
38Ri Pilato xub'i'ij che:
—¿Sa' ri' la' la Q'ijsaq? —xcha'.
Echiri' u'anom chi wa tz'onob'al, xel tanchi ub'i ri Pilato, xch'a't tanchi kuk' raj judi'ab' y xub'i'ij chike:
—Ri'in na kanriq ta juna umak wa'chi. 39Ralaq lik xex ka'an wi alaq ri koy'ej alaq pa ri nimaq'ij Pascua kanyolopij b'i chiwach alaq juna achi k'o pa cárcel. ¿Ka'aj kami alaq ri' e kanyolopij b'i ri rey ke raj judi'ab'? —xcha'.
40Ek'uchiri', konoje xkijeq kesik'in tanchik:
—¡Mayolopij b'i la ri Jesús! ¡E yolopij b'i la ri Barrabás! —xecha'. Yey ri Barrabás e jun achi eleq'om.
S'ha seleccionat:
Juan 18: acrN
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2009, Wycliffe Bible Translators, Inc. All rights reserved.