Zaŋ 2
2
Yezu da magurlam me zəgey kokwa da Kana
1Arka andza meney ma makar ana na, ma kam magurlam me zəgey kokwa da Kana ma Galiley, maya ma Yezu ŋga daha da ɗəma. 2Ka wunama Yezu ba a huɗa tiyatsa, ta gawla ŋga hay dzay. 3Andza zom a hətsey na, maya ma Yezu ma ləvar: «Zom a rafata dasakay.» 4Ama Yezu ma mbəɗar kava: «Ŋgwas eɗey, ka wuɗafaya mey? Har a ɗaw ka slawa tsaray kakay sana.» 5May ŋga ma ləvatar a gawla ma 'ay hay: «A ləvakwar teŋgey teŋgey na, kama!» 6Gəzla ma ŋgwa hay mukwa ma pa hiya ka slam ana, me bəzləmey vaw ma Zuif hay. Gəzla na asləta na, a mbəɗey yam a key zaw tsew dakay na makar. 7Yezu ma ləvatar a gawla ma 'ay hay: «Rəhadəmata gəzla na hay ta yam.» Arka taya ma rəhadəmata petse petse. 8Yezu ma ləvatar: «Ekəɗey na təɗamar, dadəmara a bay ma magurlam ana.» Taya ma təɗamar. 9Arka ma ndzəka yam ana hana, ma təra ha ba zom aha na, - a sərada zom ana a sawa na da may kakay, sey gawla ma 'ay hay na ma təɗəmərawa yam ana-, arka ŋga ma ləvar a zel ma kokwa na: 10«A vəlam ka mey na zom ma tsəray ana, arka andza ndaw hay ma wa hiya tsoy na, a vələmatar na ma tsəray lele kakay ana tok sana, ama kah tok na, kah ma pada zom hayna, kasl ekəɗey ana na!.» 11Zeheɗ ma Yezu me key tsəfəmey ana da Kana ma Galiley na, neney. Ŋga ma ɓada maram aŋga, arka gawla ŋga hay ma pam 'ar ka ŋga. 12A dəba na na, ŋga me hərɗey a Kafarnawom, ta may ŋga, ta malam aŋga hay, ta gawla ŋga hay. Ama taya ma ndzam da huɗa na, meney nekəɗey dada.
Yezu da 'Ay me key Kuley
(Mt 21.12-17; Mk 11.15-17; Lk 19.45-46)
13Andza magurlam ma Pak ma Zuif hay a gurawa ha bəse na, Yezu me tsəley a Zeruzalem. 14Ŋga ma ndzafata ndaw ma həɗəkadama sla hay, təɓaŋ hay ta hwoɗəgwam hay da 'Ay me key Kuley, ta ndaw me mbəɗey sumkwo hay ma ndza hiya da huɗa. 15Arka andza ŋga me ləmey ɗewer laway aha na, ŋga ma haratərawa ba tabiyaha da 'Ay me key Kuley, təɓaŋ hay ta sla hay adzay. Ŋga ma zlaɗadatara sumkwo ma ndaw me mbəɗey sumkwo hay ba, ma tsəhəɗadatara tabal ata na hay ba. 16Arka ma ləvatar a ndaw ma həɗəkadama hwoɗəgwam ana hay: «Hələmata tek a neney hay ba tabiyaha ka sləna. Ka təradama 'Ay ma Baba ɗaw andza 'ay me key filaw zlay!» 17Arka gawla ŋga hay ma sərafama ka guma ma Mewindey a neney Kokwoɗ ana hay: Da i ma wuɗa 'Ay ɗek na, a tsaya mevel. 18Ama Zuif hay, ma mbəɗamar kava: «Ka tek eɗek a neney hay me key ana na, ka da ɓandar na zeheɗ ma mey?» 19Yezu ma mbəɗatar kava: «Mbəzladama 'Ay me key Kuley a neney ba na, i da lətsada ka slam aŋga da meney makar.» 20Arka Zuif hay ma ləvamar tok: «Me zley ma 'Ay me key Kuley a neney na, me ndzey mevey kokurow faɗ kava mukwa tok na, kah na, ka da lətsada da meney makar tok ɗaw?» 21Ama ŋga na, a tsey na ka 'Ay me key Kuley na, ma vaw ŋga na. 22Andza ma ma lətsawa ŋga da walaŋ ma ndaw ma mətsa na hay na, gawla ŋga hay ma sərafama azlakwa a tsey andza neney na ka vaw ŋga na, arka taya ma pam 'ar ka Mewindey Kokwoɗ ana hay ta guma ŋga hana me tsey ana.
Me pey ’ar na ɗa tsa kakay
23Andza Yezu ma ndza ha da Zeruzalem da har ma magurlam ma Pak na, ndaw hay haɗadzidzay ma pam 'ar ka mezəley ŋga, hərway taya ma nəkadama zeheɗ aŋga na hay me key ana. 24Ama Yezu na a patar 'ar tikay, hərway a sərada me key ta tobiya ta ha. 25Arka ŋga na a wuɗey ndaw ka kar seydewe ma ndaw tizlay, hərway ma mey na, a səradata mevel ma ndaw hay.
S'ha seleccionat:
Zaŋ 2: MOF
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Le Nouveau Testament en langue Mofu © 2007 Alliance Biblique du Cameroun