Ducas 11
11
Nuquin Papa chiannete chiaid
(Mat. 6.9-15; 7.7-11)
1Adashic uëshë utsin uanno nidshun Nuquin Papa Esusën chuipanëdash. Aden Nuquin Papa chuiquin nainacsho issun abëd icquido abentsëcshun nadopanëdash: Icbo, Nuquin Papa naden chuita, quequin Uanën abëd icquido chuipanëdash. Adembidi Nuquin Papa chiannete ubitedi chui, capanëdash.
2Adoaquien Esusën: Naden Nuquin Papa chuita:
Papa, bëdamboshëcquidquio mibi nec.
Adquid icsho matses abitedishunquio: Cun Icbombo mibi nec, quequin ma mibi tantiapanuna, Papa.
Mimbi namiacnoshon mibëd icquidon mimbi chiacpadombuenuidi naic.
Adombuembidi nidaidënshun matses abitedishunquio ma mibi tantiaquin napanuna, Papa.
3Bunmianenquio icquin badiadquidën badiadquidënquien cun pete icmeta, Papa.
4Adecbidi utsin ubi chieshënsho isash aid cuidenquio yec ubi bëshunacpadecbidi umbi icsambuen naidtedi tantienquio yec bëshunta, Papa.
Adembidi: Mayan Icsa Satanasën icsambuen namequin tanquin icsamenushe, queshun ubi cudasquin dayun uata, Papa, quequin chuita, quepanëdash Esus.
5-6Adotanquimbic nadembidi Nuquin Papa chuite Esusën chuiuapanëdash: ¿Ada mibitedi mibëd nashunnanquidquio icpec? Inchësh poctsembo pete bedshunnuec mibëd nashunnanquid yacno nidash: Ubi yacno umbi tantiaidquio chosho iuedombi. Aid pemenu, cac cun pete nibëdsho isash aid pemenun pan 3ted bedec chobi. Mimbi meniac cuidquin adquidbidi mibi meneuaimbi, mimbi catsiac.
7Adoaquien nuntanshun: Padi. Shëcuë shëcnandoquiombi. Cun bacuëbobëd ushec samëdtoquiobi. Mibi menetiapimbo, quequin mibëd nashunnanquidëmbi mibi chuitsiash.
8Aden aidën chiaqui min pete nibëdnuc mimbi iuen chuidonetsiac. Aden iuen chuidoniac mibi menetsiash. ¿Abëd nashunnanquid icshoda mibi menepadic? Padenquio. Mimbi nidenquio icquin mimbi iuenquio chuidonesho tantiashumbien mimbi chuibuedtedi mibi menetsiash, quepanëdash Esus.
9-10Aden chiec abi onquec: Nuquin Papa ënenquio icquin chuidoneta. Aden chuidoniac tantiashun Nuquin Papan mibi menendac. Adembidi: Ubi bëdambuen name, Papa, mimbi cacpadombuen mibi namendac. Adembidi: Ubi nashunta, Papa, quequin chuidoniac tantiashun Nuquin Papan mibi nashunendac.#11.9-10 Isayasën adembidi chuipampic. Ambi dada uaid Isa. 55.6 ista. Edemiasën adembidi. Aidën dada uaid Ede. 29.13 ista. Adembidi chotaquën onqueten M.I.Ch. 4.29 ista.
11Min madon: Bundobique. Nuëcquid chenu. Bec cho, papa, ¿cacta nisimbo menepadic? Padenquio. 12Adembidi: ¿Cachinan bacuë chenu. Bec cho, queshoda mimbi chichunquio menepadi? 13Mibitedi icsambuen naquido icquimbi min bacuë tantiaquin bëdambocquid menequid mibi nec. Adquid icnuc Nuquin Papa icsaisambo abuc tabadquid icquin: Min Mayan Bëdamboshëcquid ubi mene, quequin abi chuisho tantiashun mibi menendac, quepanëdash Esus.
Bedsebun namiaid Esus nec, quequin chiaid
(Mat. 12.22-30; Madc. 3.20-27)
14Adshumbic podobitsi icsa dapuduedshun eme uaid dada icsho istanquin Esusën: Dapuduen, cac podobitsi icsa dapuduennubi ambi eme uaid onquiampanëdash. Adsho isash iccuededquidotedi tantiadempambo yec tabadnubi 15utsi utsiec: Bedsebu caid podobitsi icsan icbon namiaid icquimbien Esusën podobitsi icsa dapuduenmequin nachitec, quepanëdash.
16Adnubien iccuededquid utsibon: Icsambuen namenuna, quequin naden Esus chuipanëdash: Nuquin Papan Chomiaid icquin Aidën namiac nadatiambocquin nabanquin ubi isme, capanëdash.
17Aden chuisho tantiashien aidon otacquio tantiaid tantiaquidquio yec abi icsambuen chuimenuequido chiec Esus nadpanëdash: Chuiquid tapan nëishshun abëd icquido cumapenen chushcac: Aidbëd ictiapimbo iquebi, quianec cuëshcuëshëdec niquec. Adec niquian chuiquid tapa ictiapimbo aid iquendac. Adquiecbidi shubu icbon nëishshun abëd icquido cumapenen chushcac: Aidbëd ictiapimbo iquebi, quianec cuëshcuëshëdec niquec. Adec niquian shubu icbobëd icquid aton shubu nibëdendac. 18Adembidi Bedsebu cashumbic Satanas Mayan Icsa caid podobitsi icsabon chuiquid tapa nec. ¿Adquid icquimbida ambi namiaido aton iuabo dapuduedmeshun aton iua ubi icshoda aido dapuduenmequid ubi icmepatsiash? Padenquio. Ambi dapuduedmiaido dapuduenmetiapimbo ictsiash. Mimbi: Bedsebun namiaid icquimbien podobitsi icsa dapuduenmechitec, ubi casho tantiashun aden mibi chiec nebi. 19Umbi podobitsi icsa dapuduedaid dapuduenmesho issun: Bedsebu caidën namiaquien nachitec, quequin mibitedishun tantianuc ¿Tsuntsin namiac mibëd icquidon podobitsi icsa dapuduedaid dapuduenmepac caosh? Aden nasho issun mimbi ubi chuibocpadombuembidi ma mimbi min matses aden chiambo icpaboc. Mimbi adoac mibëd icquido: Mimbi icsambuen chiec, quetsenosh podobitsi icsa cuenmequido. 20Nuquin Papan nadatiambocquin namiac podobitsi icsa dapuduenmequid yec ¿ambi Chomiaidquio Nuquin Papan namiacno matses tabadmequid mibitedi yacno ënden choabida ictic? quepanëdash Esus.
21Aden chiashic Esus onquec: Dada uidënquiocquid siante sananec aton shubun icquidtedi isec tsadnuc atona ampetiapimbo iquec. 22Adnubien dada utsi aid udictsëcquid uidënquioshëcquid choec shubun puduedtanquin icbo uidën uatanquin siante mënchictanquin atonatedi ampeshunendac. Adotanquimbi abëd icquido menebanendac.#11.22 Aden nadatiambocquin nabanquid icquin Mayan Icsan iuabo Esusën dapuduenmepanëdash.
23Aden chiashic: Ubi cun Icbo cainquio icquido ubi chieshënquido nec. Adquid icquin ubi tantiactsëcquido chieshënquin cuëshëdmendac, quepanëdash Esus.
Abibi dapuduembuedi podobitsi icsa dapudueduaid
(Mat. 12.43-45)
24Aden chiashic abi onquec: Abi dapuduedaid podobitsi icsa abibi dapuduenanec matses nibëdec masiuidpambo yacno nidash capucuennequimbi abi dapuduedtequid istuidenquio icposh. Adquid istuidambo iquec: Ubi dapuduembuedi dapudueduaic nidnu, quianec anobidi chouaposh. 25Adec choshon abi dapuduembuedën dada bëdambuen bescaquin shubu nacnenacbimbuec icsho istuidposh. 26Adsho isash padpidec niduashun abipadquid utsi udictsëc icsamboshëcquid 7ted icquidobëd choash abitedi dapuduedcuededan aid dada buëdanquiec icsamboshë yanuaposh, quepanëdash Esus.
Chido abentsëcshun chiaid
27Aden Esusën chuibansho tantiec tabadcuedednubien chido abentsëc: Mibi tishshun shuma chishmequin cani uaondaid chido Nuquin Papan bëdambo icmiaidquio nec, quepanëdash Esus chiec.
28Adoaquien: Nuquin Papan Chiaid chuibansho tantiashun aidën chiacpadombuen nabanquid Nuquin Papan bëdambo icmiaidquio nendac, quepanëdash Esus aid chido chiec.
Onasën ismiampicpaden ismete chiaid
(Mat. 12.38-42; Madc. 8.12)
29Adnubien abi yacno chochoash matses dadpen datsidadcuededsho issun Esusën nadopanëdash: Nëid nidaidën nëbi tabadquido icsamboshëcquido nec. Adquido icquimbi: Nadatiambocquin nabanquin ubi isme, mibi quepec. Adsho nëbi ismenquio icquin Nuquin Papan ambi oncamiaid nuquin tsusedpa Onas nampicpadombuen naquin abentsen ismendambi. 30Shubu dadpen icquid Ninibe caid yacno nidshun matses icsambuen naquido cuidte Nuquin Papan tantiamiacpaden Onasën cumapenen chuisho tantiash: Abimbo caic, queshun ambi icsambuen naid ënquin Ninibe yacnocquidon tantiabempampic. Adembidi Matsesën Tishaid icquin umbi chuibansho nëbi matses icquidon tantiatiadquidi nec. 31Adquid icnuc abitedimbo cuidte uëshëmbi matses utsi Sud yacnocquidon chuiquid tapa chido tsusedpa Sadomon bëdambuen tantiaquid icpampid icnubi ënapenuësh choampidëntsen: Icsambocquido neque. Cuid, mibitedi cauaindac. Sadomon bëdambuen tantiaquid icpampid icnubi aid udictsëcquidquio icquin nadatiambocquin nabanquin ismiaqui mibitedishun ubi tantienquio iquec.#11.31 Ch.D.1. 10.1-10 tantiaquin Esusën aden chuipanëdash. 32Padnuen Nuquin Papan Chiaid Onasën chuibanac shubu dadpen icquid Ninibe yacnocquido badedi icsainquio yec ënëdquin Nuquin Papa tantiabempampic.#11.32 Onas 3.5 tantiaquin aden chuipanëdash Esusën. Nuquin Papan Chiaid chuibanquid yec Onas bëdambo icpampic. Ubien aid udictsëcquid yec nadatiamboquidquio nec. Adquid icquin chuibanquin dadpen ismiaqui mimbi ubi tantienquio iquec. Aden ubi tantienquio icquido icsho Nuquin Papan abitedimbo cuidte uëshëmbi Ninibe yacnocquidon: Icsambocquido neque. Cuid, mibitedi caindac, quepanëdash Esus.
Tabote chënquiacbimbuec icte chiaid
(Mat. 5.15; 6.22-23)
33Aden chuishumbic Esusën naden chuipanëdash: Tabote taboshon ompoesa nec. Adembidi matsun bëtashesambo icbo nec. Ma umbi iuedaidon isnu, queshun tabote taboshon nënantanquio abuc dectanquid. 34Adoaidbimbuec min tantiate iquec. Min tantiaten bëdambuen tantiaquid icquin bëdambuen nabanec mibi bëdambuec tabadendac. Pamumëdacbimbuen min tantiaten icsambuen tantiaquid yec bëdambuec tabadtiapimbo mibi iquendac. 35Bëdambuen tantiec tabadbuedi: Icsambuec tabadmane, queshun abimbo tantiata. 36Min tantiate bëdambocquid icquin bëdambuen nabanec tabadec tabote taboac chënquiacbimbuec icsho isash: Nuquin Papan chiacpadec tabadquid aid nec, quequin utsibon mibi isendac, quepanëdash Esus.
Nuquin Papan cuidtequido chiaid
(Mat. 23.1-26; Madc. 12.28-40; Duc. 20.45-47)
37Aden Esusën chuibanquin nainshobien padiseobo abentsëcshun: Cun shubu yacno pec cho, capanëdash. Adoac aidbëdi nidec puduedash pete tabëcte dayunquio Esus tsadtuidpanëdash. 38Adec tsadsho isash abi iuedquid padiseobo yec: Cun tsusedpabon chiampicpadec penush mëpamëdenquien Esus icpec, quequin ambibi tantiec abi iuedquid tsadpanëdash.
39Adoaquien aidën otacquio tantiaid tantiaquidquio icquin tantiash Esus nadpanëdash: Mibi padquidobëtan mimbi naden naic. Padapadaidbëta dëshote chieshquin cachocuidtsëqui dapanshun anauc ampanambo icquidi ampanaid danmianacbimbuec mibitedi bëdambuec tabadquid danmianquiec ampeteuidi bunquido yec icsamboshëcquido mibitedi nec. 40Tantiesambo mibitedi nec. ¿Nuquin Papan matses uaquin dadabëtabi tantiate uapampic, quequin tantienquioda ique? 41Atona nibëdquid tantiaquin menededneta. Aden mimbi menedednesho issun Nuquin Papan mibi bëdambuen isendac, quepanëdash Esus.
42Aden chiashic Esus nadpanëdash: Nuquin Papan chiacpaden naimbi, queshun min tiedën canitsëcquid utsi utsien 10ted icnuc tambanquin sanshun abentsëc bedtednequin Nuquin Papa mimbi menedednepec. Aden nabanquid icquimbi Nuquin Papan Chiaid utsi tantienquio icquin bëdambuec tabadenquio icquin matses bëdambuen tantienquiocquid mibi nec. Ambi chiacpadombuen Nuquin Papa menequid icquimbi Ambi Chiaid utsi abitedi natiadquidi ma mimbi nainquio icpaboc. Adesa icsho Nuquin Papan cuidtequidombo mibitedi nendac. 43Adembidi: Ma ubi chuiquid tapabimbuec capusho mabi bëdambuen isnu, quequin tantiec Nuquin Papan Chiaid chuibante shubun puduedash chuiquid tapa tsadacno mibi tsadtednepec. Adombuembidi tantiec matses iccuededacno nidequi: Chuiquid tapabimbuec capusho bëquedshun mabi bëdambuen chuinu, quec mibi capupec. Aden tantiaquid icsho Nuquin Papan cuidtequidombo mibitedi nendac. 44Adembidi: Matses uënësaid chococaid manenushe mabësnu, quiacbimbuen: Ubi icsaid tantianushe, quequi bëdambocquid danmianquido yec icsambocquido icsho Nuquin Papan cuidtequidombo mibitedi nendac, quepanëdash Esus Moisesën chiampid tantiamequidobëta padiseobo chiec.#11.44 I.T. 19.16 ista.
45Adoaquien Moisesën chiampid tantiamequid abentsëc: Aden padiseobo icsambuen chuishunquimbi ubitedi mimbi icsambuen chuishunuapec, quepanëdash.
46Adoaquien Esusën: Ëndenquimbo Nuquin Papan: Naden nata, quequin Moises chiampidbëta mimbibi tantiaquin: Naden nata, quequin chiaid dadpen chuibanquin ambi natiapimbo icte matses mimbi namepec. Aden aido namequimbi mimbi chiacpaden nabanesambo icsho Nuquin Papan cuidtequidombo mibitedi nendac.
47Adembidi Nuquin Papan oncamiaido dadpen min tsusedpabon cuessunnepampic. Tsusedpabon cuessunniampido ënenquio icquin tantianu, quequin aido chocoquiacno mimbi shubumpi uaquin nacnempec. 48Cuessunnequin bëdambuen tsusedpabon napampic, quiacbimbuen tantiaquid mibitedi nec. Adquid icquin ambi oncamiampido cuessuniampid shubumpi uatanquin cuessunnequidobimbuecsho Nuquin Papan cuidtequidombo mibitedi nendac.
49Adquid icnuc ëndenquimbo abitedimbo tantiaquidquio icquin Nuquin Papan naden chuipampic: Umbi oncamiaidobëta umbi: Chuibennetan, quequin nidmiaido icsho utsi utsien mëyanquimbi utsi utsien cuessunnendac, quequin chuipampic. 50Aden min tsusedpabo Nuquin Papan oncamiaidon chuisho tantiesa icquin aido intac mëyanmequin cuessunnepampic. Min tsusedpabopadquid nëbi icquidobëtan Nuquin Papan Chomiaidquio tantiesambo mibitedi nec. Adquido icsho Nuquin Papan matses cuidte uëshëmbi ambi ënden mëyanampidobëta nëbi cuessunnianquidobimbuecsho mibitedi cuidendac. 51Tsusedpan abia Abed cuëmëdquid cuessunniampid icnubi tsiuecquio Sacadias cuessunnepampic. Aidi Nuquin Papa tabadte shubu dapa yacnocquid Nuquin Papa ismequin nëish iua pichicate dayunshunquiobi aidon cuessunnepampic. Aden ënden nampidbëta nëbi mimbi icsambuen naid tantiaquin mibitedi cuidendac.#11.51 Abed cuessunniampid iste bunquin Ene. 4.10 ista.
52Moisesën chiampid tantiamequido icquimbi bëdambuen tantiamenquio icsho Nuquin Papan cuidtequidombo mibitedi nendac. Nuquin Papan Chiaid tantienquio icquin aid yacno iuedanquid tantiesa mibitedi nec. Adquid yec aid yacno puduedtiapimbo icquin ambembi chiaiduidi mimbi chiac utsibotsen aid yacno puduedtiapimbo icuaindac, quepanëdash Esus.
53Aden chianec puduenanec nidsho isash padiseobobëd Moisesën chiampid tantamequido nadec onquec: Dadpen icsambuen chuimenuna, quecuededpanëdash. 54Adash Esusën chuibanacno nidanneshun: Icsambuen chuimenu, quequin naden tantiapanëdash: Ubitedishun chuimiac icsambuen chuisho tantiashun: Icsamboshëcquid nec, canuna, quequin tantiaquin Esus icsambuen chuimete bumpanëdash.
S'ha seleccionat:
Ducas 11: mcfNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved.