Ducas 12
12
Bëdambocquid danmianquid icsambo iquec, quiaid
(Mat. 10.26-27)
1Aden padiseobon: Esus cuidnuen icsambuen chuimenuna, quequin tantianubien matses dadpenquioshë Esus yacno chochoash tsucus tsucustsëcquio yec tatincancuededtsëcquiec iccuededpanëdash. Adec matses tabadnubien abëd icquido Esusën nadopanëdash: Padiseobo bëdambuec tabadquid danmianquid yec pan bidiscametebimbuecquido neque. Aidon muaquin chuisho tantienda. 2Utsibo ismenquio icquin ompodshon nabanaidtedi tantiadanendac. Adembidi utsibo tantiamenquio icquin nabanaidtedi chiadanendac. 3Adquid icnuc inchëshën shëcuë bëtashash min nuntanuësh mibitedi icsambuen chiec onquiaidbëta shoshquequin chiaidtedi badiadën matses abitedimbo tantiamequin chuibanendac, quepanëdash Esus.
Nuquin Papauidtsëqui dacuëdënta, quiaid
(Mat. 10.28-31)
4Tantia. Umbi tantiaido icsho mibitedi chuinu. Min dadauidtsëqui cuessunnequid dacuëdënenda. Adquidën mibi cuessunnequin udictsëc mibi icsauabudtiapimbo iquec. 5Nuquin Papauidtsëqui dacuëdënta. Icsambuen nadennequid icsho aidën mibi cuessunnemeshun chian annëdënquequid nësecaindac. Adoanquiduidtsëqui dacuëdënta.
6Piucquid tsasicquidëmpi daëd menequin uicchunëmpi 5ted bedquid. Aden bedaidtedi Nuquin Papan bëshunenquio icquin tantiec. 7Adembidi min manëdaid abitedimbo Nuquin Papan tambanaidquio nec. Aden min manëdaid tambanquid icquin uicchun bëdiactsëc tantiaquimbi mibitedien cumapenen tantieque. Dacuëdec tabadenda.
Esus tantiaquid nebi, quequin utsibo chuite chiaid
(Mat. 10.32-33; 12.32; 10.19-20)
8Abimbo chiembique: Tantiata. Utsibon tantianubi: Esus tantiaquid nebi, quequin abimbo chuisho issun adombuembidi Matsesën Tishaid icquin: Nëid ubi tantiaquid nec, quequin Nuquin Papabëd icquidonquio tantianuc chiendambi. 9Adembidi utsibon tantianubi: Esus tantiaquidpenquio nebi, quequin chuiquid Nuquin Papa yacno chosho issun: Nëid ubi tantiesa nec, quequin Nuquin Papabëd icquidonquio tantianuc chiendambi. 10Matsesën Tishaid icshobi ubi chieshënquin icsambuen chuishumbuedëmbi ënsho isash aidën icsambuen naid tantienquio yec Nuquin Papa bëshunendac. Padnuen Aton Mayan Bëdan namesho issumbi: Icsambo iquec, quequin icsambuen tantiaquin chuishunquid icsho aidën icsambuen naid Nuquin Papa tantienquio yec bëshuntiapimbo iquendac.
11Adquid icnuc: Esus tantiaquid nec, queshun mibitedi chieshënquin bedshun utsi utsien Nuquin Papan Chiaid chuibante shubuno buanendac. Utsibic cuidte chuiquid yacno buanendac. Utsibic chuiquid tapabo yacno buanendac. Adoac: Icsambuen nambo iccombi, quequin tantiec: ¿atotsimbi chuiquid chuipeba? quec natienda. 12Aden buanshun chuimeshobi Nuquin Papan Mayan Bëdan: Naden chuiban, quequin mibi tantiamendac, capanëdash Esusën abëd icquido chuiquin.
Atona dadpen icquidën icsambuen tantiaid
13Adnubien abi datsidadquid abentsëcshun naden Esus chuipanëdash: Icbo, cun pa uënësan cun panatedi cun buchin bedoshe. Mimbi bedbued musuc min utsi meneta, quequin cun buchi chuita, capanëdash.
14Adoaquien Esusën: ¿Buchibëta mibi namequidtabi nepe? quepanëdash abi: Chuita, caquid caic. 15Aden aid chuishumbic: Cuna dadpenquio bednu, quesa icta. Mimbi dadpen bedaidënquio mibi bëdambuec tabadtiapimbo iquendac.
16Adshumbic utsi chiacbimbuen Esusën naden chuipanëdash: Dada atona dadpen icquid icposh. Aidën tiedën icquid pete dadpenquioshë icposh. 17Adec dadpenquio icsho isash tied icbo nadposh: ¿Mitsimbuembi aidtedi sauedshun dayun uapeba? queposh. 18Adashic: Naden naimbi. Cun pete dayun uate shubu shënitedi chic chicshun aidtedi nuamboshëcnuc shubu uaimbi. Aden shubu uashun aidën cun pete abitedi sauedshun cuna utsitedi dayun uaimbi. 19Adashic abibi onquec: Cun pete dadpenquio icquid baded naimëdenquio iquec. Ad icnuc chonoadenquio yec iuec tabadquin cuishonquequin peshun aquembi, quec atona dadpen icquid onqueposh.
20Adec onquesho tantiashun: Tantiesambo mibi nec. Adquid yec nëid inchëshëmbi mibi uënësec. Adec uënësan mimbi dadpen dayun uaid ¿tsuntsina nepatsiash? quequin Nuquin Papan atona dadpen icquid chuiposh, quepanëdash Esus. 21Aden chiashic: Atonauidi tantiaquin dadpen tsindoquidtedi Nuquin Papan chiacpaden naisa yec atona nianec uënësash Nuquin Papa yacno puduedtiapimbo iquendac, quepanëdash Esus.#12.16-21 Aden chiaid iste bunquin Chotaquën onqueten Cuëd. 49.10bëta Ede. 17.11 isbanta.
¿Atotsimbi napeba? quec natiec tabadenda, quequin chiaid
(Mat. 6.25-34)
22Aden iccuededquido chuishumbic Esusën abëd icquido nadopanëdash: ¿Atotsimbi pepeba? ¿Mitsicquidibi dasiuidpeba? quequin min dada bëdambo icmeteuidi tantiec tabadenda. 23Bëdambuec tabadnu, quequin peteuidi tantienda. Adembidi dashcute dasiuidteuidi tantienda. 24Uicchunën ambi cute ëshë siac bacuëacsho chenquio iquec. Adecbidi ambi pete dayun uatequid shubumpi nibëdec. Adquid icshobi Nuquin Papan aton pete bedmec. ¿Aden uicchun bëdiactsëc tantiaquimbi matses tantiaquidquio icquin mibitedi pete bedmenquioda icpadic? Adquid icquin Nuquin Papan mibi nashunquin min pete icmeque. Natiec tabadenda. 25Mitsanauidi tantiec natiec tabadnubi ¿mibi uënëste uëshë chonoc: Padi, quecta mibi icpe? Padenquio. 26Adec mibi uënëste uëshë chonoc: Padi, quetiapimbo icquid iquequi ¿atotsi quiash mibi bunaidtedi tantiec mibi tabadpe? 27Tantia. Chuinu. Cute bacuëec tuashquiaid bëdamboshë isadec. Adec bëdamboshë isadquid ¿ambibi daëdcaidta dasiuidpec? Padenquio. ¿Adquid bëdamboshë isadquidbimbuecta nuquin tsusedpa chuiquid tapa Sadomon cuëmëdquidën dashcute icpampic? Padenquio. Adpenquio icpampic. 28Padnuen cute bacuëec tuashquiaid bëdamboshë isadbuedi badedquio sequiacsho nëdëncaquid yendac. Adquid icnuc ¿abipadquid Nuquin Papan ambi uaido icsho mibi dasiuidte dashcute bedmenquioda icpadic? Ubi bedmenquio ictsiash, quequin Nuquin Papa bëdiactsëc mimbi tantiec. 29Adquid iquec: ¿Atotsimbi peshun acpeba? quec natiec tabadenda. 30Nuquin Papa tantiesaboen abi bunaiduidi tantiec tabadeque. Mibitedishun naden tantiata. Nuquin Papan umbi: Cuna nibëdec, quequin tantiaidtedi ambia tantiaquid icquin umbi petequid yec actequid yec dasiuidte yec ushtequid yec quenuc ubi icmeshunec, quequin tantiec tabadta. 31Adembidi: Nuquin Papan namiacno tabadtequid nebi, quequin aid tantiata. Aden tantiaquid icquin abi chuisho mitsana mibi bedmendac.
Nuquin Papa yacnoshon menete chiaid
(Mat. 6.19-21)
32Mibitedi cun obecabimbuecquido nec. Adquido yec daëdpactsëc icshobi Nuquin Papan ambi namiacno tabadmete buneque. Dacuëdenda, caimbi. 33Ambo nidabi icquin mitsana menebanquin min piucquid bedshun atona nibëdquido menebanta. Aden utsi tantiaquin mimbi nabannuc Nuquin Papan abi yacnoshon menetequid mitsana chodquetiapimbocquid yec ampen bedshuntiapimbocquid yec macumpin udquin icsa uatiapimbocquid yec quec iquendac. 34Utsibo abi bunaiduidi tantiec tabadnubi Nuquin Papabëd tabadte bunquin aidën chiacpaden nabanec tabadta, quepanëdash Esus.
Chieshtoenquio icquin Esus caintequid chiaid
(Mat. 24.45-51)
35-36Aden chuishumbic Esusën utsi chiacbimbuen nadopanëdash: Aton icbon aton chido bedshun dadpen pemiacno uanno isec nidan: Cun icbo chonoshe, quiash dasiuidacchobi ushenquio icquin tabote dëbedtonequin: Cun icbo choquin shëcuë toshtoshcasho badedquio puduedmeshun nashunnu, quequin aton iuabon caimposh. 37Aden ushenquio icquin abi cainsho istuidshun aton icbon bëdambo icmequin nadoposh: Umbimbo mibi pemenu. Nëmbo tabadec cho, queshun ambi iuaido pemequin bëdambo icmendac. 38Adembidi icbo inchësh poctsenquio chosho: Cun icbo nashunnu, quequin cainquido icsho icbon bëdambo icmiaido iquendac. Adembidi badiadte anoentsëqui choshon abi ushenquio icquin cainquido icbon bëdambo icmiaido icuaindac. 39Tantia. Chuinu. ¿Nëbi ampequid choshon ampec, quequinda shubu icbon tantiapadic? Padenquio. Tantiaquidënquien: Ampe choshon cuna bedtsiash, queshun atona bëdambuen isquin ampemenquio ictsiash. 40Adquiecbidi Matsesën Tishaid yec ampe choacbimbuec chosho: Umbibi tantienquio icchitomane, queshun chieshtoenquio icquin ubi tantiaquin cainta, quepanëdash Esus.
Iuan icbon chiacpadombuen naquidbëta iua chieshtoquid chiaid
(Mat. 24.45-51)
41Aden Esusën chuisho tantiashumbien Petedon: ¿Icbo, mimbi utsi chiacbimbuen chuibambued ubitedictsëqui tantiamenuenda chio? ¿Matses abitedi tantiamenuenda chio? Tantianu. Ubi chui, quepanëdash Esus caic.
42Adoaquien Esusën: Icbon chiac ¿mitsipadquidën ambi namiaido bëdambuen namepec? Adquid chuinu. Tantia. Pete tambanshun musucshun umbi namiaid utsitedi bëdambuen menebanta, quequin ambi namiaid abentsëc chianec icbo nidposh. 43Adec nidashic aton icbo chouashun ambi chiacpadombuen ambi namiaidën nasho istuidshun: Bëdambo iquec, caindac. 44Umbi namiaid utsibon chuiquid icta. Adquid icquin cunatedi dayun uaquin isquid icta, quequin icbon chuitsiash. 45Aid iuan aton icbo baded choenquiocsho issun abëta iuaid utsibo chieshënquin dadabëtabi chido cuesbanshun ambentsëqui nua peshun tantiadennuen paë uaid nua acpatsiash. 46Aden naic tabadec: ¿Nëbida cun icbo chopeba? quequin tantienquio icnubien aton icbo chotsiash. Adec choshon ambi chiacpadombuen nainquio icsho istuidshun: Icsambo iquec, queshun tantiesabo yec icsambuen naquido cumapenen cuidacbimbuen cuidendac. 47Adembidi aton icbon chiaid tantiaquimbi ambi chiacpaden nabanesa icsho issun: Cumapenen cuesta, cac iuen cuesendac. 48Padnuen aton icbon chiabicquid icquimbi icsambuen nabansho aton icbon bëdiactsëc cuesmendac. Adembidi Nuquin Papan dadpen tantiamequin chuiquid tapa icmequin: Utsibo nashunta, caid iquendac. Padenquio icsho cumapenen cuidquiendac. Utsi chuiquid icmiabi Nuquin Papan chiacpadombuen natiadquidi padenquio icsho bëdiactsëc cuidendac.#12.47-48 M.I.Ch. 25.2-3 tantiaquin nëid dada uapanëdash.
Utsibëd bëdambuec tabadnu, quesa icquin cuëshëdmequid
(Mat. 10.34-36)
49Adshumbic padpiden chiec: Cute nëdënquedoeque. Ista, cacbimbuen Nuquin Papan matses cuidte tantiamenuec chondabi. Ëndembi matsesën bëdambuen tantiapatecnëdan. 50Adecbidi: Ubi uënës uanun mëyantequidquio iquendac, quequin uënësquiocquin tantiec: Ëndembi uënës uamepatecnëdani, quec tabadebi. 51Nidaidën icquidtedi matses bëdambuec tabadmenuec choac ¿quequinda mibitedishun ubi tantie? Padenquio. Umbi chiaid tantiesabobëd ubi tantiaquidobi cuëshëdtsiash, quequin tantiequi chondabi. 52Nëbi bedanec nad iquendac: Min shubun icquid 5ted icbuedi Esus tantiaquid utsi utsiec yannubien utsi padenquio yec cuëshëdendac. 53Aton papan chieshënquin chushcac aton mado cuëshëdendac. Aton madon chieshënquin chushcac aton papa cuëshëdendac. Aton titan chieshënquin chushcac aton champi cuëshëdendac. Aton champin chieshënquin chushcac aton tita cuëshëdendac. Aton chayan chieshënquin chushcac aton babanën cuëshëdendac. Aton babanënën chieshënquin chushcac aton chaya cuëshëdendac.#12.53 Aden chieshënte chuiquin ëndenquimbo Miqueasën dada uapampic. Ambi Dada uaid Miqueas 7.6 ista.
Nuquin Papan ismiantequid nad iquendac, quequin chiaid
(Mat. 16.1-4; Madc. 8.11-13)
54Aden abëd icquidombo chuishumbic Esusën naden iccuededquido chuiuapanëdash: Abu inchësh chosho isec: Ue choec, cacpadequi ue choec. 55Adecbidi uëshë chënquedosho isash: Chumbo yanec, cacpadequi chumbo yanec. 56Adec abuc icquidbëta nidaidën icquid adquio iquec, quequin mibitedishun tantiec. Aden tantiaquid icquimbi ¿atotsi queshun abucshun Nuquin Papan Chomiaid issumbi ubi tantienquio mibitedishun icpe? Adquido yec Nuquin Papa tantiaquid nebi, quec bëdambocquid danmianquido mibitedi nec, capanëdash Esusën.
Utsibëd chushcananquid icbuedi bëdante chiaid
(Mat. 5.25-26)
57Aden chiashic: ¿Atotsi quiash utsibobëd bëdambuec tabadenquio ique? 58Mibëd chieshënnambuedën: Nëid cuidmenuen cuidte chuiquid yacno buanchitembimbi iquec, queshun buanac podquiedën nidec aidbëd bëdambuec onqueta: Ma nëish bëdannu, quiash. Matses cuidte chuiquidën cuidnushe, quiash badedquio mibëd chieshënnambuedbëd bëdambuec isnanta. Padenquio icsho matses cuidte chuiquidën: Icsambo iqueque. Quënën tsaduntan, cac mibi quënën tsadunnushe. 59Aden tsadunmiac mimbi icsambuen nabued cuidquin min piucquid uesquin meniambo yec quënë yacnouësh mibi puduentiapimbo iquendac, quepanëdash Esus.
S'ha seleccionat:
Ducas 12: mcfNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved.