Ducas 17
17
Matses icsambuen nate bunmequid chiaid
(Mat. 18.6-7, 21-22; Madc. 9.42)
1Aden chuishumbic Esusën abëd icquido naden chuipanëdash: Icsambuen namianquid ënëdenquio iquendac. Adquid icnuc aton matses icsambuen namequid icsho Nuquin Papan cumapenquien cuidendac. 2Adquid icnuc ubi tantiabentsëcquid icsambuen namequin cuëshëdmesho issun cuënote iuëmbocquid tëdectanquin tëtanetanquin acte ëquëducquioshë yacno nënepatecnëdan. 3Aid tantiec: Aidpadquid icmane, quiash bëdambuec tabadta.
Mibëtan Esus tantiaquidën mibi icsambuen nashunsho issun: Mimbi icsambuen naique. Aden nainquio icquin ënta, quequin chuita. Mimbi adoac: Ai, icsambuen naombique. Ënnu, quesho tantiash aidën icsambuen naid tantienquio yec bëshunta. 4Adashic mibi icsa uaquin icsambuen nabued choec: Icsaobique. Nëbi padpiden nainquio iquembi, quesho tantiash aidën icsambuen nambo yacbimbuec tantienquio yec bëshunta. Adenuidi 7teden icsambuen nadednequin mibi icsa uashun: Icsaobique. Nëbi padpiden nainquio iquembi, quedednesho tantiash ambi icsambuen naid tantienquio yec bëshundedneta, capanëdash Esusën abëd icquido chuiquin.
Nuquin Papa tantiate chiaid
5Adoaquien: Nuquin Papa nadatiambocquin nabanquidquio nec, quequin tantiaquidquio icte bunebique. Adquidquio ubitedi icme, icbo, capanëdash abëd icquidon Esus chuiquin.
6Adoaquien: Cute mostasa caid ëshë pistsëcquio ictsec. Aid yacbimbuen Nuquin Papa nadatiambocquin nabanquid nec, quequin mimbi bëdiactsëc tantiactsëcquin nëid cute cain: Mananuc tabadbuedi adquiecbidi acte nantan tabaduata, quequin mimbi chiacpadec acte nantantsen abi tabadacpadecbidi tabaduaindac, quepanëdash Esus.
Icbo nashunquid
7Aden chiashic Esus: Min iua mimbi: Neshcata, cac nidshun neshcatansho: Nëbi cun iua obeca ista, cac naintanec shubuno chosho issun: Nëmbo tsadquin pec cho, ¿caquinda mimbi icpe? 8Padenquio icquin: Cun pete codocashun ubia pemequin acte acmeshun mimbitsen tsiuec peshun acta, mimbi caic. 9Aden mimbi chiac mimbi chuibuedtedictsëqui nabanquin mimbi iuaidën nainec. Aden nainacsho isash: ¿Bëdambuen mimbi naoc, quecta mibi icpe? Padenquio. 10Ambembi nainquio iccosh. Mimbi chiacpaden min iuan nabanosh. Adembidi Nuquin Papan chuibuedtedtsëqui nabanash mibitedi Nuquin Icbo caic: Mimbi chuibuedtedi nabampombi. Mimbi namiaid icquin umbi natequiduidi napombi. Utsi dadpen natiadquidi nainquioccombi, quequin mimbi chiendac, quepanëdash Esus.
Dada daush daushpambo yec daicsaid Esusën 10ted bëdanmiaid
11Adashic Edusaden yacno nidequi nidaid Cadidea caid ënëdacno nidaid Samadia caid yacno datambëtsenec 12shubu daëdpactsëcquid yacno Esus chopanëdash. Ambo choshobien dada aton dada daush daushpambo yec daicsaid 10ted choquin Esus bëquedtuidpanëdash. Adquido yec uanno tabadquin nadopanëdash: 13Ubitedi tantiaquin ubi bëdanme, Esus, cabededpanëdash cumapenen cuënquin.
14Adsho tantiashumbien Esusën: Nuquin Papa ismequin nëish iua pichicaquido yacno nidshun ismetanta, capanëdash. Adoac nidannequi abitedi bëdancuededpanëdash.
15Adec bëdanash abentsëc dëbidiadanec choec cumapenec cuëdec: Nuquin Papa bëdamboshë iquec, quec 16Esusën tayun dannëshën sebudash nidaidën bëccuësquebudash: Mimbi bëdanmeboc bëdambo iquebi, quepanëdash Esus caic. Aidi Samadia yacnocquid isadaidpembo nepanëdash.
17Aidën aden chiaquien: ¿10tedidambi bëdanmepo? ¿Ma utsibo 9ted? quepanëdash Esus dëbidiadanec chobued caic. 18Aden chiashic: ¿Atotsi quiash nëid abentsëqui isadaidpembo iquequi dëbidiadanec choash: Nuquin Papa bëdambo iquec, quequin chuipec? quepanëdash Esus. 19Aden chuishumbic: Mimbi tantiacpadequi mibi bëdanoque. Nidtoanec nidec nid, quequin Esusën chuipanëdash.
Nuquin Papan namiacno tabadte uëshë chote chiaid
(Mat. 24.23-28, 36-41)
20Adshumbic: Nuquin Papan namiacno tabadte uëshë ¿mitsipadënquio iqueque? Tantianu. Ubi chui, capanëdash padiseobon Esus chuiquin. Adoaquien: Nuquin Papan bedanquin namete isadenquio iquendac. 21Adecbidi: Nëmbobi Nuquin Papan namiacno iqueque. Is, quetiapimbo matses icpec. Adecbidi: Umbo Nuquin Papan namiacno iqueque. Is, quetiapimbo matses icuaic. Abi tantiaquido namequid nëmbobi iquec, quepanëdash Esus padiseobo chiec.
22Aden padiseobo chuishumbic abëd icquido nadopanëdash: Iuecash adquid icnuc: Abuc abëd tabadte uëshë chopashun, quec tabadquimbi Matsesën Tishaid yec ubi chosho iste bunquimbi mimbi ubi isenquio iquendac. 23Adec ubi iste bunnubien utsibon: Nuquin Papan Chomiaid ambo choshe. Istan, cac nidenda. Adembidi: Nëmbo choshe. Isec cho, cac istanenda. 24Abu uëshëmbo yec bed bedquetannesho ¿ada matses abitedishunquio isenquio icpadic? Ai, isec. Adembidi Matsesën Tishaid yec ubi chosho matses abitedishunquio isendac. 25Aid uëshë choabicnuc ubi natiametequid iquendac. Adembidi: Chuiquid tapa nec, cainquiocquin ubi isadaidbon chieshëmbededendac, quepanëdash Esus.
26Aden chiashic: Matsesën Tishaid ubi icsho: Nëbi aid choec, quenquio matses icnubini chouaindac. Noen cano nacnennubi ¿mitsipadquio aton matses tabadpampic? 27Nadec tabadpampic: Nuquin Papan nuqui cuidendac, quequin tantienquio icquin peshun acquinc aton chido bedquinc aton champi bedmequinc caic icsambuec tabadpampic. Adec tabadnubien Noe abëd icquidobëd cano dapan puduedpampic. Adnubien ue dapambo choec sequenuc mauanquin maboccac abitedimbo uënësbudnepampic, quepanëdash Esus.#17.27 Noen nampid istiadquio icquin Ene. 6.9—9.17 isbanta.
28Adecbidi Dod caid icnuc icsambuen nabanec matses tabaduapampic. Adec tabadquin nua peshun nua actednepampic. Adembidi atona dadpen bedtednepampic. Adembidi aton piucquid bednuen dadpen menedednepampic. Adembidi aton tied nitsindednequinc shubu uadennequinc caic tabadpampic. 29Adec tabadquin Nuquin Papa tantienquio icnubi shubu dadpen icquid Sodoma caid yacnoshon Dod cuenmepampic. Adnubien tabote dëpesh nëdënquequid pasquiacbimbuecquid ue sequiacbimbuec sequec nëdënquequidën Sodoma yacnocquidtedi pichicac uënësbudnepampic, quepanëdash Esus.#17.28-29 Aid chiaid iste bunquin Ene. 18.20 bedanquin Ene. 19.25 yacno dënainquin isbanta.
30Aden chiashic: Umbi chuibocpadquiec matses icsambuecshë tabadendac. Adnubini Matsesën Tishaid yec chouaindac. 31Aid uëshë yannuc shubu macano padapadapambocquid yacno dectatoash tabadquid yec: Cuna bednu, quenquio yec budanec cuenta. Adecbidi tied nantan mibi icnuc aid uëshë chosho isash: Cun shubu yacno nidnu, quenquio yec badedquio cuenta. 32Mibi yacnocquidtedi uënës uanushe. Aucbidi bidiadshun isenquio yec cuenta, cac Dod cuennubien atona tantiec aton chido aucbidi bidiadsho uënës uapampic, quequin chiaid tantiata.#17.32 Aden Dod chiaid iste bunquin Ene. 19.26 ista. 33Matses ambi tantiaiduidi naic tabadquid uënësash Nuquin Papa yacno puduedtiapimbo iquendac. Padnuen ubi tantiaquin umbi chiacpadec tabadquid cuessuniacsho Nuquin Papan abi yacno puduedmendac. 34Ubi chote uëshën nad iquendac. Inchëshën daëd ushec samëdsho Nuquin Papa yacno iuednuen ubi tantiaquid abentsëc beduanquimbi utsi ubi tantiesa icsho nianendac. 35Adembidi chido daëdshun macuesquid icsho Nuquin Papa yacno iuednuen ubi tantiaquid abentsëc beduanquimbi utsi ubi tantiesa icsho nianendac. 36Adembidi dada daëd aton tied nantan icsho Nuquin Papa yacno iuednuen abi tantiaquid beduanquin utsi abi tantiesa nianendac, quepanëdash Esus.
37Aden chuisho bëdambuen tantienquio icquin abëd icquidon: ¿Mitsimbo adquid icpec, icbo? capanëdash.
Adoaquien: ¿Ada uënësaid pisenaid yacno edeste budenquio icpadic? Ai, budec. Adecbidi Nuquin Papan cuidte uëshë chonoc abitedishun isnuc chouaindabi, quepanëdash Esus.
S'ha seleccionat:
Ducas 17: mcfNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved.