Ducas 18
18
Utsi chiacbimbuen niantebëta cuidte chuiquid chiaid
1Adshumbic Esusën: Ma ubëd icquidon chieshtoenquio icquin Nuquin Papa chiannenu, quequin tantiaquin utsi chiacbimbuen naden chuipanëdash: 2Shubu dadpen icquid yacno cuidte chuiquid icposh. Aidi Nuquin Papa dacuëdënesa yec matses tantiesa neposh. 3Adnubien ambo icquid chido niante icposh. Aidi icsambuen naquid cuidte chuiquid yacno nidshun: Ubi chieshënquin icsambuen naquid ma cuidnu, quequin chuitannequid icposh.
4Aden chuidedniaqui abi chieshënquin icsambuen naquid cuidte chienquiocbuedëmbi chido ënëdenquio yec nidted nidtedquin adombuenuidi chuisho tantiashun: Nuquin Papa dacuëdënesa yec matses tantiesa nebi, 5quequid icquimbi niante ënëdenquio yec chodednequin chuidednesho issun: Ënenquio icquin icsambuen ancabudnushe. Abi chieshënquin icsa uaquid cuidte chuinu, queshun cuidte chuiquidën chuiposh, quepanëdash Esus.
6Aden chiashic Esus: Nidted nidtedquin ënënquiocquin chidon chuidonesho tantiash: Mibi chieshënquin icsa uaquid cuidte chuinuna, queposh cuidte chuiquid icsambocquid. 7Adombuembidi ambi: Cun matses nec, caidon: Ubi chieshënquid cuidta, quequin ënenquio icquin chuidoniac: Cuidnu, ¿quenquioda Nuquin Papa icpec? 8Ai, aidën chiacpadombuen badedquio cuidendac. Adquid icnuc Matsesën Tishaid yec choshon ¿adambi ubi tantiaquin cainquidombo istuidpendac? quepanëdash Esus.
Utsi chiacbimbuen padiseobobëta piucquid bedshunquid chiaid
9Adashic: Ubiuidtsëqui bëdambocquid nebi, quequin: Utsibotedi icsambo icquido nec, quequido tantiamenuen utsi chiacbimbuen naden Esusën chuipanëdash: 10Nuquin Papa tabadte shubu dapa yacno nidshun: Nuquin Papa chuinu, quequid dada daëd icposh. Abentsëc padiseobo icnubi utsi Doma yacnocquidon chuiquidën chiacpadombuen aton matses piucquid bedshunquid icposh. 11Adquid icnuc nidtoshon padiseobon ambi tantiacpaden naden Nuquin Papa chuiposh: Bëdambocquid nebi, Papa. Ampequido utsibo icnuc icsambuen nabanquido utsibo icnubi aton chidopenquio chudquid utsibo nec. Aden naisambo nebi. Adecbidi cun matsesën piucquid bedshunquidpadquidpenquio nebi, Papa. 12Adembidi chonoadtemaid uëshë utsi choabicnuc daëdec ushquin mibi tantiaquin buna mëmundednembi. Adembidi umbi bedaid 10ted icnuc tambanquin abentsëc sanshun mibi menedednembi, Papa, quequin padiseobon chuiposh.
13Aden padiseobon chuibombien aton matses piucquid bedshumënquid puduedash uanno nidtuidshun Nuquin Papa chiec: Icsambocquid nebi, Papa. Adquid nebi, quequin ismec shuebudacchobi abuc isenquio yec shubiec onquec: Icsambuen nabanquid nebique. Umbi icsambuen naid tantienquio yec bëshunta, Papa, queposh, quepanëdash Esus.#18.13 Nëid chiacbimbuen Dabid Cuëd. 51.1 isbanta.
14Aden chiashic: Tantia. Chuinu. Aton matsesën piucquid bedshunquid Nuquin Papan bëdambuen isaidquio icnubien padiseobo ambi icsambuen isaidquio icposh. Aidi icsambuen naisabimbuec: Bëdambocquid nebi, quequid Nuquin Papan bëdambuen istiapimbo iquendac. Padnuen: Icsambocquid nebi, quequid Nuquin Papan bëdambuen isaid iquendac, quepanëdash Esus.
Bacuëbo Esus yacno bëbëaid
(Mat. 19.13-15; Madc. 10.13-16)
15Adshumbic Esus ismenuen bacuëbo bëbëpanëdash: Ma mamishquin Nuquin Papa Esusën chuinu, quequin bëbësho issumbien abëd icquidon: Nëmbo bëbëenda, capanëdash.
16Aden chuisho tantiash Esus nadpanëdash: Padi. Ma bacuëbo ubi yacno bëbënu. Cuenmenda. Nëid bacuëbo amën chuisho tantiash badedi: Abimbo caic, quiacbimbuen ubi tantiaquid Nuquin Papan namiacno puduedtequid nec. Bacuëbo bëdambo iqueque. Bec cho, quepanëdash. 17Adombuembidi: Abimbo chiembique. Tantia. Nuquin Papan namiacno tabadte iquec, quequin chiac nëid bacuën badedquio tantiacbimbuen tantiaquid yec Nuquin Papan namiacno puduedtequid iquendac. Aden tantiesa ambo puduedtiapimbo iquendac, quepanëdash Esus.
Dada atona dadpen icquid Esusbëd onquiaid
(Mat. 19.16-30; Madc. 10.17-31)
18Adshumbic isadaidbon chuiquidën: Chuibanquidquio yec mibi bëdambocquid neque. En ubi chui. Nuquin Papa yacno ënëdenquio yec tabadnuen ¿atotsimbi nape? capanëdash Esus chuiquin.
19Adoaquien Esusën: ¿Atotsi quequin mimbi ubi: Bëdambocquid nec, cape? Nuquin Papa abentsëcquiobien bëdambocquid nec. 20¿Ada Nuquin Papan: Naden nata, quequin Moises dada uamiampidtedi tantie? Min chidopenquio chudenda. Min bënëpenquio chudmenda. Cuessunnenda. Ampenda. Cuidmenuen utsi mua uainda. Adecbidi utsina bednuec muainda. Titabëta papa chieshënenquio icquin bëdambuen tantiata, quequin chiampictedi ¿nabanquidta ne? capanëdash Esusën.#18.20 Buan. 20.12-16 tantiaquin nëid dada uapanëdash. Adembidi Chotaquën onqueten M.I.Ch. 5.16-20 isbanta.
21Adoaquien chuiquid: Aidtedi niaquenquio icquin bacuëctsëc icquimbi bedanquin nabanquidquio nebi, quepanëdash.
22Aden chuisho tantiashun: Abentsëc mimbi nabicquid iqueque. Mimbi dayun uaidtedi uesquin menequin piucquid bedta. Aden piucquid bedshun atona nibëdquido mitsana uesquin menebanta. Adosho issun abëd tabadmenun Nuquin Papan mibi bëdambuen istsiashe. Adota. Adotanec ubëd iquec cho, capanëdash Esusën.
23Aden Esusën chuisho tantiashien: Cuna dadpenquio icquid uesquin menetiapimbo iquebi, quiash uënësquio yec atona dadpen icquid Esusën chiacpadombuen natiapimbo yec nidpanëdash. 24Adsho issun: Atona dadpen icquid atonauidi tantiaquid yec Nuquin Papan namiacno puduedtiapimbo iquendac, quepanëdash Esus. 25¿Ada nëish tapa camecho caid pinchuc chicte shëcuë nasiadpatsiash? Padenquio. Adecbidi atona dadpenquio dayun uaquidën atonauidtsëqui tantiaquin umbi chiacpadombuen natiapimbo yec Nuquin Papan namiacno puduedtiapimbo iquendac, quepanëdash Esus.
26Aden chuisho tantiash iccuededquido nadpanëdash: ¿Tsudain Nuquin Papa yacno puduedtequid icpec? quecuededpanëdash.
27Adoaquien Esusën: Matsesën natiapimbo ictequid icnuc Nuquin Papain namianquidquio nec. Ambi natiapimbo ictequid nibëdec, quepanëdash.
28Adoaquien Petedon: Icbo, mimbi: Nuquibi icnu. Cho, cac ubitedishumbi cuna nianec mibëd icnuec chopondabi, quepanëdash Esus caic.
29Adoaquien: Abimbo mimbi chioque. Tantia. Chuinu. Nuquin Papan namiacno matses tabadte iquec, quequin chuibannuen aton shubu nianquinc aton chidobëta aton bacuëbo nianquinc aton utsibo nianquinc aton papabëta aton tita nianquinc cain nianacsho 30ambi nianaidtedimbo tambanquin daëd uabanquin Nuquin Papan nëbi bëdambo icmeshumbic abi yacno nidacsho bëdamboshë icmequin uënësesambo mibi icmendac, quepanëdash Esus Petedo chiec.
Ubi uënës uaindac, quequin Esusën ënquimbi chiaid
(Mat. 20.17-19; Madc. 10.32-34)
31Adashic abëd icquido 12tedtsëqui uanno buanash: Edusaden yacno nëbi nuquitedi nidnu nid. Ambo nidacsho Nuquin Papan oncamiaidon dada uaquin chiampicpadombuen Matsesën Tishaid icsho bedshun mëyanmendac. 32Adoshombic isadaidbon isadaidpembo menendac. Aden meniac bedshun mamënshumbededquimbi icsambuen chuishunquin bëpishtucaindac. 33Adoshombic cueshcanten cacuestonequin mëyanshun cueste napotiaidën dectanquin uënës uaindac. Adoac daëdec ushash uincuenendac, quepanëdash Esus abëd icquido chiec.
34Aden abi uënës uate Esusën chuibansho tantiash abëd icquido: Aden chiec nec, quequin tantiatiapimbo yec tabadpanëdash.
Bëshuaid bëdanmiaid
(Mat. 20.29-34; Madc. 10.46-52)
35Adashic shubu dadpen icquid Edico caid anoentsëqui Esus chonobi podquied cuëmambi bëshuaid tsadpanëdash. Adec tsadquin matses cuen cuensho tantiashun: Piucquid bec cho, cadennepanëdash bëshuaidën. 36Adec tsadquimbi matses dadpen cuen cuensho tantiashun: ¿Atotsi quec nec? capanëdash. 37Adoaquien abentsëcshun: Nasaded yacnouësh choquid Esus cuenec nec, capanëdash.
38Adsho tantiashumbien bëshuaidën: Esus, Dabidën mado caid icquin ubi bëdambuen tantiaquin nashunta, capanëdash cumapenen cuënquin.
39Adshobien: Aden cuënenquio yec otacquio tsad, capanëdash bëyuc choquidon.
Adoaquien bëdiactsëc cuëmbuedëmbi cumapenquien cuënuaquin: Dabidën mado caid icquin ubi tantiaquin nashunta, cauapanëdash bëshuaidën.
40Adoac nidtuidshun Esusën: Aid nëmbo bec cho, cac abi yacno bësho issun: 41¿Atotsimbi mibi nashune? capanëdash Esusën bëshuaid chuiquin.
Adoaquien: Isbente bunebique. Cun ëshë bëdanme, Icbo, capanëdash.
42Adoaquien Esusën: Aidën ubi bëdanmec, quequin mimbi tantiacpadquiequi mibi bëdanoque. Padpidembuen isbenuata, quenubi 43badedquio bëdanquin isbenuashun bëshuacbuedëmbi Esus tsibananec nidquin Nuquin Papan naid chiec onquec nidpanëdash. Aid bëdansho isquidotedishuntsen adembidi: Nuquin Papa bëdambo iquec, quequin aidën naid chuibededpanëdash.
S'ha seleccionat:
Ducas 18: mcfNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved.