Mateo 2
2
Uispa isquin tantiaquido Esus isec choaid
1Nidaid cuëshë Udea caid yacnocquid shubu daëpactsëcquid Beden yacnoshon Madian Esus tishpanëdash. Adnubien shubu dadpen icquid Edusaden yacno isadaidbo matsesën chuiquid Tapa Edodes cuëmëdquid icpanëdash. Aid icnubi matses utsibo uispa isquin tantiaquido Esus isnuec uëshë choacmiuësh chopanëdash. Edusaden yacno choshon 2ambocquido naden chuituidpanëdash: Min matses isadaidbon chuiquid tapa ictequidquio nëbi tishtsaidëmpi ¿midambo ictseque? Isnu. Aid tishaid tantiamete uispa ubitedishun isombique. ¿Mitsimbo ictseque? Isnu. Aidi chuiquid tapa bëdamboshë ictequidquio nec, quiash aid isnuec chopobi, quetuidpanëdash uispa isquin tantiaquido.#2.2 Ënden Esus tishte chuipampic. Aid chiaid istiadquiocquin I.T. 24.17 isbanta.
3Adsho tantiash dacuëdcuededpanëdash. Edusaden yacnocquido abitedimbo: Padtec. ¿Midapadquid bacuë capendabac? quecuededpanëdash Edodes isadaidbon chuiquid ambi namiaidobëdi. 4Adshumbien Edodesën abi yacno Nuquin Papa ismequin nëish iua cuessunneshun pichicaquidon chuiquidobëta Moisesën chiampid tantiamequido chochomepanëdash. Aden chochomeshun: ¿Mitsishunquio Nuquin Papan Chomiaid Quidistu Mesias caid tishpatsiash? ¿Ada Nuquin Papan Chiaid isbanquin tantio? caquien: 5Ai, tantiembi. Nidaid Udea caid yacnocquid shubu daëdpactsëcquid Beden yacnoshon aid bacuë tishendac, quequin chiampid tantiembi. Nuquin Papan Chiaid ambi oncamiaid nuquin tsusedpan naden chuiquin dada uapampic:
6Beden yacno tabadquido yec nidaid Uda caidën tabadquido mibi nec.
Chuiquid tapa nibëdnuc icsambo iquendac, quedennedi mibi yacnoshon chuiquid tapa ictequid tishendac.
Aidëmbi obeca dayun uaquidën dayun uacbimbuen isadaidbon chuiquid tapa icquin bëdambuen tabadmendac,
quequin Nuquin Papan Esus tishte chiaid chuipanëdash Nuquin Papan Chiaid isquidon Edodes chuiquin.#2.6 Miqueas 5.2tantiaquin nëid dada uapanëdash.
7Adoaquien Edodesën ambi namiaido isadaidbo ismenquio icquin matses utsibo uispa isquin tantiaquido chomeshun chuimepanëdash. ¿Nëbida aid tishaid tantiamete uispa isquin bedano? ¿Ëndenda isbenonda? En chui. Tantianu, cac chuisho 8tantiashun: Beden yacno istan. Ambo nidshun mimbi chiacpadquid bacuë istan. Aid bacuë istanec cuenquin ubi chuibenta. Umbitsen istannu. Nuquin Papan Chomiaid chuiquid tapa ictequid bëdambo iquec, quequin umbitsen istannu, capanëdash Edodesën.#2.8 Bacuë cuessunnemete bunquimbi aden Edodesën chuipanëdash.
9Adoaquien uëshë choacmiuësh bedbedquesho ambi isbëquin tsibambëbuedi uispa tsibanec Beden yacno nidpanëdash. Adec nidnubien shubu ismec uispa nidtuidpanëdash: Nëid shubun bacuëmpi iquec, quequin ismec. 10Aden isashien: Bëdambo iquec, quec cuishonquequiopanëdash uispa isquin tantiaquido. 11Adash shubun puduedshun isaquien aton tita Madiabëd bacuëmpi iquec. Aid isashic: Matses chuiquid tapa ictequid nec. Matses bëdambo icmetequid nec, quequin aton matsesën nacpadombuen ismec danëshën sebudpanëdash. Adshumbic ambi bëbued atona bëdambocquid chicshun menepanëdash nëidtedi. Nëidic shocosh bëshpiu bëshpiupactsëcquid odo caid. Nëidic bëdambo nuadnuc pichicatequid. Nëidic bëdambo nuadec danoshquete mida caid. Aidtedi menepanëdash. 12Adoash ushtoacsho Nuquin Papan ushquin ismequin naden chuipanëdash: Isadaidbon chuiquid tapa Edodes chuibidanenda, quequin ushquin ismiac isucunanec abi chobuedën nidenquio yec podquied utsin nidpanëdash aton nidaid yacno nidec.
Equipito yacno cuenquin Osen buanaid
13Adec Esus isuambuedo uispa isquido nidambien Nuquin Papabëd icquidën Ose ushquin ismequin naden chuipanëdash: Isucunanec cuenta. Bacuëmpi aton titabëta buanec nidaid utsi Equipito yacno cuenta. Nuquin Papan: Cho, cabi choenda. Ambobi tabadta. Edodesën: Bacuëmpibo cuessun secatan, cac chochoeque. Cuenta, quequin Ose ushquin ismepanëdash Nuquin Papabëd icquidën.
14Aden ushquin ismiac isucuntanequi aid inchëshëmbi puduanquin Osen aton bacuëbëta aidën tita buanec nidaid utsi Equipito yacno nidpanëdash. 15Adec nidash ambobi tabadpanëdash. Isadaidbon chuiquid tapa Edodes uënësabi icnuc ambo tabadpanëdash. Esus tishabi icnubi ëndenquimboshë Nuquin Papan tantiamiac ambi oncamiaidën Esus Equipito yacno buante naden chuiquin dada uapampic: Equipito yacno nidash tabadsho: Auëshquio cho, Mado, caindambi, quiosh Nuquin Papa, quequin dada uapampic.#2.15 Oseas 11.1 tantiaquin nëid dada uapanëdash. Oseasën isadaidbo quequin mado dada uampic. Mateon Nuquin Papan Mayanën tantiamiacpadombuen chiec: Esus iquec, quequin mado dada uapanëdash.
Bacuëbo dadpen cuessun secaid
16Adnubien isadaidbon chuiquid tapa Edodes: Uispa isquin tantiaquidon cacuidposhi, quiash cumapenec nëishshun aton iuabo naden chuipanëdash: Uispa isquin tantiaquidon chuibocpadtsëcquid dada bacuëmpibotedi seta daëd ictsëcquidotedi cuessun secatan. Beden yacnocquidon bacuëbobëtabi uanno pauequidon bacuëbotsen cuessun secatan, cac cuessun secatampanëdash. 17Aden cuessun secate ëndenquimboshë Nuquin Papan ambi oncamiaidquio Edemias naden chuiquin dada uamepampic:
18Uënësaid tantiec baded ënëdenquio yec chidobo shubiec sedenquecuededendac.
Nidaid Isadaid caidën icquid shubu dadpen icquid
Dama caid yacnouësh natia shubiec sedenquendac.
Aidi chido Daqued cuëmëdquid nec.
Aton mado cuessun secasho isash
natiaquiec baded ënëdenquio yec shubiec sedenquendac,
quequin Edemiasën chiampicpadombuen aton bacuëbo cuessun secasho isash shubiec sedenquepanëdash.#2.18 Isadaidbo chidobo caquin Daqued capampic Edemiasën. Aid iste bunquin Edemiasën Dada uaid 31.15 isbanta. Ëndenquimbo Daqued Acobon chido nepampic. Adquid yec aton mado Ose icnuc aton mado utsi Benjamin nepampic. Aden chiaid iste bunquin Ene. 29.15-30 isquinc Ene. 30.22-24 isquinc Ene. 35.16-18 isquinc cabanta.
Nasaded yacno Esus buanaid
19Iuecquio ictanniashic isadaidbon chuiquid tapambo Edodes uënëspanëdash. Adambic nidaid utsi Equipito yacno tabadsho Nuquin Papabëd icquidën Ose ushquin ismequin naden chuipanëdash: 20Bacuëbo cuessun secatan, quiondaid uënësoshe. Min chidobëta min bacuë buanec min nidaid Isadaid caidën niduata, caquien 21isucunanec aidën chuibocno aton nidaid Isadaid yacno buanec Ose nidpanëdash.
22Aton nidaidën nidshun aton matses: Udea yacnocquido Edodes padon mado Adquedayo cuëmëdquid chuiquid tapa icsambocquidbidi nec, quesho tantiashien Ose dacuëdtampanëdash. Adshobien Nuquin Papan Ose ushquin ismequin naden chuipanëdash: Cuessunnenushe. Min nidaid Udea caidën nidenda, quequin ushquin ismiac isucunanec aid nidaid Isadaid caidëmbidi nidec aid nidaid cuëshë utsi Cadidea caidën nidpanëdash. 23Adec nidec shubu dadpen icquid Nasaded yacno choash ambobi tabadpanëdash. Nasaded yacnocquid Nuquin Papan Chomiaid nendac, quequin Nuquin Papan oncamiaidon chuiquin dada uampicpadec ambo tabadequi Esus canipanëdash.
S'ha seleccionat:
Mateo 2: mcfNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved.