SAN LUCAS 16
16
Sca msu laca loo nu tajua' ti ngua'ni, masi cuxi ti tyiquee yu
1Li' nchcui' Jesús lo'o nu ngu' nu ndyaca tsa'a̱ ji'i̱:
―Ntsu'u sca nu culiya', lo'o jua'a̱ cua ntsu'u sca ñati̱ nu laca loo ji'i̱ msu ji'i̱ yu culiya' bi'. Lo'o li' ndacha' ngu' ji'i̱ nu culiya' bi', cha' cua tye ti cha' tso'o nu ntsu'u ji'i̱ yu, cha' nguliji ñu'u̱ ti msu nu laca loo ji'i̱ cha' tso'o bi'. 2Li' ngusi'ya xu'na ji'i̱ msu nu laca loo bi', cha' xcuane ji'i̱ msu bi': “¿Ni cha' ta laca nu nchcui' ngu' lo'o na' cha' jinu'u̱?”, nacui̱ yu. “¿Ni cña ndyu'ni nu'u̱ nu cua nchcui' ngu' lo'o na'? Tya nu'u̱ cuentya jna' juani, cuacha' clya nu'u̱ cha' jna', ña'a̱ cha' nu cua ngua'ni nu'u̱. Nga'aa caca nu'u̱ loo ji'i̱ msu 'na juani.” 3Quiña'a̱ tsa ngulacua ti' msu nu laca loo bi' li': “¿Na laca cua'ni na' juani, si nga'aa ta xu'na na' cña nu cua'ni na'? Nga'aa jlo ti' na' ñi'ya̱ cua'ni na' li'. Ná qué na' cha' cua'ni na' cña lo yuu; lo'o si tsa'a̱ jña na' msta̱, la cui' ti jua'a̱ ca tyuju'u tsa ti' na' li'. 4Pana cua jlo ti' na' ñi'ya̱ nu cua'ni na' cha' caja su tyi'i̱ na' toni'i̱ ji'i̱ ñati̱, nu lo'o nga'aa ta xu'na na' cña nu cua'ni na'.” Jua'a̱ ngulacua ti' msu bi', cha' cuxi ti tyiquee yu. 5Li' ngusi'ya yu ji'i̱ lcaa ñati̱ nu ndacui ji'i̱ xu'na yu, nchcuane yu ji'i̱ ngu' li': “¿Ni tsa lo ta ndacui nu'u̱ ji'i̱ xu'na na'?” nacui̱ yu ji'i̱ tsaca ngu'. 6“Sca mil tya'a litro setye ndacui na' ji'i̱”, nacui̱ ngu' bi' li'. Hora ti nacui̱ msu nu laca loo bi' ji'i̱ ngu' bi': “Nde nscua quityi nu nscua cuentya jinu'u̱. Cua'a̱ clya nu'u̱ re cha' cuiñá chaca quityi, nu ñacui̱ cha' ca'yu siyento ti litro setye ndacui nu'u̱ ji'i̱ nu cusu' bi'”, nacui̱ msu bi' ji'i̱. 7Li' nchcuane yu ji'i̱ chaca ngu': “Nu'u̱ ni, ¿ni tsa lo ndacui ji'i̱ xu'na na'?” “Sca siyento tya'a cujui̱ nscua' trigo”, nacui̱ ngu' bi' li'. “Ha̱a̱”, nacui̱ yu, “nde nscua quityi nu nscua cuentya jinu'u̱”, nacui̱ nu msu bi'. “Cua'a̱ clya nu'u̱ ca nde cha' scua chaca quityi nu ñacui̱ cha' jacuayala tya'a cujui̱ ti, tsa bi' ti ndacui ji'i̱ nu cusu'.” 8Tiya' la ngua cuayá' ti' ycui' nu laca xu'na yu ñi'ya̱ nu ndyu'ni yu. “Tajua' tsa ndyu'ni msu nu laca loo bi' 'na laja lo'o ndyu'ni yu cña”, nacui̱ nu cusu' culiya' bi'.
Lo'o li' tya nchcui' Jesús lo'o ngu' bi':
―Lo'o cu'ma̱ ni, nu nti' tsa ma̱ taquiya' ma̱ ji'i̱ lcaa cha' nu nchcui' ycui' Ndyosi ―nacui̱―, taca ca tsa'a̱ ma̱ xi lo'o ña'a̱ ma̱ ñi'ya̱ nu ndu'ni xa' la ñati̱ chalyuu lo'o tya'a ngu', masi cuxi ti ngu'.
9’Ndi'ya̱ chcui' na' lo'o ma̱ lacua: Tso'o ti cua'ni ma̱ lo'o lcaa cha' tso'o nu ntsu'u ji'i̱ ma̱ nde chalyuu; xtyucua ma̱ ji'i̱ xa' ñati̱ lo'o cha' tso'o nu ntsu'u ji'i̱ ma̱ ña'a̱ cuayá' tye chalyuu ji'i̱ ma̱, cha' jua'a̱ caja tya'a tso'o ma̱ nde chalyuu. Lo'o li' ta ycui' Ndyosi su tyi'i̱ ma̱ slo Ni, su ná nga'a̱ cha' tye chalyuu ji'i̱ ma̱ li'.
10’Ñati̱ nu tso'o tsa ngua'ni lyiji sca cña piti ti, jua'a̱ tso'o tsa cua'ni ngu' bi', masi sca cña nu cua tlyu la; pana ñati̱ nu ñilo'o ji'i̱ xu'na ngu' lo'o cua'ni ngu' sca cña piti ti, ná tyiquee' ná caca cua'ni ngu' bi' sca cña nu cua tlyu la. 11Si ná nchca cña'a̱si̱i̱ ma̱ sca cha' tso'o nu ntsu'u ji'i̱ ma̱ nde chalyuu, ni ná ta ycui' Ndyosi sca cña tso'o la cha' cua'ni ma̱ cuentya ji'i̱ ycui' Ni. 12Lcaa cha' tso'o nu ntsu'u ji'i̱ ma̱ chalyuu, na nda ycui' Ndyosi cha' bi' jña ti ma̱; si ná cua'ni tso'o ti ma̱ lo'o cha' bi', ¿ñi'ya̱ cua'ni ma̱ lo'o cha' tso'o nu nda Ni cha' tyanu ne' cresiya ji'i̱ ma̱?
13’Sca msu ni, ná caca cua'ni yu cña ji'i̱ tucua tya'a xu'na yu sca tyempo ti; ji'i̱ sca ti xu'na yu taca cua'ni yu cña. Ná tyiquee' ti'í ti' yu ña'a̱ yu ji'i̱ tsaca ñati̱ li', cuati ji'i̱ chaca ñati̱ bi' tso'o ntsu'u tyiquee yu ña'a̱ yu ji'i̱; hasta tso'o la cua'ni yu cña ji'i̱ ñati̱ bi', pana ji'i̱ tsaca ñati̱ bi', lasa la cua'ni yu cña ji'i̱. Ná caca xñi na cha' ji'i̱ ycui' Ndyosi nu Xu'na na si ntsu'u tsa tyiquee na ña'a̱ na ji'i̱ cñi, cha' ñi'ya̱ si laca chaca xu'na na, jua'a̱ laca cñi bi' li'.
14Pana ntsu'u tsa tyiquee ngu' fariseo cha' ji'i̱ cñi, bi' cha' lo'o ndyuna ngu' cha' nu nchcui' Jesús, ngustí lo'o ti ngu' ji'i̱ yu. 15Li' nguxtyacui Jesús cha' lo'o ngu' bi':
―Cu'ma̱ ―nacui̱ yu―, tso'o tsa ndu'ni ma̱ cha' ña'a̱ ti xa' ñati̱ ji'i̱ ma̱, pana cua jlo ti' ycui' Ndyosi lcaa ña'a̱ cha' nu ntsu'u tyiquee ma̱. Ñati̱ nu tlyu tsa ndu'ni ji'i̱ ycui' ca ngu', xtyanu ti'i̱ ycui' Ndyosi ji'i̱ ngu' bi'.
Ñi'ya̱ ndyaca lo'o cha' tso'o nu ji'i̱ ycui' Ndyosi
16’Nu tyempo cua sa'ni la ni, ntsu'u cha' cusu' ji'i̱ ñati̱, la cui' cha' nu nda ycui' Ndyosi lo'o Moisés, jua'a̱ lo'o ngu' nu ngua tu'ba ji'i̱ Ni tya sa'ni la; pana nu lo'o ñaa Juan, tya li' nguxana ngañi cha' tso'o ji'i̱ ycui' Ndyosi, cha' caca Ni loo ne' tyiquee ñati̱. Quiña'a̱ tsa ñati̱, lye tsa nda ngu' juersa cha' xñi ngu' cha' ji'i̱ ycui' Ndyosi.
17’Ná tlyu cña tye lcaa na nu ntsu'u nde cua̱, jua'a̱ tye tyucui ña'a̱ chalyuu; pana ná tye tsiya' ti ni sca si'yu cha' ji'i̱ lcaa cha' nu cua nda ycui' Ndyosi lo'o na nu ngua sa'ni la.
Nchcui' Jesús cha' ji'i̱ ñati̱ nu xtyanu ti'i̱ ji'i̱ clyo'o
18Tya nchcui' la Jesús lo'o ngu' li':
―Lo'o culo sca ñati̱ quityi cha' xtyanu yu ji'i̱ clyo'o yu, cha' xa' caja clyo'o yu lo'o xa' nu cuna'a̱, cha' suba' ndyu'ni yu bi' li'. Lo'o jua'a̱ lo'o caja clyo'o sca nu qui'yu lo'o sca nu cuna'a̱ nu cua nguxtyanu clyo'o ji'i̱, masi cuentya ji'i̱ ley, la cui' ti cha' suba' laca nu ndyu'ni nu qui'yu bi' li'.
Cha' ji'i̱ sca nu culiya' lo'o sca yu ti'i nu naa Lázaro
19’Cua ntsu'u sca nu culiya', lo'o xcui' late' quiña'a̱ nga'a̱, xcui' late' tso'o ña'a̱ nchcu' yu. Lo'o jua'a̱ lye tsa ndyu'ni yu, lcaa tsa̱ ndyaca ta'a slo yu. 20Pana ntsu'u sca ñati̱ ti'i nu naa Lázaro, nu xcui' quichu' ntucua tyucui ña'a̱ yu. Toni'i̱ ti ji'i̱ nu culiya' bi' nchca'a̱ Lázaro lcaa tsa̱. 21Cua nti' yu ti'i bi' masi cacu yu satya na nu ndyalú to' mesa su ndyacu nu culiya' bi' li'. Lo'o jua'a̱ ndya'a̱ xne' su nga'a̱ yu cha' nclye'e loo quichu' nu ntsu'u hichu̱' yu ti'i bi'. 22Ndyalaa tsa̱ nu ngujuii nu ti'i bi'; lo'o nu xca̱ ji'i̱ ycui' Ndyosi ni, ndyaa lo'o ngu' ji'i̱ ca slo jyo'o cusu' Abraham, ca su tlyu nu ngua'ni cho'o ycui' Ndyosi. Lo'o jua'a̱ ngujuii nu culiya' bi', nguxatsi' ngu' ji'i̱ li'. 23Pana nu lo'o cua ntsu'u nu culiya' bi' su nchcube' yu ca bilyaa, li' ngusicua̱ hique yu na'a̱ yu ji'i̱ jyo'o cusu' Abraham tyijyu' ti, lo'o jua'a̱ na'a̱ yu cha' stu'ba ti ntucua jyo'o Lázaro lo'o. 24Li' ngusi'ya nu culiya' bi' ji'i̱ Abraham: “Sti ya Abraham, cua'ni tya'na ti' nu'u̱ jna'. Ta nu'u̱ ji'i̱ Lázaro jua cha' ca̱a̱ ca̱lo'o xi hitya cha' co'o na', masi lo'o sne ti yu cuicha' yu xi tu'ba na' cha' ca'ya tyacala' xi ltse' na', cha' lye tsa tyique' nti' na' su ntsu'u na' lo quii' re.” 25Li' nacui̱ jyo'o Abraham ji'i̱: “Sñi'”, nacui̱, “tso'o tsa ngua hi̱ lo'o nguti'i̱ nu'u̱ nde chalyuu. Lo'o Lázaro re ni, si'i jua'a̱ ngua ji'i̱ yu, cha' lye tsa nchcube' yu su nguti'i̱ yu chalyuu. Bi' cha' caja su tso'o tyi'i̱ yu ca nde juani; lo'o nu'u̱ ni, nga'a̱ cha' chcube' nu'u̱. 26Tya ntsu'u la cha' ji'i̱ cuare nde su ndi'i̱ ya, ntsu'u sca laja cua'a̱ tlyu cla'be laja su ndi'i̱ cuare lo'o cu'ma̱; bi' cha' si ntsu'u ngu' nu nti' tsaa nde slo cu'ma̱, ná caca ji'i̱ ngu' tyaa ngu'. Lo'o jua'a̱ cu'ma̱ nu ntsu'u ma̱ nde jua, ná caca ji'i̱ ma̱ tya̱a̱ ma̱ ca nde.” 27Li' tya'na tsa nchcui' nu culiya' bi' lo'o: “Cua'ni nu'u̱ sca cha' tso'o lo'o na', Abraham sti na'”, nacui̱ nu culiya' bi'. “Ta ji'i̱ Lázaro cha' tsaa yu to' tyi sti na', 28ca su ntsu'u ca'yu tya'a ngu' tya'a na', cha' chcui' yu lo'o ngu', cha' ná ca̱a̱ ngu' ca nde su ntsu'u na' nchcube' na'.” 29Pana nacui̱ Abraham ji'i̱: “Cua jlo ti' ngu' bi' lcaa ña'a̱ cha' nu nguscua jyo'o Moisés; jua'a̱ nu xa' la quityi ji'i̱ ycui' Ndyosi nu nguscua jyo'o cusu' cua sa'ni, ntsu'u bi' ji'i̱ ngu' tya'a nu'u̱. Tso'o si cua'a̱ jyaca̱ ngu' ji'i̱ cha' nu nscua lo quityi bi'.” 30Li' nguxacui̱ nu culiya' bi' cha' ji'i̱: “Tso'o lacua, sti na' Abraham. Pana si tsaa sca ngu' jyo'o re ca su ndi'i̱ ngu', li' culochu̱' ngu' cha' cuxi nu ndyu'ni ngu'.” 31Xa' nchcui' jyo'o Abraham lo'o nu culiya' bi' li': “Lo'o ná nti' ngu' taquiya' ngu' ji'i̱ cha' nu nguscua Moisés, lo'o jua'a̱ ná taquiya' ngu' ji'i̱ jyo'o cusu' nu ngua'a̱ loo ycui' Ndyosi cña ji'i̱ cha' chcui' lo'o ñati̱, la cui' jua'a̱ ná taquiya' ngu' ji'i̱ xa' la cha' nu ta Ni lo'o ngu', masi tyu'ú sca nu cua ngujuii chaca quiya' cha' chcui' lo'o ngu'”.
S'ha seleccionat:
SAN LUCAS 16: cta
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 1981, Wycliffe Bible Translators, Inc. All rights reserved.