SAN LUCAS 4
4
Ngua ti' nu xña'a̱ tyiji̱loo ji'i̱ Jesús
1Ngutsa'á̱ tyiquee Jesús ndi'i̱ Xtyi'i ycui' Ndyosi ne' cresiya ji'i̱, nu lo'o ndu'u Jesús to' sta'a̱ Jordán ñaa chaca quiya'; nde sca nati̱' btyi su ná ndi'i̱ ñati̱ ndyaa li', 2cha' tu'ba tsa̱ ndyaa lo'o Xtyi'i ycui' Ndyosi ji'i̱ yu. Ca bi' nchcui' cuayá' nu xña'a̱ lo'o Jesús. Nu lo'o ndu'u scua tu'ba tsa̱, ntyute' tsa Jesús li', cha' ná sca na ndyacu yu tsiya' ti. 3Lo'o li' nchcui' nu xña'a̱ bi' lo'o yu:
―Si chañi cha' nu sca ti Sñi' ycui' Ndyosi laca nu'u̱ ―nacui̱ nu xña'a̱ bi' ji'i̱―, cua'ni nu'u̱ cha' caca nu quee re sca xlyá cacu na lacua.
4Li' nchcui' Jesús lo'o:
―Lo quityi ji'i̱ ycui' Ndyosi nscua cha' ndi'ya̱: “Si'i na cu'ú ñati̱ chalyuu cha' cacu ngu' tyaja ti; lo'o cuna ngu' lcaa cha' nu nchcui' ycui' Ndyosi, li' chañi cha' tyu'ú ngu'”, ―nacui̱ Jesús ji'i̱ nu xña'a̱ bi'.
5Li' ndyaa lo'o nu xña'a̱ bi' ji'i̱ yu ca lo xlya ca'ya cua̱. Sca hora ti ngulu'u nu xña'a̱ bi' tyucui ña'a̱ chalyuu ji'i̱ Jesús. 6Li' nchcui' nu xña'a̱ bi' lo'o yu chaca quiya':
―Ta na' chacuayá' jinu'u̱ cha' caca nu'u̱ loo ji'i̱ lcaa chalyuu jua ―nacui̱ nu xña'a̱ bi'―, cha' caja lcaa na nu ndi'i̱ jua jinu'u̱ ―nacui̱―. Ntsu'u chacuayá' bi' jna'. Lo'o jua'a̱ ta na' chacuayá' bi' ji'i̱ cua ña'a̱ ca ñati̱ nu nti' na' cha' caca loo ―nacui̱―. 7Sca ti si tyu̱ sti̱' nu'u̱ loo na', si cua'ni tlyu nu'u̱ jna', li' caja chacuayá' bi' jinu'u̱ ―nacui̱ nu xña'a̱ bi' ji'i̱ Jesús.
8Li' nguxacui̱ Jesús cha' ji'i̱:
―Tyatsu' nu'u̱ slo na', Satanás ―nacui̱―. Lo quityi ji'i̱ ycui' Ndyosi ndi'ya̱ nchcui': “Sca ti ji'i̱ ycui' Ndyosi nu Xu'na ma̱ cua'ni tlyu ma̱ ji'i̱, sca ti cha' ji'i̱ ycui' Ni nga'a̱ cha' taquiya' ma̱ nde chalyuu”. Si'i loo nu'u̱ tyu̱ sti̱' na' lacua ―nacui̱ Jesús ji'i̱.
9Li' ndyaa lo'o nu xña'a̱ bi' ji'i̱ Jesús nde quichi̱ Jerusalén, ngusacui̱ ji'i̱ Jesús ndyaa ca que laa tonu bi'. Lo'o li' xa' nchcui' nu xña'a̱ bi' lo'o yu:
―Si chañi cha' nu sca ti Sñi' ycui' Ndyosi laca nu'u̱ ―nacui̱―, xtyú lo'o nu'u̱ ji'i̱ ycui' ca nu'u̱ ca chcua'a̱ re. 10Lo quityi ji'i̱ ycui' Ndyosi ndi'ya̱ nchcui':
Culo ycui' Ndyosi cña ji'i̱ xca̱ ji'i̱ Ni cha' ña'a̱si̱i̱ ngu' jinu'u̱.
11Lo'o ya' ti xca̱ xatu̱ ngu' jinu'u̱ li',
cha' ná caca quicha quiya' nu'u̱ su tyú nu'u̱ chu̱' quee.
Jua'a̱ nscua lo quityi ji'i̱ ycui' Ndyosi ―nacui̱ nu xña'a̱ bi' ji'i̱ Jesús.
12Li' chaca quiya' nguxacui̱ Jesús cha' ji'i̱ nu xña'a̱ bi':
―Lo'o jua'a̱ ndi'ya̱ nchcui' lo quityi ji'i̱ ycui' Ndyosi: “Ná chcui' cuayá' ma̱ lo'o ycui' Ndyosi nu Xu'na ma̱”, nacui̱ quityi.
13Cua ndye nchcui' nu xña'a̱ bi' lo'o Jesús li', lo'o ná ngua ji'i̱ tyiji̱loo ji'i̱ yu tsiya' ti. Hora ti ndu'u nu xña'a̱ bi' ndyaa li'; ca tiya' la caja ñi'ya̱ caca nu tyiji̱loo ji'i̱ Jesús, ngua ti'.
Cua nguxana Jesús ndyu'ni cña ji'i̱ ycui' Ndyosi ca Galilea
14Li' nguxtyu̱u̱ Jesús ndyaa nde loyuu su cuentya Galilea chaca quiya'. Tlyu tsa chacuayá' ngujui ji'i̱ Jesús xqui'ya Xtyi'i ycui' Ndyosi, ña'a̱ cuayá' tyucui ña'a̱ loyuu ca bi' ndañi nchcui' ngu' cha' ji'i̱ yu. 15Lcaa quichi̱ su ndya'a̱ yu nda yu cha' lo'o ngu' ca ne' laa ji'i̱ ngu' judío, lo'o jua'a̱ lcaa ñati̱ ngua'ni chi̱ ngu' loo Jesús.
Lo'o ndi'i̱ Jesús nde quichi̱ Nazaret
16Li' ndyalaa Jesús nde quichi̱ Nazaret, su nguluu yu. Lo'o ndyalaa tsa̱ nu ndi'i̱ cña' ngu', li' ndyaa yu ne' laa ji'i̱ ngu', cha' xcui' jua'a̱ ndu'ni yu tsa̱ bi'. Li' ndatu̱ Jesús cha' chcui' yu lo quityi nu nscua cha' ji'i̱ ycui' Ndyosi; 17quityi nu nguscua jyo'o Isaías, bi' laca quityi nu nda ngu' ji'i̱ Jesús cha' chcui' yu lo. Li' nguscana Jesús quityi bi', ngulana macala nscua cha' nu nchcui' ndi'ya̱:
18Cua ngulacua̱ ycui' Ndyosi nu Xu'na na jna', nacui̱ lo quityi bi'.
Cua ngua'a̱ loo Ni jna', bi' cha' cua ndi'i̱ Xtyi'i ycui' Ndyosi lo na', cha' chcui' na' cha' tso'o lo'o ngu' ti'i.
Cua nda Ni jna' lijya̱a̱ cha' cua'ni cho'o na' tyiquee ñati̱ nu xñi'i̱ tsa ti', nacui̱ lo quityi bi'.
Ntsu'u cha' chcui' na' lo'o ngu' nu laca preso ji'i̱ nu xña'a̱, cha' cua tyu'u ti ngu' ya' nu xña'a̱ bi'.
Ta na' xee nu tyu'u ne' cresiya ji'i̱ ñati̱ nu ndyacu̱' hique ngu'.
Lo'o lya' tsa ti' ngu' ji'i̱ tya'a ngu' ni, li' ta na' chacuayá' ji'i̱ ngu' cha' tyu'u ngu' laja ti.
19Na lijya̱ ti na' cha' chcui' na' lo'o ngu', cha' cua ndyalaa tyempo tso'o la nu nda ycui' Ndyosi nu Xu'na na ji'i̱ ngu'.
Jua'a̱ nscua lo quityi su nchcui' Jesús.
20Li' nguxcatya'a Jesús quityi bi', xa' ndya yu quityi bi' ji'i̱ xirta ne' laa bi', xa' ndyaa tucua Jesús li'; pana lcaa ngu' nu ndi'i̱ ne' laa bi' ña'a̱ tsa ngu' ji'i̱ yu. 21Li' nguxana Jesús nda yu cha' lo'o ngu':
―Hasta juani cua ndu'u tucua cha' bi' su ntucua ycui' ma̱, cha' nu ndyuna ca ti ma̱ ―nacui̱ Jesús.
22Ndube tsa ti' ngu' ña'a̱ ngu' ji'i̱ Jesús cha' tso'o tsa nchcui' yu, jua'a̱ ndiya tsa ti' ngu' cha' nu nda yu lo'o ngu'. Ndi'ya̱ cha' nu nchcui' ngu' lo'o tya'a ngu' ji'i̱ yu li':
―¿Ha si'i ca sñi' José laca yu re? ―nacui̱ ngu'
23Li' nguxacui̱ Jesús cha' ji'i̱ ngu' bi':
―Ná tyiquee' tiya' la xi ta ma̱ cha' re lo'o na': “Si nu jo'o laca nu'u̱, cua'ni nu'u̱ jo'o ji'i̱ ycui' ca lacua”. Lo'o jua'a̱ ná tyiquee' ñacui̱ ma̱ jna': “Cua ndyuna ya cha' ji'i̱ lcaa cña tonu nu ngua'ni nu'u̱ nde quichi̱ Capernaum bi'”, ñacui̱ ma̱. “La cui' jua'a̱ cua'ni nu'u̱ nde quichi̱ tyi na lacua, cha' ña'a̱ ya xi”, ñacui̱ ma̱ 'na li'. 24Ta na' sca cha' liñi lo'o ma̱ lacua ―nacui̱ Jesús―. Macala su chcui' sca ñati̱ cha' ji'i̱ ycui' Ndyosi lo'o ngu' tya'a quichi̱ tyi yu, ná taquiya' ngu' ji'i̱ cha' nu nchcui' yu, cha' la cui' tya'a quichi̱ tyi ngu' laca yu. 25Tyempo lo'o nguti'i̱ jyo'o cusu' Elías chalyuu ―nacui̱―, ntsu'u ti' ma̱ cha' cua nteje tacui sna yija̱ ntucua scuá co' nu ná ngua'ya tyo tsiya' ti; tlyu tsa jbi'ña ngua tyucui ña'a̱ chalyuu li'. Tyu̱u̱ tsa tya'a nu cuna'a̱ ti'i nguti'i̱ loyuu re tyempo bi'; 26pana nda ycui' Ndyosi ji'i̱ Elías cha' tsaa yu slo sca ti nu cuna'a̱ ti'i nu ndi'i̱ nde quichi̱ Sarepta, sca quichi̱ tyijyu' la nde loyuu su cuentya Sidón. Ná ndyaa Elías slo ni sca nu cuna'a̱ ti'i tya'a quichi̱ tyi ngu' Israel. 27La cui' jua'a̱ ngua lo'o nguti'i̱ jyo'o Eliseo. La cui' tyempo bi', nguti'i̱ tsa ngu' quicha nu ngutsu' cuaña' nde loyuu re; pana ni sca ngu' bi', ná ndyaca tso'o ngu' ji'i̱ quicha bi'. Sca ti nu Naamán bi', sca ti nu bi' ndyaca tso'o; sca ngu' xa' tsu' ngua yu, cha' loyuu su cuentya Siria laca su ngutu'u yu ―nacui̱ Jesús ji'i̱ ngu' bi'.
28Laja lo'o ndyuna ngu' cha' nu nchcui' Jesús su ndi'i̱ ngu' ne' laa bi', ngua ñasi̱' tsa ngu' bi' li'. 29Lo'o li' ndyatu̱ ngu' ndyaa lo'o ngu' ji'i̱ Jesús, ngulo'o ngu' ji'i̱ yu cha' tyu'u yu ca to' quichi̱. Li' ntejeya' ngu' ji'i̱ Jesús, ntojolaqui ngu' ji'i̱ yu ña'a̱ cuayá' ndyalaa ngu' lo'o yu ca to' cua'a̱, sca to' yuu nu ntsu'u to' quichi̱ bi'. Ngua ti' ngu' cha' xtyú ngu' ji'i̱ yu tsaa yu nde chcua'a̱, 30pana tso'o ca ti ndu'u Jesús ya' ngu'; ntejetacui yu laja ngu', ndyaa yu li'.
Sca ñati̱ nu ngusñi cui'i̱ cuxi ji'i̱
31Li' cua ndi'i̱ Jesús nde quichi̱ Capernaum, sca quichi̱ nu ndi'i̱ nde loyuu su cuentya Galilea bi'. Nu lo'o ngua tsa̱ nu ndi'i̱ cña' ngu', li' nguxana Jesús ngulu'u yu ji'i̱ ngu' ca ne' laa ji'i̱ ngu'. 32Ndube tsa ti' ngu' lo'o ndyuna ngu' cha' tso'o nu nda Jesús lo'o ngu'. Ngua ti' ngu' cha' tlyu tsa chacuayá' ntsu'u ji'i̱ yu lo'o nchcui' yu lo'o ngu'.
33Ca ne' laa bi' ntsu'u sca nu qui'yu nu ngusñi sca cui'i̱ cuxi ji'i̱. Cui̱i̱ tsa ngusi'ya nu quicha bi' ji'i̱ Jesús lo'o na'a̱ cha' lijya̱ yu nde ne' laa:
34―¿Ni cña cua'ni nu'u̱ ca nde, Jesús Nazaret? ―nacui̱ nu qui'yu quicha bi'―. ¿Ha na cua nti' nu'u̱ cua'ni tye nu'u̱ cha' 'na tsiya' ti? Nslo tso'o na' jinu'u̱, cha' ycui' nu lubii laca nu'u̱; cua nda ycui' Ndyosi jinu'u̱ lijya̱ ca nde.
35Ngua'a Jesús cha' ji'i̱ nu quicha li'; ngulo yu cña ji'i̱ cui'i̱ cuxi bi', cha' nga'aa cua'ni cuxi lo'o yu quicha bi'.
―Chca'a̱ ti̱ nu'u̱ ―nacui̱ Jesús―. Nga'aa cua'ni xña'a̱ cui'i̱ lo'o nu'u̱.
Li' nguxlyú nu cui'i̱ cuxi bi' ji'i̱ yu quicha nde loo su ndi'i̱ ngu' quiña'a̱ bi'. Lo'o li' ndu'u nu cui'i̱ cuxi bi' ndyaa, nga'aa ngua'ni cuxi lo'o nu quicha bi' li'. 36Ngulacua tsa ti' ngu' li', nguxana nchcui' ngu' lo'o tya'a ngu':
―¿Macala ngujui cha' nu nchcui' Jesús cua? ―nacui̱ ngu'―. ¿Ni cha' laca cha' tso'o tsa ngujui chacuayá' ji'i̱ yu cua cha' culo yu cña ji'i̱ cui'i̱ cuxi? Hora ti nduna cui'i̱ cuxi cha' nu nchcui' yu lo'o, ndu'u cui'i̱ bi' ndyaa li' ―nacui̱ ngu' ji'i̱ tya'a ngu'.
37Bi' cha' nguañi cha' bi' tyucui ña'a̱ loyuu ca bi', nchcui' tsa ngu' cha' ji'i̱ Jesús li'.
Ngua'ni Jesús jo'o ji'i̱ xtya'a̱ laa Simón Pedro
38Li' ndu'u Jesús nde ne' laa, ndyaa yu to' tyi Pedro. Quicha tsa xtya'a̱ laa Simón Pedro bi', cha' tlyu tsa tyique' ngusñi ji'i̱ ma'. Tya'na tsa nchcui' ngu' lo'o Jesús cha' tsaa na'a̱ xi ji'i̱ ma'. 39Ndu̱ ti Jesús slo ma' ña'a̱ tsa yu ji'i̱ ma'. Li' ngua'a yu ji'i̱ tyique' bi', cha' tyu'u tyique' ji'i̱ ma'. Hora ti ndaca'a̱ ma', ngua'ni cña ti' ma' cha' caja xi na cacu ngu'.
Ngua'ni Jesús jo'o ji'i̱ tyu̱u̱ tya'a ngu' quicha
40Lo'o ndyaa cuichaa, li' ndyaa lo'o ngu' ji'i̱ lcaa tya'a ngu' nu quicha tsa cha' ngusñi tyu̱u̱ lo quicha ji'i̱ ngu', ndyalaa ngu' ca slo Jesús. Li' ngusta ya' Jesús hichu̱' ngu' quicha cuentya scaa ti ngu'. Hora ti ndyaca tso'o ngu' li'. 41Lo'o jua'a̱ ngutu'u cui'i̱ cuxi ji'i̱ tyu̱u̱ tya'a ngu' quicha bi' li'. Ndu'u si'ya cui'i̱ bi' lo'o ndu'u ji'i̱ ngu':
―Sca ti nu'u̱ laca Sñi' ycui' Ndyosi ―nacui̱ cui'i̱ bi' ji'i̱ Jesús.
Li' ngua'a Jesús chacuayá' ji'i̱ cui'i̱ cuxi cha' nga'aa chcui' bi' tsiya' ti. Cua ndyuloo cui'i̱ bi' ji'i̱ Jesús, cha' la cui' Cristo nu cua nda ycui' Ndyosi ji'i̱ lijya̱ chalyuu laca yu bi'.
Nda Jesús cui̱i̱ lo'o ngu' ca nde Galilea
42Lo'o nguxee chaca tsa̱, li' ndu'u Jesús ndyaa yu ca chaca se'i̱ su tyi'i̱ ycui' ti yu ca ne' quixi̱'. Ngulana tsa ngu' ji'i̱ li', ña'a̱ cuayá' nquije ji'i̱ ngu' macala su nga'a̱ yu. Ngua ti' ngu' tatsaa ngu' ji'i̱ Jesús cha' nga'aa tsaa yu xa' se'i̱. 43Li' nacui̱ Jesús ji'i̱ ngu':
―Lo'o nde xa' quichi̱ ntsu'u cha' ta na' cha' tso'o nu ji'i̱ ycui' Ndyosi lo'o ñati̱, cha' cua ndyalaa tyempo cha' caca Ni loo ne' cresiya ji'i̱ ñati̱ chalyuu. Bi' laca cña nu cua nda Ni jna' lijya̱a̱ cha' chcui' na' cuentya ji'i̱ ycui' Ni.
44Jua'a̱ ti ndya'a̱ Jesús lcaa ne' laa ji'i̱ ngu' ca nde Galilea, nda yu cui̱i̱ lo'o ngu'.
S'ha seleccionat:
SAN LUCAS 4: cta
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 1981, Wycliffe Bible Translators, Inc. All rights reserved.