SAN LUCAS 5
5
Nguxtyucua Jesús ji'i̱ ngu' lo'o ndyaa ngu' cuta cualya
1Ngua sca tsa̱ ndyaa Jesús to' tayu' Genesaret. Tyu̱u̱ tsa tya'a ñati̱ lca'a̱ ji'i̱ yu. Li' tachaa tsa ndi'i̱ ngu' ca su ndu̱ yu to' tayu' bi', cha' ngua ti' ngu' cuna ngu' lo'o nchcui' yu cha' ji'i̱ ycui' Ndyosi. 2Cua na'a̱ Jesús su ndacui tucua tya'a yaca ni'i̱ sube ti ca to' tayu' bi'. Ná tucui nga'a̱ ne' yaca ni'i̱ sube bi' tsiya' ti, pana cacua ti bi' ndu̱ ngu' ngui'í̱ ngu' taraya ji'i̱ ngu', cha' cua ndye ngua'ni ngu' cña. 3Li' ndyatí̱ Jesús ne' sca yaca ni'i̱ ji'i̱ Simón, nchcui' lo'o yu cha' tucuni'i̱ yu ji'i̱ yaca ni'i̱ cha' tsaa ca lo hitya la xi. Ndyaa tucua Jesús nde siyu' ti yaca ni'i̱ bi', li' nguxana Jesús nclyu'u cha' ji'i̱ ycui' Ndyosi ji'i̱ ngu' quiña'a̱ bi'. 4Lo'o cua ndye ngulu'u Jesús ji'i̱ ngu', li' nacui̱ ji'i̱ Simón:
―Yaa ma̱ lo'o yaca ni'i̱ re ca su clyaa la hitya. Ca bi' cu̱ ma̱ taraya cha' caja cualya ji'i̱ ma̱ ―nacui̱ Jesús.
5Li' nguxacui̱ Simón cha' ji'i̱:
―Cusu' ―nacui̱―, tyucui talya nguta'a̱ ya lo tayu' ngu̱ ya taraya; ni sca na ná ngujui ji'i̱ ya tsiya' ti. Pana si jua'a̱ culo nu'u̱ cña 'na, tsaa ya ca su nacui̱ nu'u̱ cha' cu̱ ya taraya cajua ―nacui̱ Simón li'.
6Li' jua'a̱ ngua'ni Simón lo'o tya'a yu, lo'o quiña'a̱ tsa cualya ngujui ji'i̱ ngu' li'. Xqui'ya cha' quiña'a̱ tsa cualya ndyatí̱ ne' taraya ji'i̱ ngu', hasta ngutaa' taraya ji'i̱ ngu' li'; 7bi' cha' ngua'ni ya' ngu' ji'i̱ tya'a ngu' nu nga'a̱ ne' chaca yaca ni'i̱ bi', cha' ca̱a̱ ngu' xtyucua ngu' ji'i̱. Hora ti ya̱a̱ ngu' li', ndojolaqui ngu' taraya ngutsa'á̱ ne' ntsu'u cualya, cha' su'ba ngu' ji'i̱ ne' yaca ni'i̱. Xi tya lyiji cha' clyu'u tyucuaa yaca ni'i̱ bi' ne' hitya xqui'ya cualya bi'. 8Lo'o na'a̱ Simón Pedro lcaa cualya bi', ngua cuayá' ti' yu cha' xqui'ya Jesús ngujui cualya ji'i̱ ngu'. Hora ti ndyatu̱ sti̱' yu loo Jesús li', nchcui' yu lo'o:
―Tyu'u clya nu'u̱ nde slo na', Xu'na ―nacui̱ Simón ji'i̱―. Ntsu'u tsa xqui'ya na' cha' ñati̱ chalyuu ti laca na'.
9Ndube tsa ti' Simón, lo'o jua'a̱ tya'a ndya'a̱ yu ne' yaca ni'i̱ ndube tsa ti' ngu', xqui'ya cha' quiña'a̱ tsa cualya ngusñi ca ti ngu'. 10Lo'o tyucuaa nu qui'yu sñi' Zebedeo nu nga'a̱ ne' chaca yaca ni'i̱ bi', nu naa Jacobo lo'o nu naa Juan ni, lo'o ngu' bi' ndyutsi̱i̱ tsa ngu'; la cui' tya'a ndya'a̱ Simón cña laca ngu' bi'. Li' nchcui' Jesús lo'o Simón:
―Ná cutsi̱i̱ ma̱ ―nacui̱―. Tya tsubi' la cua laca ti cña ngua'ni ma̱, xcui' cña cuta cualya ngua'ni ma̱; pana juani, ta na' xa' cña ji'i̱ ma̱, cha' ca̱a̱ lo'o ma̱ ji'i̱ xa' ñati̱ ca slo na' ―nacui̱ Jesús ji'i̱ Simón, jua'a̱ ji'i̱ tya'a ndya'a̱ yu cña.
11Lo'o ndyalaa yaca ni'i̱ bi' ca to tayu' chaca quiya', li' nguxtyanu ngu' bi' ji'i̱ yaca ni'i̱, ndu'u ngu' ndyaa ngu' lo'o Jesús li'.
Ngua'ni Jesús jo'o ji'i̱ sca ngu' quicha nu ndyatsu' cuaña'
12Lo'o ndi'i̱ ti Jesús sca quichi̱, li' ndyalaa sca yu quicha slo; lye tsa ndyatsu' cuaña' yu quicha bi'. Lo'o na'a̱ yu ji'i̱ Jesús, hora ti ndyatu̱ sti̱' yu, ndyanu tu'ba yu hasta ca lo yuu. Tya'na tsa nchcui' yu lo'o Jesús li':
―Si nti' nu'u̱ cha' tyaca tso'o na', jlo ti' na' cha' taca jinu'u̱ cua'ni jua'a̱ jna' ―nacui̱ nu quicha bi'.
13Li' ngusta ya' Jesús chu̱' yu su ndyatsu' cuaña' yu:
―Tyaja'a̱ na' ―nacui̱ Jesús ji'i̱―. Caca lubii tyucui ña'a̱ nu'u̱ juani ti.
Laja lo'o nchcui' Jesús jua'a̱, hora ti ndatsu' quicha nu ndyatsu' cuaña' yu li'. 14Lo'o li' nacui̱ Jesús ji'i̱ yu, cha' ná cacha' yu ji'i̱ ñati̱ ñi'ya̱ ngua ji'i̱ yu. Ndi'ya̱ nchcui' lo'o yu:
―Yaa clya nu'u̱ chcui' lo'o sti jo'ó nu ndi'i̱ ne' laa ―nacui̱ Jesús ji'i̱ nu quicha bi'―. Cajua ta nu'u̱ msta̱ nu nacui̱ jyo'o Moisés cha' ta na ji'i̱ ycui' Ndyosi lo'o ndyaca tso'o na ji'i̱ quicha nu ntsu'u ji'na. Jua'a̱ ca cuayá' ti' ñati̱ lo'o ycui' sti jo'ó cha' cua ngua lubii tyucui ña'a̱ nu'u̱. Nga'aa ca quicha nu'u̱ juani.
15Lcaa tsa̱ cua nguañi la cha' ji'i̱ Jesús li', cha' nchcui' tsa ngu' cha' ji'i̱. Bi' cha' quiña'a̱ tsa ñati̱ ndyu'u ti'i̱ slo Jesús, cha' cuna ngu' ña'a̱ cha' nu nda yu lo'o ngu', cha' cua'ni yu cha' ndyaca tso'o ngu' ji'i̱ quicha nu ntsu'u ji'i̱ ngu'. 16Pana ntsu'u quiya' ndu'u Jesús ndyaa yu ca ne' quixi̱', ca su caca tyi'i̱ yu ycui' ti yu, cha' chcui' yu lo'o ycui' Ndyosi Sti yu ca bi'.
Ngua'ni Jesús jo'o ji'i̱ sca ñati̱ nu nchcu̱' tyucuí̱ tyucui ña'a̱ yu
17Ngua sca tsa̱ nclyu'u Jesús cha' ji'i̱ ycui' Ndyosi ji'i̱ tyu̱u̱ tya'a ñati̱. Quichi̱ tyi ngu' bi' laca lcaa quichi̱ sube ti nu ntsu'u nde Galilea, nu ntsu'u nde Judea, nu ndi'i̱ cacua ti quichi̱ Jerusalén. Laja nu tsa tlyu ti ñati̱ bi', cua ndi'i̱ tyu̱u̱ tya'a ngu' fariseo. (Tacati tsa ycui' ngu', nti' ngu'; lye tsa ndu'ni tyucuaa ti' ngu' ji'i̱ xa' ñati̱.) Lo'o jua'a̱ ndi'i̱ tyu̱u̱ tya'a mstru nu ngulu'u cha' jo'ó ne' laa. Ngua tii lcaa ngu' nu ndi'i̱ ca bi', cha' ycui' Ndyosi laca nu nxtyucua ji'i̱ Jesús lo'o ndyu'ni yu cha' ndyaca tso'o ngu' quicha. 18Li' ndyalaa lo'o ngu' ji'i̱ sca nu quicha nu ntsiya ne' catya̱, cha' cua nchcu̱' tyucuí̱ tyucui ña'a̱ yu quicha bi'. Ngua ti' ngu' cha' tyatí̱ ngu' toni'i̱ su nga'a̱ Jesús, cha' tsaa lo'o ngu' ji'i̱ nu quicha bi' ca su ndu̱ ycui' Jesús, ña'a̱ lo'o catya̱ ngua ti' ngu'. 19Pana ná ngujui ñi'ya̱ nu tyatí̱ ngu' lo'o nu quicha bi' ni'i̱, cha' tachaa tsa ndi'i̱ ñati̱; bi' cha' ndyacuí̱ ngu' nde que ni'i̱. Li' ngulotsu' ngu' cuxi'ña, ngucha ngu' yaca que ni'i̱, cha' jua'a̱ ngujui ñi'ya̱ nda'ya ngu' ji'i̱ nu quicha bi' liñi ca su nga'a̱ Jesús cla'be la su ndi'i̱ ñati̱. 20Lo'o ti ngua cuayá' ti' Jesús cha' jlya tsa ti' ngu' bi' ji'i̱, bi' cha' nacui̱ ji'i̱ yu quicha bi':
―Cusu' ―nacui̱―, na cua ngua'ni clyu ti' ycui' Ndyosi jinu'u̱ ji'i̱ qui'ya nu ntsu'u jinu'u̱ ―nacui̱ Jesús ji'i̱ yu quicha bi'.
21Li' ngulacua tsa ti' ngu' mstru cha' jo'ó lo'o ngu' fariseo: “¿Tilaca laca nu qui'yu re? ¿Ni cha' laca re? Cuxi tsa nchcui' yu cha' ji'i̱ ycui' Ndyosi lo'o nchcui' yu jua'a̱”, nclyacua ti' ngu'. “Ná taca ji'i̱ sca ñati̱ chalyuu ñi'ya̱ nti' yu re, ná taca cua'ni clyu ti' ji'i̱ qui'ya nu ntsu'u ji'i̱ ñati̱; sca ti ycui' Ndyosi taca ji'i̱ Ni cuityi̱ Ni qui'ya nu ntsu'u ji'i̱ ñati̱.” Jua'a̱ nclyacua ti' ngu'.
22-23Cua jlo ti' Jesús ni cha' laca nu nclyacua ti' ngu'. Li' nchcuane yu ji'i̱ ngu' bi':
―¿Ni cha' laca nti' ma̱ jua'a̱? ¿Ha nti' ma̱ cha' tucui la laca si ñacui̱ na' ji'i̱ nu quicha cua cha' cua'ni clyu ti' ycui' Ndyosi ji'i̱ qui'ya nu ntsu'u ji'i̱ yu? ¿Ha nti' ma̱ cha' yala la caca si ñacui̱ na' ji'i̱ nu quicha: “Tyatu̱ clya nu'u̱ tya'a̱ nu'u̱”? ¿Ni cña yala la cua'ni na' cuentya ji'i̱ yu cua lacua? 24Cua nti' na' cha' caca cuayá' ti' ma̱ cha' cua nda ycui' Ndyosi chacuayá' jna', cha' cui'ya na' cha' clyu ti' ji'i̱ qui'ya nu ntsu'u ji'i̱ ñati̱ laja lo'o ndi'i̱ na' nde chalyuu ―nacui̱ Jesús―. Xqui'ya cha' bi' cua nda Ni 'na lijya̱a̱ nde chalyuu cha' caca na' ñati̱.
Li' xa' nchcui' Jesús lo'o nu qui'yu nu nchcu̱' tyucuí̱ tyucui ña'a̱ yu:
―Nde laca cha' nu nda na' lo'o nu'u̱ ―nacui̱ Jesús ji'i̱ yu―, tyatu̱ clya nu'u̱ juani cha' tyaa nu'u̱ nde to' tyi nu'u̱; tyaa lo'o nu'u̱ ji'i̱ catya̱ su ngustii nu'u̱ juani.
25Hora ti ndyatu̱ yu quicha bi', laja lo'o na'a̱ lcaa ñati̱ bi' ji'i̱. Li' ndyaa lo'o yu ji'i̱ catya̱ su ngustii yu tsa̱ la. Tso'o tsa ntsu'u tyiquee yu lo'o ndu'u yu ndyaa yu, bi' cha' ndyu'ni tlyu yu ji'i̱ ycui' Ndyosi. 26Ndube tsa ti' ngu' ca su ndi'i̱ ti ngu', li' lcaa ngu' ca bi' ngua'ni tlyu ngu' ji'i̱ ycui' Ndyosi:
―Bilya ña'a̱ na cha' ngua'ni ycui' Ndyosi sca cha' tlyu tsa lo cua ―nacui̱ ngu' ji'i̱ tya'a ngu'.
Na ntsi̱i̱ ti ngu' nchcui' ngu' lo'o tya'a ngu' jua'a̱.
Ngusi'ya Jesús ji'i̱ Leví cha' tya'a̱ yu lo'o
27Ca tiya' la lo'o ndyaa Jesús xi lquichi̱, li' na'a̱ yu ji'i̱ sca ñati̱ ca su ntucua yu nclyo yu cñi cña loo ngu'; Leví naa nu qui'yu bi'. Cña laca yu cha' culo yu cñi ji'i̱ ñati̱ cuentya ji'i̱ ngu' xa' tsu'. Li' nacui̱ Jesús ji'i̱ yu:
―Tya̱a̱ lca'a̱ nu'u̱ jna' ―nacui̱.
28Li' ndyatu̱ Leví, nguxtyanu yu cña ji'i̱ yu cha' tya'a̱ yu lo'o Jesús li'.
29Tiya' la li' ngua'ni Leví sca ta'a tlyu ca to' tyi yu, cha' cua'ni chi̱ yu loo Jesús. Lo'o jua'a̱ ndyalaa tyu̱u̱ tya'a ngu' slo, tya'a ndyu'ni Leví cña nclyo cñi cña loo ñati̱; jua'a̱ ndi'i̱ xi xa' la ñati̱. 30Li' nguxana ngu' fariseo nu tacati tsa ndu'ni ngu', nti' ngu', lo'o nu mstru cha' jo'ó bi', nguxlyú ngu' cha' hichu̱' ngu' nu ndyaca tsa'a̱ ji'i̱ Jesús.
―¿Ni cha' laca cha' stu'ba ti ndacu ma̱ tyaja, stu'ba ti nga'a̱ ma̱ lo'o ngu' cuxi cua? ―nacui̱ ngu'―. Msu ji'i̱ ngu' xa' tsu' laca ngu' cua, nu cuiñi ti nxñi quiña'a̱ tsa cñi cña loo ñati̱. Lo'o jua'a̱ ntucua xi xa' la ngu' nu ndya'a̱ calle ti.
31Li' nguxacui̱ Jesús cha' ji'i̱ ngu' bi':
―Ñati̱ nu tso'o tyucui ña'a̱, ná clyana ngu' bi' ji'i̱ sca nu jo'o; ngu' quicha laca nu ndyaana ji'i̱ sca nu jo'o ―nacui̱―. 32Lo'o jua'a̱ na', ná lijya̱ na' cha' culana na' ji'i̱ ñati̱ nu nclyacua ti ti' cha' tso'o tsa ycui' ca ngu'; na cua lijya̱ na' cha' chcui' na' lo'o ngu' cuxi, cha' culochu̱' ngu' qui'ya nu ntsu'u ji'i̱ ngu'.
Ca chaa ti' ngu' laja lo'o ndi'i̱ Jesús chalyuu
33Li' nchcuane ngu' ji'i̱ Jesús:
―Lo'o ngu' nu ndyaca tsa'a̱ ji'i̱ Juan, lo'o ngu' nu ndyaca tsa'a̱ ji'i̱ ngu' fariseo, ¿ni cha' lu'ba ti nchcui' ngu' bi' lo'o ycui' Ndyosi? Lo'o jua'a̱ ná ndacu ngu' tyaja tsa̱ bi' lo'o nchcui' ngu' lo'o Ni. Pana ngu' nu ndyaca tsa'a̱ jinu'u̱ ni, xa' ña'a̱ ndu'ni ngu' bi'; xcui' tso'o tsa ndacu ngu', xcui' tso'o tsa ndyi'yu ngu' ―nacui̱ ngu' ji'i̱ Jesús.
34Ndi'ya̱ nguxacui̱ Jesús cha' ji'i̱ ngu' bi' li':
―Lo'o caja clyo'o ngu' ni, ndacu ngu' nu ndya'a̱ lo'o ji'i̱ cutsii; ná ndi'i̱ ngu' ntyute' ti ngu' tsa̱ bi', nu lo'o ndi'i̱ ngu' lo'o cutsii ―nacui̱ Jesús―. 35Pana nu lo'o tyalaa tsa̱ nu tyaa lo'o ngu' ji'i̱ cutsii, li' ná cacu ngu' tya'a tso'o cutsii; caca xñi'i̱ ti' ngu' li'. La cui' jua'a̱ chaa ti' tya'a tso'o na' juani, pana caca xñi'i̱ ti' ngu' nde loo la ―nacui̱ Jesús li'.
36Lo'o li' nda Jesús cui̱i̱ re lo'o ngu':
―Ná nsa'be ngu' sa yu'be ste' cucui ngu' cha' calya lo'o sca late' cusu̱ ji'i̱ ngu'. Si jua'a̱ cua'ni ngu', ná tyanu tso'o late' cucui bi' li', tyati̱' jlyacua̱ su ngalya bi'; lo'o nu yu'be late' bi', ná stu'ba xee loo lo'o nu late' cusu̱ bi'. 37Lo'o chaca cha' ni ―nacui̱ Jesús ji'i̱ ngu'―, ná nsu'ba ngu' ji'i̱ lcui nu chca ndyu'u ti ne' tyaca' cusu'. Si su'ba ngu' ji'i̱ ne' tyaca' cusu', yala ti catsu se'i̱ tyaca' bi'; clya'a tyaca', tye lcui tyalú li'. 38Ne' tyaca' cucui tyu'ú lcui lo'o chca ndyu'u ti. 39Pana lo'o cua ndyi'o ngu' lcui nu cua cusu', ná nti' ngu' co'o ngu' lcui nu chca ndyu'u ti. “Tyixi la ndyi'yu lcui nu cua cusu' bi'”, ñacui̱ ngu'.
Jua'a̱ ngua cha' nu nda Jesús lo'o ngu'.
S'ha seleccionat:
SAN LUCAS 5: cta
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 1981, Wycliffe Bible Translators, Inc. All rights reserved.