SAN LUCAS 9
9
Ngulo Jesús cña ji'i̱ nu tii tyucuaa tya'a ngu' bi', cha' tsaa ngu' chcui' ngu' lo'o ngu' xa' quichi̱
1Nguxuti'i̱ Jesús ji'i̱ nu tii tyucuaa tya'a ngu' nu ndyaca tsa'a̱ bi', cha' ta yu chacuayá' ji'i̱ ngu' cha' culo ngu' ji'i̱ lcaa lo cui'i̱ cuxi nu ntsu'u ji'i̱ ñati̱, lo'o jua'a̱ cua'ni ngu' jo'o ji'i̱ lcaa lo quicha nu ntsu'u ji'i̱ ñati̱. 2Ngulo yu cña ji'i̱ nu tii tyucuaa tya'a ngu' bi', cha' ta ngu' cha' tso'o ji'i̱ ycui' Ndyosi lo'o ngu' quichi̱ su tsaa ngu', lo'o li' cua'ni ngu' cha' tyaca tso'o ngu' quicha. 3Li' nchcui' Jesús lo'o ngu' bi':
―Ná sca na ná cui'ya ma̱ tsaa ma̱ tyucui̱i̱ ―nacui̱ yu ji'i̱ ngu'―, ni yaca xca̱, ni cuiji̱, ni tyaja, ni cñi, ná cui'ya lo'o ma̱ ji'i̱. Sca ti camxa nu ntsu'u ti ma̱ cui'ya ma̱ tsaa ma̱, ná cui'ya ma̱ chaca. 4Cua ña'a̱ ca toni'i̱ su tyalaa ma̱ ni, ca bi' tyanu ma̱ hasta ña'a̱ cuayá' nu tyu'u ma̱ quichi̱ bi' tyaa ma̱ li'. 5Si ntsu'u quichi̱ su ná ndiya ti' ngu' cha' nu nchcui' ma̱ lo'o ngu', su ná nti' ngu' cha' tyanu ma̱ slo ngu', hora ti tsaa ma̱ xa' se'i̱. Lo'o jua'a̱ salú ma̱ sñii yuu nu ntsu'u quiya' ma̱ lo'o tyu'u ma̱ quichi̱ bi'; xqui'ya cha' bi', caca cuayá' ti' ngu' quichi̱ cha' cuxi tsa cña nu ngua'ni ngu' lo'o ma̱ li'.
6Ndu'u ngu' ndyaa ngu' li', ndya'a̱ ngu' lcaa quichi̱ sube ti cajua. Li' nda ngu' cha' lo'o ngu' quichi̱ bi' ñi'ya̱ ndu'ni lyaá Ni ji'i̱ ngu'; jua'a̱ ngua'ni ngu' jo'o ji'i̱ ngu' quicha nu ndi'i̱ lcaa quichi̱ bi', ndyaca tso'o nu ngu' quicha bi' li'.
Ngujuii Juan nu ntyucuatya ji'i̱ ñati̱
7Tyempo bi' Herodes naa nu laca gobernador. Cua ngua cuayá' ti' yu lcaa cña nu ngua'ni Jesús, lo'o nu juani nclyacua tsa ti' yu: “¿Ti ñati̱ laca nu Jesús bi'?” Tyu̱u̱ tya'a ngu' nchcui' ngu' cha' cua ndyu'ú jyo'o Juan chaca quiya'. 8Lo'o jua'a̱ ntsu'u ngu' nu nchcui' cha' Jesús laca jyo'o Elías nu nguti'i̱ chalyuu sa'ni la, cha' chaca quiya' ndyu'u tucua jyo'o bi'; jua'a̱ ntsu'u ngu' nu nchcui' cha' la cui' jyo'o cusu' nu ngua tu'ba ji'i̱ ycui' Ndyosi sa'ni la laca Jesús, cha' cua ndyu'ú jyo'o cusu' bi' chaca quiya', nacui̱ ngu'. 9Pana ndi'ya̱ nacui̱ Herodes:
―Ycui' na' ngulu̱ cña cha' teje cu' ngu' scua' que Juan. Lo'o nu Jesús bi' ni, nu quiña'a̱ tsa cha' ndañi nu nchcui' ngu' ji'i̱, ¿tilaca laca yu lacua?
Lo'o li' lye tsa ngua ti' Herodes cha' ña'a̱ ji'i̱ ycui' Jesús.
Nda Jesús na ndyacu ca'yu mil tya'a ñati̱
10Nu lo'o nguxtyu̱u̱ ngu' tya'a ndya'a̱ Jesús ndyalaa ngu' slo yu, li' nchcui' ngu' lo'o yu lcaa ña'a̱ cña nu ngua'ni ngu' ca su ndyaa ngu' bi'. Li' ndyaa yu lo'o nu ngu' nu ndyaca tsa'a̱ ji'i̱ bi' sca se'i̱ su ná ntsu'u ñati̱ ngua ti' yu, sca se'i̱ cacua ti quichi̱ Betsaida. 11Pana nu lo'o cua ngua jlo ti' xa' ñati̱ macala su ndyaa Jesús, li' ndu'u lca'a̱ ñati̱ bi' ji'i̱ yu. Lo'o ndyalaa ngu' slo yu, li' ndyanu ngu' cha' culu'u yu ji'i̱ ngu' ñi'ya̱ caca nde loo lo'o caca ycui' Ndyosi loo ne' cresiya ji'i̱ ñati̱. Lo'o jua'a̱ lijya̱ ngu' quicha cha' cua'ni yu cha' tyaca tso'o ngu', nti' ngu'.
12Nu lo'o cua ngusi̱i̱, li' ndyu'u ti'i̱ ñati̱ nu ndyaca tsa'a̱ ji'i̱ Jesús ca slo yu cha' chcui' ngu' lo'o yu:
―Chcui' nu'u̱ lo'o ngu' jua cha' tsaana ngu' na cacu ngu', su caja' ngu' talya ca quichi̱ sube ti jua ―nacui̱ ngu' nu ndyaca tsa'a̱ ji'i̱―. Su ndi'i̱ na re, ná ntsu'u na cacu ngu' tsiya' ti ―nacui̱ ngu' bi' ji'i̱ Jesús.
13―Cu'ma̱ ta ma̱ na cacu ngu' quiña'a̱ jua ―nacui̱ Jesús ji'i̱ nu ngu' nu ndyaca tsa'a̱ ji'i̱ li'.
―Xti tsa na ntsu'u ji'i̱ ya re ―nacui̱ ngu'―. Ca'yu tya'a ti xlyá teje' lo'o tucua tya'a ti cualya lo'o ji'i̱ ya. Sca ti si tsaa ya tsaana ya scuaa cha' cacu lcaa ngu' re ―nacui̱ ngu' ji'i̱ Jesús li'.
14Ca'yu mil tya'a ngu' qui'yu ti ndi'i̱ ngu' bi'. Li' nchcui' Jesús lo'o nu ngu' nu ndyaca tsa'a̱ ji'i̱:
―Chcui' ma̱ lo'o ngu' jua cha' tyaca'a̱ ngu' lo yuu cuentya qui'i ti, tu'ba tyii tya'a ngu' sca qui'i ―nacui̱ yu ji'i̱ ngu'.
15Lo'o jua'a̱ ngua'ni nu tii tyucuaa tya'a ngu' lo'o nu ngu' quiña'a bi', hora ti ndyaca'a̱ ngu'. 16Li' ndaya' Jesús ji'i̱ nu ca'yu tya'a xlyá teje' lo'o ji'i̱ nu tucua tya'a cualya bi'. Nde cua̱ nguxña'a̱ yu cha' ndya xlya'be ji'i̱ ycui' Ndyosi xqui'ya scuaa bi'. Li' ngusa'be yu scuaa bi', cuati nda yu yu'be bi' ji'i̱ ngu' tya'a ndya'a̱ yu cha' tacha ngu' ji'i̱ ngu' quiña'a̱ bi'. 17Lcaa ngu' ndyacu ngu' scuaa bi' li', nguaala' ji'i̱ lcaa ngu'. Ca tiya' la ngutsa'á̱ tii tyucuaa tya'a chcubi ntsu'u yu'be xlyá lo'o cualya nu ndyanu, la cui' tya'a na nu ndyacu ngu' bi'.
Ndacha' liñi Pedro cha' ycui' nu Cristo laca Jesús
18Ngua sca tsa̱ ndi'i̱ Jesús ycui' ti nchcui' yu lo'o ycui' Ndyosi. Li' lijya̱ ngu' nu ndyaca tsa'a̱ ji'i̱ ca slo yu. Nchcuane Jesús ji'i̱ ngu' bi' li':
―¿Tilaca ta laca na' nacui̱ ngu'? ―nacui̱ Jesús ji'i̱ ngu' bi'.
19―Ntsu'u ngu' nu nchcui' cha' jyo'o Juan nu ntyucuatya ji'i̱ ngu' tya tsubi' la laca nu'u̱ ―nacui̱ ngu' ji'i̱―, lo'o jua'a̱ ntsu'u ngu' nu nchcui' cha' jyo'o Elías laca nu'u̱, jua'a̱ ntsu'u xi xa' la ngu' nu nchcui' cha' nu'u̱ laca sca jyo'o cusu' nu ngua tu'ba ji'i̱ ycui' Ndyosi sa'ni la; cua sa'ni tsa ngujuii ñati̱ bi', pana juani ndyu'ú chaca quiya' nacui̱ ngu' bi'.
20―Cu'ma̱ ni ―nacui̱ Jesús ji'i̱ ngu' bi' li'―, ¿tilaca laca na' nti' cu'ma̱?
Li' nacui̱ Pedro ji'i̱:
―Cristo nu nda ycui' Ndyosi ji'i̱ lijya̱ nde chalyuu, bi' laca nu'u̱ ―nacui̱ Pedro ji'i̱.
Nda Jesús cha' lo'o ngu' cha' cua cajaa ti ycui'
21Lye tsa nchcui' Jesús lo'o nu ngu' nu ndyaca tsa'a̱ ji'i̱ cha' ná cacha' ngu' tsiya' ti ji'i̱ xa' ñati̱ cha' Cristo laca ycui'.
22―Na' nu cua nda Ni 'na lijya̱a̱ cha' caca na' ñati̱ ―nacui̱ Jesús―, nscua cha' lye tsa xcube' ngu' jna'. Lo'o la cui' ti xtyanu ti'i̱ ngu' cusu' jna'; lo'o ngu' nu laca loo, lo'o ngu' mstru cha' jo'ó, xtyanu ti'i̱ ngu' jna'. Nga'a̱ cha' cujuii ngu' 'na; pana lo'o tyu'u scua sna tsa̱, li' tyu'ú na' chaca quiya' ca su ntsiya na' cha' nguatsi' na'.
23Lo'o nteje tacui xi tyempo, li' nchcui' Jesús lo'o lcaa ngu':
―Si ntsu'u cu'ma̱ nu chañi cha' nti' ma̱ tsaa ma̱ lo'o na' ―nacui̱ yu―, nga'a̱ cha' xtyanu ma̱ lcaa cha' nu ntsu'u tsa tyiquee ma̱ ji'i̱, cha' tya'a̱ ma̱ lo'o na' lcaa tsa̱, masi cujuii ñati̱ ji'i̱ ma̱ xqui'ya na'. 24Chcuna' chalyuu ji'i̱ ma̱ si xcui' nclyacua tsa ti' ma̱ ñi'ya̱ caca ji'i̱ ycui' ca ma̱; pana si tyaja'a̱ ma̱ xñi ma̱ cha' jna', masi cujuii ñati̱ ji'i̱ ma̱ xqui'ya na', quije chalyuu ji'i̱ ma̱ ca slo ycui' Ndyosi li'. 25Ná xtyucua tsiya' ti cha' culiya' nu ntsu'u ji'i̱ ma̱, masi tlyu tsa chalyuu caja ji'i̱ ma̱, si xqui'ya cha' bi' chcuna' ma̱ cuentya ji'i̱ ycui' Ndyosi. 26Ca tyuju'u ti' na' nu cua nda Ni 'na lijya̱a̱ cha' caca na' ñati̱ lo'o ña'a̱ na' ji'i̱ ma̱, si cua ngua tyuju'u ti' ma̱ ña'a̱ ma̱ jna', masi ntyuju'u ti' ma̱ ji'i̱ cha' tso'o nu nchcui' ti na'; nu lo'o ca̱a̱ na' chaca quiya' nde loo la cha' caca na' loo ji'i̱ ñati̱, li' ca tyuju'u ti' na' lo'o ña'a̱ na' ji'i̱ ma̱. Ndubi tsa ña'a̱ loo na' caca xqui'ya xee ji'i̱ ycui' Ndyosi Sti na' li'; stu'ba ti ca̱a̱ na' lo'o lcaa xca̱ ji'i̱ ycui' Ni, xca̱ nu lubii tsiya' ti. 27Chañi cha' nu nchcui' na' lo'o ma̱, cha' ntsu'u ngu' nu ndu̱ lo'o na chalyuu re juani, nu tya lyiji cajaa ngu' lo'o ca cuayá' ti' ngu' cha' cua nguxana cha' laca ycui' Ndyosi loo nde chalyuu.
Cua ngutsa'a̱ ña'a̱ tyucui ña'a̱ loo Jesús ndu̱ slo ngu'
28Nu lo'o cua ndu'u scua snu' tsa̱ tya lo'o nchcui' Jesús cha' bi', li' ndyacuí̱ yu sca ca'ya cha' chcui' yu lo'o ycui' Ndyosi; ndyaa lo'o yu ji'i̱ Pedro lo'o Jacobo lo'o Juan. 29Nu lo'o ndu̱ Jesús nchcui' lo'o ycui' Ndyosi Sti yu, li' hora ti ngutsa'a̱ ña'a̱ tyucui ña'a̱ loo Jesús; ñi'ya̱ ña'a̱ sca xee nu ngati̱ tsa, jua'a̱ ngati̱ tsa ña'a̱ ste' yu. 30Li' ndu'u tucua tucua tya'a ngu' qui'yu ca slo Jesús, ndu̱ ti ngu' bi' nchcui' ngu' lo'o Jesús; jyo'o cusu' Moisés lo'o jyo'o cusu' Elías nu nguti'i̱ chalyuu sa'ni ngua ngu' bi'. 31Lo'o jua'a̱ tyucui ña'a̱ su ndu̱ ngu' ntyiji'i̱ sca xee nu lye tsa ña'a̱. Nchcui' ngu' lo'o Jesús ji'i̱ lcaa ña'a̱ cña nu cua nda ycui' Ndyosi Sti yu cha' cua'ni yu nde loo la xi, nu lo'o cajaa yu nde quichi̱ Jerusalén. 32Masi ndyu'u tsa xcalá Pedro lo'o xa' tya'a ndi'i̱ yu ca jua, pana tya tii ngu'; bi' cha' na'a̱ ngu' bi' lcaa cha' tso'o ji'i̱ Jesús, lo'o ji'i̱ tyucuaa ngu' jyo'o nu nga'a̱ slo yu. 33Nu lo'o cua tyaa ti tyucuaa ngu' bi', li' nacui̱ Pedro ji'i̱ Jesús:
―Xu'na ―nacui̱―, tso'o tsa cha' ndi'i̱ ya nde. Cuiñá ya sna tya'a chcua'ya: tsaca laca su tyi'i̱ ycui' nu'u̱, chaca su tyi'i̱ La Moisés, lo'o chaca su tyi'i̱ La Elías ―nacui̱.
Pana nu Pedro bi' ni, ná ngua cuayá' ti' yu ñi'ya̱ ndyu'u cha' nu nchcui' ycui' ca yu. 34Tya nchcui' yu, lo'o li' ñaa sca coo nu ngüixi̱i̱ hichu̱' ngu'. Lye tsa ndyutsi̱i̱ ngu' su ntsu'u ngu' ne' coo bi', cha' lye tsa ña'a̱ coo bi'. 35Li' nguañi xtyi'i sca ñati̱, pana hora ti ngua cuayá' ti' ngu' cha' nchcui' ycui' Ndyosi laja coo bi'.
―La cui' yu re laca Sñi' na'; tyaca'a tsa yu 'na ―nacui̱ Ni―. Cua'a̱ jyaca̱ ma̱ ji'i̱ cha' nu chcui' yu re lo'o ma̱ ―nacui̱ Ni.
36Lo'o cua ndyuna ngu' ña'a̱ cha' nu nchcui' ycui' Ndyosi ji'i̱ Jesús, li' na'a̱ ngu' cha' sca ti Jesús ndu̱ bi'. Cuaana tya ndyaa ti'i̱ ngu'; ni sca cha' nga'aa nchcui' ngu' lo'o xa' ñati̱, ñi'ya̱ ngua cha' nu na'a̱ ngu' sii' ca'ya bi'.
Ngua'ni Jesús jo'o ji'i̱ sca yu cuañi' nu ngusñi cui'i̱ cuxi ji'i̱
37Ca chaca tsa̱ nu lo'o ngua'ya ngu' sii' ca'ya bi', tyu̱u̱ tsa tya'a ngu' ndyaa ngu' ndyacua tya'a ngu' lo'o Jesús. 38Ndi'i̱ sca nu qui'yu laja ñati̱ quiña'a̱ bi' nu cui̱i̱ nchcui' lo'o Jesús:
―Mstru ―nacui̱ yu ji'i̱―, cua'ni cha' tso'o ña'a̱ nu'u̱ xi ji'i̱ sñi' na', cha' sca ti bi' laca sñi' na' nu ntsu'u 'na. 39Ntsu'u tsa̱ nxalú cui'i̱ ji'i̱ yu, ndu'ni bi' cha' cui̱i̱ nxi'ya yu li'; nxasu nu cui'i̱ bi' ji'i̱ yu ña'a̱ cuayá' ndyu'u ngo' tu'ba yu. Cuxi tsa ndu'ni cui'i̱ bi' lo'o yu, cha' ná ntaja'a̱ bi' culaá ji'i̱ yu. 40Bi' cha' lye tsa ndijña na' ji'i̱ nu ngu' nu ndyaca tsa'a̱ jinu'u̱ cha' culo ngu' ji'i̱ cui'i̱ cuxi nu ngusñi ji'i̱ sñi' na', pana ná ngua ji'i̱ ngu' culo ngu' ji'i̱ tsiya' ti.
41Li' nguxacui̱ Jesús cha' ji'i̱ ngu':
―Ná jlya ti' ma̱ 'na tsiya' ti, cu'ma̱ ñati̱ chalyuu ―nacui̱ Jesús―, cha' cuxi tsa cresiya ji'i̱ ma̱. Nga'aa tso'o tyanu na' slo ma̱, nga'aa talo tyiquee na' ji'i̱ ma̱ tsiya' ti ―nacui̱ Jesús ji'i̱ ngu'―. Ca̱a̱ lo'o ji'i̱ sñi' slo na' ―nacui̱ Jesús ji'i̱ sti nu quicha bi' li'.
42Pana nu lo'o ñaa nu quicha bi' cacua la, li' nguxlyú cui'i̱ cuxi bi' ji'i̱ yu quicha bi' nde lo yuu, lo'o li' lye tsa nguxalú cui'i̱ ji'i̱ yu. Li' ngulo Jesús cña ji'i̱ cui'i̱ cuxi nu ntsu'u ji'i̱ yu cha' tyu'u bi' tyaa, cua ndyaca tso'o yu quicha bi' li'. Cuati nacui̱ ji'i̱ sti yu cha' ca̱a̱ qui'ya ji'i̱ sñi', lo'o li' ndya Jesús ji'i̱ yu nu ngua quicha bi' ji'i̱ sti yu chaca quiya'. 43Lcaa ngu' ndube tsa ti' ngu' lo'o ña'a̱ ngu' cha' tlyu nu ndyu'ni ycui' Ndyosi.
Xa' nchcui' Jesús lo'o ngu' cha' ntsu'u cha' cajaa ycui'
Lcaa ngu' ndiya tsa ti' ngu' ña'a̱ ngu' cña nu ndyu'ni Jesús. Pana laja lo'o ndube ti' ngu', li' nacui̱ Jesús ji'i̱ nu ngu' nu ndya'a̱ lo'o yu:
44―Cua'a̱ jyaca̱ ma̱ ji'i̱ cha' re, culacua xi ti' ma̱ ji'i̱: Ntsu'u sca ñati̱ nu cujui' cresiya 'na ji'i̱ ngu' tisiya cha' cua'ni cuxi ngu' lo'o na', masi na' nu cua nda Ni 'na lijya̱a̱ cha' caca na' ñati̱ ―nacui̱ Jesús.
45Pana ná nda nu ngu' nu ndyaca tsa'a̱ ji'i̱ yu bi' cuentya, ná ngujui ñi'ya̱ caca ca cuayá' ti' ngu' cha' bi'; jua'a̱ ntsi̱i̱ tsa ngu' cha' xcuane ngu' ji'i̱ ycui' Jesús ñi'ya̱ tyu'u cha' nu nchcui' yu lo'o ngu'.
Nchcui' ngu' cha' ndulo la cha' ji'i̱ ycui' ca ngu'
46Lo'o nu ngu' nu ndyaca tsa'a̱ bi' ni, lye tsa nchcui' tube ngu' ñi'ya̱ nu tya'a ngu' laca nu ndulo la cha' ji'i̱. 47Pana Jesús ni, hora ti ngua cuayá' ti' lcaa ña'a̱ cha' nu ntsu'u tyiquee ngu'. Li' ngusñi yu ya' sca nu piti, ngusta yu ji'i̱ nu piti cacua ti slo ycui' yu. 48Li' nchcui' yu lo'o ngu' ndi'ya̱:
―Lo'o xtyucua ma̱ ji'i̱ cua ña'a̱ ca ñati̱ cuentya jna', masi ñati̱ ñi'ya̱ laca nu piti re, la cui' jua'a̱ na nxtyucua ma̱ jna' laca ―nacui̱ Jesús―. Jua'a̱ ngu' nu tucuá cña jna', lo'o cña ji'i̱ ycui' Ndyosi tucuá ngu' bi' li', cha' ycui' Ni laca nu nda jna' lijya̱a̱ ca slo cu'ma̱. La cui' nu piti la ji'i̱ tya'a ma̱, nu ná ndulo cha' ji'i̱ bi' nti' ma̱, bi' laca nu ndulo la cha' ji'i̱ cuentya jna', nti' na'.
Sca ñati̱ nu ná nxu̱u̱ tya'a lo'o na ni, bi' laca nu taca ji'i̱ xtyucua ji'na
49Li' nacui̱ Juan ji'i̱ Jesús:
―Mstru ―nacui̱―, cua na'a̱ ya cha' ndu̱ chaca ñati̱ nu nclyo ji'i̱ cui'i̱ cuxi nu ntsu'u ji'i̱ ñati̱ chacuayá' jinu'u̱, nacui̱ yu. Bi' cha' ngua'a ya ji'i̱ yu bi', cha' nga'aa cua'ni yu jua'a̱, cha' ná lo'o yu bi' ndya'a̱ yu ndyaca tsa'a̱ yu lo'o ya.
50Pana ndi'ya̱ nacui̱ Jesús ji'i̱ li':
―Ná cua'a ma̱ ji'i̱, cha' sca ñati̱ nu ná nxu̱u̱ tya'a lo'o na, ná tyiquee' taca ji'i̱ bi' xtyucua ji'na.
Ngua'a Jesús ji'i̱ Jacobo lo'o ji'i̱ Juan
51Nu lo'o cua tyalaa ti tyempo cha' tyaa Jesús nde cua̱, li' ngüiñi ti' yu cha' tyaa yu nde Jerusalén. 52Nda yu ji'i̱ nu ngu' nu ndyaca tsa'a̱ ji'i̱ yu cha' tsaa ngu' tyucui̱i̱ nde loo la, cha' chcui' ngu' lo'o ngu' quichi̱ sube ti su tyeje tacui yu lo'o ngu'. Li' ndyaa ngu' bi' sca quichi̱ sube ti, sca quichi̱ tyi ngu' Samaria; ngulana ngu' su tyi'i̱ ngu' li'. 53Pana ná ntaja'a̱ ngu' quichi̱ sube bi' ta ngu' chacuayá' cha' tyanu ngu' bi' quichi̱, cha' jlo ti' ngu' quichi̱ bi', cha' nde quichi̱ Jerusalén tsaa ngu'. 54Nu lo'o ndyuna tya'a ndya'a̱ Jesús cha' bi', Jacobo lo'o Juan naa nu ngu' bi', li' nacui̱ ngu' bi' ji'i̱ Jesús:
―Cusu' ―nacui̱ ngu' bi'―, ¿ha ná nti' nu'u̱ cha' jña ya quii' nde cua̱ cha' tyalú nde lo yuu su ndi'i̱ ngu' jua? Cua'ni tye bi' tsiya' ti ji'i̱ ngu' jua, tyaqui̱ ngu'. Jua'a̱ ngua'ni jyo'o cusu' Elías sa'ni ―nacui̱ ngu' ji'i̱ Jesús.
55Li' ña'a̱ tsa Jesús ji'i̱ ngu' bi', nchcui' yu lo'o ngu' bi' li':
―Ná nda ma̱ cuentya tsiya' ti ñi'ya̱ ndyu'u cha' nu nchcui' ma̱ ―nacui̱ Jesús―, si'i Xtyi'i ycui' Ndyosi laca nu ngulu'u ji'i̱ ma̱ cha' chcui' ma̱ cha' cuxi jua'a̱; nu xña'a̱ laca nu ngulu'u ji'i̱ ma̱ cha' chcui' ma̱ jua'a̱. 56Si'i cha' cua'ni tye na' chalyuu ji'i̱ ñati̱ nda ycui' Ndyosi Sti na' 'na lijya̱a̱ cha' caca na' ñati̱; cha' cua'ni lyaá Ni ji'i̱ ñati̱ chalyuu, bi' cña ntsu'u cha' cua'ni na' ―nacui̱ Jesús.
Li' ndu'u ngu' ndyaa ngu' xa' quichi̱ sube ti.
Ñati̱ nu chañi cha' nti' tya'a̱ lo'o Jesús
57To' tyucui̱i̱ su ndyaa ngu' na'a̱ ngu' ji'i̱ sca nu qui'yu.
―Cusu' ―nacui̱ yu―, lo'o na' nti' na' tsa'a̱ lo'o nu'u̱, macala su tsaa nu'u̱ tsa'a na' lo'o nu'u̱.
58Li' nguxacui̱ Jesús cha' ji'i̱ nu qui'yu bi':
―Nu naa cuatya' ni, ne' xtyú ni' ndyu'ú ni'; lo'o nu quiñi sube ni, ne' xlyati̱ ndyu'ú ni'; lo'o na' ni, cua lijya̱ na' chalyuu cha' caca na' ñati̱, pana ná ntsu'u su xtyii na' caja' na', ná ntsu'u su chca'a̱ cña' na'.
59Lo'o li' nacui̱ Jesús ji'i̱ chaca nu qui'yu:
―Ca̱a̱ tya'a̱ nu'u̱ lo'o na' ―nacui̱.
―Cusu' ―nacui̱ yu ji'i̱ Jesús li'―, ta nu'u̱ xi tyempo jna' cha' tyanu na' lo'o sti na' ña'a̱ cuayá' nu cajaa sti na', cha' ña'a̱ na' ji'i̱ tyatsi'.
60Li' nacui̱ Jesús ji'i̱ yu:
―Tya ntsu'u xi xa' la tya'a ñati̱ ma̱ nu taca xatsi' ji'i̱ nu cua ngujuii; pana nu'u̱ ni, ntsu'u cha' tsaa nu'u̱ lo'o na' cha' chcui' nu'u̱ cha' tso'o ji'i̱ ycui' Ndyosi lo'o ñati̱.
61Li' nacui̱ chaca nu qui'yu ji'i̱ Jesús:
―Cusu', lo'o na' nta̱' tsa'a̱ lo'o nu'u̱ ―nacui̱ yu―, pana ta xi tyempo 'na cha' tsa'a na' salya' na' lo'o ngu' toni'i̱ 'na.
62Li' nguxacui̱ Jesús cha' ji'i̱ nu qui'yu bi':
―Sca ñati̱ nu nguxana sca cña ni, ná caca tyu'u scua cña bi' ji'i̱ yu si tya'a̱chu̱' yu ji'i̱; ñi'ya̱ nti' ñati̱ nu nclya'a yuu, ná ca cula'a tso'o yu yuu si ña'a̱ yu nde chu̱' yu; la cui' jua'a̱ lo'o caca ycui' Ndyosi loo ne' cresiya ji'i̱ cu'ma̱ ñati̱ chalyuu ni, ná ta Ni cña cua'ni ma̱ cuentya ji'i̱ ycui' si nti' ma̱ tya'a̱chu̱' ma̱ ji'i̱ Ni.
S'ha seleccionat:
SAN LUCAS 9: cta
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 1981, Wycliffe Bible Translators, Inc. All rights reserved.