SAN MATEO 6
6
Nclyu'u Jesús ji'i̱ ngu' ñi'ya̱ xtyucua ngu' ji'i̱ ñati̱ ti'i
1’Lo'o chaca cha' ni, ná ta ma̱ sca na ji'i̱ ngu' ti'i nu lo'o ña'a̱ xa' ñati̱ ji'i̱ ma̱, cha' ná ña'a̱ ngu' ñi'ya̱ laca cha' tso'o nu ndu'ni ma̱ cuentya ji'i̱ ycui' Ni. Ná taca xco'o ycui' Ndyosi Sti na sca cha' tso'o nu tyacua ji'i̱ ma̱ ca su ntucua ycui' Ni, si cha' ña'a̱ xa' ñati̱ ji'i̱ ma̱ ndyu'ni ma̱ cha' tso'o ti. 2Lo'o xtyucua ma̱ ji'i̱ ngu' ti'i ni, ná ntsu'u cha' cacha' ma̱ cha' bi' ji'i̱ xa' ñati̱. Ná cua'ni ma̱ ñi'ya̱ nu ndu'ni ngu' nu tucua cha' ntsu'u tyiquee ngu', nu nti' tsa cha' ña'a̱ xa' ñati̱ ji'i̱; nu lo'o nxtyucua ngu' bi' ji'i̱ ngu' ti'i, masi ne' laa ji'i̱ ngu' judío tya'a na, masi to' calle ti, sca ti nti' ngu' bi' cha' tso'o tsa chcui' ñati̱ ji'i̱. Ná cua'ni ma̱ jua'a̱. Cha' liñi nchcui' na' lo'o ma̱: lcaa cha' tso'o nu tyacua ji'i̱ ngu' bi' ca slo ycui' Ndyosi nquicha', cua laca ngujui cha' bi' ji'i̱ ngu' bi' nu lo'o cua na'a̱ xa' ñati̱ ti ji'i̱ ngu'. 3Lo'o cu'ma̱ ni, nu lo'o ta ma̱ sca na ji'i̱ ngu' ti'i, ta ma̱ ji'i̱ cuaana ti, cha' ná ca cuayá' ti' xa' la ñati̱; masi tya'a ma̱, ná caca cuayá' ti' ngu' ni cña ndyu'ni ma̱. 4Sca ti ycui' Ndyosi Sti na caca cuayá' ti' Ni ñi'ya̱ laca cha' tso'o nu ndu'ni ma̱ cuaana ti, lo'o li' xco'o Ni cha' tso'o nu tyacua ji'i̱ ma̱ nde loo la.
Nclyu'u Jesús ji'i̱ ngu' ñi'ya̱ chcui' ngu' lo'o ycui' Ndyosi
5’Lo'o chaca cha' ni, lo'o chcui' ma̱ lo'o ycui' Ndyosi, ná cua'ni ma̱ ñi'ya̱ nu ndu'ni ngu' nu tucua cha' ntsu'u tyiquee ngu'. Ndu̱ ngu' cuiñi bi' slo ñati̱ ne' laa ji'i̱ ngu' judío tya'a na, cha' nti' ngu' chcui' ngu' lo'o ycui' Ndyosi laja lo'o ña'a̱ ñati̱ ji'i̱ ngu' bi'; la cui' ti cha' bi' lo'o ndu̱ ngu' laja calle cha' chcui' ngu' lo'o ycui' Ni. Cha' liñi nchcui' na' lo'o ma̱: lcaa cha' tso'o nu tyacua ji'i̱ ngu' bi' ca slo ycui' Ndyosi nquicha', cua laca ngujui cha' bi' ji'i̱ ngu' nu lo'o cua na'a̱ ñati̱ chalyuu ti ji'i̱ ngu'. 6Lo'o cu'ma̱ ni, nu lo'o chcui' ma̱ lo'o ycui' Ndyosi, tsaa ma̱ sca se'i̱ su taca tyi'i̱ ma̱ cuaana ti. Si nga'a̱ ma̱ nde ni'i̱, li' tacu̱' ma̱ toni'i̱, cha' jua'a̱ cua'ni tlyu ma̱ ji'i̱ ycui' Ndyosi Sti na cajua; ndi'i̱ ycui' Ndyosi cacua ti slo ma̱, masi ná nga'a̱ xa' ñati̱ slo ma̱. Sca ti ycui' Ndyosi Sti na nchca cuayá' ti' ñi'ya̱ laca cha' tso'o nu ndu'ni ma̱ cuaana ti, lo'o jua'a̱ xco'o Ni cha' tso'o nu tyacua ji'i̱ ma̱ nde loo la.
7’Nu lo'o chcui' ma̱ lo'o ycui' Ndyosi ni, ná chcui' ma̱ la cui' ti cha' quiña'a̱ tsa quiya', ni ná chcui' ma̱ quiña'a̱ tsa cha' nu ná nchca cuayá' ti' ycui' ca ma̱, ñi'ya̱ nu ndu'ni ngu' nu ná ntsu'u cha' ji'i̱ lo'o ycui' Ndyosi tsiya' ti. Nclacua ti' ngu' bi', cha' tso'o la taquiya' jo'ó ji'i̱ ngu' si quiña'a̱ tsa cha' chcui' ngu', jua'a̱ nti' ngu' bi'. 8Pana, ná chcui' ma̱ jua'a̱, cha' jlo ti' ycui' Ndyosi Sti na cua ña'a̱ ca cha' nu lyiji ji'i̱ ma̱, masi bilya jña ma̱ cha' bi' ji'i̱ Ni. 9Tso'o la si ndi'ya̱ chcui' ma̱ lo'o ycui' Ni lacua:
Ndyosi Sti ya nu ntucua nde cua̱, tacati tsa cha' jinu'u̱.
10Ca̱a̱ nu'u̱ nde chalyuu cha' caca nu'u̱ loo ji'i̱ ya.
Cua'ni nu'u̱ cha' caca lcaa cha' nu nti' nu'u̱ cha' caca nde chalyuu; ñi'ya̱ nu ndu'ni nu'u̱ ca su ntucua nu'u̱, jua'a̱ caca nde lo yuu re li'.
11Ta nu'u̱ na cacu ya tsa̱ juani.
12Lo'o jua'a̱ cui'ya nu'u̱ cha' clyu ti' ji'i̱ ya ji'i̱ lcaa cha' cuxi nu ntsu'u tyiquee ya, cha' jua'a̱ cua ngüi'ya ya cha' clyu ti' ji'i̱ ñati̱ nu ngua'ni cha' cuxi lo'o ya.
13Ná ta nu'u̱ chacuayá' cha' cojolaqui cha' cuxi ji'i̱ ya, pana cua'ni lyaá nu'u̱ ji'i̱ ya ya' nu xña'a̱.
Nu'u̱ laca loo tsiya' ti; lcaa chacuayá' nu ntsu'u nde chalyuu, lo'o jua'a̱ chacuayá' nu ntsu'u nde cua̱, jinu'u̱ ntsu'u lcaa chacuayá' bi'. Ná nga'a̱ cha' tye cha' tlyu tsa laca nu'u̱. Jua'a̱ caca cha' tu'ni.
Jua'a̱ ñacui̱ ma̱ ji'i̱ ycui' Ndyosi.
14’Si cui'ya ma̱ cha' clyu ti' ji'i̱ ngu' nu ngua'ni cha' cuxi lo'o ma̱, li' lo'o Sti na nu ntucua nde cua̱ cui'ya Ni cha' clyu ti' ji'i̱ ma̱; 15pana si ná cui'ya ma̱ cha' clyu ti' ji'i̱ tya'a ñati̱ ma̱, lo'o ycui' Ndyosi Sti na, ná cua'ni clyu ti' Ni ji'i̱ ma̱ ji'i̱ qui'ya nu ntsu'u ji'i̱ ma̱ li'.
Nclyu'u Jesús cha' ji'i̱ tsa̱ nu ná ndacu ngu'
16’Lo'o chaca cha' ni: nu lo'o tyalaa tsa̱ ji'i̱ ma̱ lo'o ná cacu ma̱ xqui'ya cha' cua'ni tlyu ma̱ ji'i̱ ycui' Ni, ná tso'o si tyu'u cha' xñi'i̱ ti' tyiquee ma̱, ñi'ya̱ nu ndu'ni ngu' nu tucua cha' ntsu'u tyiquee ngu'. Nti' ngu' bi' cha' ña'a̱ ñati̱ ji'i̱ cha' tacati tsa nu ndu'ni ycui' ca ngu', cha' ná ndyacu ngu' tsa̱ bi'. Cha' liñi nchcui' na' lo'o ma̱, cha' cua laca ngujui cha' ji'i̱ ngu'; lcaa cha' tso'o nu tyacua ji'i̱ ngu' ca slo ycui' Ndyosi nquicha', cua ngujui cha' bi' ji'i̱ ngu' nu lo'o cua na'a̱ xa' ñati̱ chalyuu ti ji'i̱ ngu'. 17Pana cu'ma̱ ni, lo'o tyalaa sca tsa̱ nu ná cacu ma̱, cha' tso'o la cua'ni tlyu ma̱ ji'i̱ ycui' Ni, li' tso'o la tyaati̱ loo ma̱, jua'a̱ sube' ma̱ chcuu hique ma̱, 18cha' ná caca cuayá' ti' xa' ñati̱ ji'i̱ ma̱ cha' ná ndyacu ma̱ tsa̱ bi'. Sca ti ycui' Ndyosi Sti na nchca cuayá' ti' ñi'ya̱ laca cha' tso'o nu ndu'ni ma̱ cuaana ti. Lo'o li' xco'o Ni cha' tso'o nu tyacua ji'i̱ ma̱ nde loo la.
Cha' tso'o nu tyacua ji'i̱ ngu' ca su ntucua ycui' Ni
19’Lo'o chaca cha' ni: ná xco'o ma̱ quiña'a̱ tsa cha' tso'o cuentya ji'i̱ ycui' ti ma̱ laja lo'o ndi'i̱ ma̱ chalyuu re. Yala ti quiñu'u̱ cha' tso'o bi' jua'a̱ ti; ntsu'u quiya' cacu tiña' ji'i̱, cacu cuixu̱' ji'i̱, cua'ni ñu'u̱ ji'i̱ li'. La cui' jua'a̱ cuaana ngu' ji'i̱ cha' tso'o nu ntsu'u ji'i̱ ma̱, nguna' cha' bi' ji'i̱ ma̱ li'. 20Tso'o la lo'o xco'o ycui' Ni cha' tso'o nu tyacua ji'i̱ ma̱ ca su ntucua ycui' Ni; nga'aa cacu tiña' ji'i̱ cha' tso'o bi', nga'aa quiñu'u̱, lo'o jua'a̱ nga'aa caca cuaana ngu' ji'i̱ cha' tso'o bi'. 21Cha' nu tyaca'a la ji'i̱ ma̱ ni, tyanu cresiya ji'i̱ ma̱ ca su ntsu'u cha' bi', masi sca cha' tso'o nu ndyu'u co'o ji'i̱ ma̱ nde chalyuu, masi cha' tso'o nu cua nchco'o Ni cuentya ji'i̱ ma̱ ca su ntucua ycui' Ni.
Nu laca xee ji'i̱ tyucui ña'a̱ ngu'
22’Nu si'yu cloo na ni, bi' laca nu nda xee ji'i̱ tyucui ña'a̱ na. Nu lo'o tso'o ti si'yu cloo na, li' taca ña'a̱ na cha' cua'ni na lcaa lo cña nu ntsu'u cha' cua'ni na, taca cua'ni na xcui' cha' tso'o. 23Pana si quicha si'yu cloo na, nga'aa caca cua'ni na cña, cha' talya xee ña'a̱ na li'. Lo'o jua'a̱ ne' cresiya ji'i̱ ma̱ ni, si ndyacu̱' xee ji'i̱ ma̱ cha' ntsu'u chalyuu cuxi ji'i̱ ma̱, nga'aa tyu'u xee ne' cresiya ji'i̱ ma̱ tsiya' ti li'; talya tsa tyanu cresiya ji'i̱ ma̱ li'.
Ñi'ya̱ nchcui' ycui' Ndyosi cha' ji'i̱ cñi
24’Ni sca ñati̱ ná taca ji'i̱ ngu' cua'ni ngu' cña ji'i̱ tucua tya'a xu'na ngu' sca tyempo ti. Ná taca taquiya' ma̱ ji'i̱ ycui' Ndyosi la cui' tyempo lo'o lye tsa ndya'a̱ cha' tyiquee ma̱ cha' ji'i̱ cñi. Si jua'a̱ ni, cua ntsu'u tucua tya'a xu'na ma̱ li'. Ná tyiquee' li' ca ti'í ti' ma̱ ji'i̱ tsaca xu'na bi', lo'o jua'a̱ ca tiji̱' ti' ma̱ ji'i̱ chaca xu'na bi'. La cui' jua'a̱ taquiya' tso'o ma̱ ji'i̱ xu'na clyo bi', lo'o jua'a̱ cñilo'o ti ma̱ ji'i̱ chaca bi' li'.
Ña'a̱si̱i̱ tso'o ycui' Ndyosi ji'i̱ sñi' Ni
25’Ndube ti' ycui' Ni ji'i̱ ma̱, bi' cha' ná ntsu'u cha' culacua tsa ti' ma̱ ñi'ya̱ caca cha' cu'ú ma̱, na ca cacu ma̱, na ca co'o ma̱ su ndi'i̱ ma̱ chalyuu. Ná culacua tsa ti' ma̱ ma caja ste' ma̱. Cuayá' tsa cha' na lu'ú ti na juani, masi si'i quiña'a̱ tsa na nu cacu na; cuayá' tsa cha' tso'o ti tyucui ña'a̱ na, masi si'i na tso'o tsa ste' na. 26Culacua xi ti' ma̱ ñi'ya̱ nu ndyaca ji'i̱ quiñi nu ndyacui cua̱: ná ntyaa ni' nscua', ná ndu'ni ni' clacua, ná ndiñá ni' ja'ba su xco'o ni' na cacu ni'; pana ycui' Ndyosi Sti na nu ntucua nde cua̱, nda Ni na cacu ni' jua'a̱ ti. Lo'o cu'ma̱ ni, ¿ha xti la ntsu'u loo ma̱ que quiñi bi' ca slo ycui' Ndyosi? Si'i. Quiña'a̱ la ntsu'u loo ma̱ cuentya ji'i̱ ycui' Ni. 27Pana nga'aa caca caluu la ma̱ sa cla'be metro cua̱ la, masi quiña'a̱ tsa cha' culacua ti' ma̱.
28’Lo'o jua'a̱ cha' ji'i̱ ste' ma̱, ¿ni cha' nclyacua tsa ti' ma̱ ji'i̱ cha' bi'? Culacua xi ti' ma̱ lo'o ña'a̱ ma̱ queé nu ntsu'u lo quixi̱' cua. Tso'o ti nclyuu bi', masi ná ndu'ni bi' cña, masi ná nchca ji'i̱ cuiñá late' cacu'. 29Nu jyo'o Salomón nu ngua rey culiya' tsa cua sa'ni ni, tso'o tsa ña'a̱ ngua ste' jyo'o bi'; pana ná stu'ba ña'a̱ ste' yu lo'o queé cua, cha' tso'o la ña'a̱ queé. 30Ñi'ya̱ lo'o tso'o tsa ngüiñá ycui' Ndyosi ji'i̱ queé cua, cha' nda Ni sca lo ste' bi', masi sca ti tsa̱ talo queé bi' lo'o li' tyaqui̱ ntsu'u quiya'; la cui' jua'a̱ ta ycui' Ni late' cacu' ma̱, masi xti tsa cha' jlya ti' ma̱ ji'i̱ ycui' Ni. 31Bi' cha' ná ntsu'u cha' culacua tsa ti' ma̱ ñi'ya̱ cha' cuxi tyacua ji'i̱ ma̱ ca nde loo la. Ná ñacui̱ lye ma̱: “¿Ma caja na cacu ya?” Ná ñacui̱ ma̱: “¿Ma caja hitya co'o ya?” Ni ná ñacui̱ ma̱: “¿Ma caja ste' ya?” 32Jua'a̱ nclacua ti' ñati̱ nu ná ntsu'u cha' ji'i̱ lo'o ycui' Ndyosi tsiya' ti. Pana jlo ti' ycui' Ndyosi Sti na nu ntucua nde cua̱ cha' lyiji cha' bi' ji'i̱ ma̱, 33bi' cha' si'i ji'i̱ cha' bi' clyana ma̱. Tso'o la si ta ma̱ tyempo ji'i̱ ycui' Ni cha' caca Ni loo ne' cresiya ji'i̱ ma̱, jua'a̱ tso'o la si cua'ni ma̱ lcaa cha' nu nti' ycui' Ni cha' cua'ni ma̱ nde chalyuu; li' ta Ni lcaa na nu lyiji xi ji'i̱ ma̱. 34Lo'o jua'a̱ ná ntsu'u cha' culacua ti' ma̱ cuentya ji'i̱ ñi'ya̱ nu caca ji'i̱ ma̱ tsa̱ quee. Chaca tsa̱ laca bi'. Sca ti ji'i̱ tsa̱ juani culacua xi ti' ma̱ ñi'ya̱ cua'ni ma̱ cha' tyiji̱loo ma̱ ji'i̱ cha' cuxi nu tyacua ji'i̱ ma̱ juani.
S'ha seleccionat:
SAN MATEO 6: cta
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 1981, Wycliffe Bible Translators, Inc. All rights reserved.