Jean 9
9
Jesus mi mal ir sama a vud’um ki dukina
1Kid’a Jesus nga mi kala, mi we sama a vud’um ki dukina. 2Mam suma hata a djobom ala: Ma hat suma, sama le tchod’a ba a vud’um ki dukina ni nge ge? Ni sa máma, d’oze simiyêm suma a vud’uma zu?
3Jesus mi hulong dazi ala: Ni yam tcho mamba d’oze ni yamba hi simiyêmba d’uo mi, wani ni kayam á nde ki sunda hAlonid’a woi abu kamu. 4Kid’a afata nga tua d’a, mbeî ei lei sunda hi mam ma sununïna, kayam andjeged’a nga d’i mba, sa ndak á le sunda kurut ti. 5Kid’a an nga kur duniyad’a tua d’a, an ni b’od’a hi suma kur duniyad’ina.
6Bugol la mi de hina d’a, mi tuvo ayôna kä andaga, mi tib’egem ki lubuna, mi tinimzi iramu, 7mi dum ala: Ang i mbus irang kur gring ma Silowe-na. Ad’ut nala, Suna. Kayam ndata, sama duka i mbus iramu, mi hulongî, nga mi we yina.
8Ndrom suma azina ki suma a wum adjeu ala mam mi sama tchenda na, a dala: Wana ni sama nga kaka kä adjeu á tchendina d’uo zu?
9Suma hiuna a dala: Ni mamu.
Suma hiuna ala: Hawa! Mi hlumî hle.
Wani mam tamba mi dazi ala: Ni anu.
10Kayam ndata, azi djobom ala: Irangî mal lei ni nana ge?
11Mi hulong dazi ala: Sama a yum ala Jesus-na, mi tib’ek lubuna, mi reyêndji iranu, mi dan ala: Ang i kur gring ma Silowe-na, ang mbus irang ngeyo. Kayam ndata, an i ni mbus iranu, ni we yina.
12Azi djobom ala: Sa máma mi nga ni lara ge?
Mi dazi ala: An we nga d’i.
Fariziyêna a djop ma duk ma we yinina
13Azi i ki ma adjeu dukina mi Fariziyêna. 14Kid’a Jesus mi tib’ek lubuna mi malam iram mbeid’a, ni bur ma sabatna. 15Kayam ndata, Fariziyêna a djop sa máma kua ala: Irang mal lei ni nana ge?
Mi dazi ala: Mi tinin lubuna iranu, an mbus iranu, ni we yina.
16Suma hiuna aduk Fariziyêna a dala: Sa máma mi tcholï nga ni gen Alona d’i, kayam mam nga mi ngom bur ma sabatna d’i.
Wani suma hiuna a dala: Ni nana ba, sama tchona ndak á lahle suma simat suma hina na ge? Wala ti tchol adigaziya.
17Kayam ndata, azi djop ma duka kua ala: Kayam mi malang wa irang ngei da’, ang de nana kam nge ge?
Mi dazi ala: Mam mi ma djok vun Alona.
18Juif-fâ a he nga gagazid’a ala mam mi ma duka adjeu ba iram mal lei wana d’i, gak a yi simiyêm suma a vud’uma. 19Juif-fâ a djobozi ala: Wana ni gorogi ma agi ala agi vud’umî ki duka na d’uo zu? Ni nana ba, iram mal lei ge?
20Kayam ndata, simiyêm a hulong dazi ala: Ami wum ala ni goromi ma ami vud’umî ki dukina. 21Wani vama le ba, mam nga mi we yina ki tchetchembina, ami wami nga d’i, ami wami nga sama malam iram mbeina d’uo mi. Agi djobomu, mi ndak sana da’. Mam tamba mba mi dagiya. 22Simiyêm a de hina ni kayamba azi nga le mandara Juif-fâ, kayam Juif-fâ a ndjak vunazi avok ala le sama de woi ala Jesus ni Mesi-yu na ni, a mba digim mbei kur gong mazi d’a toka. 23Ni kayam ndata ba, simiyêm a dala: Mi ndak sana da’, agi djobomu.
24Kayam ndata, Fariziyêna a hulong yi ma duka adjeuna yazi á mbàd’a, a dum ala: Ang de ni zla d’a gagazid’a avok Alona. Ami wami sa máma ni sama tchona.
25Kayam ndata, mi hulong dazi ala: Le sa máma ni sama tchona pî, an we nga d’i. Wani an we va tu, avoka an ni sama duka, wani ki tchetchemba, an nga ni we.
26Kayam ndata, azi djobom ala: Mi langî me ge? Mi malang irang ngei ni nana ge?
27Mi hulong dazi ala: An dagiya wa da’, agi humugi nga d’i. Ni kayam me ba, agi min humugi kua d’ei ge? Agi min mbud’ugi mam suma hata mi zu?
28Azi ngulumu, a dum ala: Angî mam ma hata, wani ami ni suma hata hi Moise-sâ. 29Ami wami ala Alona mi de zlad’a mi Moise. Wani sa máma, ami wami nga yima mi tcholï kuana d’i.
30Mi hulong dazi ala: Wana ni vama atchapma tala agi wagi nga yima mi tcholï kuana d’uo d’a, wani mi malan iran ndeyo. 31Ei wei ala Alona nga mi hum sama tchona d’i. Wani le sama lara pî ma nga mi kud’or Alona nga mi le minda hAlonid’a mi na ni, Alona nga mi humumu. 32Dedei ei humi nga ala sa mi mal ir sama a vud’um ki dukina woyo d’i. 33Ladjï sa máma, mi tcholï ni gen Alona d’uo ni, mi ndak á le va d’i.
34Azi hulong dum ala: Ang ma vud’ung kur tchod’ina, ang ndak á had’ami zu? A digim mbei abu kur gong mazi d’a toka.
Duk ka yam zlad’a hAlonid’a
35Jesus mi hum ala a dik wa ma duka woi abua, mi fumu, mi dum ala: Ang he gagazid’a yam Gor Sana zu?
36Sa máma mi hulong dum ala: Salana, mam mi nge ba, an he gagazid’a kam ge?
37Jesus mi dum ala: Ang wum wa da’. Ma nga mi dang zlad’a wana ni mamu.
38Sa máma mi hulong dum ala: Salana, an hang gagazid’a. Mi grif kä, mi kud’uromu.
39Jesus mi dala: An mba kur duniyad’a ná ka sariyad’a, kayam suma bei wed’a a we, suma wed’a a duk mi.
40Fariziyê suma hiu suma a nga gevema, a hum zla ndata, a djobom ala: Ami ni duka mi zu?
41Jesus mi dazi ala: Ladjï agi ni duka ni, agi nga ki tchod’a d’i. Wani ki tchetchemba agi nga dagi ala: Ami nga wamiya. Kayam ndata, tcho magid’a nga kak kä kagiya.
S'ha seleccionat:
Jean 9: BA
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Azumeina Bible © Alliance Biblique du Tchad, 1999.