Luc 24
24
TCHOLA HI JESUS-D’A KI TAK TA MAMBA
KI HULONG MAM MBA AKULOD’A
(24.1-53)
Jesus mi tchol akulo aduk suma matna
(Gol Mat 28.1-10; Mar 16.1-8; Jn 20.1-10)
1Kur bur dimas ki yorogo tcholola, aropma a mba yam asud’a ki mbul ma his ma afufuî ma azi minima. 2Azi fe ahina d’a ligata woi avun zula. 3Azi kal kua, a fe nga mad’a Salad’a Jesus d’i. 4Ata yima azi nga djib’er yam ahle suma a lenina, suma mbà a buzuk kei irazi ki baru d’a hap pa ngal wiwilika ataziya. 5Aropma a le mandarâ, a tchok yazi kä. Sum ndazina a dazi ala: Ni kayam me ba, agi halagi sama arina aduk suma matna ge? 6Mi nga ka hî d’i, mi tchol wa. Agi djib’eregi yam zla d’a mi dagizi avok kid’a mam nga kur Galile tua d’a. 7Mi dala: Mbeî a mba han an Gor Sana abo suma tchona, a mba b’alan akulo ata aguna, wani an mba ni tchol akulo kur bur ma hindina.
8Aropma a djib’er yam zla d’a Jesus mi dazizi avoka. 9A tcholï yam asud’a, a i avo, a de mi suma hat suma dogo yam tuna ki suma a nga ki sed’ezina ahle suma a lena pet. 10Arop suma a de zla ndata mi suma sundina, ni Marie d’a Makdala-d’a azi ki Jan ki Marie Jacques asum karop suma ding suma a nga ki sed’ezina mi. 11Wani azi gol zla mazid’a ni d’igi zla d’a hawad’a na, a he nga gagazid’a kat ti. 12Wani Pierre mi tchol mi ring mi i yam asud’a, mi hud’o kä, mi gol hur zula, mi we baru d’a a tozom ki d’a nga tchuka kä abo tu. Mi hulong avo hatamu, nga mi le atchap yam ahle suma a lena.
Jesus mi nde tam mbei ir suma hata mbà
(Gol Mar 16.12-13)
13Kur bur máma suma mbà aduk suma hata a i kur azì ma a yum ala Emawus-sâ, dei ki Jerusalem d’igi kilometred’a dogo yam mbà na. 14Azi nga de tazi yam ahle suma a lena pet. 15Ata yima azi nga yo siretna, a nga djop tazina, Jesus tamba mi hut geveziya, nga mi tit ki sed’eziya. 16Azi golomu, wani a we nga d’ala ni mamu d’a d’i. 17Jesus mi djobozi ala: Agi nga tid’igi gak mi agi dagi ni zla me aduk tagi ge?
A tchol hirik, a nga d’us iraziya. 18Ma dingâ tu, simiyêm ala Kleyopas, mi hulong dum ala: Ni ang tu ba, nakoi ma nga kaka avo Jerusalem ma bei wahle suma a le kur bur mámina zu?
19Mi dazi ala: Vama le ni me ge?
A dum ala: Ahle suma a le ki Jesus ma Nazarat-na. Mam mi ma djok vun Alona ma ad’eng ma kur sunda ki zla d’a ded’a avok Alona avok suma pet mi na. 20Wani mei suma nglo suma ngat buzuna azi ki mei suma te yamba a hum abo suma á kam sariya d’a matna kamu, a b’alam akulo ata aguna mi. 21Ni ma ami tinimi hurumi kam ala mba mi sut Israel-lâ na. Wani ini ni bur ma hindi ma ahle ndazina a lena. 22Gagazi, arop suma dingâ adigami a kami hurumi mbina. Ata yima a i yam asud’a yorogo tchololâ, 23a hulongî a dami ala azi fum nga mad’am mbi. A dami ala malaikana a nde tazi iraziya, a dazi ala mi nga karid’a. 24Ndromi suma dingâ a i yam asud’a, a fahlena d’igi aropma a dazi na mi, wani azi wum nga d’i.
25Jesus mi dazi ala: Agi ni suma bei ned’a suma bei he gagazid’a atogo yam ahle suma suma djok vun Alona a dazina. 26Mbeî Mesi mi fe ndaka yam ahle ndazina tua ba, mi kal kur subur mamba d’uo zu? 27Jesus mi tin ad’ud’a kur mbaktumba hi Moise-sa ki d’a hi suma djok vun Alonid’a pet, nga mi vazi ad’ud’a kur mbaktumba hAlonid’a pet yam ahle suma a dazi kama.
28Azi mba go kazì ma azi nga i kuana; mam le d’igi mi kalî avok na. 29Wani azi d’elemu, a dum ala: Ang kak ki sed’emiya, kayam afata ar go á nika, yina kal wa. Mi kal avo á kak ki sed’eziya. 30Kid’a mi kak avun tena ki sed’ezid’a, mi hlavungôna, mi le mersi mAlona kamu, mi mbrugum kä, mi haziziya. 31Ata yi máma, irazi mal leyo, a wumu, wani mi vit iraziya.
32Azi de tazi ala: Kid’a nga mi de zlad’a ki sed’ei kur lovotid’a, ata yima nga mi ve ad’ud’a kur mbaktumba hAlonid’ina, tei lei djivid’a d’uo zu?
33Azi tchol ata yi máma, a hulong Jerusalem, a i fe suma hat suma dogo yam tuna azi ki suma a nga toka ki sed’ezina. 34Suma toka a dazi ala: Gagazi, Salad’a mi tchol akulo, mi nde tam mbei ir Simon. 35Bugola, azi suma mbà ndazina a nde vazi ad’ud’a yam ahle suma a le ki sed’ezi kur lovotina, ni nana ba, azi we Jesus ata yima mi mbruk avungônina ge.
Jesus mi nde tam mbei ir mam suma hata
(Gol Mat 28.16-20; Mar 16.14-18; Jn 20.19-23; Sun SS 1.6-8)
36Kid’a a nga de zla ndata tua d’a, Jesus tamba mi nga tchola adigaziya, mi dazi ala: An gagi depa.
37Wani a nga zlak abo mandarâ, a djib’er ala a we nangusa. 38Mi dazi kua ala: Ni kayam me ba, vunadigagi d’i pat fek ke? Ni kayam me ba, agi djib’eregi kurugi hina ge? 39Agi gologi abon kasenu. Ni an tanda! Agi laman-ngi tanu, agi wagiya, kayam angusa nga ki hliuna kaso’â d’i, d’igi agi wagi an nga ki sed’ezi na.
40Kid’a mi dazi zla ndata dad’a, mi tagizi abom kasemu. 41Ata yima azi nga bei he gagazid’a abo furîd’ina, a le atchap, mi djobozi ala: Agi nga ki vama te ka hî zu? 42Azi hum kuluf ma tchuf ma arâ. 43Mi vumu, mi tum avoroziya.
44Mi dazi kua ala: Wana ni zla d’a an dagizi kid’a an nga ki sed’egi tua d’a. An dagi ala: Mbeî ahlena pet suma a b’irizi kan kur gata hi Moise-sa, kur mbaktumba hi suma djok vun Alonid’a, kur Sawal la Giled’a mi na, a mba ndaga.
45Ata yi máma, mi malazi djib’er mazid’a woi á wäd’u mbaktumba hAlonid’a. 46Mi dazi ala: A b’ir kur mbaktumba hAlonid’a ala: Mesi mba mi fe ndaka, mba mi tchol akulo aduk suma matna kur bur ma hindina. 47A mba tin ad’u tchi wala ki simiyêm yam zla mbut hurâ yam tchod’a á fe hur ma vata ata Alona yam tchod’a navo Jerusalem gak i ata andjaf suma pet. 48Agi ni suma glangâsâ yam ahle ndazina. 49An mba ni sunugi he d’a hawa d’a Abun mi hle vunam kata, wani agi kagagi kur Jerusalem djang gak ad’eng nga akulod’a mba d’i mba kagiya.
Alona mi hle Jesus akulo
(Gol Mar 16.19-20; Sun SS 1.9-11)
50Bugola, Jesus mi i ki sum mama woi bugol azina gak go ki Betani, mi yo abom akulo, mi b’e vunam kaziya. 51Kid’a nga mi b’e vunam kazi tua d’a, mi wal ki sed’eziya, Alona mi hlum sä akulo. 52Azi kud’uromu, a hulong kur Jerusalem ki furî d’a ngola. 53Burâ ki burâ azi nga kur gong nga kud’ora hAlonid’a, a nga gile Alona mi.
S'ha seleccionat:
Luc 24: BA
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Azumeina Bible © Alliance Biblique du Tchad, 1999.