LUKAS 24
24
Rìghèmɓɛ̀n ɗi Yeesus
(Mt. 28:1-10; Mk. 16:1-8; Zŋ. 20:1-10)
1Ŋwosi sɔnɗì sariwa, ɓɛ̀yiɓ ɓɛ kɛngà a zɔ̀ŋ rì mɔ̀ɔ mɛ ɓɛ pegsɛ̀ngà. 2Fɔɔnnɛ ɓɛ tanɛ̀ngà lɛ, gɔ̀g ìnɛ ì ɓaghà ɓi ŋwɔm wu zɔ̀ŋ ì ti m̀ɓiŋziyɛn fìràɓ. 3Nni ɓɛ ɗiŋìghà, wɔ̀lɛ ɓɛ̀ kɛɛ̀ ghɛn kiloŋ ki Kan Yeesus. 4Yɛ̀ɛ ɗyomzɛ̀n ɗi ɓaghà di ɗyaa ɗim ɓɔ, nni ɓum ɓɛdɛŋ ɓɛɓɛɛ̀ ɓɛ resɛ̀ngà ɓɔ, rì ɓìlàà ɓi lònlomɛn. 5Ìris wu ɓan ɓɔ, ɓɛ ruusàg mɛ̀su ɓi zi, wɔ̀lɛ ɓumɓɛ̀n ɓɛ tɔg ɓɔ lɛ: Ɓisuucɛ nnɛ ɓi kaakaa roànɛ à ti cem ɓi nyìinyìm à ɓìloŋ? 6À yin fɛ, àa ghèmɓɛɛ; yitiina yɛ̀ɛ à kpaaghà mìni di à kaka a Galile. 7À kpaakpààghà lɛ, ki ghɛɛ̀sɛɛ lɛ ɓɛɛ fa Man à mum rì ɓɛ̀kìì-kìbe, ɓɛ kpan nyi ɓi kɔrɔs, à ki ghèmɓɛn ɓi ŋwos a kìraa. 8Nni ɓɛ yitìghà min ɓitòkì ɓi Yeesus.
9Fɔɔnnɛ ɓɛ pɛsɛ̀ngà min a zɔ̀ŋ ɓɛ kɛǹ kì kalii ɓiɓan ɓiǹ ɓìcèm rì ɓɛ̀yilàg ǹtɛ̀ɗ rì bog, ɓɛ kpaa girig ɓum ɓɛm̀bog ɓɛ̀sɛ̀ɛ̀ ɓɛ̀cèm. 10Ɓɛ ɓaghà lɛ rì Marii Madelɛn, rì Zyaanɛ rì Marii a jɛɛ Zyag; ɓɛ̀yiɓ ɓɛm̀bog ɓɛ ɓɛ ɓaghà rì ɓɔ, ɓɛ ɓiìtìghà lɔŋ kikpaà ɓɛ̀kɛ̀nì-fìtom com kìfog. 11Wɔ̀lɛ ɓɛ̀kɛ̀nì-fìtom ɓɛ ghɛngà lɛ ɓìɓan ɓiǹ ɓi ri ɓìdìmìdimi ɓi ɓiɓan, fɔɔnnɛ ɓɛ gherɛ̀ngà ɓi com ki ɓɛ̀yiɓ ɓɛǹ ɓɛ kpaaghà ɓɔ. 12Kìɓan kifog Pyɛɛri à pɛ̀sɛ̀ngà, à kɛ̀n a zɔ̀ŋ rì mɛ̀ree, yɛ̀ɛ à tɛkà zɔ̀ŋ ɓi ɗùm, à ghɛn lɔŋ zyònà yi ɓilàà yɔrìyɔ ɓi zi. Fɔɔnnɛ à sugtìghày a mɛɛ di a kuukuùghràg kìɓan ki ki kilɛ̀ngà kiǹ.
Ɓɛ̀yilàg ɓɛ ɓɛ kɛnkɛ̀ngà a Emayus
(Mk. 16:12-13)
13Nni ŋwos àǹcèm ànɛn, ɓɛ̀yilàg ɓɛɗɛŋ ɓɛɓɛɛ̀ ɓɛ kɛnkɛ̀ngà ɓi maa kìlɔ̀ŋ àdɛŋ ɗii lɛ Emayus; maa kìlɔ̀ŋ ànɛ à ɓaghà ɓɛ̀kilòmɛɛ̀tìrɛ̀ ǹtɛ̀ɗ rì bog ɓi rìpɛ̀sɛ̀n a Yorisalɛm. 14Ɓɛ kuùkùrɛ̀ngà ɓi ɓìɓan ɓi ɓi kilɛ̀ngà ɓiǹ. 15Yɛ̀ɛ ɓɛ kɛɛ̀ghkɛ̀ɛ̀ghrɛ̀ngà fɔlɔɔ di ɓɛɛ̀ nyoonyolɛ̀n, nni Yeesus à tyòŋdɛ̀ngà ɓɔ a nyoo, à kɛ̀ɛ̀zɛ̀n rì ɓɔ. 16Kìɓan kifog, mis maa mɛ ɓaghà yɛ̀ɛ mɛ ri rì daa lɛ ɓɛ̀ kɛɛ̀ yiti nyi. 17Nni à tɔkà ɓɔ lɛ: Kìɓan aɗi kɛɛ̀ki ɓi nyoonyolɛ̀n lɛ miì bee bimiɗ? Fɔɔnnɛ ɓɛ̀yilàg ɓɛǹ ɓɛ rɛlìghà, mɛ̀su maa ri bim, 18kìbog ki ɓi ɓɔ ɗii lɛ Kileyopas ki ɓaàg nyi lɛ: Wɔ̀ yɛɛ ri nya kìbog ki mum ki a Yorisalɛm, ki ki yii ɓi kiɓan ki ki nkìlɛɛ wɔɔ ɓi mɛ̀ru mɛ? 19Yeesus à tɔg ɓɔ lɛ: Kìɓan aɗi kɛɛ nkìlɛɛ wɔ̀ɔ̀? Fɔɔnnɛ ɓɛ ɓakà nyi lɛ: Kìɓan ki ki nkìi Yeesus ànɛ a Naazarɛt, ànɛ mɛ̀kìkìì mii rì ɓìtòkì ɓii, ɓi nɗèresii lɛ, à rì kìtèetèɗ ki ǹkpaŋzì-ɓìɓan ɓi mis mɛ Bɛ̀ll rì ɓi mis mɛ kilɔ̀ŋ kìcèm. 20Ɓɛ̀pìrɛɛtìrɛ̀ ɓis ɓɛgwey rì ɓɛ̀làmì ɓis ɓɛ nkàɓi nyi rì gɔmìnà lɛ a reǹ lɛ ɓɛɛ wey nyi, ɓɛ ki kpan nyi ɓi kɔrɔs. 21Ɓìsii nti rì dyàɓɛn lɛ, nnyɛɛ ɓiì ghɛɓsii Isirayɛl; nni rì gɛ ɓìɓan anɛ̀n bimiɗ, ɓɛ̀ŋwos ɓɛɛ ti lɛ ɓɛraa yɛ̀ɛ kìɓan kiǹ ki nkìlɛɛ. 22Nni wɔ̀lɛ ɓɛ̀yiɓ ɓɛdɛŋ ɓɛ ɓi nɗaŋ wis ɓɛɛ ɓùùsii ɓìsi lɛ kɔɔ̀kɔɔ̀; lɛ ɓaa poni a zɔ̀ŋ sariwa lɛ ɓuɓ, 23ɓɛ̀ kɛɛ̀ ghɛn kiloŋ kii ɓi zɔ̀ŋ nni ɓaa yùu ɓìsi kì kpaà lɛ ɓum ɓɛ titom ɓaa rèsɛɛ yì ɓɔ, ɓɛ ki kpaa ɓɔ lɛ, Yeesus à rì cem. 24Ɓum ɓɛdɛŋ ɓɛ tyàa rì rì ɓɔ ɓaa kɛ̀ɛ a zɔ̀ŋ, ɓɛ tanɛ̀n lɛ ki ri yɛ̀ɛ ɓɛ̀yiɓ ɓaa kalii, kìɓan kifog kɛ̀ ɓɛɛ̀ ghɛn Yeesus nyimiɗ. 25Fɔɔnnɛ Yeesus à kpaaghà min ɓɔ lɛ: Mìni ɓum ɓɛ kɛ̀ɛ̀ ɗyomzɛ̀n, ɓɛ mɛ̀rem mɛ ti mɛ̀ kɛɛ̀ fyaŋzi ki gherɛɛ ɓiɓan ɓi ɓɛ̀kpaŋzì-ɓìɓan ɓɛ kpaaghà, 26ɓì yii ɓi lɛ Kiris à ghɛ̀ɛ̀sɛ̀ngà kì woògh mɛ̀tɔɓ fɔlɔɔ ɓi ɗi lɛ a ɗiŋi ɓi rìkem ɗii? 27Nni à konàkà ɓɔ kì rèsii ɓiɓan ɓìcèm ɓi ɓi ɓaghà ɓì kànɛn ɓisu wìì, à tumɛ̀n ɓi ɓɛ̀kaàtà ɓɛ Moyis à kpaŋ ɓi ɓɛ ɓɛkpaŋzì-ɓìɓan ɓɛ̀cèm.
28Yɛ̀ɛ ɓɛ kpagà jàŋbog rì kìlɔ̀ŋ ki ɓɛ̀yilàg ɓɛǹ ɓɛ ɓaghà wɔɔ ɓiì kɛ̀nkɛni, Yeesus à kì lɔŋ yɛ̀ɛ a kɔ̀nkɔn lɛ a kɛɛ̀di beèbɛ̀y. 29Wɔ̀lɛ ɓɛ̀yilàg ɓɛ siìrɛ̀n nyi rìtɔtɔ̀g lɛ: Ti rɔɓ fɛ, ŋwos aa màg ɓilɛ̀y, ìru wu ki yùu kì finì, fɔɔnnɛ à ɗiŋìghà ɓi naa lɛ a kɔri rì ɓɔ. 30Nni yɛ̀ɛ à kɔ̀rìghà ɓi ɓìɗilàg ǹɗaŋ ri ɓɔ, fɔɔnnɛ à tekà bìrɛs, à fa Bɛ̀ll ɓìtògsɛ̀n, à ɓɛg yɔ̀ à fa ɓɔ. 31Fɔlɔɔ nnɛ mis maa mɛ ŋwarɛ̀ngà min, ɓɛ yitì nyi, kìɓan kifog à silìghà ɓɔ ɓi mis. 32Nni ɓɛ̀yilàg ɓɛǹ ɓɛ kpaaghà wɔɔ ɓɔ rì ɓɔ lɛ: Cààmɛ̀n ki àa tòtoogh rì ɓìsi ɓi bee, à tɛɛ̀tɛ̀ɛ̀zì ɓìsi ɓìɓan ɓi ɓi ri ɓì kànɛn, mɛ̀rem mis maa nyɛ̀ŋɗɛɛ ɓi mùm. 33Nni ɓɛ ghaskà kì pɛ̀sɛɛ, ɓɛ sugtì a Yorisalɛm, ɓɛ tanɛ̀n ɓɛ̀yilàg ɓɛ ki ǹtɛ̀ɗ rì bog ɓɛ̀taŋzɛ̀n nɗaŋ ri ɓɛ̀reŋkàŋ ɓaa, 34di ɓɛɛ̀ kpaakpaa lɛ, ki ri lɔŋ saaɗ lɛ Kan àa ghèmɓɛɛ, Simɔn àa ghɛɛ nyì. 35Fɔɔnnɛ ɓɔɔ kpaaghà ɓɔ kìɓan ki kaa kìi ɓɔ ɓi bee inɛ a Emayus, rì yɛ̀ɛ ɓaa rèmii Yeesus di à mɛ ɓɛg bìrɛs.
Yeesus à rèsɛɛ ɓɛ̀yilàg ǹtɛ̀ɗ rì bog
(Mt. 28:16-20; Mk. 16:14-18; Zŋ. 20:19-23)
36Yɛ̀ɛ ɓɛ kpaaghà fɔlɔɔ, nni Yeesus nyimiɗ a ghàskà kì rɛlii ɓi nyìinyìm wàà à kpaa ɓɔ lɛ: Fyòoog a ɓa rì mìni. 37Nni ɓɛ̀yilàg ɓɛ risìghà ɓɛ tumɛ̀n rìnììghnìŋdɛ̀n lɛ ɓɛ fefèkà lɛ ɓɛ ghɛɛ ǹghay. 38Kìɓan kifog Yeesus à tɔkà ɓɔ lɛ: Ɓisuucɛ nnɛ ɓì rì ɓɛ̀ɓùùsɛn, ɓì ki ɓa ti ri nywey ɓi nɗem? 39Ghɛɛna lɛ rì ɓyàg ɓyɛm̀, rì mɛ̀kòò mɛm̀, mɛ̀ɛmiɗ yɛɛ ri lɛ, kòmina min mɛ, fɔɔnnɛ ɓi ghɛǹ lɛ, ǹghay waà ɓa ɓi ri nyoo, nsoò ɓìwoɓ fɛlɛ yɛ̀ɛ mɛ̀ ǹɗì rì ɓyɔ lɔŋ yɛ̀ɛ ɓi seesèè. 40Nni yɛ̀ɛ Yeesus à kpaaghà fɔlɔɔ, nni à rèsìghà ɓɔ lɛ rì ɓyàg ɓii rì mɛ̀kòò mii. 41Yɛ̀ɛ ɓɛ ɓaghà di ɓɛ ka gherɛn ɓi, kìɓan kifog ɓɛ wowòg kìnyàà, ɓɛ ki kuurag lɛɛ̀gwey, Yeesus à tɔkà ɓɔ lɛ: Ɓì yin fɛ rì com ki ɗiyɛn? 42Nni ɓɛ faghà nyi kìden ki kizɛn ki tɔ̀nɛn. 43Yeesus à teɗ kìzɛn kìn à ɗi kɔ ɓi mis maa.
44Nni à kpaaghà ɓɔ lɛ: Ɓì ghɛɛ kìɓan ki ǹkpaaghà mìni di ǹkaka rì mìni lɛ: Ki ghɛɛ̀sɛɛ lɛ ɓìɓan ɓìcèm ɓi ɓi ri ɓì kànɛn ɓisu wɛ̀m ɓi ɓɛ̀kaàtà ɓɛ Moyis rì ɓɛ ɓɛkpaŋzì-ɓìɓan, rì ɓi ɓɛ̀sam ɓyɛɛ kilɛn? 45Fɔɔnnɛ Yeesus à nɛmgà min ɗyomzɛ̀n ɗyaa, lɛ ɓɛɛ wog ɓìɓan ɓi ɓi ri ɓì kànɛn ɓi kaàtà à Bɛ̀ll. 46À ki kpaa ɓɔ lɛ: Ki ri kì kànɛn lɛ: Kiris à ghɛ̀ɛ̀sɛɛ kì woògh rìkɛŋ, à ghèmɓɛ̀n a ɓìloŋ ɓi ŋwos a kìraa. 47Fɔlɔɔ nnɛ à tumɛ̀n a Yorisalɛm, à kpaŋ ɓi ɓìlɔ̀ŋ ɓìcèm ɓɛ ri ɓiì kpaakpaa kiɓan ki lɛ ɓum ɓɛɛ lɔɔ̀ghrɛn mɛ̀rem di Bɛ̀ll a cenɛn ɓìɓe ɓyaa ɓi ɗii ɗìì. 48Ɓì rì ɓɛ̀wusìnɛ̀ɗ ɓɛ ɓi kìɓan kiǹ. 49Fɔɔnnɛ ǹɗì ɓiì romìì com ki Tààta wɛ̀m à kàkà, kìɓan kifog ɓì ka ghɛ̀ɛ̀sɛɛ kì rɔ̀ɓi ɓi bàn ìnɛ à kpaŋ yɛ̀ɛ ɓì rì ɓìi terì ìtèɗ wu wu riì aɗyòò.
Yeesus à ɓɔɔgh aɗyòò
(Mk. 16:19-20)
50Yeesus à kɛ̀ngà rì ɓɛ̀yilàg jàŋbog rì Bɛtanii, à nàm ɓyàg, à màŋ ɓɔ. 51Nni cààmɛ̀n ki à màŋmàŋgà ɓɔ kìn, kɛɛ̀ki à ghasɛ̀ngà rì ɓɔ, à ɓɔg aɗyòò. 52Ɓɛ̀yilàg ɓɛ ɓaghà ɓɛ mɛ kemzi nyi, fɔɔnnɛ ɓɛ sugtìghà a Yorisalɛm di ɓɛɛ̀ wowog kinyàà lɛɛ̀gwey. 53Ɓɛ ɓaghà lɔŋ ɓi naà-Bɛ̀ll ɓyààmɛ̀n ɓìcèm, ɓɛ fafà Bɛ̀ll rìkem.
S'ha seleccionat:
LUKAS 24: BAFNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bafia Nouveau Testament © Bible Society of Cameroon, 2019.