MATYOO 5
5
Yeesus à kpaa ɓìɓan ɓi Bɛ̀ll ɓi dòn aɗyoo
(Lk. 6:20-26)
1Yɛ̀ɛ Yeesus à ghɛngà ɓìtuu ɓi ɓum ɓìn, nni à ɓɔkà ɓi dòn aɗyoo à kɔ̀rì ɓi zi, ɓɛ̀yilàg ɓii ɓɛ tyɛɛ̀tɛ̀n nyi a nyòò. 2Fɔɔnnɛ à tumɛ̀ngà ɓɔ rìrèsàg à kpaa lɛ:
3Mààgh rì ɓumɓɛ ɓɛ yii lɛ ɓɛ ri nyìighnyìg, ɓi mɛ̀ghay maa ɓisuulɛ kìlɔ̀ŋ ki aɗyoo ki ri ɓisu wàà.
4Mààgh rì ɓumɓɛ ɓɛ ri rì misì ɓi mɛ̀tam, lɛ Bɛ̀ll à ri fɔɔsi ɓɔ mɛ̀rem.
5Mààgh rì ɓumɓɛ ɓɛ ri mɛ̀rem lɛ fyòoog, lɛ zi ì ri wooghrɛn ri ɓɔ.
6Mààgh rì ɓumɓɛ ɓɛ ri rì coo zày lɛ, di saaɗ áa ɓaa, lɛ ɓɛ ɓiì wurii.
7Mààgh rì ɓumɓɛ ɓɛ ti ɓɛ wokì ɓɛ̀ro ɓɛmbog nyìighnyìg, ɓisuulɛ Bɛ̀ll à ri wog ɓɔ nyìighnyìg.
8Mààgh rì ɓumɓɛ ɓɛ ri mɛ̀rem mɛ̀tɛnɛn, lɛ ɓɛ ri ghɛn Bɛ̀ll.
9Mààgh rì ɓumɓɛ ɓɛɛ̀ kìki lɛ, fyòoog a ɓa ɓi nyìinyìm à ɓum, lɛ ɓɛ ri reŋi ɓɔ lɛ ɓɔn ɓɛ Bɛ̀ll.
10Mààgh rì ɓɛ̀roɓɛ ɓɛɛ̀ tuutulɛ̀n rì mɛ̀tɔɓ ɓisuu saaɗ, à rìren ɗi ɓiɓan, ɓisuulɛ kìlɔ̀ŋ ki aɗyoo ki ri ɓìsu wàà.
11Yiina lɛ, ɓì rì rì ɓɛ̀mààgh di ɓum ɓɛɛ̀ sɛɛsɛmgì mìni, ɓɛ tɔtɔ̀ɓ mìni, ɓɛ ki renɗen mini ɓìɓan ɓi nyoo zàɓ yi aɗyoo yìcèm ɓìsu wɛ̀m. 12Nyàànyaana, ɓì ki sànsam ɓisuulɛ mɛ̀lèɓ min mɛ aɗyoo mɛ teghɛɛ lɛɛ̀gwey. Fɔlɔɔ nnɛ ɓɛ kighà ɓɛ̀kpaŋzì-ɓìɓan ɓɛ ɓɛ lokà kì yùu rì mìni.
Ɓɛ̀yilàg ɓɛ ri kìkòn, rì kìtɛɛtɛn ki ɓi ziinɛ
(Mk. 9:50; Lk. 14:34-35)
13Mìni yɛɛ rì kìkòn ki ɓi ziinɛ, nni i kìkòn ki mɛ rɔ̀ɓ kɛ̀ kɛɛ̀ yɛ̀ɛ̀ti, cɛ kɛɛ̀ki ɓɛ ɓiì kìi lɛ kɛɛ yɛɛ̀ti? Ki rɔɓi lɔŋ lɛ, ɓɛɛ sòɓ kɔ ɓidan, ɓum ɓɛɛ nyɔɔ̀ kɔ rì mɛ̀kòò. 14Mìni yɛɛ ri kìtɛɛtɛn kì ɓi ziinɛ. Bàn ìnɛ ì rì ǹtoŋɛn ɓi dòn aɗyoo ì yin lɛ, ì nyamzɛ̀n. 15Ɓaà ki ròòsi ɓi lamɓà lɛ ɓɛɛ kuɓsi nyi a kìbɔkɔ̀ zi, wɔ̀lɛ ɓɛɛ̀ rɔ̀ɔ̀sag lamɓà lɛ ɓɛɛ saghi nyi ɓi kìrɛsì ki lamɓà aɗyoo, fɔɔnnɛ à kpeŋzì ɓum ɓɛ̀cèm ɓɛ ɓɛ ri ɓi naa. 16Fɔlɔɔ nnɛ Kìtɛɛtɛn kin ki ghɛɛ̀sɛɛ kì lòmi ɓi nyìinyìm à ɓum ɓi lèg ànɛ lɛ, i ɓɛ ghɛɛ ɓìɓan ɓi syeesyee, ɓi ɓi kìkì ɓɛ kemzì Tààta wìn anɛ à rì ɓi ɗyoo ɓi ɗùm.
Yeesus à rèsaagh ɓìdɔ̀gsɛna ɓi Bɛ̀ll
17Kɛ̀ ɓi fèg lɛ ǹ-yùghà lɛ n-yogsi ɓìdɔ̀gsɛna ɓi Bɛ̀ll, nsoò lɛ, rìrèsàg ɗi ɓɛkpaŋzì-ɓìɓan, ǹ-yùghà ɓi lɛ ǹ-yogsì ɓyɔ, ǹ-yùghà lɔŋ lɛ, ǹɗoòzi ɓìɓan ɓi miì. 18Ǹkalii mìni ɓi saaɗ lɛ, cààmɛ̀n kìcèm ki yɛ̀ɛ ɗyoo rì zi ɓi ri ɓiì ɓaɓaa nsoò maa com àdɛŋ ànɛ ɓi ɓìdɔ̀gsɛna àa pɛ̀sɛn ɓi, à kpaŋ yɛ̀ɛ ɓìɓan ɓìcèm ɓi miì ɓi ri ɓiì kìlɛɛ. 19Nni ŋwaànɛ à ɓiì sɛɛtii kibog ki ɓi ɓìdɔ̀gsɛna ɓi, nsoò lɛ à rèsàg ɓum lɛ ɓɛɛ sɛɛti ɓyɔ, nnyɛɛ ri ɓiì ghɛnɛɛ yɛ̀ɛ maa ŋwaàzɛy ɓi kìlɔ̀ŋ ki aɗyoo, kìɓan kifog roànɛ à ɓiì ɓèŋi ɓidɔ̀gsɛna ɓiǹ, à ki rèsag ɓum ɓɛdɛŋ lɛ ɓɛɛ ɓeŋ̀ ɓyɔ yɛɛ ɓiì ɓaà gìn i mum ɓi kìlɔ̀ŋ ki aɗyoo. 20Lɛ ǹkalii mìni lɛ; I ɓì kìi bi Bɛ̀ll mɛ̀wog a cee lèg ànɛ ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ ti ɓɛ kilàg, ɓyàa ɗiŋi ɓi ɓi kìlɔ̀ŋ ki aɗyoo.
21Ɓi wokà lɛ ɓɛ kpaaghà ɓɛ̀seŋi ɓin ɓɛ ɓɛsɛ̀ɛ̀ lɛ: Kɔ̀ɔ wey mum. Ŋwaànɛ à woli mum, à ghɛ̀ɛ̀sɛɛ lɛ ɓɛ yɔm̀ nyi. 22Kìɓan kifog mɛ̀ ǹkalii mìni lɛ: ŋwaànɛ à rì ɓiì woògh bim ri geni, à ghɛ̀ɛ̀sɛɛ lɛ ɓɛ yɔm̀ nyi. Ŋwaànɛ à sɛmi geni lɛ kìdùŋdùŋ à ghɛ̀ɛ̀sɛɛ lɛ ɓɛ yɔm nyi ɓi sànèdìrɛŋ. Roànɛ à ɓiì reŋii geni lɛ kìyèg, à ghɛ̀ɛ̀sɛɛ kì kɛ̀ɛ ɓi ɗuu ɗi fiɗyàɓ fikɔ̀ɔ̀. 23Nni cààmɛ̀n ki ù kɛ̀ɛ kì ɓɔgsii Bɛ̀ll rì kìtuwe ɓi rìkùna, nnɛ ù yitii lɛ goni àdɛŋ à rì wɔ̀ rì bim, 24ka càra kìtuwe kɔɔ foo ɓi ŋwɔŋì wu rikùna ɓi ka pègsɛn yi kìɓan ki lɛ rì wɔ̀ rì goni, di fɔɔnnɛ u sugtiì min ki faà rìfa ɗyɔɔ. 25Wooghrɛn jɛ̀ɛ̀ lɛ fyɛ̀ɗ ɓɛɛ̀ mum wɔɔ̀ à kìɓan di ɓi kaka ɓi bee ì ɓɛ̀yɔ̀m, kɛ̀ɛ̀ fɔlɔɔ, di à rì wɔ̀ ɓiì faà ɓi ɓyàg ɓi ɓɛyɔ̀mì-ɓum, ɓɛ̀yɔ̀mì-ɓum ɓɛ ghagsì wɔ̀ rì ɓɛ̀sujàà, ù ki ghay lɛ ù ɗiŋii naà-zày. 26Ǹkalii wɔ̀ ɓi saaɗ lɛ, wàa kpaŋ ɓì naà-zày ìnɛn di ɓɛɛ ka tɔtɔg wɔ nsoò siisì bog ànɛ u leɓ.
27Ɓì wokà lɛ ɓɛ kpaaghà lɛ: Kɔ̀ɔ kì fisɔ̀mɔ̀g. 28Kìɓan kifog mɛ̀ ǹkalii mìni lɛ, i mum à fiɓii giɓ à fèg lɛ a kɔrì rì nyi, ŋwàanɛ̀n a yi lɛ à mɛ kì fisɔ̀mɔ̀g rì giɓ anɛ̀n ɓi ǹɗem wii ɓi ɗùm. 29I ɗis ɗyɔɔ ɗi weèlem ɗi ri lɛ ɗi kɛɓtì wɔ̀ fìɓàg, sɔgha ɗyɔ, u mag̀ ɗyɔ fìràɓ; ɓisuulɛ, ki ri kìrɔɔ lɛ u ɗimzi kìkàɓ kɔɔ kifog à cee lɛ wɛ̀ɛmiɗ bimiɗ u kɛǹ ɓi ɗuu. 30I càg kɔɔ ki weèlem ki ri lɛ ki kɛɓtì wɔ̀ fìɓàg, rena kɔ u mag̀ kɔ fìràɓ; lɛ ki ri kìrɔɔ lɛ u ɗimzi kìkàɓ kɔɔ kifog à cee lɛ wɛ̀ɛmiɗ bimiɗ u kɛǹ ɓi ɗuu.
31Ɓɛ kpaaghà lɛ: I mum à nàɓi giɓ wiì à ghɛ̀ɛ̀sɛɛ nyi kì faà kaàtà ànɛ à rèsii lɛ ɓɛ mɛ ghasɛ̀n. 32Kìɓan kifog mɛ̀ ǹkalii mìni lɛ; ŋwaànɛ à ɓiì nàɓi giɓ wiì, di ki yin lɛ giɓ anɛ̀n à kìi fìsɔ̀mɔ̀g, di à foŋi nyi ɓi nɗɛli wulɛ, a ghày ǹkìì-tìsɔ̀mɔ̀g, nni ŋwaànɛ à ki wɔli giɓ anɛ ɓɛ naɓi fɔlɔɔ, à kìi girig fìsɔ̀mɔ̀g.
33Ɓì wokà tì lɛ ɓɛ kalìghà ɓɛ̀seŋi ɓis ɓɛ ɓɛsɛ̀ɛ̀mɛn lɛ: Kɔ̀ɔ kànɛn bɛ̀ɗ yi kɛ̀ɛ̀ ìsu, kìɓan kifog, ù ghɛ̀ɛ̀sɛɛ kì roozii ɓìɓan ɓi ù kàagh Kan ù kànɛ̀n bɛ̀ɗ lɛ ù ɓiì kìi. 34Kìɓan kifog mɛ̀ ǹkalii mìni lɛ; kɛ̀ ɓi kànag gi bɛ̀ɗ, nsoò rì ɗyoo ɓisuulɛ wɔɔnnɛ Bɛ̀ll à kɔ̀kɔrii, 35nsoò rì zi lɛ miì nnɛ à rɛrɛsii mɛ̀kòò mii, nsoò rì Yorisalɛm, lɛ nnyɛɛ ri bàn ì rìfòm ɗigwey. 36Kɔ̀ɔ ki kànɛn girig bɛ̀ɗ ri ǹto wɔɔ ɓisuulɛ ù yin lɛ ù puɓsì nsoò lɛ ù fiìzì fyòŋ nsoò fìfog. 37Ki ghɛɛ̀sɛɛ lɛ, i ɓì kpaa lɛ, ɛ̀ɛ̀ ki ɓa lɛ ɛ̀ɛ̀, i ɓì kpaa lɛ àg, ki ɓa loŋ lɛ àg, lɛ jɛ̀ɛ̀ yimbog yi yi ɓiì wòŋwoŋi ti foo, yi riì yɛ̀ɛ Satàn.
38Ɓì wokà lɛ ɓɛ kpaaghà lɛ: I ù tùsi mum ɗis ɓɛ tus girig wɔ̀ ɗis; i ù ɓɛɛgh mum ɗin, ɓɛ ɓɛg girig wɔ̀ ɗin. 39Kìɓan kìfog mɛ̀ ǹkalii mìni lɛ, kɛ̀ ɓi pɛ̀ɛ̀zi mum kìɓe ki à kìi mìni; ì ŋwaà ɓoogh wɔ̀ rìɓɛn ɓi rìtam ɗi weèlem, lɛgsi tì nyi ɗimbog lɛ a ɓog miì. 40I ŋwaà sɔmɛɛ wɔ̀ lɛ a ɓatɛn bùɓi yɔ̀ɔ̀, càra nyi a teɗ lɛ ɗì rìga wɔ̀ɔ̀ miì. 41I ŋwaàdɛŋ à kàŋi wɔ̀ lɛ ù kɛɛghi kilòmɛɛ̀tìrɛ̀ bog rì ǹtɛ̀g, kìya ɓɛ̀kilòmɛɛ̀tɛ̀rɛ̀ ɓɛɓɛɛ̀ rì ǹtɛ̀g wiǹ ɓɛɛ̀ nyi. 42I ŋwaà lɔni wɔ̀ com, faa nyi kɔ̀; kɔ̀ɔ ki yem mum ɓɔ̀ra di à tɔɔgh wɔ̀ ɓɔ̀ra.
43Ɓi wokà lɛ ɓɛ kpaaghà lɛ: Keesi ŋwaànɛ à wubsɛɛ wɔ̀, ù ɓèèzɛ̀n bènàbena wɔɔ̀. 44Kìɓan kìfog mɛ̀ ǹkalii mìni lɛ, keesiina ɓɛ̀bènàbena ɓin, ɓì màŋ ɓumɓɛ ɓɛɛ̀ cɛ̀ncɛm mini, ɓɛ̀roɓɛ ɓɛɛ̀ ɓèeɓeèzɛ̀n mìni, ɓì kì ɓɔ kìrɔɔ, ɓì ki ɓɔ̀ŋzag Bɛ̀ll ɓisuu ɓumɓɛ ɓɛɛ̀ yeeyeèsì mìni, ɓɛ tɔtɔ̀ɓ mìni, 45di fɔlɔɔ nnɛ ɓi ɓa ɓɔn ɓɛ Seŋi wìn anɛ à rì ɓi ɗyoo ɓì ɗùm, lɛ nyii ti à lòmzàg ŋwos wii ɓisuu ɓiɓeɓtàg ɓi ɓum, rì ɓisuu ɓum ɓɛ syeesyee, à ki nɔsag ti bwey ɓisuu ɓumɓɛ ɓɛ ri lɛ saaɗ, rì ɓisuu ɓɛroɓɛ ɓɛ ri ɓìtɛ̀ŋtɛ̀ŋ. 46I ɓumɓɛ ɓɛɛ̀ keesag mini ɓɛɛ̀ɓɛ ɓì keesii ɓɔrìɓɔ, mɛ̀lèɓ aɗi mɛɛ̀mɛ ɓì rì lɛ ɓì ɓoŋɓòŋ yɛ̀ɛ Bɛ̀ll? Nsoò ɓɛ̀terì-làmpoŋ̀ ɓɛ ti ɓɛ kilàg girig fɔlɔɔ. 47I ɓɛ̀geni ɓin ɓɔrìɓɔ ɓɛɛ̀ɓɛ ɓì ti ɓì tògsàg, di ɓi ka ki bi kiɓan ki nyɔ̀n; lɛ nsoò ɓumɓɛ ɓɛ gherɛɛ ɓi Bɛ̀ll, ɓɛ ti ɓɛ kilàg girig fɔlɔɔ. 48Ɓaana min ɓɛsyeesyee ɓɛ ɓum lɛ kɔɔ̀kɔɔ̀ lɔŋ yɛ̀ɛ Tààta wìn anɛ à rì aɗyoo nyii ri.
S'ha seleccionat:
MATYOO 5: BAFNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bafia Nouveau Testament © Bible Society of Cameroon, 2019.